[عبدالرحمن العمري]

بسم الله وحدهـ

السلامُ عليكم و رحمة الله

قصيدهـ ..
أول مرّهـ أحط عنوان مُثير /:
فقط / لـ التجربـه !!
قلت 00

جت على سابق و عَدها تكشف استار الظلام= كنّها تفتح عليّ ابواب عتمة ليلها
من بعيد ارقب خطاها شبر شبر و بالتمام = مشية اللي في قيوده ما حدن مرخي لها
و الله انْ لو في طريقي ندبة ٍ مثل السنام= ما توقعها تعدّى لين يفنى حيلها
ترفع الفستان مرّه و تّعثّر في حطام = و ان نشب تدعي عليّ من القهر و ادعي لها
لين حطت في يميني كفها قبل السلام = و ازفرَت ثمّ استمالت قلت حيّه ميلها
و اضحكت ضحك الذي بعد الخطا حسّ الملام = ما تجاوز ضحكته حدّ الشفا و يزيلها
قالت: اعذرني تعبت من المشي مابي كلام =خلّني لين استريح و طلّعت منديلها
تمسح اطراف الجبين اللي تقل كنّه وسام = مآخذه بالحسن كلّ الاوسمه في جيلها
قمت اداري كفّها بشويش من زود الهيام = خايف اجرح خدّها و آموت في تدليلها
قالت: انت الحين قلّي " اينَ وعدك يا غلام" = خابرتني بالفصيح اليا زعلت احكي لها
قلت: فات العام و اقبل من بعَد هالعام عام = و الذي فات اتركيه " لمزنه و تحليلها"
قالت : آه.. و قلت لا و الله عليّه بالحرام = ما شغلني عنك شيّ الا هموم آشيلها
خفت لآكدّر صفاك و نقلب الدعوه خصام = قلت في نفسي عساني لا هديت آجي لها
ثمْ كتبت اللي قريتي من مواثيق الغرام= و الوعد هذي عيونك جت على وعدي لها
هزّت الراس برضا يفرض عليّ الاحترام= واثقه لكن على طاري الهجر يا ويلها
ثمّ قالت: تستحق الحين و ارخت لي اللثام = بسّ وحده لا تطول و هي تبي تطويلها
قلت: خلّك مثل منتي لا وراء و لا امام = برسمك "صورة فتاةٌ تنتظر تقبيلها"
قالت: انت الحين وين و وين انا يالمُستهام !!=وش بلاك اليوم حتى لهفتي شاقي لها !!
و الله انّ آحس دقّة قلبي بْوسط العظام= و الأماني حدّ عيني جت تركّض خيلها
قلت: زدتيني غرور و شيء من رفع المقام= طوّلي بالك عليّ و مُنيتِك روقي لها
قالت: ايه آنا الضحيّه و انت رايق !! يا سلام = وش بقى من روحي اللي في رياضك سيلها !!
ثمّ حطّت يدّ ترجف فوق يدّ و جت تنام = غمّضت لكن تشوف و قلبها قنديلها
قلت: ياربي عليك الصبر منك الإلتزام = ويش اسوّي بالعنيده كيف لي تعديلها
ما تعرْف اني إلى من قمت كنّ الموت حام = ما قعدت إيلين اوفي قومتي في كيلها
هيه يا بنت العناد يْورّدِك درب الزحام = و انتي اضعف من يزاحم خطوتي و مثيلها
قالت: أسمعْك و كلامي ما بعَدْه أيّة كلام = ليّ عندك بوستين و لا أبي تأجيلها
و الفتوّه و المراجل ما تفيدك في الغرام = ما يفيدك غير كلمه تطرب اسماعي لها
كنّها شقّت لباس الحلم عنّي و المنام = ما صحيت الاّ الوساده تشتكي تقبيلها !!

و سلامتكمـ