ماهو اول حضور .. // مصافحه بعد طول غياب

[عبير الورد]

كفوووو يالبدراني

وهلابك ملايين

نورت المنتدى بعودتك يامرحبا فيك

وصح لسانك على هالجزاله
الغير مستغربه بإنتظار جديدك
ويامرحبا ملايين *

[عطر الياسمين]

روعه صح لسانك
تحيايت

[حوريه]

نص رائع وجميل من شاعر أجمل
ياهلا بك يا محمد
الحمدالله على ىسلامة العوده
تحيت لك وتقديري

[ماجد الزيد]

المشاركة الأصلية كتبت بواسطة محمد عبدالله البدراني

الاخوه الافاضل والفاضلات

اليكم هذه المصافحه بعد طول غياب واتمنى ان تجد القبول لديكم
والعذر يسبقها لتقصيري تجاهكم ولكن نتمنى ان يسعفني وقتي للتواصل معكم مجددا ان شاءالله:

ماهو اول حضور ولاهو آخر غياب = الله انه يكافي من الغياب الطويل
ليا حضرنا نسر اصحابنا ولانهاب = كل دربٍ عسير وندرك المستحيل
بشاية الله ولا لغيره حسبنا حساب = يوم ولد الردي يهناه عيش الذليل
وان حكينا صدقنا ونكره الاغتياب = وان وعدنا وفينا والفعايل دليل
يوم بعض الخلايق عايشٍ باكتئاب = بن حقدٍ دفين وبين حسد وغليل
يكره الطيّب من الناس خطو الغراب = بارد الوجه ماله بالشكاله حصيل
وتربة الطيب تثمر والخبيثه يباب = وكل شهمٍ جواد يعيش مثل النخيل
والعرب من مروتها تعشق الصعاب = ومن تعوّد على الهين القي به نزيل
يامسوي النفسك صرح كله سراب = والله ان الكريم يعاف عرف البخيل

وهذه تحيتي وتقديري لكم
مع اسمى ايات الشكر والامتنان اطيب المنى رعاكم الله
....
.,.
..
.

الله الله الله

صح صح صح الله لسااااااااانك مليون يالبدراني
وياهلا مليون بك وبالقاف الجزل يالجزل
اسمح لي بمجاراة تسعدني على جمال حرفك وجزالة غرفك

مرحبا مرحبا من قبل وبعد الإياب =ومرحبا مرحبا بسهيل ولا هو سهيل
ما تخيب الهقاوي في عزيز الجناب=عاسفه عود ضاري ما يرد الدخيل
اشهد انّك تغيب ويفقدونك صحاب=يوم غيرك غيابه مع حضوره بديل
عاسفك عود وضاري بالمراجل شهاب=السماء منزلك والذيب الاسحم عميل
نورك إن بان عوّى الذيب يقنب قِناب=الف مرحب هلابك يالبدر يالأصيل
إن شرّ الخلائق كلّهم والكلاب=من يعضّ اليمين تمدّ له بالجزيل
من يعدّ الجمايل , طيّب النّفس طاب=وناكر الطّيب ماله صاحب وْلا خليل
الحقود الحسود عيونه عيون داب=فرّته فرّة الحربا ووضعه هزيل
اعشق الطيْب وآقدر عيون الذّياب=وأكره الضبّعة العرجا بظهر الدّبيل

[منيع]

البدارني
الحمدالله على السلامة
تعود ويعود للشعررونقة وعذوبتة وابداعة
ياهلابك
تحياتي لكم

[نجم الإبداع]

ارحب يابو عبدالله

وصح لسانك على المصافحه الوافيه

لاهنت

تقبل مروري

وتقديري

[الطامي]

اهلا البدراني
صح لسانك واعتلى شأنك
جزله من راس جزل
ولاهنت

[عبدالعزيز العمار]

الله الله

ياهلا بالشعر واهله

صح كلك يامحمد على هطولك الفاخر

رائع وجزل في حضورك وعودتك

تحياتي لك مع التقدير

[محمد عبدالله البدراني]

المشاركة الأصلية كتبت بواسطة الطائر المهاجر

صح لسانك واعتلى شأنك
رائعة من شاعر رائع
ومتجدد الإبداع
دام ابداعك
تحيتي ومودتي

صح ابدنك يابو عبدالله

ومليون مليون شكر لمرورك الكريم المبهج


الابداع بوجودك والروعة حضورك لاعدمناك


بيض الله وجهك


واطال الله عمرك على العز والطاعه



تحيتي وتقديري
مع اسمى ايات الشكر والامتنان اجزل الثناء واطيب المنى رعاك الله

[الحمراني]

ابداع وشاعر مبدع
صح لسانك الف
ولا هنت
مع احترامي واجمل تحياتي