الشاعر : حمد بن عبدالله بن عبدالعزيز بن محمد بن سلطان المعجل
ولد في الحصون عام 1325وتوفي والده وعمره سنتان تقريباً
درس القرآن على يد الشيخ عبدالله بن محمد بن فهيد وعاش بداية حياته في سدير ثم سافر لطلب العمل في الكويت وعمل في الغوص والتجارة ثم استقر به المقام في الرياض
وهو شاعر متمكن وواضح المعنى وقصائده تحمل طابع الأصالة وله قصائد في جميع مجالات الشعر ولكن للنصيحة والموعظة نصيب كبير من قصائده وكثيراً ما تتضمن قصائده الحث على التمسك بالدين والاستقامة.
يقول رحمه الله :
وقت مضى كنه على خاطري حلم
في نعمة الإسلام مر بسهولـــــــــه
يقول الأول كل ما زم يهضــــــــــم
الكل يرجع في مواقع نزولــــــــــه
في دبرة اللي بالمخاليق يعلــــــــــم
وما داج في وضح النهار وليولــــــه
ربٍ على من تاب يغفر ويرحــــــم
سبحان مفني دولةٍ عقب دولـــــــــه
لا شفت اثار جدودنا صابني هـــــم
ما ودي أشوفه ولا أدوج حولــــــــه
أهل الوفا والطيب والدين وشيـــــم
راحوا وخلَّو حقهم للي هو لـــــــــــه
لاجاهم الجيعان يحشم ويكــــــــرم
يروح مسرور النبا مع ذلولـــــــــــه
هذي سلوم اجدودنا الضيف يحشم
خص الضعيف اللي ذلوله نعولــــه
وحنا بساقتهم عسى الله يرحـــــــــم
الموت حق وكل نفسٍ تنولــــــــــــه
فيما مضى ياطول ما قلت ياعـــــم
واليوم انا اللي صرت عم الحمولـــه
بوصيك يللي بالملازيم تهتـــــــــــم
عليك بالعليا طريق الرجولـــــــــــه
وقتٍ علينا زود الهم بالهـــــــــــــــم
في هالزمان اللي كثير ميولــــــــــه
من طاوع المعبود يسعد ويسلــــــم
يتبع طريق الرب ويتبع رسولـــــــه
وخمس الفرايض لازمَه والشهر صم
من طاعة الله كل خيرٍ تنولــــــــــــه
بوصي عيالي كلهم لايمٍ لـــــــــــــم
الله يقديهم على اللي نقولــــــــــــــــه
من رافق أهل الطيب ما يلحقـــه ذم
ملزوم تأخذ من سجايا فعولـــــــــــه
ومن رافق اللي دون يخسر وينــدم
لابد ما يبلاك شرٍ تنولـــــــــــــــــــه
ولا يغرك سنحة الزول والجـــــرم
ما هيب في جرمه ولا كبر زولــــــه
مثل السراب اللي يغرك إلـــــى زم
يزم لك وهو سريع جفولــــــــــــــه
ولا يغرك من بوجهك تبســــــــــم
حتى تميز غايته ومحصولـــــــــــه
لو شفت وجهه زين فالداخلي ســم
له حِقةٍ للغافلين محبولــــــــــــــــــه
واوصيك ابن عمك إلى جار فاحلم
ادمح له الزلة وكرّم نزولــــــــــــــــه
واوصيك في جارك ترى الجار يكرم
قبل حديكم ترتحل به زمولـــــــــــــه
والوقت لو يسقيك من صافي الجــم
لابد ما تشرب بواقي حثولــــــــــــه
وصلاة ربي عد من حج واحــــرم
على النبي اللي كريمة فعولــــــــــه
*****