أول استـبـداي باسـمـك يـاحـنـون
يـاكـريـم مـــا تـخـالـفـه الـظـنــون
امــرك المحـفـوظ فــي كــاف ونــون
وانـت لـي فـي كــل مـغـواة دلـيـل
هيـج اشواقـي حمـام فـي الغصـون
بـات ساجـع فـي بديـعـات اللـحـون
بـيــن تـغـريـد وتـرجـيـع يــهــون
مادرى اني في الهـوى مثلـه عليـل
ياحـمـام الــدوح هيـجـت الـغــرام
ما سبب نوحك ومالـك مـن مـرام
اعطنـي عهـدك وخـذ منـي ذمـام
بيعني شوقك وخـذ شوقـي بديـل
ان فــي قـلـبـي جـــروح ماتـطـيـب
مـابـدت حـتـى يداويـهـا طـبـيـب
من هواجس جات من فرق الحبيب
بـاح مكنونـي وصبـري مستحـيـل
كلـمـا هــب الصـبـا قلـبـي صـبــا
مـن غـزال فــي الحـمـا فــاق الظـبـا
ظبـي جـازي يرتعـي نـبـت الـربـا
يسلـب العشـاق بالطـرف الكحـيـل
مــال عـنـي بالتجـافـي والـصــدود
مابقـي غـيـر الحسـايـف والـوجـود
كـم رعيـت النجـم والعـالـم رقــود
والمحاجـر دمعـهـا الصـافـي يسـيـل
زارنـي طيفـه كمـا طيـف النسيـم
جــدد الاشــواق والعـهـد القـديـم
وانثنـى فـي داجـي الليـل البهيـم
قلـت زدنـي قـال يكفـيـك القلـيـل
آه مــن هــم شــوى قلـبـي بـنــار
وان طلـبـت الصبرماالقـالـه قــرار
كـيـف ابــا صبروالـحـشـا للهم دار
صـار مالكـنـي وانــا عـنـده نـزيـل
قمـت ممـا حسنـي عـنـد الهـجـوع
يــوم كــل نــام ولـعـت الـشـمـوع
والهواجـس جاتنـي تمشـي جـمـوع
مثـل ورد النحـل فـي وادي طفيـل
أو كمـا سيـل تسايـل مـن مضيـق
يقـلـع الحيـطـان والـسـد الـوثـيـق
يـأخـذ الاشـجــار ويـســد الـطـريـق
زاد عـن حـده وضــاق بــه المسـيـل
طـار نومـي يـوم نامـت كـل عـيـن
بـت ساهـر مـع نـجـوم الفرقـديـن
من هواجس من جفا من جور ديـن
مـا بقـا الا البعـد عنهـا والرحـيـل
صوب ارض الشام أو ارض العـراق
عــل يـــوم فـيــه يـنـحـل الـوثــاق
كـم نقـاسـي والقـسـا مــر الـمـذاق
ربـمـا نلـقـى عــن الـمـنـزل بـديــل
دع بــلاد الــذل وارحــل يالـبـيـب
واغـتـرب فالـكـل بالدنـيـا غـريــب
القضـا مكتـوب والداعـي نصـيـب
اركــب الاخـطـار والـهـول المـهـيـل
وان جفتـك الـدار أو مـال الـزمـان
لاتـعـيــش بــــدار ذل أو هـــــوان
لــو يظـلـي نبتـهـا مــن زعـفــران
صاحـب الاخـطـار واجعلـهـا دلـيـل
شـد عـن ارض الاعــادي والحـسـود
واطـلـب العلـيـا وبـالـغ بالجـهـود
لـو يكـون العـز فــي غــاب الاســود
خيـر مـن دار تعيـش ابـهـا ذلـيـل
كــل مــن رام الـعـلا يـرقــى لـهــا
ســلــم الاخــطــار فــــي اهـوالــهــا
مـــن تـراخــى عـزمـتـه مـانـالـهـا
دونـهــا يـقـصـر الـبــاع الـطـويــل
اقطـع البـيـدا عـلـى عــوج النـضـا
لـو يكـن تمشـي علـى جمـر الغضـا
مــا يـفـوت العـمـر قــدام الـقـضـا
ديـن عنـدك ليـن ياتيـك العمـيـل
عاشـر الاحـرار مــن اهــل الـرتـب
تستفـيـد العـقـل مـنـهـم والادب
حيـث هـم اهـل المـروة والنـسـب
واترك الانـذال مـا منهـم حصيـل
سـل عـن الجـيـران قــدام الـنـزول
وان سمعت النـاس تهـرج لاتقـول
تكتـسـي ثــوب المـعـزة والـقـبـول
والـخـلايـق يـذكـرونـك بالـجـمـيـل
كــم كــلام راح فــي نقـلـه نـفــوس
وانـت ماتاخـذ علـى نقـلـه فـلـوس
لاتفـتـش كــل حــب فـيـه ســـوس
كـم تخـوض النـاس فـي قـال وقيـل
خـذ عزيـز البـز مـن زيـن القمـاش
والـردي لـو كـان يعطونـك بــلاش
ما يفيـدك كيـف تاخـذ شـي مـاش
بيـعـة المغـبـون منـهـا يستـقـيـل
دور الطـيـب لـــو وغـــال الـثـمـن
لو يكـون القصـد فـي صنعـا اليمـن
لا تـغـرك صقـلـة الـوجــه الـحـسـن
ابــذل المـجـهـود بـالـمـال الـجـزيـل
الـذهـب مــا يخلطـونـه بالـنـحـاس
غير بعض النـاس مـا عنـده قيـاس
خـذ نصايـح مـا حواهـا بـو نــواس
مثـل نظـم الـدر واللولـو الأصيـل
وان ملكـت المـال لاتغـدي شـحـوح
اطعـم الجيعـان واكسـي كــل روح
الـدبــش والـمــال لابــــده يــــروح
والثنـا والمـجـد جـيـل بـعـد جـيـل
هم روحـك واغتنـم عصـر الشبـاب
ان لــلأيـــام مـــيـــل وانـــقـــلاب
ونـت فيهـا تنطـوي طـي الكـتـاب
لاتـغـرك صـحـة الـعـمـر الـطـويـل
اتـرك الدنيـا لـيـا جـاتـك ضـحـوك
لا تـغــرك بـالـمـلاعـب والـشـكــوك
كـم غـرر فيهـا وكـم غـرت مـلـوك
ضحكهـا غـرار مـا اسـرع مـا تميـل
والعـدو لا تأمـنـه لــو بـعـد حـيـن
لو حلـف بالبيـت والركـن اليميـن
الحقـد والبـغـض فــي قلـبـه دفـيـن
وان ضحك بالوجـه قلبـه لـك غليـل
خـــل عـنــك الـكـبـر فالله الكـبـيـر
لا تــحــاقــر عـــاجـــز والا فــقــيـــر
واعــلــم ان الأمـــــر لله الـخـبـيــر
يـقـصـم الـجـبـار ويـعــز الـذلـيــل