مهدي الحبابي
سلام تسليمةِِ من شاعر مـا يبـور
لاهل الوفاء والرجال تقوم بسلومهـا
حبيت اشارك معاكم بالفرح والسرور
واعطي الرجال العلوم وباخذ اعلومها
الطائر المهاجر
يا مرحبا بك عداد الورد واغلى الزهور
منك الشهامه تعلـم جاهـل رسومهـا
مادام طبيت فارفـق وانتظـر للبخـور
عطـر الفطاحل قـدومك وانت قيدومهـا
مهدي الحبابي
دام البقاء يا المرحب وانت وافي الشبور
حـي الله قايـد مسيرتنـا و زيزومهـا
انا حضرت ولقيت المنتدى يشـع نـور
ونور الفطاحل يعرف الناس وعزومهـا
الطائر المهاجر
كل الفطاحل رجال ولا بهم من قصـور
والحر يلفي على الاحرار مـن يومهـا
وعلم وصلني ترى مهدي عميق البحور
ونا بحوري ضحـال وجاهـل عومهـا
مهدي الحبابي
كل الفـطـاحـل لنا عـزوه وانـت مـخبـور
والـكـفـو مـثـلـــك هـو الـحـاكــم لمـحـكـومهـا
والعـلـم عــندي وعــنـدك والليـالي تـدور
ومـن يـعـرف اصدورهـا ما يجهـل اقــدومـهـا
الطاير المهاجر
دوري مثل من بنى له بيت وسط القصور
وقال ارحبوا والرجال بطيّـب وسومهـا
اتموا اللي نقص بالفعل حتـى الجسـور
راحت شمال وجنـوب وبانـت حلومهـا
مهدي الحبابي
قصرك مـكانـه مـشيـد فـيـه عـشريـن دور
واظــنـهـا اكـثـر من اللي قـلت بأرقـومـهـا
ما جـا قصـورِِ عــساك اتـدوم بـأيـة أمـور
راحـت شـرق غـرب بس نـجـدد وســومـهـا