كشكول غريب الآه(بدون ردود)

[الغريب]

قال: أبي اعرف مشاعرها نحوي ومن خلال المشاعر إنا انطلق واحدد موقفي ،،

قلت له أبيك تعرف شي واحد طالما هناك بعد بينك وبينها لا تقول مشاعر وأحاسيس ممكن تعجب في أسلوبك في طريقة إدارتك للحوار في المفردات اللي تستخدمه في مواضيعك إما سالفة عمق وحس وجداني هذي ما تجي إلا مع الحوار تتعرف على أفكارك وعلى ثقافتك وبعدين يحصل التجاذب بينكم وهاك الساعة إذا تبيها زوجه ممكن تصارحه وتفتح موضوع الزواج ويدك مليناه إما من البداية تقولها زواج صدقني راح تشك فيك وتقول هذا يبي يلعب وهاك الساعة أنت وحظك إذا أهي تبي تلعب راح تمشي معك في نفس الخط وإلا راح تنسحب أو إذا أهي معجبة يعني ميته على خشتك، توجهك وتحطك في الطريق الصحيح .

فهمت ولا أعيد

قال : والله مدري وش أقولك
قلت مافي وش أقولك لازم تحسم امرك من البداية تبي تلعب المباراة ولا تبي تجلس في المدرجات وتتفرج الين مايجي غيرك ويشيل وأبيك تعرف التعامل مع بنات المنتديات والنت تراه شي خطير انتبه مو تعتقد كلهم بنات صغار او بنات ثانوية أو يدرسون في معاهد للكمبيوتر لا ترى فيهم دكتورات فيهم بنات يملكون شركات ومؤسسات وفيهم مديرات بنوك وموظفات في قطاع خاص وقطاع حكومي ومدرسات وإذا أهي مدرسه لازم تنتبه لنقطه مهمة إذا طلعت مدرسة ابتدائي اعرف أنها كبيره يعني تدخلك من هنا وتطلعك من هنا واللي تشوفها سهرانا على النت 80 ساعة في اليوم يعني تحس كان سرها مقطوع في ألنت اعرف أنها بنت جامعه أو كلية أو معهد وحافظه كلمتين وجاية تذبل سبود الأعضاء بس ما يمنع أنهم متعلمات ويعتمد عليهم
بس تبي الصدق أبي أقولك شي وبدون زعل أنت وجهك مو وجه جامعية أحس وجهك وجه معلمة ابتدائي ورائدة فصل من الفصول الدنيا بعد و تكون في منطقه نائية عشان كل يوم توصلها بعدين تكون خبره أو دكتورة وطبعاً أفضل شي لك ربة الأسرة عاد أنت وحظك تطلع مطلقه أو أرملة حظ يانصيب

قال: طيب وش تشوري عليا فيه



يتبع

[الغريب]

قلت: أرسل رسالة وجس النبض ولا تدري اكتب قصيده شعرية وأرسلها لها قوله أبي اخذ رأيك في الأبيات ممكن أو الموضوع اللي تبي تطرحه

قال: هي ماهي شاعرة ولأكاتبه هي مشرفة القسم الإسلامي

قلت: يعني مطوعه ، بسيطة أرسل له حديث واسألها هو ضعيف ولا صحيح ومن الراوي و وش المناسبة

أو اسألها عن مسألة فقهية

قال: مثل شنو

قلت: شف أنت مالك إلا انك تسألها وتقولها إذا إلام خافت على جنينها من الجوع في رمضان تفطر ولا تصوم

وهل الرضاعة تفطر ولا ؟

قال: وربي منت بصاحي يا الغريب هو وقت رمضان ها الحين

قلت : له اسمع هما الصحابة كانو يستعدون لرمضان من ستة شهور اعتبر نفسك إنسان مقتدي با لصحابة بعد الرسول وتبي تستعد لرمضان

قال: طيب إنا وش لي وشل الرضاعة

قلت: له يخوي هذا مجرد سؤال عشان تجس النبض وإذا وافقت قولها انك رجل مطلق وأبي استفسر ، عندي بزر رضيع!

قال: لا والله خوش سؤال عز الله جسيت النبض وش عرف البنت بسوالف الأمهات وبعدين وش لون اسألها سؤال عن الامهات و اقولها انا مطلق وش الرابط في السؤال

بسيطه اذا كشفتك قولها ابي ارضعه صناعي

وش عرف البنت ، أنت وش لون عرفت أنها بنت وش يدريك احتمال تكون متزوجة

قال: متزوجة !!!!

قلت: إيه ولا على بالك كل البنات اللي قدامك قصر يبه فيه المطلقة وفيه الأرملة وفيه المعلقة وفيه المخطوبة والخالعة

خالعه!!!!!

قلت إيه خالعه

قال : يا بن الحلال وش لنا وش الخالعات





يتبع

[الغريب]

قلت له يا مسلم هما الدين يسمح للمرأة إن تخلع زوجها ، المطلق وش يقاله رجل مطلق أو امرأة مطلقه واللي زوجها يموت يقالها أرمله صح طيب واللي تخلع زوجها يقالها خالعه لأنها أهي اللي خلعت الرجل

يعني المفروض انك ما طلقة مرتك المفروض انك طلبت منها عمارة قدام الحرام في مكة او شقة في القاهرة مقابل انها تفدي نفسها وهذا الشي أجازه الإسلام ليش ما تستغله ، شفت الفرق

قال صحيح

قلت خلاص هذي تعتبر خالعه والزوج مخلوع

يعني ممكن أنت تحب ها البنت وتتزوجها وتذبل سبدها وتجيب لها قرحه في الشبكية ما تدري إلا وهي خالعتك وممسكتك الباب

قال: افا

قلت: افا ولا جبها كل شي وارد أنت قوي قلبك وأرسل وماعليك

وخلنا على اتصال عشان أقولك وش تسوي في الخطوة الجاية طبعاً أنت إنسان محظوظ لأنك جالس تتكلم مع إنسان عنده خبره ومعرفه مو أي احد وهذي فرصة لا زم تستغلها مثل الاستشاري العالمي إذا جاء زيارة عندنا فرصة للي يبي يسأل ويستشير أنت ألان في فرصة عظيمة ما سبقك عليها احد والكل يحسدك على اللي أنت فيه

وهذي ميزة المميزين إذا اعطو وقتهم وجهدهم للناشئين أنت تعتبر نشاء في رحاب المنتدى وانأ راح أحطك على الطريق الصحيح أبي أتبناك يعني بالعربي أبي أدرسك أصول لعبة المنتديات وهذا الشي يبيله ناس تعرف من وين تأكل الكتف

ما اقول الا الله يستر لا خبرتك تودينا في داهية

و تقابلنا بعد أسبوع

ها بشر

قال أرسلت الرسالة

وحسيت بحجم الاهات اللى في صدره!

حلو بشرني وش قالت و وين وصلتو أكيد استلطفتك البنية

صدقتني اي شي بتخطيط وتكتيك نتايجه مذهلة ماني قايلك

بس مبين من عيونك انك أعطيتها أيميلك وبصراحة حاس انك خشيت في العميق

كل شي مبين في عيونك بالذات اليسار

قال أبي أسألك سؤال

ممكن اعرف في منتداكم وش لقبك؟!!!!

[الغريب]

وقفو عضويتي عقب ما شهر فيني المدير

والبنت راحت مشرفه على التصاميم

قلت تمام تمام تمام

جات وجابها الله

قال وش عندك يا وجه النكبة

مايخالف هذي اخرتها صرت وجه نكبة لكن لو شبكت مع البنيه بتقول ياوجه الخير

قلت شف يبيلك تمر على أي منتدى متخصص في التصاميم وتلطش لك تصميم وترسله لها وتقولها إني شغال عليه

صار لي أسبوعين وبما انك مشرفه ومسئولة عن قسم التصاميم قبل ما انزله حبيت أستشيرك في تمازج الألوان وإبعادها وأبي اعرف هل الخلفية جيده ولا يبيلها تغميق أكثر.

قال وش هوله كلمة تمازج

قلت اسمع الكلام أنت وش عرفك بها السوالف وبها المفردات ما ني قا يلك الخبرة تلعب دور

قال بس إنا موقف ها الحين وش لون

قلت بسيطة عندك خيارين لا ثالث لهم

قال وشهو

قلت إما انك تطلب عفو من المدير أو انك تسجل باسم جديد ومن كمبيوتر جديد عشان الايبي لا يعرفه المدير

قال وإذا عرف الايبي

قلت يا حلو راح يعرف انه جهازك وبعدين يتابع تحركاتك

قال تدري اطلب عفو بس وش أقوله

قلت له لا تشيل هم إنا الليلة امخ مخ لك على صيغه اخلي المدير يعفو عنك ويتنازل عن الحق العام بعد واحتمال اهو اللى يعتذر لانه تسرع وش تبي أكثر من كذا




يتبع

[الغريب]

قال يا بعد قلبي والله يا الغريب ، إنا لازم ارجع للمنتدى بأي حال من الأحوال ولا ودي إن البنت تطير حاس إن روحي

تعلقت فيها واليوم اللي ما أشوفها في المنتدى يضيق صدري أحس أنها مريضه أو أنها تعاني من شي مكدر حياتها

قلت له أرجوك هذي خبرة وعطاء سنين

المهم وازين هاك ألصيغه اللي خلت المدير بعد ثلاث أيام من الإيقاف يعفو عنه ويقدم له خطاب شكر

ودخل المليح للمنتدى وبداء يركز نشاطه في قسم التصاميم ومن بعيد لبعيد يراقب ردود البنت

المهم مدري من وين جاب تصميم وأرسله لها برسالة خاصة عشان يأخذ رأيها

قلت له شكلك استعجلت بس تدري أرسل رسالة ثانيه

و قولها إن البرنامج نسخة أصلية عشان تركيب الألوان والإبعاد ما حبيت اشتري نسخة مقلدة حبيت كل شي يبان على

طبيعته وبنفس العمق الوجداني والبعد الفني للتصميم عشان تحس انك موهوب وانسان مرهف الاحساس

وش دعوه بتصميم اصير مرهف الاحساس

يبه انت وش عرفك ماني قايلك هذا كلام يدرسونه في الجامعات وها السوالف لها ناسها انت وش عرفك انت حدك كلمة

منقول وتخب عليك بعد اذا ما اغير من نمط حياتك ، برستيجك هذا لازم يتغير يبه انت مقبل على حياة جديده حياة مابعد الاربعين انت تنتظرك احلام ورديه بمشورتي لك راح تلامس النجوم يبه انا بخلق منك انسان مامر على المنتديات

المهم طلعة هناك مفاجأة في الموضوع



اتصلت فيه هلا أبو فلان

قال الله لا يهليبك يا وجه النكبة تصدق اللي يمشي ورآك يا الغريب لازم يستخير ربه اول

شي لان المصايب بتنصيب عليه من كل حدب وصوب

قلت سلامات وش السالفة صار شي جديد

قال وقفو عضويتي

لاحول ولاقوة الا بالله ثاني مره

قلت له ليش أكيد غلطت على المدير أو نزلت موضوع يخدش الحياء

قال المشي معك اهو اللي يخدش الحياء لعن ابودارك ذبحتني كل ما اطقها عوجه وانت

ماغير تزعط عندي قال ايش قال يدرسونه بالجامعات شف ابي اقولك شي تعرف زمان وش لون كان التعليم *(( الكُتَاب ))

او يرسلونك عند مطوع اقسم بالله انه اصرف منك ومن خبرتك بذمتك هذا كلام يدرسونه في الجامعات

شفت كلمة منقول والله انها ابرك من افكارك ، شفت لو اني استشرت راعي غنم او وحده من عجايز سوق المعقلية او

سوق الحب في الدمام ها اللى باسطين وربي سان ابرك من افكارك انت وجهك وجه خبرة ومعرفه وكله كوم يوم تقول

انت انسان محظوظ انك جالس تستفيد من خبرتي يلعن ابوها من خبره قم بس قم

يا ابن حلال وش فيك عسى ما شر انت علمني وش صار ترك خذتني بشراع ومجداف فهمني وش السالفه

قال شفت التصميم اللي لطشته..........



يتبع

[الغريب]

من ابها اشكركم على الحضور واقولكم الاجواء عندنا رووووووووووووووووعه امطار وضباب وبرد

بصراحه اجواء تصلح لابوعبدالله يقدر يكتب فيها كم من بيت

على العموم اخليكم مع الحلقة الجديدة

هماني أرسلته لها وجلست انصب عليها قلت لها إن البرنامج اللي

استخدمته جايبه من ايطاليا مخصوص عشان الألوان والإبعاد وصورة البنت

اللي في التصميم هذي تصوري لشكلك وعشان البعد الفني والعمق

الوجداني


التصميم طلع لخويتها وش في البنت ما تشتكيني للمدير وثاني مره

يوقف العضوية بس ها المرة عقب ما فضحني ونشر نص الرسالة اللي

أرسلتها للبنت يوم كانت مشرفه للقسم الإسلامي ويوم صارت مشرفه

للتصاميم . هذا اللى صار

إنا لو يفكني الله من فلسفتك ومفرداتك وجملك وتعابيرك اللي مالا أم

أمها داعي وربي إنا بخير

تصدق أنت ذكرتني با الرقاصة اللي طلعت من المرقص ورأسها كله جروح

ليش

لان اللي في المرقص حـ........... كانوا ينقطون عليها بهلل( قطع معدنية)

لا والله ها اللي يبي يبط كبدي أحر ما عندي ابرد ما عنده

بصراحة اضحك على حظك بعد أنت ما جيت تعجب إلا بمشرفة قسم إسلامي

وش السوات ها الحين

من ايطاليا لعن أبو دارك اكبر غزلنجي ولعاب في المنتديات ما قال

إني جبت برنامج من ايطاليا لعن أبو دارك قل شريته من جرير قل انه

برنامج أصلي مكلفني 2741 ريال و39 هلله ، من ايطاليا مرة واحده

إلا على فكرة جفنشي مايقربلك بالمره انت وجهك وجه ايطالي لعن

ابودارك فيضة السبسب بالصمان وتخب عليك

ولا يكون قايلها إن ها الألوان أهي نفسها اللي استخدمت في الموناليزا

بعد، الله يستر لايكون قايلها انك تتقمص شخصية فنسنت فان جوخ ولا

بيكاسيو وماتحب تشتغل الا على انغام السمفونية التاسعة لبيتهوفن

لعن ابو دراك تبي تشوت خل شوتاتك خفيفه اما انك تشوت

من نص الملعب وتبي البنيه تصدقك والله لو انها مدمغه

لاحول ولاقوة الابالله......


بس لا يهمك وهذي تعتبر من ابسط الأمور في عالم المنتديات

أقولك عضويتي موقفه تقول بسيطة

قلت لا تهتم كلها أيميل جديد وكمبيوتر جديد الله

يخلي مقاهي ألنت وكل شي يصير تمام

بس ها المرة بأسلوب جديد وستا يل يختلف عن القديم

وش رأيك تمرني وأعلمك وش تسوي

أنت فاضي ها الحين

مر هو عندنا غيرك نطقطق عليه


هلا والله با الرومنسي

وش عليك يا الغريب تطنز يحقلك

قهوة ولا شاهي

يابن الحلال إن بغيت حلتيت بس شف لنا صرفه في ها الموضوع

شف إنا لازم أغير من ستا يلك أول شي أبي أغير اسمك الحركي أبيه اسم

جديد ورنان ولوك مختلف وأسلوب خرافي إنا لازم أتبناك

تتبناني ، وش دعوه شايفني جاي من الشارع

اسمع وأنت ساكت وخلى عنك ألبربره

ولازم اصنع منك عضو خرافي كل المنتديات تتكلم بتميزه وبجمال أسلوبه

قال إلا ما ودك أحط مكياج بالمرة

قلت اسمه مكياج بذمتك هذا اسلوب واحد متعلق

شفت الخبرة وش تسوي يبه صار اسمه ميك أب بعدين خطوط وجهك ما تسمح

وصغر عينك ما تعطي مساحه لبروز الضل وألا سان سويتها

بعدين أنت مو يبيلك تنظيف بشرة وبس أنت يبيلك سمكره من جديد

ومنتجات شنيل ماتجيب معك نتيجه انتي يبيلك شغل وهذا مكلف


قلت خل عنك الفلسفة أبيك تحفظ كم كلمة من

كلمات الحب وهذي أمرها بسيط اشتر كم من ديوان واقعد أقراءة

قال أنت وش ناوي عليه

قلت أبيك ها المرة تخش قسم الأدب وتكتب خواطر وأبيات شعرية وأبيك

تخش في مساجلة شعرية بين الشباب والشابات يعني أبي اصنع منك شاعر

يا ابن الحلال إنا ما اعرف اكتب ربع بيت عشان أصير شاعر

لا يهمك ثلاث أرباع الشعراء والشاعرات قصا يدهم فيها عجز وتلقى

بيوتهم مكسورة وأمورهم ماشيه أخر حلاوة والمشرفين والشباب بس يجون

ويسجلون حضور ولا من شاف ولا من دري رأس مالها صح لسانك وجزلة من

رأس جزل ومن ها الحكي والهدف الأساسي رفع عدد المشاركات ومجاملات

عشان اذا نزلت قصيده يجون يتواجدون على العموم مو بس الشعراء ثلاث

ارباع منتسبي المنتديات كذاوبسلامة الطيبين

بس المشكلة اللي تواجهنا إني أبي أدور لك على اسم فيه اكشن وإثارة

وفي نفس الوقت يكون اسم جذاب ورنان ابيه اسم موسيقي

حشا مو شاعر شكلي بصير ممثل

وش رأيك اسميك خزان الإحزان

بذمتك هذا اسم

اجل الله خيرك بين اسمين المنسم او قاهر فتيات المنتدى

الله واكبر ياوائل كفوري على غفله

اقول خلنا على خزان الاحزان اصرف

[الغريب]

يا ابن الحلال لازم يكون اسمك مميز وفيه جاذبية ولازم تحس انه اسم موسيقي يعزف نفسه بنفسه

لازم الاسم يوحي بشي من الواقع وأنت إنسان مليان إحزان وكتلة مشاعر ولازم تفضي الخزان

فهمت القصد ولا لا

والله مدري وش أقولك يا الغريب

شكل العالم بتضحك على وأنت تقولي إثارة واكشن

ما عليك أنت اسمع كلامي وكل الأمور بتصب في صالحك

من عرفتك ما شفت شي صب في صالحي

خل عنك ألبربره واسمع الكلام

شف ها الحين أبيك تحفظ كم من بيت وتحفظ عندك مواقع الشعراء وتحاول انك تتفهم المفردات وتستوحي قصيدة من خلال مشاعرك يعني الخزان أبيه يصب مشاعر أبيه يغرق المنتدى أبيه يخلي قسم الأدب ربيع أبيك تصير وسم المنتدى

وبدءا الأخ يغدق على المنتدى بخواطره

كان هناك بعض الكتابات اللي ادري عنها وبعضها كانت بدون استشارتي ، وكنت أتخوف من اللي تنشر بدون علمي أو اخذ رأي فيها بحكم خبرتي ومعرفتي المسبقة



تقابلنا بعد فترة

قال أبشرك في قسم الأدب كان ميلادي، بصراحة أحس الكل يتفاعل مع كتاباتي

قلت اتركني من الكل البنية رأس المال وش ردود الأفعال عندها

قال أبشرك تتجاوب معي وتشجعني وتقولي بانتظار المزيد وفي احد الردود قالت خزان الإحزان والرومانسية وجهان لعملة واحده

شف ياغريب وش رأيك أبي أرسلها رسالة خاصة واكتب لها كم من بيت وأقولها هذي الأبيات تصورك وتعبر نيابة عني

قلت بهواك بس انتبه لا تجيب شي من برا وتقولها كلماتي

قال لا تخاف المهم أبي أبيات تهز مشاعرها وتفجر عواطفها وتثور إحساسها

قلت وش دعوه بتدخلون حرب شكلك بتنتق البنت ولانت مخلي فيها قطعه

قال إيه حرب

حرب الحب والآهات

حرب العواطف وتحريك السكنات

الله الله وش ها الكلام والله وصرت تعرف تعبر أتريك منت بهين يا الدب أسف قصدي يا خزان



قال آه ه ه ه ه ه ه ه ه ياغريب لو تعرف وش اللي في قلبي كان علوم

بسم الله على قلبك، هذا وأنت ما بعد شفتها، عيني يا عيني والله قمنا نتكلم عن القلوب والحب

خلها على ربك

ما يخالف اكتب لك بيتين واعرضهم على ويصير خير
بعدين أبيك تعرف شي مهم لازم تفهم إن تعبيرك يدل على شخصيتك ويترجم أحاسيسك وهذا راح يكون نابع من حياتك ومعاناتك في الحياة يعني أبيك تعبر من ذاتك عشان يكون كلامك معبر ومؤثر مو مثل بعض الشعراء والشاعرات يكتبون أي شي بس أهم شي أنهم يظهرون على الساحة إنا مآبي ظهورك يكون سطحي أو وقتي أبيه راسخ وابدي فاهم ولا لا بعدين أبيك تصير ثقيل ممكن تشوف المدير ومجلس الإدارة يجوون ويمدحونك بزود اعرف أنهم يرفعون فيك وهذا شي معمول فيه في كثير من المنتديات يرفعونك وبعدين يهمشونك انتبه وخلك ثقيل وحاول انك تلعب معهم بأسلوبهم انتبه مو تطير في العجه

الأخ ما قدر يتحمل الانتظار بعد محاولات فاشلة ما قدر يعبر ببيتين تفجر العواطف ما دريت إلا والأخ لطش من ديوان مليحة الفودري وأرسل


بعد سهرة مع الدلال وشبت الضو في خيمته ما دريت إلا والأخ مولع شموع شي بريحه وشي بدون ريحه

إنا انصفقت وقلت يا ولد أنت وش سألفتك

قال ياخي مدري وش في البنيه كل يوم والثاني تسألني وش رأيك في الشاعرة الفلانية والشاعر الفلاني

وأكثر شي تركز على الشاعرات الظاهر انها معجبة وتبي تعرف انا امشي على خطى من ، من الشاعرات والشعراء

والله مدري بس احتمال أنها تكتب باسم مستعار ولا علمت احد واحتمال انها تبي تكشف لي حقيقتها الشعرية

إلا على فكرة وش سويت بالأبيات اللي قلت تبي تكتبها وترسلها

قال أبشرك راحت والبنية أعجبت بالأبيات

بعد إصرار وإلحاح

قلت له سمعني وش كتبت خلنا نتعلم منكم يا الحبيبة وش يدريك احتمال الله يرزقنا ببنت حلال تعجب أقوم أعطيها من أبياتك

حسيت الرجال يتهرب

قلت طبيعي أكيد الأبيات مكسرة وحالتها حاله بس مو مشكله البداية دايمن تكون كذا وكل الشعراء والشاعرات ابتدو صغار واليوم محد يفكر انه يعطيك وجه

بعد إصرار ومعاناة عشان أشوف واسمع وش كتب


طلع ديوان للشاعرة مليحة الفودري بعنوان(( بقايا كحل من عيون سود الصادر عام 2000))

قال بصراحة حاولت بس ما قدرت وقمت وأرسلت لها أبيات من الديوان وقلت هذي من تأليفي

بصراحة جلست فترة أناظر فيه وارشف من القهوة وأناظر فيه وارشف من القهوة

وأناظر و أقوله صب شاهي ولا يكثر حكيك



يتبع

[الغريب]

قلت له تدري ليه البنية تسألك عن الشاعرات

قال لا

قلت صدقني أنها كشفتك وتبي تصيدك

يخوي أنت متى تتعلم، متى تفهم

الواحد إذا يبي يسرق أو يقتبس يجيب شي ما يخطر على بال احد يعني دور لك من ها المبتدئين الصغار والطش منهم

مالقيت غير مليحة ، لعن ابودارك هذي أشهر من نار على علم

قال وش السوات

قلت مالك إلا حل واحد تقولها إنكم على صلة ونسب مع الشاعرة مليحة واهي اللي أهدتني ها الأبيات وأعطتني حقوق النص الأدبي

والله مدري وش أقولك

طيب بعد الأبيات وش قالت البنيه

بصراحة ياغريب أعجبت كثير فيها وقالت أنت إنسان مرهف الإحساس ومبين عليك عاطفي وشفاف

طيب أنت وش سويت

قال على طول أرسلت لها الرد وقلت لها إنا معجب فيكي من زمان من قبل القسم الإسلامي

قالت إنا حسيت بها الشي بعد التصميم اللي جبت ألوانه من ايطاليا مخصوص.

قلت بصراحة ما عرفت وش لون أوصلك بحكم إني مالي تجارب سابقه ما عرفت وش لون أتقرب منك واستشرت صديق وشار على

على العموم انسي اللي راح واعتبريه مجرد طريق للوصول لقلبك

قالت قلبي مرة وحده

طيب وش رأيك نتقابل في مكان ثاني ونتكلم

قال ما عندي مانع حددي المكان والزمان

ها وبعدين قال ما جاني رد

قلت له بذمتك أنت شفاف، أنت حساس، أنت عاطفي ،بذمتك هذا وجه واحد عاطفي هذا وجهك وجه بيبي فيس لعن أبو دارك أنت بينك وبين الرومانسية والعاطفة والشفافية مجرات لعن أبو دارك أحاسيسك تعتبر من مواليد ق.م

وش ق.م ذي بعد

يعني قبل الميلاد

قال وش فيه وش فيك انقلبت على يا غريب

يا بني أدام افهم تبي أيميلك عشان تتقابلون على الماسنجر وتأخذ راحتها في السوالف الخاتره تبي تفتح قلبها تبي تفضفض تبيك تحتضنها بحنانك وعواطفها لعن ابودارك البنت تبي تحس بأنوثتها مع رجل خلقت من اجله وخلق من اجلها تبي تشم عبق رجولتك الصافية فهمت يأبني ادم

يعني وش السوات

وش السوات

جب الكمبيوتر ها الحين وأرسل أيميلك

وأرسل الايميل وبعد ساعتين جات بشاير ألإضافة

وتقابله على الماسنجر
هلا

مين أنت

خزان الإحزان

ههههههههههههههههه
دوم يأرب مو بس اليوم

تدري إن اسمك حلو

عيونك الحلوة

ما شاء الله عليك تعرف تتكلم وتعبر

والله وش أسوي اللي يعرفك لازم يعبر

[الغريب]

خزان أبي أسألك سؤال وأتمنى تجاوبني عليه بصراحة
أتفضل

لو حبيتها وطلعت مقطوعة من شجره وتأكدت أنها إنسانه صادقة وإنسانه محترمه واكبر شي سوته ماسنجر ومنتديات وأنت عارف ها الحين مافي بنت إلا وما تقابلت مع رجال بالمسانجر بذمتك هل النظرة تتغير أو تضل مثل ماهي أو تنسحب

شف ياغريب

ما تصدق لو أقولك إني استمر متى ما كانت صادقة وصريحة ، صدقني إنا اللي راح ازرع فيها الثقة

طيب سؤال

تدخل ألنت لبيتكم ولا لا

قال سؤال صعب الإجابة عليه ، ولازم ها الموضوع ينفتح معها وبناء عليه اقدر أجاوب

شف إنا ما أقولك إن كل بنات المنتديات سيئات لا والله بس ترى فيهم مثلهم مثل الشباب فيه اللي يدخل ويتصيد وفي اللى يدخل يضيع وقت ومحترم نفسه يعني الكفتين متعادلتين وبعدين لاتنسا انت تتكلم على زواج صح ولا انا غلطان يعني بمجرد ما تتزوجون وتدخلون غرفة النوم كل واحد راح يبان على حقيقته يعني مافي مجال للتغير
يعني كلام الماسنجر والكلام المعسول راح تكتشف ان كلامك كان من منطلق عواطف وكلام معسول وحلو يعني ممكن لو أحطكم في منحل بتنتجون عسل سدر درجة أولى بس مشكلة إذا فكرت انك تسوي نفسك بطل فلم مع الملكه تعرف وش العقاب

إما على ارض الواقع كلامكم ونبرة صوتكم راح تتغير لا نكم تتكلمون من واقع مصير مشترك

صحيح بس انا محتار والبنية شاغله تفكيري بالحيل

يا خزان ممكن تكون مرحلة من مراحل المراهقة المتأخرة خصوصاً وانك انت منفصل عن زوجتك واحتمال انك اشتقت للحياة الزوجية طبعاً انا مقصد بحياة زوجية عند نقطه معينه او لحظه بذاتها واعتقد أنت فأهمني ، انا اتكلم على الحياة بصفة شاملة من الف الى الياء

لاتنسا أنت أب وهي أم تقدر تقولي كيف راح توفق بينها كزوجه وبين عيالك وبين بنتها لاتنسا إن البنت عايشه معها يعني لو الأب يبي البنت كان خذها مع العلم إن البنت تجاوزت مرحلة الحضانة
تقدرون تتجاوزون مراحل الحرمان اللى عشتوها انتو الاثنين بدون ما يكون على حساب سعادة عيالكم

خزان إنا ماني جالس احبطك لا والله بس ابيك تفكر بعقلك لا تفكر بقلبك ، ابيك تستخير ربك وتدرس الموضوع صح لاتنسا ان المرأة مطلقه لو فشلت في تجربتها الجديدة أهي اللي بتدفع الثمن الاكثر ماهو انت ، وأنت عارف مجتمعنا ينظر للمطلقة نظرة فيها الكثير من التجاهل او الظلم او الاستغلال من قبل البعض اذا حصل وتطلقت منك اعرف انك دقيت اخر مسمار في نعشها ولاتنسا أنها مازالت قادرة على العطاء 30 سنة تعتبر في عز الشباب يعني أنت ألان في وقت القطف وجني المحصول
وش دعوه لا يكون إن البنية مزرعة وانأ مدري

لا مو القصد بس أرجوك فكر وأفضل شي أبيك تاخد إجازة وتسافر بعيد عن المنطقه احتمال انك توصل لحل

معليش ابعد عنها أسبوع شهر بس إذا رجعت خل رجعت حاسمه للموضوع و وقتها إذا فشلت أنت من راح يتحمل نتيجة قرارك وإذا نجحت راح تقطف ثمار ما بذرته

مدري وش اقولك بس انت قلبت راسي

خزان انا ما نصحتك إلا إني ابيلك الخير وصدقني انا ماني ضد الفكرة او ضد البنت انا اعرفك ولا اعرفها يعني مابيني وبينها أي شي بالعكس اول من راح يفرح لكم هو إنا

على العموم يصير خير اذا صار شي راح اتصل فيك

يوم الاربعاء الساعة 10 مساءً


هلا وغلا هلا بالزين كله

هلا خزان وش لونك

بخير يا عمري
وش إخبارك وينك ما شفتك لي كم من يوم لا يكون مسويا بلوك

بخير لا و الله لا بلوك ولا شي بس كنت مشغولة

الله لا يشغلنا إلا بطاعته

امين كوارع ممكن سؤال

تفضل يا خزان

اقدر اعرف ليه تطلقتي

شف لو أقولك ما تصدق لكن الشاهد الله إنا كنت مخلصه لزوجي وكان هو كل شي في حياتي

بس للأسف زوجي كان إنسان أناني وما يحب إلا نفسه ومع هذا صبرت ثلاث أرباع الراتب على الشراب وكان

يضربني وإذا عطاني ريال بعد ساعة يجي ويأخذه وخليها على ربك

طيب ليه ما علمتي اهلك

اهلى الله يسامحك هم وين اهلى أبوي بعد ما طلق أمي تزوج من أجنبية وما تبيني اسكن عندهم وأمي متزوجة ورجلها قال ما تدخل بيتي عماني كل واحد مع مرته وحريمهم ممشينهم على كيفهم

ولد عمي رجال كبير اهو أحسن واحد استأجر لي بيت وسكني فيه إنا وبنتي وشهر يعطيني مصروف وشهرين ما أشوف ريال بيض الله وجه ما قصر رغم انه عند عيال وفاتح بيت

طيب وشلون تدبرين نفسك وين إخوانك

إخواني والله ما فكر واحد فيهم يمرني بس يخلوني اخدمهم وحريمهم ما يدانوني

أحيانا اشتغل في العروس مره قهوجية ومره سفرجيه وأحيانا اطبخ للعزايم في البيوت و بعض الامهات يخلون بزا رينهم عندي إذا راحو للعروس واللى تدفع عشرة ريال واللى ما تدفع وش أسوي الحياة صعبة

الله يكون بعونك تصدقيني ما كنت أتخيلك كذا

وش اللي خالك ما تتخيلني بها الشكل

يعني مجرد إحساس بعدين يعني معقولة ولا واحد من اهلك مافي قلبه رحمة

يابن الحلال خلها على ربك الحمد لله إن ربي ساتر علي وحا فظني إنا وبنتي

الحمد لله وطالما أنتي ماشية في طريق الرحمن لا تخافين محد يقدر يقرب منك

خزان اتكلم معك براحه أكثر

[الغريب]

الساعة 9:30

الساعة 10

الساعة 10:15

الماسنجر يسجل دخول ان ما عشت لك تري حياتي بدونك مالها معنى



قبل ما تسلمين وتهلين ممكن اعرف وينك من أسبوع

السلام عليكم ورحمة الله وبركاته

عليكم السلام ليه ماجا وبتي

أنت وشلونك يا خزان أول شي وش اخبارك

اخباري زفت ممكن اعرف سبب الغياب

ابشر بس ممكن اعرف انت ليه معصب

يعني اللى سويتيه ما يستحق إن الواحد يعصب له

يابن الحلال بنتي مريضه وكنت مقابلتها

سلامات ما تشوف شر طيب ليه ما علمتيني كان جيت و وديتها المستشفي

ما تقصر بس ما حبيت أزعجك

يا بنت الحلال أي ازعاج وأي خرابيط المهم وش لونها إن شاء الله احسن

ابشرك صارت طيبه الحمد لله عدت الأنفلونزا

وش عطاها الدكتور

أي دكتور

انتي ما وديتيها لدكتور

يابن الحلال احنا وين والدكاترة وين الله يخلى ام عمشه جارتنا لقيت عندها مضاد حق بنتها يوم انها تمرض قبل شهرين وعطتني الباقي والحمد لله البنت طابت

باقي دواء!!!!

ايه باقي دواء ماهي اول مره

طيب ليه ما رحتي مستشفي نور خان

يابن الحلال خلني اصرف علي وعلى بنتي بعدين اروح لمستشفي نور خان

طيب ليه ما مريتي مستشفي المللك خالد

بعيد عننا المهم انت وش لونك تصدق انك وحشتني يا خزان

حتى أنتي يا كوارع وحشتيني موت ابي اطلبك طلب وأتمنى توافقين عليه

اذا اقدر ابشر

مافي اذا اقدر ابيكي تقولين تم

طيب وإذا ما اقدر

لا تقدرين

يصير خير اطلب

ابي اشر يلك جوال وشريحة

الله واكبر شريحة وجوال مره وحده

ايه جوال وش فيها على الاقل اذا بغيتك لقيتك

الله يسامحك بذمتك وجهي وجه جوال وها الجوال ما يبيله تسديد فواتير

لا تشيلين هم انتي وافقي ويوصلك لحدك

لا مشكور ما تقصر

ليه يعني خايفه من شي معين

لا والله ماني خايفه منك بالعكس انا احس انك منى وما تعرف قد ايش فقدتك الاسبوع اللى راح

خلاص طالما انتي واثقة إني ما ابي أي مقابل خلاص وافقي ، قبل ما انسى وين رقم الحساب

خزان لا تكلف على نفسك انا ادبر اموري ارجوك

يا بنت الحلال ما من كلافه ولاشي

يعني كل هذا وله

بصراحة إيه ونفسي اني اتعرف عليكي اكثر بالعربي ابي اقرب من قلبك

يا الله قلبي مره وحده بس اخاف اني ما اكون قد المقام

يا بنت الحلال كلنا عيال تسعه

اخاف بعد فترة تغير رأيك

ليه أغير رأي فيه شي ما اعرفه عنك