[الطائر المهاجر]

بصوت الشاعر عبدالعزيز بن عمّار

الطيب مع من لايقدّر سذاجه= كم واحد من طيبته داسه الناس
وطيبٍ بليّا قياس اكبر سماجه = فوازن امورك كل شيٍ له قياس
ولا شفت منهو يعاملك في هواجه=باسباب طيبك فاقلب الوضع ينحاس
ولا من عرفت اللي قليلٍ يواجه = يضحك بوجهك غير ف الظهر ملاس
فابعده عن دربك بليا لجاجه = مثله حقود وجالب لكل الاتعاس
ولا من ذكرك اللي يدوّر لحاجه= من بعد نسيانك فرده بالافلاس
ولا تنخدع باللي طليقٍ احجاجه= لا من سمعته قلت معدنه الماس
انظر لفعله تكتشف وش خماجه= ترى الحصاني تغيّر لباس بلباس
واحذر من اللي ماثبت في مزاجه = كل يوم والثاني تلاقيه محتاس
عواطفه تحكمه طاير عجاجه = يومٍ يثق بك وآخرٍ فيه اوجاس
ورجل مهفّه ما عرف وش خراجه = ودّك على علباه يكوى بمحماس
تعبت انا والفكر زاد انزعاجه= واعلنت حربي للحصاني والانجاس