صباح/مساء الورد عليكم جميعا
المجلس اللي مايجيه المسايير=مافيه فود ولويكلف ملايين
والمجلس اللي مدهل"ن" للمناعير=يسوى ذهب لوهو من القش والطين
يلقى به الطرقي وجيه"ن" مسافير=هذا يرحب به وذا حطه يمين
ويدار فيه الكيف صفر"ن" مباهير=تجلي عماس الراس والخطر يزين
ويسج عن همه كثير التفاكير=اللي تخلى عنه حتى القريبين
ماهو بمجلس مدمنين المحاذير=ناس"ن" يخالفهم هل العرف والدين
لاجيتهم مثل الشبا والسواطير=وما يقطعون إلا بلحم المقفين
واطلقهم اللي يفتل الراي ويشير=هامور في سوق الربا والمرابين
ماهمهم ياكود جمع الدنايير=ولايردون النظر فالمساكين
اموالهم لوهي توازي قناطير=وقت النوايب ماحد"ن" منهم يبين
ياجعلهم يفدون ذخر المعاسير=اللي يخاوونك على العسر واللين