القلب يا ابني فهد به دار هاجوس = روابع ٍ بين الرجا له وياسه
في بني ساس ٍ عاد له دثر ورسوس = متهدم ٍ ساسه ومن مر داسه
من مختلف وقت ٍ به العدل منكوس=تشارك الطاهر وراعي النجاسه
والشرك به مكشوف والدين مدسوس=حتى ولو بين سريع ٍ اخلاسه
وفي الناس ناس ٍ عضوا الدين بضروس=وناس ٍ عاونت على هدم ساسه
هذا الذي يذكر بالالواح مدروس=شفناه شوف العين قبل الدراسه
وعادوا لنا الماضين حيين بعكوس=واكبر غلطنا نعتجب في العكاسه
دنياً تقلب كنها ريش طاووس= تمسي وتصبح بين كره ٍ واناسه
وحنا نعرف ان ضد الاقبال بتعوس =واطيب لنا يا ابني فهد الجلاسه
قم قام حظك دك للنار دهلوس=حيث ان شبوب النار يبري الحساسه
واجعل عليها من حطب رمث غاموس =ماهو بدغث اللي وقيده قباسه
واصنع لنا فنجال ماهو بمكبوس=ريحه يفك الصوع عند احتماسه
لا اجتال في محماسه البن محموس=وارتد من عقب الغتار بدهاسه
كبه بضباح ٍ لاطق مرفوس=يقنب قنيب الذيب ولاا الجراسه
واحشه بصفرا كن بها التبر مطلوس=تصفاتها كالورس حل اختراسه
ماها وطبختها مع الهيل مقيوس=وانت البصير بها وراعي البهاسه
بدلال مافيهن مكنسل ومشموس=رسلان مثل موقعات القباسه
منهن منزل ٍ وسطها الكيف مخموس=لا ذاقه المستصاع تبري عماسه
تهيل لمن يردون لاثار عكبوس=لا اختلط عج الرمك واقتباسه
خطلان الايدي مورية كل ناسوس=وسيوف هند يقسمن التراسه
ربعي قصاصيب الفنا كل دابوس=في الضيق لاعيق الطمع والتماسه
قوم ٍ تكافح كل كساب ناموس =وكل ٍ بحوض المدح يشرب بكاسه
والمدح له ني وفقار ٍ ونسنوس =وحزنا سهمنا الجزل ماهو دساسه
الاوله مانمغث الجار بحسوس=والثانيه فينا الكرم والحماسه
واللي تبقى منه بين العرب روس=كل ٍ يحوز من المراجل قياسه
قلته وانا من نازلين الخطر جوس=بيوت ٍ تبنى فيه قبل العساسه
اهل النبا الطيب من دقيانوس=واهل السموت الطيبه والفراسه
هواجر ٍ يدري بنا كل منحوس=لاضده اقوى منه ضد ونحاسه
ونتبع هوى القطعان والضد مكلوس=وما زان من قفر ٍ رعينا مساسه
وحنا لها بالخوف جيران وحروس=جوس ٍ ولا نبغي منه احد ٍ حراسه
وننزل لا من قالوا الحبل ممسوس =في قافر ٍ ماداس به كون حاسه
وحنا لمن في هامته زوم فاعوس=نخلف هقاويه ونكمل عطاسه
ولا ثار عكنان ٍ تقابس به الطوس=وكل ٍ لبس للضرب درع ٍ وطاسه
الله كسانا راية العز ملبوس=سبحان من فصل علينا لباسه
نمسح بالانفس يوم دايس ومديوس=لا صار ميدان ٍ وسيع ٍ مداسه
وتنحي بنا الزلبات في الضيق كردوس=مثل الوحوش اللي هوت بنتكاسه
ونخوض بالميدان لو فات بنفوس=لو صافي الخمسين خمس الخماسه
لعيون من عدل شفاياه بلعوس=غر ٍ خذاله مدة ٍ في عناسه
وان رمانا ضد ٍ غترنا بجاسوس=عود بغبنه بالفشل والتعاسه
وناتيه لو دونه جبال وطعوس=معطان لو بالليل حزة نعاسه
وفينا لمن يصفى لنا لين ملموس=والجفس ماله عندنا الاا الجفاسه
قاسين ماطعنا لحكم ابو كبوس =ومنا البحر والبر ثار اعتفاسه
فيما مضى واليوم روس ٍ تحت موس=وتشابه الراعي وراعي الرياسه
والحكم للي يرفد الناس بفلوس=واخلف مروات الدول بالسياسه
عبد العزيز اللي تهاضع له الروس=مرهق اسود الغاب الي اشتد باسه
اللي جعلنا بين مطلق ومحبوس=كل ٍ بكفه يلتمس وين راسه
وامن ميادين وبلادين وغروس =ونزح محسنة اللحى بالمواسه
وخلى الفهد والظبي والذيب والعوس =متوالفين ولف بغض وغلاسه
وتمت وصلوا عد ماهبت الكوس=وعد مخضر ٍ دنا به يباسه
على شفيع الخلق لامدوا القوس=في موعد الخلق المبعوث ناسه