(من هو اسبرانزا) رحلتي في ماضيه

[ثار التميميه]

طقت صح ، والله انها لين الحين توجع

اسبرنزا

عيني بعينك

يكبر جورك الى الحين توجع ؟؟


خخخخخخخخخخخخخخخخخخخخخخخخخخ


مشرفنا

ياوليدي عسى ماجاني منك تكفير..

ان شاء الله انه تكفير يابعدي

ولا محدن يصبر على ذا الموذي

ان شاء الله انه تكفير يابعدي

ولا محدن يصبر على ذا الموذي

انا معاك في هذه النقطه خصوصا انه اذاه زاد عقب ما كبر

(من هو اسبرنزا) رحلتي في ماضيه

الحلقة الثاني

خلص الوالد أوراق البعثة و قرر انه عشان ما نصاب كلنا بصدمة حضارية ممكن تؤدي إلي خلل عقلي عندنا كلنا انه يودينا للقاهرة و نقعد فيها أسبوع قبل ما نواصل رحلتنا لأمريكا.

إنا الحقيقة مدري من اللي لعب على الوالد و قال له إن القاهرة فيها وجه شبه من أمريكا و انه يفضل مرورنا عليها و الاختلاط بهلها و التحضر قبل ما نروح لأكبر حضارة في ذاك الوقت أمريكا.

لا تفهموني غلط ، إنا ما أقول في مصر شي ، و أكون صريح معك إن مصر عام 1974 كانت أفضل من السعودية و متقدمه عليها حضارياً بشكل كبير ، لكن يا ناس وش جاب مصر لأمريكا.

المهم توجهنا إنا و الوالد و الوالدة و إخواني الثلاثة إلي مطار الرياض القديم ، و ركبنا كلنا طيارة لأول مره.
إنا بزر عمري 5 سنوات ما عمري طلعت من حارتنا في حي الرئيس إلا إذا رحنا لم منفوحة أو الملز اللي في ذاك الوقت كان حي الشيوخ في الرياض.
كانت رحلتنا من الرياض إلي القاهرة على الظاهر أول طيارة شرتها الخطوط السعودية و إنا مدري وش نوعها ، كل اللي اذكره عنها أنها كانت علبة ساردين و صغيرة.

أقلعت الطائرة و الفرحة بركوب طيارة صارت فلم مرعب ، اطل مع شباك الطيارة أدور الأرض ، لكن الأرض ما لها وجود ، اقعد أفكر وش السالفة و الخوف طاقني ، أناظر أبوي كود انه يفزع معي و يقول لي وش السالفة فلقاه امتحزم في كرسيه ولا هو قادر يقول ولا كلمة.

إنا في اللحظة هذي عرفت إن إحنا رحنا فيها ، و اللي زاد الخوف أكثر إني صرت معادني قادر اسمع شي و إذاني تسددت.

و أطلق للساني العنان و أبدا أصيح صياح يحبه قلبك ، صياحي ما وقف إلا يوم جابت لي وحده مصرية (المضيفة) حلاوة مدري وشي بس الحقيقة كان طعمها رائق ، إنا لهيت في الحلاوة و نسيت الوجع اللي في إذاني.

بعد حدود 3 ساعات طيران وصلت طيارتنا إلي مطار القاهرة ، نزلنا من الطيارة و ركبنا لنا تكسي كان لونه اسود (إنا متعود على تكاسي السعودية الصفر في ذاك الوقت) ، ركبنا في التكسي و بدا يدور و يلف بنا في حارات و شوارع كان يمشي فيها ناس تقل نمل من كثرهم ، و عندما تكون في سنة الخامسة من العمر و تشوف ناس كثر اللي إنا شفتهم أول ما يجي في بالك انه أكيد فيه شي غلط ، تقول لنفسك يا كثر ما يتطاقون المصاريا هذولي ( في الرياض لين شفت ناس كثير متكومين تعرف إن فيه ناس يتطاقن مع بعض).

وصلنا التكسي لم عمارة قديمة قال لي أبوي أنها فندق ، أخذنا عفشنا و طلعنا لأحد غرف الفندق هذي ، يمكن احلي ما كان في الفندق بالنسبة لي هو إن فيه شباك كبير في الغرفة و احلي ما في الشباك انك تقدر تطلع فوقه و تصير تطل على الشارع (الشباك الكبير كان بلكونة ، بس لأني ما عمري شفت بلكونة حسبتها شباك).

يوم وصولنا للقاهرة ما طلعنا و قعدنا في الغرفة ، نمنا ذيك الليلة و يوم أصبحنا صحيت تقل مهبول من صوت عالي جداً إنا ما كنت ادري وشو ، الصوت كان جاى من عند البلكونة ، رحت اركض للبلكونة و طليت على الشارع و الظاهر اني شفت حول مليون مصري يمشون ، من كثر المصاريا اللي كانوا يمشون خلص الهواء اللي كان في الجو و بدا يصلع صوت خلخلة عالي و كان هذا هو الصوت اللي انا سمعته.

قعدنا في القاهرة حدود 5 أيام تمشينا فيها على حديقة الحيوانات و مرينا النيل و رحنا لم أماكن كثيرة ، و كل مكان كنا نروح له كان يقول لنا الوالد إن أمريكا بتكون مثل القاهرة.

بعد خمسة أيام في القاهرة (و تعذروني لأني ما تكلمت عنها كثير ، بس إنا كتبت كل شي إنا تذكرته عنها) ركبنا طيارة التي دبليو أي (TWA) الأمريكية و رحنا لم باريس و من باريس و بدون ما ننزل من الطيارة كملنا طريقنا إلي نيويورك.

و الرحلة الي مصر و المفترض انها تجهزنا للحضارة الغربية تسببت في اني ما اروح لمصر الا السنة هذي ، يعني بعد 30 سنة.


و وصلت إنا و أهلي إلي مطار جي اف كندي في نيويورك ، عاد تخيلو بزر ما عمره طلع من حارته إلا إلي القاهرة و حتى يوم راح للقاهرة كان الفرق بسيط بينها و بين الرياض الله هم إلا من كثر عدد الناس و الانفتاح اللي كان يشمل شوفت حريم يمشون في الشارع بدون عبي.

و فجاءه توديه لم اكبر مطار في العالم ، شعور و رهبة غريبة انك تشوف إشكال أول مره تشوفها .
غريبة انك تشوف هالامريكان و شعورهم شقر و حمر و عيونهم ملونه ازرق و اخضر تقل قطاوه ، صحيح إن شعري كان فيه شوي شقار و كانت عيوني شوي زرقاء (إيه كثر من العيون الزرقاء) ، لكن الإشكال كانت غريبة و يمكن يكون أكثر شي غرابه هو هالامريكان اللي ما كانوا يكدون شعورهم ، يا ناس شعورهم كانت منفوشة و تقل شجره ، تخيلو شعورهم كانت منفوشة على ارتفاع الظاهر وصل إلي متر فوق رؤوسهم (كان الشعر المنفوش هو الموضة في ذيك الأيام).

خلص أبوي اجرات الجوازات و استلم عفشنا من السير حق الشناط (أول مره أشوف شناط تحرك بنفسها و تجى إلي عندك) ، و عند الجمارك بهذلونا الأمريكان يوم شافوا شناطنا مليناه أكل من كل نوع و كأننا رايحين لم ديرها ما فيها أكل.

طلعنا من المطار و ركبنا تكسي اصفر و توجهنا لم فندق صغير أشبه ما يكون بالخرابه لأكنه بالنسبة لنا كان تقل قصر (الفندق كان الظاهر نجمة وحده) ، و في الطريق للفندق شفنا في نيويورك العمائر اللي من طولها تنكسر رقبة الواحد و هو يبي يشوف أعلاها بس ما يقدر لأنها تأصل السحاب من ارتفاعها (والله مدري وش جاب القاهرة لنيويورك).

وصلنا للفندق اللي كان مكون من غرفة وحده و الوالد الله يهداها نام على السرير و خلانا إنا و إخواني نفترش الأرض (لين الحين ظهري يوجعني من النوم على الأرض).

في الصباح قرر الوالد يروح لم الملحقية الثقافية في المدينة عشان يخلص أوراقه و قال لنا ما نطلع من غرفة الفندق و حذرنا من المخاطر المتعلقة بذلك.

لكن اسبرانزا و شقاوته ما خلته يقضب أرضه و تجرا و طلع من الغرفة عشان يكتشف المنطقة ، الفندق كان في منطقة كوينز في نيويورك ، و اللي يعرف نيويورك بيعرف إن المنطقة هذي هي حيث يتركز فقراء المدينة و بالذات من السود ، بديت أدور في الشوارع و الحارات القريبة و شفت إشكال غريبة تخوف ، العبيد الأمريكان كان الواحد منهم تقل فيل من كبره و كل واحد منهم شعره منفوش تقل شجره و كانوا لابسين ملابس غريبة ولا عمري شفتها من قبل.

واصلت تجولي في المنطقة و استغربت شوفت واحد اسود متمدد على جنب الطريق ولا فيه أي حركة و الأغرب من هذا كله إن الناس كانوا يمرون من جنبه ولا كأنهم شايفينه ، قلت في نفسي يمكن محد انتبه له و الفضول اجبراني إني أوقف بالقرب منه عشان انتظر الناس وش يسوون معه إذا انتبهو له ، مر 5 دقائق و بعدين 10 و بعدين 15 و لكن ولا واحد من الأشخاص اللي كانوا يمرون من جنبه حتى حاولو يوقفون و يشوفون وش السالفة و الأكثر غرابه إن السيارات اللي تمر على الطريق إذا قرب من الرجال المنسدح على الطريق كانوا يلفون سياراتهم عنه و يواصلون طريقهم ، أخيرا و بعد حدود 20 دقيقة جت وحده سودا عجوز و غطته بجريده و راحت خلته ، إنا في اللحظة هذي عرفت بطريقة أو أخرا انه ميت أو مقتول.

خفت من الموضوع و حطيت رجلي راجع للفندق ، أول ما وصلت للفندق طمرت لمي و قلت لها عن سالفة الرجال اللي مذبوح في الطريق و يا ليتني ما قلت لها ، لانها خافت خوف مهوب صاحي و راحت قفلت باب غرفة الفندق و بدت تصيح.

إنا و إخواني شفنا أمي تصيح و خذ معها صياح ، استمرينا على الوضع هذا حدود كم ساعة ولا تجرا احد مننا انه يطلع مع باب الغرفة الين جئ الوالد ، و قلت له عن اللي شفته ، فهاوشني في البداية لأني طلعت من الفندق و في نفس الوقت أكد لنا إن الرجال بالفعل مذبوح و مرمي على جانب الطريق و الأغرب من هذا كله انه ضل مرمي على جانب الطريق ساعات عديدة الين جئ إسعاف و شاله.

خلال الأيام الثلاثة ألاحقة استمر أبوي في الخروج كل يوم صبح إلي الملحقية الثقافية السعودية عشان يخلص أوراقه و إنا و إخواني كنا نقعد في غرفة الفندق ولا نتجرأ على الخروج منها ، لكن عملية عدم الخروج من الغرفة ما كانت مشكله بالنسبة لنا لان إحنا لقينا شي ما عمرنا تعودنا عليه ، لقينا تلفزيون يعرض قناة غير القناة السعودية ولا كانت قناة وحده كانت قنوات كثيرة و كل وحده منهن توسع الصدر أكثر من الثانية (أفلام كرتون كثر التراب و يحبها قلبك) ، صحيح إنا إحنا ما كنا نفهم وش يقولون لكن فكرة القنوات الكثيرة كانت كافيه بحد ذاتها.

بعد ما قعدنا في مدينة نيويورك حدود أربع أيام و بعد ما خلص الوالد أوراقه من الملحقية الثقافية السعودية ركبنا لنا طيارة ثانية و توجهنا إلي مدينة تمبي في ولاية ايرزونا لان الوالد كان بيبدا دراسته في احد جامعات المدينة.

الحقيقة ذاكرتي ضعيفة في تفاصيل بقانا في مدينة تمبي ، بس كل اللي أتذكره إنا إحنا سكنا في مجمع سكني عبارة عن بيوت متلاصقة و كل بيت مكون من دورين.

أتذكر إني إنا و إخواني عثينا في ذاك المجمع عثي و صفقنا كل بزارين الأمريكان اللي كانوا ساكنين في الجمع معنا (عرابجة حى عسير في أمريكا).

طبعاً تصفيقنا لبزران الأمريكان ما عدى بسهولة لان أم واحد من البزران جت لم بيتنا و بدت تهاوش فينا و في أمي اثنا ما كان أبوي في الجامعة ، و أول ما رجع أبوي من الجامعة و قالت له أمي وش صار ، راح أبوي لم بيت الحرمة و تهاوش معها و قال لها إذا قربتي من عيالي مره ثانية تراني بذبحك (أبوي يحسب نفسه في الرياض) ، الحرمة و بعد ما قال لها أبوي اللي قال اتصلت على الشرطة و جو لمن في البيت و ضفو أبوي و ودوه لم مركز الشرطة.

إنا مدري وش صار مع أبوي في مركز الشرطة بس اللي صار انه ثاني يوم ضفينا عفشنا من المجمع السكني بعد ما طردنا منه و انتقلنا لم بيت في منطقة ثانية من المدينة.

البيت اللي انتقلنا له كان وسيع و يحبه قلبك ، كان من كبره تراكض فيه الخيل ، و زيادة على كذا كان الباب الخلفي للبيت يطل على بران (ولاية ايرزونا الأمريكية مثلها مثل ولاية نيفادا و تكسيس هي ولايات فيها مناطق رملية شاسعة) ، عاد إحنا يا أهل السعودية نعز البر و علومه .

خلال فترة بقانا في مدينة تمبي و اللي امتدت إلي حدود 3 أشهر ما سجلنا الوالد في المدارس لأنه كان في نصف السنة اعتقد ، لذلك عندما كان الوالد يروح للجامعة كنت إنا و إخواني مغير دوجان في البران اللي خلف بيتنا ، الشي اللي ماني ناسية عن ذاك البيت و البران اللي فيه هو نحلة لسعتني لأني و من جهلي بالنحل (والله ما كان عندنا نحل في حى عسير) بديت أطارد ورا النحلة عشان امسكها ، و بالفعل مسكتها في النهاية و لسعتني في يدي ، بس يا كانت لسعتها توجع حسيت إن قلبي انتقل لم يدي و ترك مكانه في صدري.

بعد ما قعدنا في مدينة تمبي بولاية ايرزونا مدة 3 أشهر و بعد ما إنهاء الوالد ترمه الأول في الجامعة قرر انه ينتقل لم مدينة اركيتا الموجودة في شمال ولاية كلفورنيا ، اعتقد ان شبب الانتقال هو ان بعض زملا الوالد مدحو له الجامعة الموجوده في المدينة هذي.

انتقلنا لم مدينة اركيتا ، و هي ما كانت بالمدينة الكبيرة كانت اقرب ما تكون مدينة أمريكية صغيرة بس كان أكثر ما يميزها هو جمال الطبيعة فيها و ذلك لأنها قريبة من شمال أمريكا.

استأجر الوالد لنا بيت كامل في المدينة ، بيت يحبة قلوبكم ، كان قدام البيت و من خلفه ثيل ما ود الواحد اللي انه يتبطح فيه.

الحقيقة ذاكرتي عن ذيك الأيام ما زالت ضعيفة ولا اذكر عن المدة اللي أقمنا فيها إلا شي واحد يتعلق بدراستي سنة تمهيديه في احد المدارس الحكومية و ذاكرتي بالمدرسة هذي تتعلق بالمدرسة اللي كانت تأكلنا كل يوم صبح بطاطس ني ، و كانت تقول لنا انه مفيد للصحة.


بعد ما قعدنا في مدينة اركيتا حدود سنة انتقل الوالد لم جامعة ثالثة في مدينة هيوستن بولاية تكسس.

مدري كم قعدنا في مدينة هيوستنا و الحقيقة ما أتذكر أي شي عن إقامتنا فيها إلا البزارين المكسيكان اللي كانوا كل ما وصلنا باص المدرسة لم البيت اللي إحنا ساكنين فيها و اللي كان في مجمع سكني كبير ، كانوا يتمجعون على و على اخوي اللي اصغر مني و يصفقونا كل يوم (عرابجة حي عسير جاهم من هو أكثر عربجة منهم)

و الوالد الحقيقة ما تدخل في الموضوع لأنه كان يقول إن اهل البزارين المكسيكان ما ينمزح معهم.

أخر مدينة أقمنا فيها و اللي تحمل اغلب ذكرياتي عن أمريكا لأننا جلسنا فيها حدود أربع سنوات هي مدينة قريلي بولاية كولورادو.

و انشاءالله أتكلم لكم في الجزء القادم عن ذكرياتي الكثيرة في مدينة قريلي.

(يتبــــــــع)

مدري كم قعدنا في مدينة هيوستنا و الحقيقة ما أتذكر أي شي عن إقامتنا فيها إلا البزارين المكسيكان اللي كانوا كل ما وصلنا باص المدرسة لم البيت اللي إحنا ساكنين فيها و اللي كان في مجمع سكني كبير ، كانوا يتمجعون على و على اخوي اللي اصغر مني و يصفقونا كل يوم (عرابجة حي عسير جاهم من هو أكثر عربجة منهم)
يا حرااااااااااام بعد ماكنت اللي تصفق صرت المصفوق

اجل الله يستر من البقيه ..
..

[الطائر المهاجر]

يبدو بالفعل إنك كنت صغير لدرجة صعوبة التذكر لبعض الأمور :
جلسنا في مطار باريس ليلة وحدة فقط حتى نسوي كونكشن مع اتي دبليو اي لنيويورك.
جلسنا في نيويورك يوم واحد فقط ، واثناء جيتنا من المطار ، في شارع كوينز ، شفنا رجال طايح في وسط
الشارع ، والسيارات تلف عنه يسار ويمين ، وهذا افزعكم ، لدرجة إنكم يوم فتحوا عليكم الروم سيرفس ، خفتوا لايذبحونكم ، ويوم جيت ، بعد ما خلصت من الملحقية والاقيكم في وضع سئ ، وسافرنا في نفس اليوم لأريزونا.
مشاكلكم في سكن تيمبي ، ومطاقكم مع العيال ، لم يؤدي الى تدخل الشرطه ، كلما في الأمر اني شفت لكم بيت
آخر لكن ما حوله جيران كثيرين وهو اللي ذكرت ، وايضا لم نجلس فيها إلا تيرم واحد للغه، بعدها انتقلنا لأركيتا ، حيث ، كان فيه اتفاق بين الملحقية وجامعتها على تدريس مجموعة من المبتعثين من نفس الوزاره المكونة من حوالي 15 طالب.
لم نسكن في هيوستن ، بل جيناها على شان الملحقية فيها ، حيث كان سكننا في دنتن للشمال من دلس وما طولنا فيها ، يمكن تيرم واحد فقط . بعدها انتقلنا الى قريلي- كولورادو . ومطاقكم مع المكسيكان ، كان في غريلي ، فهم شياطين وانتم شياطين ، لكنهم تكاثروا عليكم ، والسكن كان رخيص وسبب رخصه بعده ونوعية سكانه ، وهذا ما ادى إلى اننا ننتقل لبيت مستقل ، واللي يجعلني اقول إنه في قريلي ، أن واحد من الزملاء عراقي ، زارنا في السكن ، وكان من اللي عايشين فيها ، ومتطبع بطباع الأمريكان ، وأول ما تغدينا حنا وياه ، قام وغسل المواعين ..

[الريم]

يا حليلللله اخيي الكبيير تسلمين شذا القصه الي اغلبها اول مره اسمع عن تفاصيلها

والله فله ذا الرحله واسبرانزا الخبل أثره شجاع من يومه صغير وأقول أنا كيف يروح لذا الديار الفلبين ومدري وشي ولا يخاف أثره مغامر من صغرته,,,

والله شكلي بكتب ذكرياتي يوم كنت صغير في الحاره ماعمري طلعت منها ألا للجامعه خخخخخخخخخ

والله يبي لي رحلة ويكون ابو عرب اسبرانزا معي علشان يفهمني الطبخه ههههههه

بس الله يستر سعودي وعربجي مثلي وطالع برا السعوديه بتصيبني نفاضه وصدمه وكسرة وشلل حضاري بعد

بس القصه حلووووة كملي ياشذا خلينا نعرف تواليها مع اسبرانزا

وأبو عبدالله الله يعينك ويغفرلك ويرفع مقامك عزالله أنك تعبت مع اسبرانزا بس عساه موب غاثك لين الحين ومهبل بك

خخخخخخخخ

حياة حلوة

[الــذاهبه]

ههههههههههههه

يعطيكم الف عافيه
وكل عام وانتم بخير

[ثار التميميه]

خخخخخخخخخخخخخخخخ

ياحليلك ياسبرنزا

والله لك ماضي حافل بالتجارب

[حي الضمير]

خالص الشكر والتقدير
على كل جهودك الرائعه
تقبل اطيب التحيه