عشقت القمر حيث القمر ينبعث به نور = واخص الليالي البيض تزهاه ويزهنه
واحب الهوى لاهب من خايع ممطور = وريح النفل حيث النفل طيب الخنه
واحب الجماله والجماله عمل مبروك = واحب الغناه وعز نفسي عن المنه
واحب الصراحه والصراحه بها مسرور = حيث الصراحه تقطع الشك والظنه
واحب الكريم اللي يفرج عن المعسور = اليا من عطى حتى اهله ما دروا عنه
احب الرجال العارفه واكره المغرور = من اغتر في بعض المظاهر يغرنه
سقا الله ليال ماضيه قبل هدم السور = نحفر العدود ونشرب الماء من الشنه
نشوف البنات اليا اوردن كنهم الحور = مهار مشاويلن بالاعياد معتنه
على الماء تشوف بيوتهم كنهن القور = كثير القبايل تقطن العد بالكنه
على البال ذكراها ياليت الليالي دور= ياليت الليالي ماخذنه يجيبنه
تذكرت شيبان لنا يوم حنا بزور = يحثوننا بالطيب والفرض والسنه
لوعاشوا حياة قاسيه في بحر وبرور = عسى الله يعوضهم بمافات بالجنه
لو دورن مضى من بينهم وين ذاك الدور = زمان مضى له ذكريات يحلنه
يوم الذهب مايلبسونه بدون خصور = جمال النسا ماهو من السوق يشرنه
فقدنا حياة البدو مع شوفة المظهور = ولا عاد به بدو ولا الطرش له حنه