بسمك اللهم

[الطائر المهاجر]

بسمك اللهم رحمنٍ رحيم = منشي الإنسان باحواله عليم
من وضعت العزّ والفخر بتميم= في جديد الوقت والاّ من قديم
كاسبين المجد والصيت العظيم= لين صاروا كالبدر بين النجوم
شمسهم ما يوم غطاها السحاب= وفعلهم معروف في كل الرحاب
رافعين الراس بالسمر القضاب= وفي زمان السلم في علم الكتاب
بحرهم لامن هدر فاحسب حساب= يضرب اعصاره قبل يعلن قدوم
من سلالة فارسٍ قاد الجيوش= وانتصر للعرْب من كل العروش
ولو على عهده ظهر بوش بن بوش= رجّعه بالباخره ضمن النعوش
ولا غدينا في يدينه كالكبوش= يفعل اللي ما يبي ماله خصوم
في تميم المجد حنا اربعه= من بيوت العز مجده نرفعه
الكرم بالحضن حنا نرضعه= لو نجوع الضيف واجب نشبعه
والشهامه زرعنا اللي نزرعه= بكل طفل وللحميّه نصنعه
والشجاعه مهره اللي يدفعه= لاكبر واقبل يبي بنت العموم
اربعة اركان مافيها عياب= "آل سعد" و"عمرو" مع ركن "الرباب"
وحنظله جدّي وفخري مايهاب = ساس كل المجد واضح كالشهاب
امةٌ شادت لنا المجد العجاب= فانعمي بالعز لا تخشي هموم
حنظله منّه تحدّر وانحدر= عشره إلاّ اثنين من خير البشر
"مالك" و"يربوع" وسمٍ في حجر= او"ربيعه" و"البراجم" بالحصر
امةٌ تمتد في عمق الدهر = كالبحر في المدّ ماهوب محكوم
ومنك يا مالك وصل جدّ الجدود= "مشرّفٍ" بالعزّ خفّاق البنود
من يقود الجيش ماهو بالمقود= والد الشجعان صيّاد الفهود
اربعة فرسان اعطوا للوجود= قيمته بالفعل في وقت اللزوم
"يوسفٍ" و "بريد"و "مْحيوس" بعد= و"المغامس" كالعمود وكالوتد
اخوةٍ احفادهم فوق العدد= غير في الشدات تلقاهم جسد
بحر فيه الدر ما ينفد أبد = هم نجوم الفخر في كل العلوم
هم هل الطولات في دين وسياسه= من وضع للحكم عمدانه وساسه
بدولةٍ قامت على الدين ابكياسه= دولة آل سعود حراس القداسه
شيخنا ويّا الإمام وعزّ ناسه= شيّدوا صرحٍ على العزّه يدوم
افتخر إنّي تميمي بالأصول= وافتخر بالمملكه في كل قول
وافتخر في ديرتي دار الفحول= "الحريّق" من جبلها للسهول
منبع الأمجاد في كل الفعول= فالأثر باقي على كل الرجوم
أنعمي يادار بالخير العميم= وارتكي حنا رجالك من تميم
لا تحركنا بحر موجه لطيم = تسمعه يهدر جحيمٍ في جحيم
فالشجاعه نبضنا ويل الغريم= وشمسنا ما يوم غطتها الغيوم
والختام ازكى صلاتي والسلام= للنبي المصطفى خير الأنام
مخرج العربان من جهل الظلام= يطلبون المجد فعلا لا كلام
لين دان الكون في عدل وسلام= تشهد الآثار بافعال القروم