طير ياللي بالجناحين خفاقي

[فواز الغسلان]

هذه من اقدم قصائدي وقد تركتها على صيغتها القديمه 00

طـيـر يـالـلـي بـالـجـنـاحـيـن خـفـاقـي=مـاشـكـى نـار الـهـواجـيـس مـن شـوقـه
ان نـزل يـنـــزل نـبـا كل شـوهــاقـي=وان بـغـى لـه وجـهـةٍ شـال طـاروقــه
يـشـلـع الـجـانـح تـحـت كـل بـراقــي=الـبـشـر تـحـتـه والامــزان مــن فــوقـه
مـاوقـف عـنـد الـجـمــارك بـالاوراقي=لاجـل يـدفـع قـيـمــة الـخـتـم وحـقـوقـه
او وقـف سـاعـات مــع كــم سـواقــي=فـي لـهـيـبٍ يـجـدع الـنـفـس مـزنـوقـه
يرتجي من نقـطـة الـحـجـز مـنـطـاقـي=عند من يـنـفـخ على الـنـاس بـشـدوقه
صابرٍ يـشـكـي لـواهـيـب الاشـواقي=والـهـواجــس تـحرق الجـوف وعـروقـه
تجـتـمـع بالـقـلـب مـن كـل الاشـنـاقـي=ويــل مـن يـاصل لـهــيــبـه لـمـعـلـوقـه
مـن عـشـيـرٍ بـالـحـلا حـاز مـا لاقـي=لابـسٍ زيــن الـمـلابـيــس مــن ذوقــه
جسمها مـهـرة شـجـاعٍ ومـطـفـاقـي=دايـمٍ مـع سـاقـة الـقــوم مــصلــوقـه
وعـيـن ريـمٍ ترتـعـي قـبـل الاشـفـاقـي=تخـتـفــق بـيـن الـمـشـاريـف وفـلـوقـه
مـزبـنـه عـنـد الخـطـر راس مـطـبـاقـي=فـوق روضٍ زاهــي نـبــت رقـروقــه
ذارهــا الـبــارود بـكـفــوف تـفــاقــي=تـودعـه مـع هــبـرة الـفـخـذ مـصـفـوقه
جـاه وبـل الـوســـم بـالـوبــل دفــاقــي=وزان عـشـبـه وارتـفـع سـاق زمـلـوقـه
خـفـرةٍ زيـنـه جـمـع كـل الارنـاقــي=واصبـحـت عـن كـل الاريـام مـفـروقـه
الجـديـل بـمــتـنـهــا طــاق مـاطــاقـي=والـردايـف تـشـكـي الـثـوب مـن ضوقه
مـع حـلا زولــه حـلا هـرج واخـلاقـي=والـوصـايـف فــي حــلايـاه مـطــبــوقـه
شوفـهـا فـي لاســع الـبــرد مـشـراقـي=والـثـنـايـا والـشـفــايـا لـهـن لــوقــه
لاطـرت لـي فـزة الـروح بـشـهــاقــي=كــن قـلـبـي والـمـعـالـيــق مــحــروقــه
طـول لـيـلـي سـاهــرٍ ضـايـقٍ شـاقـي=كـن روحـي مـن حـنــايـاه مـسـروقـه
خوف قـلـبـي لاجلها تـنـشــف اريـاقـي=ذاهـلٍ بـالـفـكر عـن كــل مــخـلــوقــه
ريـحـهـا ريـح الـمـعـاطـر بـالاسـواقـي=كـنـهــا فـي غـدفـة الــزيـن مـدفــوقــه
حـبـها بالـقـلــب راســي بـالاعـمـاقـي=وارتـفــع مــن دون لـبـنــه وطـابـوقـه
والـلـه انـه مـاغــدر بــي ولا بـاقــي=والـظـروف الـظـالـمـه هـي سـبـب عوقـه
سـاق لـي بـعـهـود الاحـبـاب مـيـثـاقي=ولا ظـهـر مـنـهـا كـذايــب ولا بـوقــــه
ثــم صـار الـزيـن لـلـظـرف مـنـساقي=وشـفـت روحـي مـن غـثـى البعد مفـلـوقه
صار فـي بـابـه ثـلاثـيـن مــغـلاقــي=واصـبـحـت فـيـه الـمـسـامـيـر مـطـقـوقـه
دايــمٍ قـلــبــي لـــرويــــاه تـواقــي=كـنــهــا مـن بـســرة الـجـوف مـشـلـوقـه
الـمـفـارق والـجـفـى صـعـب يـنـطـاقـي=يـوم صـارت حــب قـلـبي ومــعـشـوقـه
لـيـن رب الـعـرش يـامـر بـالاوفـاقـي=لاجـل اشـوف صـويـحـبـي زاهـي دقـوقه
أه ويـلـي مـنــــك يامــدمــج الـسـاقـي=لـيـت مـن يـاخــذ شــفــايـاك لـو ذوقــه

[الطائر المهاجر]

كتبت فأبدعت واجزلت
صح لسانك ولا هنت
تحياتي الطيبة

[فيصل البدراني]

أه ويلـي منـك يامدمـج الساقـي

ليت من ياخذ شفايـاك لـو ذوقـه

صح لسان يافواز ابداع رائع

[ابومياس]

دايـمٍ قلبـي لـرويـاه تـواقـي
كنها من بسرة الجـوف مشلوقـه
المفارق والجفى صعـب ينطاقـي
يوم صارت حب قلبـي ومعشوقـه


نص راقي وجزل

كعادتك مبهر

صح لسانك وبيض الله وجهك

دمت بخير

[منيع]

ابداع وتميز
بارك الله فيكم
تحياتي وتقديري

[حي الضمير]

صح لسانك وعلا شانك
قصيده رائعه وابدعت يامميز
أجزل التحايا والاحترام

[عبدالله مذكر العقيلي]

صح لسانك

وعلاشانك


تحيتي

أحسنت أخي العزيز/فواز الغسلان أحسن الله إليك

شكرا لك سيدي الكريم على إتحافنا بهذه الرائعة جدا

صح لسانك ، وبيض الله وجهك ، ولا فض الله فاك

دمت بسلام وسعادة وحب وألق أيها الأخ العزيز

[زهرة اللوتس]

صح لسانك وعلا شانك
قصيده رائعه
وابدعت يامميز
أجزل التحايا
والاحترام

[نفحات حساسة]

صح السانك..
واعتلى شانك..ولاهنت
قصيده بقمه الروعه..يعطيك العافيه
تحياتى لك وتقديرى..