في زمان تغير ضعت في المعمعه(بالصوت)

[الطائر المهاجر]

في زمان تغيّر ضعت في المعمعه = بين فكرٍ تزمّت وآخرٍ بانحلال
وبين خادع منافق لغز ما ترمعه = له وجيهٍ كثيره خادعه للرجال
ذاك لو هو تزمّت يعرفه من معه= طيب القلب فاهم دنيته والمآل
البلى من ترهبل ولْبس الأقنعه = يظهر الدين لكن عايشٍ باحتيال
مستغلٍ لوضعه والزمن لمّعه = لو يحلّل حرامٍ قيل ماله مثال
ولو تناقش كأنك قاصدٍ تلذعه = ينبري لك هجوم ولا يجيب السؤال
ولو تقول المطوع طاح في مخمعه= قيل قولك حرام وعنه يومٍ تسال
استمع لاتناقش واللسان ابلعه = فلحمهم فيه سم ولو خطوا بالفعال
يعني إنك تحوّل منشفه وامّعه= تقبل اللي يقولوا لو عرفته خمال
وان تجادل يحطوا وصف ما اقذعه= فانت ملحد وعلماني وقتلك حلال
ما كأن الشهاده فوق هالأربعه= تمنع اللي يدوّر وصف بالإفتعال
رهبنه جت دخيله بابها ما اوسعه= وشرع ربي رفضها مايبي له جدال
ما يقر التوسط ولا اعترف بشفعه = غير للي بعثه الله يمحي الضلال
من ترهبل فحنا بالجهل نصنعه = لو تركناه وحده ما لقى له مجال
راح وقت الترهبل والزمان اقشعه = وان بقى به بقايا تنتهي للزوال
ديننا للجميع وكلنا نتبعه = ما نبي من يتاجر طامعٍ بالنوال
فالوطن شرعه الإسلام ما ضيّعه = فيه مجلس قضاء وافتاء بكل الكمال
ما يقولون خذنا وما نهوا نمنعه = وغيرهم ما نبي فتواه بين الرجال
ومن وضح بانحلاله لو تطول اذرعه= خاسرٍ في النهايه لو يطول المطال
مثل هذا تأمرك والعدو اصنعه = صار عبدٍ ذليلٍ ينشرى بالريال
صك باب الضمير وتربسه وشمعه = وطار يلهث وراهم من يمين وشمال
لاتحسف على مثله وذا مطمعه = لو وصل للثريا ينفصخ كالنعال
والخطر من منافق يعجبك مسمعه = باع دينه بدنيا لاجل جاهٍ ومال
مثل هذا المصالح لو معك تجمعه = احذره ثم حاذر لو رخى للحبال
كل همه بنفسه والجشع شجعه= مستعدٍ يبيعك لا لقى بك مجال
اتركه عنك وابعد لا تجي موقعه= مقعدك معه نقص وفي النهايه وبال
ودوّر اللي بقلبه دين ما دنّعه = نظرةٍ للدراهم في الخطب والمقال
لا بخصته عرفته رجل ما اسنعه = ماشي في حياته في الوسط باعتدال
ينصحك من ضميره لو خسر مامعه= يرجي الله ولا غيره وحسن المآل

[إستبرق]

النفاق وما أدراكـ ما النفاق

صفــة تحيا بأعماق من لا ضمير له

إشتقت لأبـداعـآتكـ إستـآذي ..

فأتيت مسرعـة لأستمتع بلوحـآتكـ

نــص لا يسطـره أحـداً سـوآكـ ..

لا فض فوكـ ودمـت بأمـان وإطمئنـان ..



إستبرق

[الطائر المهاجر]

شكرا استبرق
على كريم المتابعه
لاهنتي
اطيب التحيه

[منيع]

مبدع وجزل شكرا لك
تحياتي

[الطائر المهاجر]

شكرا منيع
على كريم المتابعه
لاهنت
اطيب التحيه

[الطامي]

صح السانك
اكثر من رائعه وصوت عساه ماينقطع منا

لاهنت

[الطائر المهاجر]

شكرا الطامي
على كريم المتابعه
لاهنت
اطيب التحيه

[داعي الشوق]

صح لسانك يادكتور
ابداع جزل وكايف وغير مستغرب
دمت بخير ودام ابداعك

ولاهنت

[الطائر المهاجر]

شكرا داعي
على كريم المتابعه
لاهنت
اطيب التحيه