تعلم الشعر ((3))خطوات عمليه لكتابه الشعر

[يوسف الشقران]

خطوات عمليه لكتابه الشعر


تنويه في البدايه انه هالموضوع رقم ثلاثه

يعني لاتطمر وتقرا هالموضوع وانت ماقريت الموضوعين اللي قبله

لان هالموضوع بروحه ماراح يكون مفيد ولاله اي قيمه

ــــــــــــــــــــ

الموضوع : ( وراح اختصر قد ما اقدر )


في الموضوعين اللي قبل عرفنا شلون نكتب شعر
( هذا المفروض يكون )


!!!!!

بس كل اللي فات كلام نظري

يعني نظريا صح

يفترض بان اللي طبق الكلام في الموضوع الاول والثاني
خلاص صار يكتب شعر

بس هالكلام لازال نظري !!؟؟!

انا ابي فعليا لما امسك قلم واكون ناوي اكتب شعر
هل راح اقدر اكتب شعر ؟!؟!؟!؟!؟




نعم تقدر




وهذا هو موضوعنا هالمره


واهو خطوات عمليه لكتابة الشعر
( وانا بطبيعة الحال افترض انك خلاص استوعبت اللي بالموضوعين اللي قبل )

خلنا اول شي نتفق علي هالامر واللي اهو

ان القصيده قسمين


1-الفكره (خمسين بالميه )

2- الصياغه والوزن والقافيه و .......الخ ( خمسين بالميه )

!!!!

هذا اللي انا شايفه


مسألة الفكره ما اقدر اسوي فيها شي
هذي ترجع لك انت
وترجع لحياتك وترجع للموضوع اللي تبيه
(وراح اتكلم عنها بموضوع مستقل انشاء الله)


ولكن الامور الثانيه ممكن نتعامل وياها

ــــــــــــــــــــــــــــــ ــــــــــــــــــــ

الكتابه العمليه للشعر

وهالموضوع راح نقسمه لمرحلتين


1- الاستعداد والتدريب

2- مباشرة الكتابه
ـــــــــــــــــ

المرحله الاولي:

1- الاستعداد والتدريب

لما تبي تلقي محاضره او درس عن القدس مثلا
لازم تقرا تاريخ القدس
وتقرا السياسه وتجهز امورك ..... صح ؟!!!؟؟!


قبل لانكتب



ياليت اتحاول قد ماتقدر تسوي هالامور :

1 - اقرا شعر فصيح
( اول شي لاحمد شوقي والشعراء اللي عاصروه وبعدين اقرا المعلقات حتا لو مافهمتها )


2 - اقرا واسمع لهالشعراء
(خلف العتيبي - سليمان الهويدي - خالد الفيصل - محمدبن راشد المكتوم - سعود بن بندر - عبدالله الفيصل - مرشد البذال - طلال السعيد )
بس هذولا وانا مختارهم بالذات متعمد مو معناتها مافيه غيرهم لا فيه
و يمكن افضل بس ابيك تسمع كلامي
واعتمد


وارجووووك
اترك شعراء هاليومين لانهم راح يخربون مستواك
( شعراء هاليومين ذبحونا بهالكلام
نعنبوها ونعنبو جدها ويلعن خيرها والله ياخذ خالتها....
مادري أي غزل كله شتايم
شوي ويقولون يابنت ...... المهم )





3- درب نفسك علي كتابة الشعر !!

شلون ؟!

انا اعطيك هالطريقه وحاول تسويها

اختار اي بيت شعر وحاول تكتب علي نفس منواله

وعلشان تسهل الامر علي نفسك
اكتب الكلمات اللي تخدم قافيتك براس الصفحه عشان تكون حاضره قدامك


مثال :
والبيت لسعود بن بندر الله يرحمه





ياليتني بينـك وبيـن المضـره
من غزة الشوكه الي سكرة الموت





براس الصفحه اكتب الكلمات اللي تساعدك

مضره : مسره - مبره - جره - مره - مجره .......الخ

موت : فوت - صوت - حوت - قوت - مكبوت - .........الخ


واقعد ركب





ناديتلـك ياغايتـي الـف مــره
وان فات فينا الفوت ماينفع الصوت

ماشفت ياعمري بعمـري مسـره
والضيم فيني طول الازمان مكبوت


وهلم جره



تحدى نفسك بالكتابه وحاول تكتب 4 او 5 ابيات نفسه
واذا خلصت اختار بيت غيره واكتب علي شاكلته
( وكرر هالعمليه لان الممارسه مهمه)


ـــــــــــــــــــــــــــــ

المرحله الثانيه :



قول باسم الله


قبل لاتبدأ


- تاكد انك اذا لقيت الفكره ف خمسين بالميه من القصيده خلص

- حط في بالك ان الكتابه امرها سهل مو شي معقد

- اعتقد وامن بانك تقدر تكتب شعر

- تأكد ان المساله مو الهام او وحي ينزل عليك

كل المساله حاله من الاستعداد الذهني والنفسي والعاطفي
فهيئ الجو المناسب للكتابه بعدين راح تلقا الامر عادي
يعني جو الهدوء والمكان الحلو والبراد ...

وصدقني مساله الجو المناسب بعدين تصير مالها داعي
يعني انا
ما اكتب الا وعندي ناس مزعجين يسولفون
او وانا اطالع مباراة كره قدم


المهم ..

صل علي النبي



2- مباشرة الكتابه

أ - الكتابه الاوليه
ب - تعديل المعاني
ج - ضبط القافيه
د - ضبط الوزن
ه -اعتماد القصيده


وراح نتكلم عن كل نقطه بروح :


أ - الكتابه الاوليه
(اكتب بالفكره اللي تبيها و لاتعقد الامور
ولا تركز حيل علي المعاني لكن حاول تكتب اللي في بالك
وحاول تسترسل قد ماتقدر
وكثر ماتستبسط الامر راح تلقاه بسيط )

(قول بسيطه ماتستبسطهاش) ===>> مالها شغل بالموضوع



ب - تعديل المعاني
( يعني مثلا لاتذكر المؤنث او تأنث المذكر ولاتجمع المفرد او تثني الجمع
وانتبه للمعني اللي انت كتبته مو المعني اللي في بالك )


ج - ضبط القافيه
( والقافيه تكون من حرفين او ثلاثه في الغالب
وانتبه للتشكيل
مثلا كلمه يختلف بكسر اللام وكلمة اختلف بفتح اللام !!
صحيح ان اخر ثلاث حروف نفس الشي بس التشكيل للحرف اللي قبل الاخير عفس الدنيا وخلاهم مايضبطون .
و ممكن تتبع الطريقه اللي قبل شوي
انك تكتب الكلمات اللي تساعدك براس الصفحه وتستخدم هالكلمات )

د - ضبط الوزن
( مسالة ضبط الوزن راح تكتسبها مع الممارسه
لكن الحين حاول تغنيها بنفس اللحن راح تجي معاك
و بالموضوع الاول سولفنا عنها وراح انتوسع فيه مستقبلا اذا الله اراد )


ه -اعتماد القصيده
( اذا كتبت قصيده واعجبتك اكتبها وانساها علي الاقل اسبوع وبعد الاسبوع اقراها
طبق هالمسأله ولا راح تندم صدقني )




ــــــــــــــــــــــــــــــ ــــــ


وانت تكتب ..

- حاول تبتعد عن القوافي الصعبه لانها راح تاذيك


- ولاتستعجل مسالة اتقان الوزن كل شي بالممارسه



بعد ماتكتب ..

- ابحث عن اخطاءك وانقد نفسك بنفسك

- قارن أي قصيده تكتبها بقصيده مشابهه لها


- اعرض محاولاتك علي ناس تثق انهم ينصحونك ولاتزعل من النقد
ومو بالضروره ان اللي ينقدك شاعر يكفي أي متذوق للشعر انه ينقدك
اهم شي يكون صادق

(وللعلم النقد فيه بناء وفيه غير بناء
البناء هو اللي يقولك عندك خطا كذا وكذا ويبين شنو الخطا ووين صايراذا قدر
والغير بناء اهو اللي يقولك انت عندك اخطاء
ولايقول شنو او يقول لا فيها نواقص ولا يبين او يقول شنو هالنواقص )



شوف




القصيده اساسها الفكره

فاذا الفكره اخذت 4 ابيات في التعبير عنها

ف هالاربعه كفايه مو بالظروره اتمطط الفكره عشان اتصير طويله


عط كل شي قدره

ياما ابيات مفرده وبروحها تسوالها قصايد من مية بيت



ومسالة الفكره موضوع كامل بروح

(انشاء الله )



ــــــــــــــــــــــــــــــ ـــــــــــــــــــ


سامحوني علي التقصير وعلي تشعب الموضوع

واذا فيه اي شي مو واضح اتمني احد يقولي



انا حاضر لاي تساؤل او سوال او اقتراح ممكن افيد او استفيد منه

( بالنهايه هذا اجتهاد يحتمل الصواب ويحتمل الخطأ )

واي ملاحظه او تعليق ياليت يكون في الموضوع الاول


وللموضوع بقيه


ــــــــــــــ
ـــــــــــــــــــ

الدرس الأول على هذا الرابط
http://www.fatahilah.com/showthread.php?t=884
-----
الدرس الثاني على هذا الرابط
http://www.fatahilah.com/showthread.php?t=9319
----
الدرس الثالث على هذا الرابط
http://www.fatahilah.com/showthread.php?t=9446
---
الدرس الرابع على هذا الرابط
http://www.fatahilah.com/showthread.php?t=9689
---
الدرس الخامس على هذا الرابط
http://www.fatahilah.com/showthread.php?t=9752
---
الدرس السادس على هذا الرابط
http://www.fatahilah.com/showthread.php?t=9945
--
الدرس السابع على هذا الرابط
http://www.fatahilah.com/showthread.php?t=10175

[رفيعة الشان]

بصراحه جهد جبار ورائع تشكر عليه
لا اخفيك اني سبق وقرات هذه السلسلة في منتديات اخرى
ولايلامون اللي نقلوها
وجزاك الله الف الف خير شاعرنا
لاااهنت

[يوسف الشقران]

المشاركة الأصلية كتبت بواسطة رفيعة الشان

بصراحه جهد جبار ورائع تشكر عليه
لا اخفيك اني سبق وقرات هذه السلسلة في منتديات اخرى
ولايلامون اللي نقلوها
وجزاك الله الف الف خير شاعرنا
لاااهنت

الشكر لله اولا

وشكرا لك على هالكلام المشجع

واللي انقلوها هم نشكرهم بدورنا

تحيتي وتقديري لك

[داعي الشوق]

يعطيك العافية أستاذ يوسف

منكم نستفيد دائما

دمت بخير

،،،،،،،،،،،،،،،،،،،

بسم الله الرحمن الرحيم

انا حقيقه ماشي معك خطوه بخطوه

وراح اماشيك بكل شيء
وعلى الموضوع الاول والثاني كان نظري وليس عملي ولكن الان انت دخلت بالعملي

فيجب ان اعرض عليك وهو على تدريبك

مثال
انت جبت لنا بيت وقلت حاولوا تكتبون مثله

انا لحنته وقمت اغنيه مره وثنتين وثلاث إلين مشى اللحن على لساني وكتبت كم بيت

فا انا ماراح ادخل بالموضوع اللي وراه حتى اتأكد اني عديت العملي ولو بشيء بسيط

هذه الابيات اللي انت وضعتها


ياليتني بينـك وبيـن المضـره
من غزة الشوكه الي سكرة الموت



وهذا ما كتبته على قافيتها ووزنها إذا الله وفقني

حبيبتي قامت عليا تشره
تبغى القصيد ودقة الحرف بالصوت

خذتني السجه على حين غره
وانزلتله شعرا من المزن ياقوت

هذا خيالي والنتايج مضره
لقيت نفسي خارج الذهن مشيوت

مالي انا بالشعر خيره وشره
وهذي حبيبه لازم ابنيلها بيوت


اتمنى اني عديت

وحقيقه ابي اعطيك شيء
عملك جبار ووالله اول مره ارتاح لشرح
ومن بعد اللي قريته لك حاس ان فيه امل اني اتعلم الشعر واكتبه
وانا راح اكون معك درس درس
ويعطيك العافيه
اخوك سعود

[همس الورد]

يعطيك العافية

جهد رائع

تحيتي و تقديري

[الهميم]

شكراً لما امتعتنا به
تحياتي

[المؤذن]

شكرا لك
على الجهد الطيب
تحياتي

[البتار]

بارك الله فيك
على ما تقوم به
احترامي

[نديم الحيارى]

جزاك الله خيراً
على ما افدتنا به
ودي واحترامي