محاوره فكاهيه وتحدي القافيه

[الطائر المهاجر]

لقيت ذيب السنافي = يمشي على الزفت حافي
سألت وش بك عوافي= قال المره اطردتني
قلت الهرج ماهو شافي= اكيد تحت اللحافي
عطيتها ظهر جافي = تقول هي اتعبتني

[نجم الإبداع]

الوصف هذا خرافي = واقول يالله ياكافي
ترفق بذيب السنافي = والقصه حيل احرجتني
الذيب ياشيخ وافي = نبعه من الود صافي
سهمه تعدى المصافي = خلا الفطاحل تغني

[الطائر المهاجر]

اظن ما عنك خافي = فحّط بسبع الملافي
جوه المرور متخافي = وقالوا على وين لافي
قال الفكر والشغافي = معها وانا صرت طافي
في نهر ماله ضفافي= من يوم هي ابعدتني

[نجم الإبداع]

الله يعين القوافي = في ليل والبعض غافي
احترت بين المرافي = والبوصله مربكتني
القاف معك انجرافي = قرب وهات الطرافي
واحذر يجيك انحرافي = خذ القسيمه بمتني

[الطائر المهاجر]

نبي ندور غيره

لقيت لقيت فلاح وواحدٍ هواشه = ولادري من اللي باديٍ في نقاشه
قلت اصبروا ليش اللجد والدحاشه = قالوا تودر منت ياصاح مسؤول
وبديت اشوف الدم ينثر طشاشه = قلبي رهيف وفي ضميري هشاشه
وفلاح او عنتر يجهز فراشه = انحاش لكن جاء على النعش محمول

[نجم الإبداع]

هلا يابو عبدالله
محشوم

خل السوالف لايجيك ارتباشه = وخلها ليله لخاله قماشه
هات النكت من بحر دون ارتعاشه = اخوان حنا والعدو قوم شاؤوووول
والله لو حاضيت ولد الطفاشه = انك لتضحك لين تغدي طشاشه
من حبكة النكته يدغدغ مناشه = يازين راعي النكته للناس مقبووووول

[الطائر المهاجر]

مادام ذا مرادك تركنا الغشاشه = ونرجع على اللي ما يكافي معاشه
اموظفٍ مسكين ريّسه داشه = ظهره تحودب دايم الدوم مشغول
واليا رجع يلقى الزعل والدفاشه = ومرةٍ تبي مصروفها والإعاشه
وذاك الضعيّف قبل ياصل فراشه = يطيح في المجلس ولاهوب مشيول

الله الله

صح ألسنتكم وخذوا راحتكم الله يبيحكم ويحللكم ترى أنا مبسوط أنكم توصفون فيني بس عاد يابوعبدالله جبت العيد خليت المرة طاردتني وأنا حبوب ولين قول وايدياتي لها سحراً مايقاوم

خخخخخ

[نجم الإبداع]

عثمان في عهد الصبى وانتعاشه = سافرت ديره ربعها في هشاشه
وشفت لي شايب مجمع غراشه = يرقص مع الزينات وتقول مهبول
عرفت زوله واستمعت ال نقاشه = ماهو غريبٍ تعرفه كل شاشه
عقب السهر شالوه كــنه فراشه = ماتسمع الا الصوت والسان مدلول

تصبح على خير

[نجم الإبداع]

هلا ومسهلا
اخوي ذيب
حضورك نوماس وشرف

لاعدمتك