وين المدير .. يفتينا

[الطائر المهاجر]

محمد سعود

برقٍ تلالا من الوادي لشط الغروب=وبله مصارير والدنيا على حالها
الطير ياكل وعينه تدّرج كل صوب=يخشى المقادير والدنيا على حالها

عثمان العبدالله

ارحب يابو سعود
يا الله إن تحييه .. حي هالصوت
ا

ن كان ياكل فلا له في طويل الدروب = الخوف جوعه وهو من شال اثقالها
ماله ومال السحابه لو نشت من جنوب= مادام ارضه نشاف فماله ومالها

محمد سعود

المرحب باقي

استلم ...

كلٍ تزايم عشاه من الجهوم الحلوب=كرشه واماصير والدنيا على حالها
حب العذارى عذاب ويستخف القلوب=وانته كما الزير والدنيا على حالها

عثمان

ربطت قافك وتوي آخذه بالحسوب = ودامه مرادك ترى الدنيا على حالها
لانيب لا الزير ولاانت عنتره في الخطوب= السيف محكوم والدنيا على حالها

محمد سعود

من قدم اقرى عياله للهنوف اللعوب=ما لقته خير .. والدنياعلى حالها
ترحيبة اعمامها تهتز منها الجيوب=وتبكي دنانير .. والدنيا على حالها

عثمان

الجو غايم ولا ادرب باللعوب الطروب = واخاف افتي وتبقى الدنيا على حالها
لكن ترى العشق لو سحره مرض للقلوب= دواه الدنانير والدنيا على حالها

محمد سعود

اتضمها في الصباح وتحتلب فالغروب=وتابع السير والدنيا على حالها
ابطيت اخض الشواطي والبحر مايروب=يزبد هوامير والدنيا على حالها

عثمان

العالم الله سرت بالليل مع ذا الهبوب = تغازل الكير والدنيا على حالها
فمن لاتقدى يطيح ولو يحاول وثوب= كنه كما الطير والدنيا على حالها

محمد سعود

من دس حُمر المياسم في رهاف الجنوب=ماله معاذير والدنيا على حالها
بعض الحساني تبعثرها كبار الذنوب=وتروح للغير والدنيا على حالها

عثمان

يقول عنده عذر والامر فيه الوجوب = مابه محاذير والدنيا على حالها
دام الحصاني تلاعب في جميع الغروب = حتى المسامير والدنيا على حالها

محمد سعود

ناسٍ تحفت وناسٍ فوق الاسطح تجوب=ترقى بصنصير والدنيا على حالها
فلذات الاكباد فيها النار شبت شبوب=يالله التدابير والدنيا على حالها

عثمان

يالله صبحه بالخير

لا هبت النسري فالليف ماهو شبوب = ومن لازرع من عصير والدنيا على حالها
ما يحصد الا الهوى وبعدين يدري العيوب= كبير يصبح صغير والدنيا على حالها

محمد سعود

صباحك نور وسرور

دبرة هل الركب في ذمة عليم الغيوب=ما اقول لك غير والدنيا على حالها
جفت لاراضين والبراق عرض النصوب=ما رش قطمير والدنيا على حالها

عثمان

الملعبه ما تكفي غير الغزال اللعوب = والذيب من يستجير والدنيا على حالها
وعقب الجفاف الغبار ولو غسل للذنوب= امره عسير والدنيا على حالها

الـ مـديــر .. قـادم ..

يـُـفـْـتــيـــكـ .. ويَــعـِـظـُـنــا ..



أتـشــرف .. بـ الـ مـتـابـعـــة ..

لـ أكـتـسـب .. مـن .. الـ .. أصــــول !!

دمـتـمـا .. بـ .. وِصـَـــال ..

مرحبا بالاخت وعد

شرفتينا بحضورك النقي
الله العالم ان المدير طايحٍ له في صحن قرصان هذا اذا اسلم المرقوق

جـو .. ثــاني !!



اسـلـمـــوا ..

وانتِ سالمه يا وعد

تشرفنا بحضورك الثاني ولا هنتِ

[ابو أنس]

لم نكتفي بعد ولازال للموضوع يقية حتماً
أو على الأقل عندنا لئلا نشرق ونغرب!!!!!!!!!!!!!

الفاضلان ابو عبد الله وابو سعود............
هنا أقرأ شيئا مختلفا وفيه لذة وحوار
لاشك أنني قد استمتعت ولا أقول شبعت ولا زلت ابحث أكثر
لكما تحيتي وفيض شكري

[الطائر المهاجر]

ارحب يا ابو نس
هذي فرصة اتعلم من الأساتذه ..

[نسناس الهوى]

سجلوني متابع ..
ولاهان منطوقكم ..