مشاوير الحياة.،.،.،.،.،.،.،.

عبدالعزيز العمار · 13-11-2010, 04:26 PM

السلام عليكم

بدون مقدمات... أضع بين أياديكم هذه المتواضعه
وأتركها تقدم نفسها لكم وعلى طريقتها ...
علها تجد القبول والإستحسان من قلوبكم

مشاوير الحياة..وكل درب ٍ فيها مريته=أدوّر للسعادة في مداها وابْني آماالي
على كثر الأماني..والأمل عندي تبنيته=طموحي دايم اسعى له ولو كان الثمن غالي
سعيت لغاية مرادي أبدرك ماتمنيه=ترافقني سنين العمر في حلّي وترحالي
سريت بليلة ٍ قمرا وفكري فيها هديته=أسابق بالفضا ذكرى زماني أول وتالي
أراجع سالف أيامي وش اللي فيها سويته=وبقايا ذكريات احلام طفل ٍ داله وسالي
على ذكـْر الزمان اللي مضى بالعمر وعديته=تعديت الصعاب ولا يرد ّ العزم عذالي
صعودي فوق مرقاب ٍ على العليا تعليته=أعاند مايواجهني وعيني ترقب العالي
ألا ياغربة ايامي وحلمي فيك ربيته=حفظته مع مرور الوقت..أغني فيه موالي
أغني به صواديف الزمان اللي تحديته=وانا اللي صابر ٍ فيما أواجه واثبت اقوالي
على ضيم الليالي صابر ٍ والصبر خاويته=وعلى حكم العذول اللي بقوله خالف أفعالي
وعلى ظلم الحبيب اللي حكمني قلبه وجيته=هجرني يوم وافاني وتركني جالس الحالي
وقفت وصرت اتابع موقفي والصمت حاكيته=يخاطبني يقول انت الحكيم اللي تهيالي
ترى بعض الزعل عند الغضي ذاك اللي حبيته=يحاول يكتم اشواق وغلا في جوفه الصالي
ويرجع لك بنظرات العتاب بقلبك اوحيته=عزيز ٍ في رجوعه وانت ترقب رجعة الغالي
تغنج وابتسم لك والخجل في عينه احيـيته=إلى قام يتمايل قمت له يا طيـّب الفالي
لقيت الصمت في حكم الحكيم وذايع ٍ صيته=وعرفت ان المشاعر في هدوءه غيم همالي
ألا ياموعدي فيك الأمل دايم تحريته=أبامضي في طريقي وارجي الله يصلح احوالي
انا في حكم رحمان ٍ رحيم ٍ يوم ناديته=ترجيت الكريم اللي عليم ٍ يلطف بحالي
صبرت ولا جزعت ولا تركت الصبر وخليته=على مَر الزمن لابد ماتفرج من الوالي
وابصبر لو مدى صبري مع الأيام عانيته=بشاير صبرنا فيها شعاع ٍ يحيي آمالي

عبدالعزيز بن سعد العمار
1431هـ