المره لا من تعدّت اربعين بين شايب وعجوزه

[الطائر المهاجر]

https://www.youtube.com

الشايب=
المره لا من تعدّت اربعين = مثل برميلٍ خشل في المزرعه
الصدى ماكلْه من طول السنين= ما يفيدك لو تحاول ترقعه
او كما الهونداي للي باخصين= بالمواتر فاهمينٍ مصنعه
فالمكينه لو توضّبها يبين = ولو تغيّر قيرها والأذرعه
مشكل الدفرنس يفضح بالحنين= والبواجي من قربها تلذعه
ولو تسمكر ما تسمكر كل حين = ينهفش صدامها لو ترفعه
الحرمه=
المره بالدين والعقل الرزين = ومن خذاها لغير هذا ما اضفعه
والجمال ارزاق رب العالمين = لو هي صغيره تشوفه ما ابشعه
وكل غصنٍ لو تشوف إنّه يلين= يوم ييبس والهبايب تجدعه
ارع للنعمه وحكيك لا يشين = قبل هرجٍ ما تفضّل تسمعه
من يبي عودٍ حنينه والونين = يسمعه من مرّ من كثر اوجعه
المره مهره على طول السنين= ما تغير كاالذهب ما انصعه
الشايب=
الرجل مرسدس في شدّه متين= لو وصل تسعين ما به قربعه
لو تقلّب مرةٍ أو مرتين= مثل ذيبٍ فالتمرغ ينفعه
دام سالم من طياس الشاربين= ومن بنات الليل واللي يتبعه
يعجبك لو كان عنده حرمتين = كان ماله من كروشٍ تمنعه
وانتي يم جنيب من حقد دفين = مخطرٍ من مر لزمٍ تلسعه
محتملك سنين وطبوعك تشين= لا نتي لا رسن ولا انتي بردعه
الحرمه=
شايبٍ عايب وتسمع له حنين = ولا بغى ينهض تجوّد باربعه
من سمع هرجه وشعره والزفين= قال توّه في شبابه ما اسنعه
خل عنك الهرج كان إنّك فطين= واحترم نفسك وخل الصرقعه
لو ابي غيرك تراهم جاهزين = من شباب ضاع وسط المعمعه
دام لي راتب وعندي ارنبين = منوة اللي نيته بالمطمعه
انتقي من هالرجال العاطلين = ما يخالف لو شتمته والفعه
الشايب=
احمدي ربك ترى فكري رصين= ولو بغيت اعرس ترى ما اسرعه
عندي فلوسٍ ولا حملّت دين = اخطب الأبكار مثلك اردعه
لاتحديني ترى ابليس اللعين = كل هرجه عن جهامك ما ابشعه
انتي اقفيتي ونا سيفٍ سنين= ماندثر في الحرب ياما اشجعه
محتسب للأجر واركع ركعتين = كلما شفت البنيّ مجمّعه
وادعي الرحمن رب العالمين = يبعد الشيطان عنّي ما اتبعه
الحرمه=
والله إنّك ثعلب يا بالحصين = كلما جيتك بثوبٍ ترقعه
خل نتصالح ولك مني يمين= ما تبي حاصل وقدرك ارفعه
كل ما يرضيك عندي عن يقين= بس لا تطري تزوج بجذعه
الشايب=
هذا خبري فيك نسل الطيبين= لكن الشيطان يغوي ما اسرعه
من تحارش رجلها بالكلمتين= خاسره في كل فعل تصنعه
للرجل حشمه ولو به ما يشين = والمره من تحتمل لو مافضعه

[الأموره]

من تحارش رجلهـا بالكلمتيـن = خاسره فـي كـل فعـل تصنعـه
للرجل حشمه ولو به ما يشيـن - والمره من تحتمل لـو مافضعـه


درر يالمهاجر
هذا عين العقل

صح لسانك ملايين

سلمت و سلم فكرك ،

الف شكر لك ،

دمت برعاية الخالق ،

[عنود الصيد]

الرجل مرسدس في شدّه متين= لو وصل تسعين ما به قربعه
لو تقلّب مرةٍ أو مرتين= مثل ذيبٍ فالتمرغ ينفعه

عز الله انك صاج والله انك جبتها
الرجال مهما كبر مايبن عليه وأغلبيه الرياجيل كل ماكبر زان

الا الحريم اللي لاحول لهم ولاقوة أغلبيتهن كل ماكبرن....صارن في خبر كان
بس في فئة قليلة..."وانا منهم"....لو تمر الايام يبقى حلاهم هذا هو...

[الطائر المهاجر]

والله الظاهر انك حصان صيد

[حي الضمير]

ابوعبدالله صح لسانك

[وجدان القلوب]

صح لسانك....

خل نتصالح ولـك منـي يميـن ما تبي حاصـل وقـدرك ارفعـه

هذا حالنا ف النهايه...
بيض الله وجهك شاعرنا...

[عنود الصيد]

المشاركة الأصلية كتبت بواسطة الطائر المهاجر

والله الظاهر انك حصان صيد

اسم الله علي............

وكل غصنٍ لو تشوف إنّه يليـن // يوم ييبـس والهبايـب تجدعـه

صح لسانك
والله هذا حال الكثير
لكن في النهايه حصل خير الحمدلله
كل الشكر لك
دمت بخير

ههههههههه

حتى هنا الحرمه هي الي تبادر بالصلح خخخخخخخخ

قهرني ذا الشايب

[داعي الشوق]

الله يالطائر

سيناريو جميل من أول حلقه لآخر حلقه

صح لسانك مع التحية ،،،