أبوأنس/الشرقي .. والقوافي المشبوهة !!

عز الله اللي من دخل عندكم عاف
زين البني ما بين فرس وشامي
لا شاف ناس تضبط الوزن والقاف
بابيات تنقش فوق عمد الرخامي
صفت معانيهم ومن غير تصفاف
هي موهبه؟ والا بدا الرد حامي؟

[الشريف الشرّقي]

يا اللي سجنت الحرف متاك تَفّرِجه ؟ = متى على الله يابعيد الهقاوي
ارفع لك الكبوس ياشيخ واعوجه = والبسك تاج الشعر والغناوي
قبلي ركبت "كروش" من دون تسرجه = وأنا ركبت شطونها البلاوي
ياكم غريرٍ لابغيناه نفلجه = من دون مانرفع عليه الدعاوي
والارنبة قبل القنص لزم ننفجه = يازين نفجتها بقاعٍ خلاوي
والاجودي لوطاب ياصعب مخرجه = يلوي عليه من الصواديف لاوي
زبدة حياتي كلها يا أبيض الوجه : ="الموت عندي والحياة متساوي"

[الشريف الشرّقي]

الفاضلة / وعد العبدالله
ماهي حسنة هذا المقال التي جعلت شاعرة قديرة تكرر المرور وتثني الحضور ؟!! لست أدري.. غير أن فضل ربي لايزال يغمرني وله الحمد والشكر ..
أخوكِ في الله .

[الشريف الشرّقي]

أخي الطيار ..
الحاء ثم الياء والمد والكاف
(حياك) ياطيار وأحلى سلامي
عينٍ لكم شرشف وعينٍ لك لحاف
زانت بك الصفحات يابن الكرامي

[الشريف الشرّقي]

أحلى من السكر ليا صِب بغراش=وأحلى من الكبسة على زند حاشي
وأغلا من المليون لا لِزمت كاش =معك الشعر يا أبو أنس بنتعاشي
واللي نواك بشر يا خوي ما عاش =دون الخوي ضرب التفق بالكلاشي
ويا واش يااللي تنقل الهرج يا واش=والله فلا اسمع فيك حاسد وواشي*
يسقي ديارك يا أبيض الوجه رشاش= تفرح بها ذيك الحزوم العطاشي
ويا خوي أنا لي عام مانيب معتاش = أزرن بقلبي لابسات الغواشي
ساعة نظرته صار في البال وشواش= وزعقت بالصوت القوي :ياخراااشي
تكفى تشوف له ترى الترف منحاش = أما تجيب العلم ولا بلاشـي

* ياواش.. كلمة تركية تعني : على رسلك، تمهل

[ابو أنس]

اللي رماك بسهمه وهج وانحاش=أكيد بارع ما رما به طواشي
سدّد على قلب الهدف سهم ما طاش=صيده فحل غالي ولاهوب حاشي
دَرَس وخطط واحكم الدرس ماهاش=عربن بضحكه كاصطفقاق الغراشي
رنّة نغم ترنيمه ولمحة فلاش=بيض النواجذ في ثَغَرها فلاشي
ماالوم قلبك ماغدا رابط الجاش=لو كان من صم الصخر كان جاشي
وانا اتعجب وانبهر كل ماجاش=قلب(ن) على الخفرات واصبح طشاشي
وشلون ذا الرقّه تجي قوة كلاش=طريحها ما ذاق لين الفراشي
ياصاحبي تكرم ويفدونك اللاش =ابشر وانا بامرك رهين(ن) وماشي
وابا انهم الطيّار وابلغ الماش=واللي سرح في صبحها والغباشي
واكلف الأقمار ترصد بالاحراش=تلقط صور للسايمه والخشاشي
وانا على الفكس آر راحل وطرّاش=أرايله فوقه ابد ماتناشي
ابا اطلبه لو كان في ديرة اوباش=او كان في بومبي او في كراشي1
او في ديار الغرب او دار الابواش=حمر العلابي كيفهم في الغراشي
او كان في المغرب او بدار الاحباش=او في اليمن وعمان واهل المحاشي
كله عسى قلبك يعوّد للاِنعاش=والنفس من شوفه يجيها انتعاشي
وان ماحصل قصدي فلانيب غشاش=اما العذر والا فلا نيب ماشي

1)كراتشي

ابتدأتها ورقيه وانتهت كيبوريه وفي الحالين لم تراجع
فالعذر عن الخلل والزلل
ولك تحية تشبهك

[ابو زياد]

ترانا معكم ونشيك على صفحتكم كل يوم
فلا تحرمونا الاستمتاع

[سناعيس]

واكلـف الأقمـار ترصـد بالاحـراش ==== تلقـط صـور للسايمـه والخشاشـي


أن أشهد ان الشعر ماهو للاوباش ==== هذا الشعر ياناس والا بلاشي

الشريف الشرقي
أبو أنس
عزالله أنكم وسعتوا صدورنا
وعزالله أنكم تقاضيتوا لنا وشفيتوا غلنا من كلمات طالما عصت علينا فطوعتوها لين ارتويناها درر
لله دركم وياليتكم تواصلون

[الشريف الشرّقي]

في ذمتي –لوكان ماعندكم صك- = انك ملكت القلب من دون صكي
دايم ادور عنك وابحث عن (النك) = لجل يتبارك يا أبيض الوجه نكي
وان ما حصل (بالوورد) نكتب (بِيك)= ولا على الجوال قلته بفكي (1)
قلته .. وأنا اللي في بحور الهوى رك = ركت بوانيش النواخذ بفلكي (2)
ياكم سقاني صاحبي علقمه (سك) = قد شفت واحد يشرب المر سكي
اقوى من الفولاذ وانعم من السلك = صاحي وريقه ياسعد فيه وسكي
سيطر على الخقاق من قوة الدك = حسبي على اللي ماتوانى بدكي
قالت : منين ؟ وقلت : شرقٍ من (عنك) = قالت علينا !! أنت ياواد مكي (3)
طيب حجازي قول يازين إشبك= هُوَ الحجازي عند الاجواد (منكي)
قالت حشا .. مافيك ريبة ولا شك = لكن أنا من نسل فيصل وتركي
قلت :اسمعي لا يكثر الهرج والهك = ترى الحكي لا طال سموه عكي
وش عاد لو كنتي من العايلة تلك = انا ولد هاشم ولانيب زنكي
اقلط على حد الخطر واطمر الشبك= ولاهمني سور القصر والبلكي (4)
واستغفر الله واتعوذ من الشرك = الملك للرحمن ، والسيف ملكي

(1) pic قلمٌ فاخر يستخدمه اصحاب الطبقة ألمـ خمـ ليه ..؟!!
(2) البانوش نوع من السفن
(3) مدينة جميلة تقع بين فكي قطو
(4)هذا البيت فيه مهايط مو طبيعي

[الشريف الشرّقي]

أبو زياد / سناعيس
كلامك ياحبيبي أنت وياه يحرج .. ويفرح في زات الوقت

سعيدٌ كل السعادة - علم الله - بوجودكما أيها الشاعران الفاضلان .