موت الفتى ..وما بعد النفط

[الطائر المهاجر]

موت الفتى في ماقف العز ساعه = ولا حياةٍ بالمذله مية عام
والعز ماهو جمع مال وطماعه= ولا هوب جاهٍ تاصله عند خدام
العز حب الدار والدين طاعه = وضمير حي ماتبدله الايام
وحقٍ تقوله عن يقين وشجاعه = حتى على نفسك وتقبل للاحكام
وعدو جدك لاتصدق خداعه = لو هو تبسم في ضميره لك الغام
ياتيك من كل الفجوج بلكاعه = من شان تامن له ويغدرك قدام
وان كان تنسى ما حدث بالتياعه= فارجع الى التاريخ تفهم للازلام
فارس وروما مع بعضهم جماعه= وانت العدو وثارهم مايبي افهام
حتى ولو عاملتهم في سناعه = الحقد باقي مابقى دين الاسلام
لكن وجود النفط اعطى مناعه=فكل الخلق تبغاه من سام او حام
واليا انتهى ماعاد عندك شفاعه = تشوف شي ما خبرته بالاحلام
ما دامهم من طوروا للصناعه = وانته على وضعك مفاطيح ويدام
تستورد لأكلك وغالي البضاعه = ولو وقفوها عنك عضيت الابهام
لا رز او قمح حظى بالزراعه = وحتى البعير اصبح بمليون ينسام
يعني مهدد بالفقر والمجاعه = لا خلص البترول نصبح كالايتام
عمره محدد ما يبي له رماعه = ومن قال غيره عايشٍ وسط الاوهام
واللي سرق واللي اخذها بذراعه= يرحل لأوروبا ولاحس بالام
مستقبلٍ يخفي وراه الفضاعه = من دون تخطيط سليمٍ للايام
وضمير حي فيه عزم وشجاعه = يبني لمابعد النفط صرح باحكام
مزارع في كل سهل ورفاعه = ومصانع تنافس ولا هابت زحام
وتجنيد للشبان يمحى المياعه = وتوجيههم للشغل ماعنه احجام
قبلك امم كانت بعز ومناعه = واليوم يطلب شعبها شغل خدام

[نجم الإبداع]

لقد اسمعت لو ناديت حيا

صح لسانك يادكتور

لاهنت

[منيع]

جزل ومبدع وحكيم
جزيت خيرا
تحياتي لكم

[ساهر الليل]

صح كلك يا شيخ

لقد نطقت بما ولج في الصدور

قصيده كايفه وصادقه من شاعر

مبدع في كل حالاته ,,,,,,,,

تحياتي لك

[هترل]

ليت الاصم يسمع وليت الاعمى يرى..
صح لسانك يادكتور واعتلا شانك
جزل بكل ما تعنيه الكلمه لاهنت ولاهان فكرك

تحياتي وتقديري

[عبدالله السويلم]

صح لسانك
كلام من ذهب
تحياتي لك

[سعيد عوده الحويطي]

الله الله يادكتور لو علم الغافلين عن الامر المحتوم ولكن للاسف انه حتي العارفين بالامر يتجاهلونه ولاحياة لمن تنادي لافض فوووووك وبارك الله فيك.

[مشعل التريباني]

اخوي الطائر المهاجر
هنا تجلت الشاعريه وفن الكلمه وهندست الابداع
وحكمة لقمان الحكيم هكذا يكون الشعروالا فلا
صدقت والله بكل كلمه في هذه الرائعه لافظ فوك
ايها المبدع تقبل تحياتي وفائق احترامي ياطائر الابداع

[داعي الشوق]

صح لسانك يا دكتوور

ابدعت ولاهنت

ولا هان فكرك

و دمت بخير

[الراقي]

صح السانك على هـــ الجميلــــة
رائع شعرا و حضورا
دمت بِكُلِ مَوَدَةٍ