المملكـة فـي عــزة الله

عبدالله الشويمان · 22-09-2006, 12:26 AM

بمناسبة اليوم الوطني اضع بين يديكم هذه القصيده...

بسم الله ابدا ثمن آضيف وقول=ابيات شعرٍ جعلها يشرفنـَّا
ثلاثه وعشريـن سبتمبر/أيلـول=من كل عامٍ نحتفـل فـي زمنَّـا
ذكرى بداية لمة الشمـل مدلـول=حب الوطن وموحـدٍ إلوطنَّـا
عبدالعزيز اللي حمل سيف مسلول=بالواحد المعبـود قـال استعنَّـا
يومٍ أمـره الله سـرَّج للخيـول=في فزعة الشجعان ما خاب ضنَّـا
الأربعين اللي لهم فكـر وعقـول=قالو لرياضـك مستعديـن حنَّـا
قال الحكيم اللي له الزند مفتـول=يا لله توافيقـك علـى ما انتمنَّـا
نهم ربوع له فوارس على طـول=ركبوا ظهور الخيل ولا أحدٍ تونَّـا
فزوا كما شهبٍ جماعة بلا فلـول=يسابقون الريح من دون مـنَّـا
والكل بارود ومعه سيف مصقول=وصلف البنادق مع رصاصٍ يخنَّـا
بالرأي والحكمة وتخطيط معقـول=نالوا رياض العز وزانـت وزنَّـا
نادى المنادي صوت عالي ومعدول=الحكم لله ثم لبن سعـود سنَّـا
وصرنا سعوديين كافـل ومكفـول=من فضل ربي ثم من جـاه بنَّـا
ابن سعود الباني أللي له الطـول=عبدالعزيز يمنـى بيمنـاه كنَّـا
وحد ربوع المملكه زين الفعـول=ورفع عليها راية الدين وهَنـَّا
من ذلك التاريخ حولٍ بثر حـول=المملكة في عزة الله فنَّـا
ببناء اخو نوره صفيين العقـول=تطورت فوق السحايب تغنَّـا
حكام شرع الله والعدل معمول=في مملكتنا دون قولت اضنـَّا
واليوم قاد المركبه طيب الزول=عبدالله بن عبدالعزيز ما تونَّـا
اخوانه عضوده على شيل الحمول=والشعب معهم يحتمون لوطنـَّا
هذا وصلاتي عد حامل ومحمول=على النبي اللي لهديه ركنـَّا

وسلامتكم

سناعيس · 22-09-2006, 02:23 AM

عبدالله الشويمان

صح لسانك
وطنية جزله وتحكي تاريخ مجيد
الله لايهينك يالغالي

تحياتي

الخنساء · 22-09-2006, 03:47 AM

صح لسانك اخي عبدالله
بيض الله وجهك ولاهان راسك
ويستاهل وطننا
سلمت وسلم شعرك
دمت بخير

جزاء الحارثي · 22-09-2006, 07:02 AM

عبدالله الشويمان

قصيده طيبه وفي حزتها

صح لسانك

مهدي الحبابي · 22-09-2006, 07:31 AM

أخوي عبدالله الشويمان

ســلــمـت ودمـــت

صح لسانك وبيض الله وجهك

رايعه ووافيه من وافي

الله يعيد علينا وعليك وعلى الجميع المناسبات العزيزه

لك فااائق احترامي وتقديري