نمر بن صنت الحافي

[الطائر المهاجر]

خطو الولد سود ثيابه من العيب=مافيه من درب الرجاجيل خصله
مشتاله المدحور بالكبر والريب=قام يتزين له بليس ورقصــــــله
ترى كثير النبح مايحرم الذيب=يملا بطانه والكلاب تحرصــــله
وظل العدو لو تضربه بالمشاعيب=يضحك ومشعابك ثلاثين وصله
لي صار ضدك يحتمل للمواجيب=عطه الوقار ولاتنشد عن أصله
لاتستمع للي علومه رباريب=ليا جا لزومه كنه الفاس نصله

[الطائر المهاجر]

يا عبيد انا كني على الرجم مرصوص =مبداي في راس الطويل اتشفق
شفق على الي خاطري منه مبخوص =هرج الرخى من صاحبي ما توفق
انا على خلي من العقل منقوص =وعقله رزين ليا هرج لي ترفق
يتل قلبي تله الهجن مرصوص =تله عقيد وبالركايب ملفق
تله مناكيف على حزب عوص =والي على عوص النجايب مطفق
من عنز ريم حازها زيله قنوص =لا عورجن قبل الجميله تصفق
دار سكن في جانبه حصه الغوص =عليه بدري السحايب تدفق

[الطائر المهاجر]

هذه القصيدة وجدتها في موقع منسوبة للشاعر

أتغرب واسافر عن عيونـك .. واجيـك=وأتحرى من اللهفـه .. يجينـي عطـااك
واهجرك واتناسى .. واذكرك واحتويـك=شفت كيف الغـلا خّلانـي امشـي وراك
والله انك بعيـن الصاحـب اللـي يبيـك=لاكـن الوقـت عيّـا .. لايحـدد لقـاك
فـي نهـار المـوداع دمعـةً ترتـويـك=آآه واقلبي اللـي .. مبتلـي فـي غـلاك
ضمّنـي يـوم مالـك بالحنايـا شريـك=بس انا .. وانت .. والثالث حبيبي هواك !
كـل ضلـعً يضمّـك بالغـلا يشتكـيـك=لعنبو ها الغلا ... مافيـه غيـر الهـلاك
كل ماجيت أبصبـر وانتظـر واحتريـك=قمت أدّور حبيبي عن سماهـم .. سمـاك
صرت كلي مواكب لين صـرت المليـك=واعتبرتك معي مثل القمر ..في بهـاك !
كثر ماجيـت يمّـك مهتـوي وارتجيـك=كثر ما لمت نفسـي يـوم تنشـد رجـاك
ياعسـى اللـي بلانـي بالهـوى يبتليـك=يمكن تحس في قلـبً .. يهمـه رضـاك

[الطائر المهاجر]

هذه الابيات قالها الشاعر نمر بن صنت الحافي العتيبي بمناسبة افتتاح مهرجان الجنادريه عام 1405هـ

اقول يوم اني بديت المنصه= هذا بعد جاني خطاب القياده
يوم أن كل جاب شعره وقصه =انا لي مع الشعار من قبل عاده
احدٍ ليا منه بغا الشعر رصه = واحدٍ ليا منه بغى الشعر اكاده
كل من الشعار في مايخصه =وانا اختصاصي لابسات القلاده
اضبط معانيه واجيد نصه= واقول شعر الغزل بوزن وركاده

[الطائر المهاجر]

وله قصائد اخرى سنحاول جلبها

يا صاحبي جيته على وقت شطه /// عقبني المظهور وأنا عقبته
لو صاحبي يكتب ترجيت خطه /// ولو صاحبي يقرأ جوابي كتبته
************** ************** ********
صاحبي وده يشيل القلب كله /// جوّد العرقاه من بين الضماير
ياهني اللي شبع من هرج خله ///قبل غل الموت وأيام الدواير
************** ************** ********
اعرضوني على خلّي ترى الموت جاني /// وأحفر القبر ما بين النهد والذويبه
كيف هاذي سواته ما بقلبه حناني /// كيف يسطي على قلبي وأنا من عتيبه
************** ************** ********
ليتنا يا سعود ما جينا الشواوي /// ما خطرناهم ولا شفنا مليحه
ليتنا رحنا مع الجو الخلاوي /// قالها السايق ولا طعنا النصيحه
************** ************** ********
يا معذب الناس يا ويلك من الخّير /// نهار جمّا الغنم تقنع بالانصافه
لا تحسبني مع الخفرات متغّير/// لو تجمع البيض قدم البيت وخلافه
************** ************** ********
امنعوني من هوى الغالي ذبحني /// كيف ورع اجناب ياخذني وساقه
ليت جاني واحد عنها نصحني /// من هل المعروف ورجال الصداقه
************** ************** ********
قال خلي ترى قلبي مثل بيت الأرضه /// قلت قلبي على شوفك تفّرت حياضه
لو عشيري عطاني من شفاياه قرضه /// شربتن عقبها قلبي تربع فياضه
************** ************** ********
يا هني من مر خله لو بعض ساعه /// مقدار فنجال وأخذ غاية الغالي
يا قلبي اللي تصبر والهوى لاعه /// كما تلوع الهبايب عشب الأسهالي
****************************** *******
جيته نهار العيد ثم قلت يا صاح///بين ليَّ الغاية؟ وكنه أخجله!
وعودت أكن الغيض والغيض ذباح///باغ رضاه، وخايف من زعله

[داعي الشوق]

إختيار موفق يالطائر المهاجر

بارك الله فيك وعساك عالقوه

تحياتي لك مع التقدير ،،،

[ابراهيم عبدالحميد]

استاذنا القدير

تحية تقدير و إعجاب لإختيارك الراقى المتميز
دمت و سلمت و غنمت

[داعي الشوق]

شاعر و فارس له الكثير من

القصائد الجميلة و المشهورة

[عالي مستواها]

الطائر مجهود رائع تسلم يدك


ومشكور على هذ النقل امتعتنا


قصيد رائع صح لسانه


لك احترامي

[نجم الإبداع]

شكرا لمجهوداتك الرائعه دكتورنا

لاهنت

تحياتي وودي