ياصاحبي بعض الهدايـا رزايـا
نقص ٍ علي اللي ينتظرها واهلها
مثل المصير اللي جميع الحوايـا
تسوق فيه من الذبيحـه وسلهـا
مافيـه خيـر ولا يعشـي قوايـا
مـن ذاق لقمـه قافيتهـا تفلهـا
والهرج مايملا اليديـن الخلايـا
اليا زاد غيـم فالكبـود ودبلهـا
لين انها تاصل حـدود القصايـا
مع دمها ومجراه يجـري زعلهـا
مار الكلام اللـي يكـف الحكايـا
من ضامري غش السوالف غسلها
قل لليدين اللـي عليهـا كوايـا
ارزاق خلق الله تـرى الله كفلهـا
اللي مخازن بـاب جـوده ملايـا
لاتحسبـون انـه عليكـم تكلهـا
الا انهـا تخفـى عليـه الخفايـا
ليا من عقـال السوالـف عقلهـا
اللي ورث حاتم بزيـن السجايـا
اليا تراكا .. والشـوارب فتلهـا
حضر لك الغايب وسوى سوايـا
مع كل مجـدال ٍ ذلولـه جدلهـا
وان طال عمره ناوي ٍ له نوايـا
يبا يشـارك بالنفـوس وبجلهـا
ويبـا يعمـر للحفـاه العـرايـا
بيوت مابجدودهـم مـن نزلهـا
بالهرج .. والا اليا تركنا الحكايا
تقاطعت ذيـك السوالـف اعللها
غيم سماه .. ونشفـن الشفايـا
وارضه عن اللي قال شربت بللها