ينام من هو مايعرف الهمومي=وعيني اليا نامو حريب لها النوم
الله يلوم اللي لحالي يلومي=لاساهر سهري ولاهوب مهموم
مهوب مثلي يزعجه كل يومي=هميلوج بداخل الصدر مكتوم
لامبديا اسرار قلبي لقومي=واللي بسر الغيب ماهوب مفهوم
اخاف ابوح السر تبدا الثلومي=وتاقف على مكنون سري هل اللوم
عاهدت قلبي مايبوح العلومي=ولايويق بغايته كل مذموم
بالليل اساهر ساريات النجومي=والصبح اعدي بالنبا كل مزموم
اوجس بقلبي مثل حر السمومي=ولاصفا لي خاين الدهر لو يوم
ياسيف قم لعل حظك يقومي=ولعل ابوك بساعة الحشر مرحوم
النار شبه ياقوي العزومي=وهات الدلال وترك النوم لرخوم
خابرك يالطيب ودود رحومي=قم سو مايبعد عنا كل شغموم
فنجال بن مايحضره رخومي=مبهر من بين الاجواد مقسوم
ارواحنا بفلاك الايام تومي=ولو يطول العمر فالاجل محتوم
روحي بيد فارض صلاتي وصومي=اللي بحبل اليسر ينجي لمضيوم
الواحد الي نطلبه كل يومي=منجي ليوسف عقب ماهوب مظلوم
دنيا الشقا ياسيف ماهي تدومي=كم واحد فيها مشيحٍ ومنجوم
وافرح الى قالوتقافت غيومي=على شفا الباطن وهو قبل ماسوم
حيثه مرب لكل وضحا ردومي=اللي بها زود على الطوق برشوم
عسى تعله مرهشات الوسومي=يمطر عليها الوبل يوم بعد يوم
عشبه يغطي نايفات الحزومي=فيه الزهر فوق الزماليق منضوم
مخالف النوار غاد سهومي=والعشب من وبل المراهيش كيهوم
فيه أم سالم من طربها تعومي=تلفح بسمح الريش في كل مرجوم
من الطرب في كل روض تحومي=وتقضي الدنيا زغاريت وسجوم
إن شافت النوار نبته يزومي=ماسايلت عن حال معطا ومحروم