للـــــتــــــــواصــــــل
قم يامسلَمَ شب ضو المحاطيب = ووقد حطبها لين أشوف شعمانه
وإن ولعت ياتي لهبها شلاهيب = تشدي خفوقاً يلتهب بضلعانه
سمراً يسامر علتاً بالمحاديب = ضواً شرح صدر الذي في وزانه
إحمس لها بناً يماني لنا جيب = وأحرص عليه من النيا وحرقانه
ودقه بنجراً فيه من عوية الذيب = ويهيض المشتاق صوت صدحانه
وعلى دلالاً فيها مي السحاحيب = خله يفوح لين أنسام ريحانه
ثم زله بدلالاً تشدي رعابيب = بين مسماره وهيل وزعفرانه
إحرص عليه وخل شغلك بترتيب = حتى لاجا فنجال سد ضرمانه
خله فنجالاً على كيف شريب = حيثك عزيزاً بالخفا والبيانه
فنجال للمهموم كيف وتطابيب = يداوي جرحاً بالضمير نزفانه
وسهيل بان مع النجوم المناصيب = يداقش الجوزا والجدي سطعانه
والوسم باقيله ليالاً حواسيب = والقيض زل وراح وقته ووانه
يالله يامجري سحاباً كواعيب = تسوقه بعطفك لنا وأمتنانه
سحاب متزابر متراكم مكابيب = دفعه الغرب والشرقي ردع جفلانه
سحاباً أحليبه جيش الزير وكليب = يسوقه الغربي لحد حدرانه
تسقي الفجوج المدهره والمجاديب = حتى نشوف البيد خضراً جنانه
ويستبشروا بدواً لسحبه مجاذيب = أهل الشرف وأهل النقا والأمانه
تفرح ليا شافت ضيوفاً مقاطيب = ودخيلهم يطير عنه خوفانه
يمشون بشفوف طوال الغواريب = لحدود مصلاحاً كثير فقدانه
تقفوا ضعنهم على شمخ النيب = تشفق على علوم وطربانه
يعشب ثراهم بالزهور المراطيب = وتلقى الزبيدي طالعاً من مكانه
وقلبي إللي معهم فاقدله ذهيب = أقفت علومه مع طرايف زمانه
إللي عليه يسرب الشوف تسريب = وأخايله مابين عانه وعانه
لاشفت زوله قمت أزف التراحيب = من لهفة المشتاق ومن عنفوانه
يامرحبا عد الدموع المساكيب = وعداد مانجماً بالأرض هويانه
وعداد ماهلت مزونأ مصابيب = وعداد ماترعد ويلوح برقانه
وعداد مافيض من الوادي شعيب = وعداد ماطيراً سجع بسجعانه
فيه وفطاريه وألا المناديب = إللي يحفظون الغلا والأمانه
شوفه يزيل الهم ويا المتاعيب = هو راحتي هو الخفوق وكيانه
ياعين منهو هاوياً بالمخاليب = ياجامعاً بين القسا والليانه
وإن لاحظ بطرفه لاودي ولاجيب = وموتي دنا من نظرته وغضيانه
وخدود ورود والعود بتقاليب = ونهود تفاحاً زانلك قطفانه
وجديل لونه مثل لون الغياهيب = والخشم سلة سيف رهفاً سنانه
وكفوف بالحنا نقوشاً مخاضيب = ومبسمه كما الياقوت بثمانه
وأنفاسه العطره أطيب من الطيب = والعنق عنق ظبي بصدته ولفتانه
والصوت له عندي أنغام وتطاريب = وأجاوبه ياعين ياليل دانه
هو قايد خشوف البني الغراشيب = أما بعينه وألا بشارة بنانه
الحب يعطى واحداً مثله أديب = إللي بشرواهم جميل وتكانه
أنا بدونه واحداً ماله صحيب = يتيم شاف الكره ذاق الخيانه
ومتهم بقتلة واحداً منه قريب = وكلاً يبا فرقاه خوف شبهانه
بري ومسلم أمره لعالم الغيب = لينه صدر حكم القصاص وبيانه
وألا دخيلاً يبي فك المناشيب = زابن على شيخاً يفك الرهانه
ثم صوبوه ومات عند المعازيب = والشيخ فز وقال أنا أخو فلانه
نذراً علي أرد ثاره عن العيب = وألا ترا عارأ وذل وهوانه
في مدرسة بعده طلعنا رواسيب = فوق إمتحانه لايزيد إمتحانه
رماه ماخطاه بلي مصاويب = حتى بالعشق ألحق سنانه عنانه
ياحيرته يادنيته والتشاجيب = لا لا تخلي كل شخصاً وشانه
أطلب عساها ماترد المطاليب = يامنوة الخاطر وشوقه وحنانه
لوشابت القيفان فيهم فلا تشيب = على البحور الزرق دوم سبحانه
عمنا وغصنا له بحوراً وأغابيب = ونجيبله دانه ودانه ودانه
الحب عذب قبلنا عكف أشانيب = بسطوته وبحدته ولطفانه
صفى صافي ولا صفتله مشاريب = يوم مابقى من عشره ألا ثمانه
عذابي لاعديت عال المراقيب = تال العصر والصدر فيه زفرانه
أقنب كما ذيباً قنب بالمقانيب = لجت ضلوعه يوم جر عويانه
حتى سمعه إللي بشرقاً وتغريب = من حر مابه والذي في زمانه
وياحد قلبي حد حرش العراقيب = وياسم حالي سمة العقربانه
ويامل قلباً له جروحاً معاطيب = يصبح ويمسي حسرتاً ونتهانه
ويكفخ كما حراً جويد المقاضيب = وينساقله سوق الرشا بوردانه
ويسلب خفوقي نبا زين الأساليب = إللي لهم في ماقع الفن خانه
وعلى فرقاه تهب سموم اللواهيب = حتى ربيع القلب تم صرماه
ويعقب فراقه عليه عواقيب = شين تشوفه وشي صعب نظرانه
واهمي إللي ساكناً بالمحاديب = ولو هو ينشاف الهم لا قول عانه
لاكن همي واضحاً بالمكاتيب = ويحسبه منهو ضوى شمعدانه
لايشك في حبه ولا يدخله ريب = بنيتله صرحاً وصعب وقعانه
مالي على غيره ملام ومعاتيب = ومالي على غيره حقوق وميانه
ومالي بدونه عشق وألا محابيب = ومالي بدونه سلوتاً ومزحانه
تلعبي أفكاري وهموماً حواريب = إللي ملاعبها لكاعه شطانه
وألا ترا ماني قريب محاضيب = أنا الذي دايم وسيعاَ بطانه
ربعي هل الطولات كسابت الطيب = ريف الضعيف إللي قليلاً عوانه
ماهمهم بالمعركه صقراً وذيب = وأذوادهم ترعى بكل ديدحانه
يحمونها بقحص المهار المهاذيب = ودخيلهم ماذاق هم ومهانه
الحب وقعه مثل وقع المضاريب = ولطف ذعذاع الهوى وطرقانه
في حبه ياما عضيت النواجيب = ومن يقول إن الهوى به هوانه
شوقي دايم عليه جذوره مخاصيب = يومه زرع يشمومه وقحويانه
شاعره عرب مابداخله تعريب = وصحت أبدانه وصحح الله لسانه
وسلامتكم