فرفشوا مع بويتاتي

[احمد الجريفاني]

لي ثلاث ايام ما جاني كفر=واعنا قلب المبنشر واعناه
واقفن مابين رفحا والحفر=بنشر الحنتور واستملس سماه
طحت في خطن جلد كله جفر=ارض صبخا ما نجا حيٍن وطاه
ارض جردا ما بها ريحة شجر=تستحي تنبت بها حتى السفاه
السبير انشق من مدة شهر=وضاعت الرقعه اكيد احدن خذاه
وين مفتاح العجل ماله اثر=من سرق عفريتتي هذا عصاه
يوم حل الليل والنور انحسر=ابتدا ذيبان يستعرض عواه
دق لي سرحان ناقوس الخطر=كان هو جيعان خلاني عشاه
بي جلادة بدو لو ربعي حضر=ما يخوفني عواء ذيب الفلاه
بتْ وسط الجيب والدنيا مطر=جايعن بردان يا الله النجاه
ليلتن خرمس تمنيت القمر=لجل اشوف الذيب وشو منتهاه
ليلتن شلتى والامعط ما شعر=لا قعد بارضه ولا ربي هداه
المطر والبرد لقاهن ظهر=ناوين له واحدن ربي بلاه
عنده انه با العواء يرمي درر=وشٍي الدبره لمن حظه رماه
قمت ابسحب فروتي طاحت حدر=فوقها مطارتي منكب ماه
ليلتن من طولها صارت عمر=ما تفيدن قولتي ويش السواه
صرت اهيجن لين ما شق الفجر=جايعن حصران وسلاحي قناه
احمد الله يا عرب ربي ستر=النهار ارحم من الليل وشقاه
يوم صار ضحي مديت النظر=المطر كل الذي حولي ملاه
صارت الصبخا من الديمه بحر=من نوى يمشي تعثر في خطاه
سرت مشمل يا عسى موتر يمر=عشر كيلو يمكن اكثر باتجاه
مومنن يا خوك في حكم القدر=واعرف الله ما يخيٍب من رجاه
عند اذاني تقل به شي يهدر=استدرت وقمت اشاور با العباه
احمد الله ساق لي راعي (....)=اجودي با الحيل ركبني معاه
موتره مضبوط لعنبو الفقر=ودي ادري بس من وين اشتراه
قلت هذا جمس قال استح (همر)=شد في (دترويت )ماهو في (مرآه)
الاكيد انه مصنع من حجر=كان هو مية سرندل ما كفاه
ضاع جوعي تقل شبعانن هبر=صرت امدٍح فيه واشكر بخوياه
قال وين انت امتعطل يا بشر=قلت هذي جٍرتي سيروا حذاه
جيت للماخوذ يا وجه القشر=قال هذا موترك رديت آه
المعاون قام في لمح البصر=حربث وهمهم حسبت انه قراه
مادري وشلون قالوا با الكفر=ادخلوا به سيم قالوا ذا دواه
اسحبوا جيبي شوي عن الجفر=قال لي حرك قبل يدمس مساه
قلت عشتو دربكم كله خضر=جاوب اتبعني ورحت اسحب وراه
النصيحه للذي ينوي سفر=التهقوي علة القلب وعماه
شل معك قربه وشل خيشة تمر=وشل معك عده من الفه لين ياه
وشل معك شوزن وكبريت وسمر=مخطين من راح من دون خوياه
اعتبر هذي نصيحه لا امر=مثلكم يفهم وقصدي ماخفاه
لا تضيع التجربه عندك هدر=الذكي من يستفيد بما قراه

[الطائر المهاجر]

احمد الله ساق لي راعـي بقر (كاوبوي)
اجودي با الحيـل ركبنـي معـاه
ما يقصرون الله يسلمهم
بس وش جابه.... يمكن يبي يتعلم رعاية النوق
صح لسانك
واضحك الله سنك
تحياتي

[كظيم]

الله يسعــدك ههههه
الجريفاني
صح لسانك وفكرك على الطيبـه الجزلـه
ابيات بجد روعـه
والحمدلله على السلامــه
تقبلني وتقبل مروري المتواضع لاهنت
ودي وتقديري

[عبدالعزيز العمار]

صح لسانك وأضحك الله سنك

رائع في الاسلوب والطرح

تحياتي

[الطامي]

الجريفاني
صح السانك ملايين
رائعة جدا
لاهنت اخي

[احمد الجريفاني]

شكرا للجميع على المرور العبق والشعور الصادق انتم من يثمن الكلمة وانا اثمن شعوركم الاخوي لكل فرد شكري وعرفاني الكبيرين متمنيا لكم دوام العافية ورضى المولى احبائي

[منيع]

فكاهية نطق بها لقمان شعرك الجميل
تسلم اخي
تحياتي

[نجم الإبداع]

هههههههههههههههههههههههه الجريفاني

صح لسانك واضحك الله سنك

لاهنت

وتقبل مروري

وتقديري

[داعي الشوق]

والله ضحكتني يا بو فراس

و ضحكت اللي عندي

الله يسعدك

و صح لسانك و فكرك
ولاهنت

[عمر ال شيبي]

صح لسانك لا هنت