26-07-2006, 04:25 AM
|
رقم المشاركة : 1 | ||
|
|
هااااااااااااااي الجزء العشرين بعد يومين ملجه شيخه... وهل الشارجه عزموا بيت حمد كااامل باللي فيه... نورة بتضطر تغيب عن الجامعه عشان هالسيره يوم واحد .. الشباب خالد وناصر ماطاعوا يسيرون.. اون شكلهم رزه...والملجه للحريم..هم وين بيحطونهم ؟؟ ماعندهم مكااااااااان.... وفعلا ان بيت خالهم ماشي مكان وايد..غرفة ضيوف وحده بس.. لكن المصيبه ان ميره وحمده معزوومات بعد..وام خالد قالت فظيحه مايروحن لان هم يوا كلهم في ملجه عبدالله..وعيب يقصرون فيهم... عاد ميره وحمده بعيالهن وين يروحهن وهو اصلا رياييلهن خالد وناصر مابيحظروون ولا بيسيرون...؟؟!!. فكروا فيها شوي وكان الاتفاق كالآتي,,, ام خالد بيشلهم بو خالد ووياها حصه او نوره وحده منهن..ومعاهم حمده وعيالها.. ميرة عزرت على حمدان هو اللي يشلها هي وعيالها وبيشلون وياهم وحده من البنات..يعني نوره او حصه... اما وضعهم في بيت هلال بيكون جذي.. نوره كالعاده مع فطوم...وحصه مع شيخه... بو خالد وحرمته بيرقدون في غرفة الضيوف.. وحمده وعيالها بيرقدون في غرفة منى ومنال...ومنى ومنال بيرقدن مع امهن وابوهن في غرفتهم... اما ميرة وحمدان بيردون في نفس الليله للعين.... وماكان فيه حل غير هذا...اذا كانوا يبون يحظرون كلهم... وهذا اللي صار.. نورة راحت مع قوم حمدان ..لانه طبيعتها تحب سوالف الشباب..وحمدان عن مية واحد ماشاء الله عليه... وبعدين ابوها بطيء في السواقه...وحمدان يطيربهم... صح انها طايحه وياه نقره طول الدرب بس كانت قلوبهم صافيه ومحد يشل عالثاني في خاطره....وفكرت نوره في لحظه خبااااااااال.... بان حمدان لو كان اكبر منها جان ما فوتته....لانه صدق ماشاء الله عليه مايتفوت... واي بنت مهما كانت طبيعتها وشخصيتها بتحبه وبتستانس وياه... بس هي تحبه مثل اخووها.. وجذي بتم الامور...احسن... اصلا ماشي مجال في قلبها... خلاص فوووول... حب سعيد ماخلى مكان لاي شخص ثاني... كانوا طالعين من العين الضحى..فوصلوا قراب الغدا... يوم الخميس... سعيد استانس يوم شاف حمدان. .عالاقل حد من الشباب يسولف وياه......وكالعاده هو اللي استقبلهم... ولاحظ ان وياهم حريم..اكيد حريم اخوانهم هذيلا..ولاحظ بعد وبقهر واضح ان نورة متغشيه وتمت متغشيه لين ماوصلت داخل البيت..طبعا سعيد مايروم يلحقها... سار هو وحمدان وبو خالد صوب الميلس ويلسوا فيه تغدوا ..وبعد الغدا دخل بو خالد عشان ييطيح شويه لين العصر..اما سعيد فطلع هو وحمدان يتحوطون في الشارجه ودبي لين مايي المغرب .. حمدان اصرر انه مايحظر الملجه وقال انه بيروح السينما وبيشوف له اي فلم وعقب بيرد يشل اخته وبيرد العين... وسعيد مارام له حيله... فخلاه على راحته... من بداية العصر والعروس وياها راعية الصالون... وحصه ونوره مع فطوم تمكيجن وخلصن بسرعه... حصه كانت لابسه فستانها مال التخرج..لانه محد شافه من قبل...اما نوره فاصرت انها تلبس مغربي.. اما فطوم لبست فستان احمر مع ابيض...مفصلتنه مخصوص لملجه شيخه وعلى السريع.. واول ماخلصن نزلن تحت يعاونن الحريم على التجهيزات...بعد صلاة المغرب وصل حمدان سعيد للبيت وروح هو للسينما اللي ناوي يسيرلها.. نزل سعيد ودخل البيت وشاف الكل مختبص... شاف منال اخته ومسكها وقالها تسويله درب لانه بيطووف.. بس الخبله سارت وماردت.. فتوكل سعيد على الله ودش البيت... كان يسمع اصوات نوره وفطوم وحصه وحريم ثانيات في الصالة .. بس ماشي وقت للرومانسيات احين...لازم يبدل ثيابه بسرعه..ركب فوق ودخل حجرته وهو كل شوي يطالع حد من اليهال يتراكظون يمين ويسار...هذيلا عيال خالد وناصر...المهم انه دخل حجرته وتسبح وتلبس وتكشخ وكله في ظرف عشر دقايق... والحين يا دور النزله..الله يستر..فظيحه اذا صادف وحده من حريم عيال عمته.....وقعد مسكين يمشي ويتحنحن بس محد معبرنه..ولا صادف اي حد..طلع من بيتهم وراح على طول الميلس وين كانوا موجودين ابوه وفيصل وابو خالد وريل خالته وكم واحد من القرايب المقربين عند ابوه... وتمت الملجه على خير... وكانت بسيطه وحلوه وهادية... وبعد ماراحوا المعازيم اللي تارسين البيت ياهم سعيد لين البيت ورمس امه لانه بيدخل راشد (ريل شيخه) داخل البيت عشان يسلم على حرمته.. فدخلت الام وخبرت كل الموجودات واللي كانن هن بس اهل البيت واهل العين...ومن سمعن الخبر طلعت كل وحده سايره حجرتها تبدل ثيابها وتمسح المكياج.. الساعه 11 ونص اتصلت ميره بحمدان...وقالت له يمر عليها احين عشان يسيروون.وحاولوا وياها انها تبات بس ماطاعت لانها قايله لريلها انها بترد الليله.... وقف حمدان سيارته ونزل ودخل البيت بتردد... فيصل روح يرقد وسعيد في الميلس مع اخو راشد واسمه محمد... استحى حمدان انه يدش الميلس..شكله رززه فتم واقف عند الباب واتصل على ميره عشان تنزل بسرعه ويروحووون...ونزلت ميره هي وعيالها بعد ماسلمت على الحريم وقف حمدان عشان يساعدها ويشل الشنطه الصغيره عنها اللي كانت حاطه فيها ثيابها... وكانوا بيطلعوون لولا ان فاطمه زقرت على ميره فجاه.. وهي لابسه شيله بيظا وبجامه نوم...انصدمت فطوم يوم شافت حمدان... اووففف هذا لازم اشووفه بين فتره وفتره يعني..؟؟؟ تغشت وسارت صوبهم وهي تسوي عمرها رزين... فاطمه: السلام عليكم... حمدان : وعليكم السلااااااااااااااااام والرحمه... شحالج الشيخه..؟؟ فطوم منقهره..رد يقولي شيخه مره ثانيه... فاطمه: بخير الله يسلمك.... ميرة نسيتي شنطه العيال... ومدت ايدها بالشنطه الصغيره اللي كانت فيها ثياب شما بنتها الصغيره... ميرة: اوووه ..يزاج الله خير مشكووره .. فاطمه: العفووو.... سلموا على عنووود.. حمدان: يوصل سلامج ان شاءالله.. ميرة: فمان الله الغاليه وسلمي عليهم كلهم.. فاطمه: يوصل ان شاء الله..توصلوون بالسلامه فمان الله.. حمدان: فمان الله فاطمه.... حمدان يتعمد يغايظها.وعمدا قال اسمها وخلاها مرتبكه... هذا من وين ياب اسمي..؟؟؟؟ محد غيرهن بنات عمووووه مخبراتنه...ماعليه بيبيين منكن دواكن عندي.....طلع حمدان ركب سيارته وركبت ميرة وعيالها وتوكلوا صوب العين... وفطوم ردت تدخل البيت .. على الساعه 1 في الليل كانن نوره وفاطمه متسدحات في الغرفه ويسووولفن... فطوم: تلاقيت ويا ولد عمج من شوي... نورة: منوووو حمدان..؟؟ فطوم: ماغييره..كان ياي يشل ميييره... نورة: هيي قايله هي انها بترد اليوم...انزين وسلمتي عليه؟ فطوم: هي قلت السلام عليكم ..وهو ترا مايقصر .. ترا ميره كانت ناسيه شنطه وسرت اوديها لها قبل ماتروح.. نورة: اهاااااااااا... وايد حبووووب حمدان ماعليج من غلاسته..يحب يغلس عالبنات...بس هو وايد طيب.. فطوم: هي ..لازم بدافعين عنه ولد عمج... بعدين منو سمح لكن تعطنه اسمي..؟؟؟ نورة: خيييييييييبه كل عاده دق سوالف وياج وزقرج باسمج..؟؟؟ فطوم: لا مادق سوالف لكن قالي فمان الله فاطمه.... نورة: ههههههههههه الريال مهتم..ويوم بغينا نعرف منه السالفه اللي صارت بينكم ماطاع يقول الا يوم قلناله اسمج اول...وبعدين مافيها شي..الا اسم هووو طنشت فاطمه السالفه وقررت انها ماتظيع وقت اكثر...الفرصه سانحه ولازم ماتفوتها..وبتكلم نوره عن سالفتها مع سعيد... فطوم: المهم طبي هالموضوع...انا ابا اسالج سؤال محيرني من زمان الصراحه.... نورة: شو هووو..؟؟ فطوم: ليش زعلانه على سعيد..؟؟؟ انصدمت نوره ..ماتوقعت للحظه ان هذا هو سؤال فطووم... بس قررت انها تصارحها وتفتح قلبها يمكن تطلع بنتيجه تريحها...فطوم تعرف سعيد اكثر من اي حد ثاني... نورة: ليش هو قالج شي..؟؟؟ فطوم: هي قالي انج زعلتي عليه فجاه وقطعتي اي علاقه كانت بينكم...وهو يقول انه ماسوا شي... نورة: هممممم فطوم..انتي تدرين اني مابزعل زعله جذي بدون سبب.... فطوم: ادري..وانا ابا اعرف شو اللي خلاج اتغيرين عليه 180 درجه...في ظرف ليله بس...لانه قالي انج الليله اللي قبل ماتزعلين كنتي تعاملينه وايد اوكي.. تذكرت نوره ذيج الليله...يوم شل سعيد عنها شنطتها وركب وياها الدري..وكان بيعترف للمره الثانيه انه يحبها وهي منعته مره ثانيه.... وتذكرت وبشكل محرج ان هي بعد لمحت له انها تحبه قبل ماتدخل الغرفه... نورة: هي..لاني ماكنت ادري باللي كان يسويه من ورااااي...ومادريت غير بالباجر من خوله يوم انتوا كنتوا في السووووق.... فطوم استغربت...شو خص خوله بالسالفه هاي كلها...؟؟؟ فطوم: شو شو شوووو..؟؟؟ خوله..؟؟؟ ليش شو قالت لج؟؟ وخبرتها نوره بالسالفه كلها..... فطوم مسكت راسها... ماتنلام نورة يوم زعلت هالزعله.... ليش خوله تقول جي..؟؟؟ ومنو عطاها الحق اصلا بهالكلام...؟؟؟.... ياربي ياسوء التفاهم الفظيع هذا.... لازم تخبر سعيد بكل شي...بس بعد لازم تشرح لنوره اللي صار بالضبط.. فطوم: ياربي بذبحها خوله هذي يوم بشوفها....سمعي نوره ...السالفه هذي كلها خرطي وتحريييف...وانا بقولج شو صار بالتفصيل... الله يسلمج انا غلطت وسرت ويا خوله مثل ماهي قالت لج..لكن خوله كاشفه وايد يعني القصه برااا والعباة مفتوووحه والعطر من بعد كيلوو ينشم والتيلفون في الايد... ويوم ردينا البيت كان سعيد في سيارته بعده مانزل ونحن ماشفناه... ويوم نزلنا من السياره كانت سياره شباب تابعتنا..او بالاحرى تابعه خوله... سعيد عصب من هالحركه لانها بتيب الفظايح لبيتنا..وهزبني انا وهزب خوله وشرشحها وقالها اذا ماتسترتي لا اطبين بيتنا ولا انتي بنت خالتنا ولا نعرفج.... واصلا سعيد من الاول مايرتاح لها خوله لكن من بعد هالسالفه كرهها صدق... بس اللي ماتعرفينه ان خوله تموووووووووووت في الارض اللي يمشي عليها سعيد..وغرورها عامنها وتخيلت انه يغار عليها ويحبها ويبا ياخذها... ماتشوفينها دوم مطيحه عندنا..؟؟؟... وسالفه انه سار يستسمح منها..هو ماسار لها هي..ساير لخالووه اللي زعلانه وهي ماتعرف شو السالفه وليش انراغت بنتها من بيت خالتها... وخبرها السالفه واستسمح منها غصبن عنه لانه امي غصبته على هالشي... والظاهر ان خوله رضت من بعد هالسالفه بشكل غريب ... وهذي هي كل السالفه... نورة كانت شوي وبيغمى عليها....اي لعبه اللي طاحت فيها هذي,...؟؟؟..كيف تفكر بسعيد هالتفكير...!!!.... كيف ماقدرت تميز الجذب من الصدق...؟؟؟ كان شعورها ساعتها ماينوصف.. نورة: ياربي....لييييييييييش ماخبرتيني من قبل هاااااااااااااا..؟؟؟؟ فطوم: وانتي خليتي حد يخبرج ويا هالويه.... بس والله يانوره....وانا حلفت احين...انج مابتحصلين حد يمووت فيج ويحبج ويحترمج كثر سعيد...ماتتصورين حالته من بعد هالسالفه..موول تغير مب سعيد الاولاني...كله كئيييب ...ومايتفاهم... نورة: فديييته والله حتى انا اموووت فيه... فطوم: لالالا... سمحيلي اييب المسجل واسجل هالمقطع...عشان اسمعه اخووويه وترد له الرووح.. نورة: هههههه ويا هالويه والله انج متفيجه....احين شو اسوي.؟؟؟ ظلمته فطوووم ظلمت سعيد وااايد ..كيف بتصرف...؟؟ فطوم: انا بخبره بالكلام اللي دار بينا...وبقوله انه سوء تفاهم وانحل وانكم بتردون مثل قبل...موافقه..؟ نورة: هي..وقوليله اني آآسفه وايد على صغر عقلي... بس خوله يابت السالفه بشكل مقنع وصدقتها... فطوم: الله يسامحها... مادري كيف بيتصرف سعيد بخصوص سالفه خوله هذي..جان مايسيرلها لين البيت ويهزبها.. نورة: تصدقين كرهتها...خله يهزبها احسن... فطوم: هههههههههههه ماعليه المهم عرفنا وين المشكله وحليناها... خلينا نرقد احين تاخر الوقت..ولا تحاتين على سعيد...بيستانس يوم بيدري... نورة: الله يسمع منج...تصبحين على خير.. لكن سعيد ماستانس...بالعكس فار غيظه بشكل يخوف... وكانت فطوم ناشه الصبح وخبرت سعيد باللي صار امس وياها... سعيد: شووووووووووووووووو..؟؟؟؟..... فطوم: هذا اللي صار...هذي خوله يبالها تاديب... سعيد: انا مب عن خوله الكلبه اتكلم....عن بنت عمتج...نوره تصدق عني هالكلام...؟؟؟؟؟؟ ....نووووره..؟؟؟؟؟؟ انا العب عليها الحين...لهالدرجه انحط تفكيرها فيني...؟؟!!!!... فطوم: شو تباها تفكر يعني بعد الكلام اللي سمعته من خوله...؟؟؟ ماتنلام الصراحه... سعيد: الا تنلاااام..ومية مرة بعد تنلااااام....بدال ماتي وتخبرني وتستفسر عن السالفه ..تقطع اي صلة بيني وبينها بهالطريقه,,,....؟؟؟؟.. واذا ماتبا تقولي انزين تقولج انتي.... تتاكد...مب جذي تحكم عليه من رمسة سمعتها.... واصلا حتى لو سمعت المفروض ما تصدق...مب من اليوم وامس هي تعرفني وتعرف اني ابغيها... صارلنا عمـــر..... الحين تيني وتقول انته تلعب عليه كل هالسنين..... شو هالخريط هذا..؟؟؟؟.. سعيد كان فعلا معصب...وفطوم ماتعرف كيف تتصرف.... وتمت ساكته...احين البنت معاها حق...واخوها بعد عنده حق..ماكان المفروض تصدق هالكلام عنه.... سعيد كان وده يكسر شي...يظرب حد... يقطع شعره من الغيظ...اي شي... التفت صوب فطوم اللي كانت كاتمه انفاسها من الخوف... سعيد: في حجرتج هي... ومشا بالسريع يبا يطلع من الغرفه... دارت فطوم بينه وبين الباب وحاطه يديها على صدر سعيد عشان مايطلع... فطوم: وين بتروووووووووح..؟؟؟ سعيد: خوزي عني فطوم.... فطوم: سعيييد دخيلك لا تفظحنا شو بتسوي...؟؟؟ سعيد: بسمعها رايي فيها بصرااااااحه.... خوووزي... فطوم: ينيييت انته ...؟؟؟... بتدخل عالبنت جذي...شو تباهم يقولون عنا..؟؟ سعيد: خووووووزي عني فطوم لا اييج شي ماشفتيه...ولا تجبريني امد ايدي عليج انتي بعد... فطوم: مد اييدك عليه انا شوي وبرضى...بس لا تتخبل وتسوي شي تندم عليه... سعيد: انا احين ندمان اني ظيعت عشر سنين وانا احب وحده تفكر فيني بهالطريقه.....خووووزي فطوم: انته احين معصب وماتعرف اللي قاعد تقووله....البنت اصلا راااااااااقده.... سعيد: بسيطه ... بنوعيييهاا... ودز فطوم عنه وفتح الباب وطلع وكان فعلا في طريقه لغرفة فطوم الا فطوم لحقته مره ثانيه ودارت بينه وبين الغرفه... فطووم : دخيييييييييييييييلك ياسعيييد لا تسوي شي.... وغلاااااااة نورة عندك... يوم كانت فطوم تتكلم انفتح الباب وطلعت منه نوره وهي لابسه شيلة بيظا وتوها قايمه... انصدمت من المنظر اللي شافته ومن الكلام بعد اللي سمعته.... " سعيد لا تسوي شي ...وغلااة نورة عندك..!!!" .. شافت فطوم في الممر ماسكه ايد سعيد بقوووه...وسعيد اللي كان يتنفس بصعووبه..وومعقد حياته وعيونه مثل النار وهي اطالع نوره فويهها..عرفت ان سعيد عرف بالمووضووع... وانه مب راضي.... ومعصب وايد... بس شو كان يبا يسوي..؟؟ وليش يطالعني جي..؟؟؟ ياويلي انا شو سويت ؟؟ خربت كل اللي بينا.... تموا على هالحال يمكن دقيقه او دقيقتين.... كل حد يطالع في الثاني... وفطوم ظايعه في الطوشه... نوره خايفه موووت ومب قادره تنطق بشي...وسعيد..وده يظربها..يذبحها... ويقولها انه يكرهها... بس ماطلع منه اي حرف... مهما كان اللي صار ... حب عشر سنين مايظيع في ثانيه وحده.... واتم نورة بالنسبه له .... " شي مقدس" .... يوم حصلت نوره لسانها...كل اللي قدرت تقوله له ودموعها متجمعه فعيونها تهدد انها تنزل...اللي خلا قلب سعيد يتقطع ... صح معصب بس كله ولا دمووعها... نورة: سعيـــــد... والله آآآسفه... ابتسم سعيد بسخريه.... بعد شو اسفه يانوره.....؟؟؟... التفت وطلع من البيت وما رد غير المسا... وكانوا هل العين ردوا بيتهم خلاص... ونورة شايله هم اكثر من اللي كان فيها من قبل.... والله أموت فيه هالجزء |
||
|
|
26-07-2006, 04:27 AM
|
رقم المشاركة : 2 | ||
|
|
أهليييييييييييين الجزء الواحد والعشرون مر الوقت.. وطلعت نتيجة فطوووم..اللي كانت 91.3 % ... البيت كله اشتل عشانها وهي بروحها قعدت تصيح من فرحتها... وماخلت حد مالوت عليه وصاحت... وفي هذاك اليوم ماقدرت تبتعد دقيقتين عن التيلفون بسبب الاتصالات اللي تيها وتباركلها..ومن ظمنهم هل العين... وفطوم غيرت رايها بخصوص العزيمه وقررت تكون اهليّة بس..يعني قوم خالتها وهل العين..لانها عافت الحفلات والربشه اللي ورا بعض هذي... نورة وحصه محتشرات على امهن اللي خونت فيهن وسارت السوق وخذت لفطوم هدية وهي ( سلسلة ذهب ابيض مع قلب وخاتم).. وقالن انهن يبن يشترهن هداياهن برووحهن... نورة: مكاان واحد مافي غيره.... العين مووووول... ام خالد: بن عروه بيوديج العين مول.. انا ماحب المراكز هاي.. حصه: امايه شو نسوي يوم هو فيه كل المحلات الزينه..!!!.. ام خالد: لالا انا مابوديكن... نورة: انزين انتي لا تودينا..ناصر والا خالد بيودووونا... امايه ماشي وقت يومين وبنروح الشارجه.. ام خالد: يوووووووووه...شاورن ابوووكن...!! حصه: طالع طالع..!!... يوم ماتروملنا حيله قالت شاورن ابوكن ...امايه شو هالحاله..؟! نورة: خليها خليها... انا برمس ابوويه... المسا يوم كانوا كلهم متيمعين... ابو خالد وام خالد وميرة وعيالها وحصه ونوره... اما حمده وعيالها كانت عند اهلها..كلمت نوره ابوها في السالفه... بو خالد وهو معقد حياته: منو بيوديكن؟؟؟ نورة: خالد والا ناصر... ميرة: خالد باجر عنده زاااام ... نورة: انزين ناصر... ام خالد: ناصر ساير ويا ولد عمه سلطان دبي عسب مشرووع... نورة: انزين امايه ويا الدريول... ام خالد: انا مب سايره مراكز خبرتكن من قبل.. بو خالد: ماعندنا حد يوديكن... في هاللحظه يسمعوون حس حمدان من برااا.. حمدان: هوووووود هوووووووود يابنات تغطن حمدااان ياي.... تحجبن البنات والكل يظحك على حمدان وسوالفه...... دخل عليهم حمدان... حمدان: السسسسسسسسسسلاااااااااااام عليكم... الكل رد السلام عليه ورحب به.. سلم حمدان على عمه واخته ويلس عدالها وحاط شماني في ذبانه.. حمدان: شخباااااااركم..؟؟؟ ام خالد: بخيييييير ياولدي... انته الوحيد اللي مايقطعنا..والا خوانك مايوونا الا في السنه حسنه... حمدان: شفتي كيييييف عموووه انا غير... ام خالد: اشهد انك غييير عنهم ...شخبارهم اهلك..؟؟ حمدان: يسلمووون عليكم... تعشيت عمي..؟؟؟ بو خالد: لا بعدني...بتعشا وياي..؟؟ حمدان: كلنا بنتعشى رباعه ماعندنا حد غريب... وفعلا حطوا العشا وتعشوا كلهم رباعه.. وبعد ماتعشوا يابت الخدامه العصير ويلسوا يشربون ويسولفون.. بو خالد: ابوويه بتودي خواتك السوق..؟؟ الكل انصدم من هالطلب..!!!... معقووووله ..!!..الشايب يطلب من حمدان يودي بناته السوق؟؟ ..هذا اذا كان يدل على شي، فانه يدل على حب الشايب لحمدان وثقته فيه... وفعلا حمدان مب مقصر فيهم كل يوم وطاب عليهم ومايقطعهم..واي شي يبونه عادي يطلبونه من حمدان... حمدان: نعاااااااااااااااااام اني بوديهن... وين يبن؟؟ حصه: نبا نسير العين مووول... بنسير ناخذ هدية حق فاطمه بنت خالي... وغمزت لحمدان اللي قرر انه يستهبل.. حمدان: ليش انخطبت..؟؟؟ نورة: لا وانته الصادق...نجحت في الثانوية العامه... رفع حمدان حواجبه وهو مستغرب...ثانوية عامه.؟؟؟؟ ماشاء الله عليها...يبين عليها انها في الكلية مب ثانوية عامه... حمدان: لا والله..؟؟!!... وكم يابت..؟؟ حصه: يابت 91.3% ... حمدان: ماشاء الله عليها....ادبي..؟؟ حصه: علمي... حمدان: ثرها مب هينه..ماشاء الله عليها... ام خالد: وانته من وين تعرف البنت..؟؟؟؟ ارتبك حمدان.. حمدان: ماعرفها عمووه..من وين بعرفها يعني..بس اسمع البنات يطرنها... المهم متى تبن تسيرن..؟؟ نورة: باااجر..ماعندنا وقت...بنسير اخر الاسبوع الشارجه... حمدان: تمام..بعد الغدا بمر عليكن وبنسير... كان المتفق ان عنود تروح وياهم..بس هذي مرضت ..يتها بلاعيم وحمى.. فخلوها في البيت وروحوا عنها العين مول...وحمدان فعلا شخص يقدر الواحد يعتمد عليه.. حصه ونوره كانن يتوقعن انه يستهبل كعادته يوم يسير السوق..لكنه كان حريص عليهن وايد وماخاز عنهن... واللي يشوفه يقول هذا على رزانته عمره 30 سنه.. يعني لا التفت لا مني ولا مني... مع انه نوره وحصه لاحظن ان كذا بنت تبصبص على حمدان وتراقب حركاته ..لكن هو ولا افتكر...نورة قررت انها تاخذ لفطوم عدة المكياج كامله... لانها تعرف فطوم تحب هالسوالف...وطاحت بباريس غالري وماخلت شي ماخذته حقها... وطلبت تغليفها وتعديلها ويوم خلصوا شلتها ودفعت عنها وراحت...اما حصه فطاحت بهوم سنتر ولايف ستايل..... وخذت لها تحف وصناديق واشياء وايد روعه لغرفتها...خلصوا وكانوا بيروحون بس قالهن حمدان يقعدن في واحد من المقاهي يوم شاف انه فاظي ومافيه شباب وروح عنهن وخلاهن بروحهن يشربن كوفي...وبعد ربع ساعه رد وهو حاظن دبدووب بني كبييييييييييييييير... كبير يعني يوم تحطه عالارض يوصل لين خصرك من كبره.. نوره وحصه فجن حلوجهن.... شو هذا؟؟ شووو يايب؟؟...وهو ماسكنه ويظحك ومستانس انه حصل اللي يبغيه..يلس وياهن وقال.. حمدان: شو رايكن.؟؟؟ نورة: رهييييييييييب الصراحه... وايد حلووو.... حصه: شو تبابه..؟؟ حمدان: مب لي.. حصه: لمنوو عيل..؟؟ حمدان: حق الطويله....بنت خالكن.. نورة: حق فطووم؟؟؟؟ ماخذ هدية حق فطوم؟؟؟....باي صفه..؟؟ حمدان: بصفة اني حمدان بن محمد الكتبي... شو بعد هاي باي صفه.. حصه: تباها تفره على روووسنا..؟؟ حمدان: مابتفره على روسكن..هذي هدية النجاح...حد يرفض هدية نجاح..؟؟؟ نورة: وتبانا نقوللها من عند حمدان..؟؟؟ حمدان: مب لازم تقولن شي...بكتب لها كرت وبفكن من الصدعه.. حصه: بعاااااااااااد ..كرت..!!..ياعيني ياعيني.. نورة: حمدااان... صدق صدق...شوياينك انته عالبنت..؟؟؟؟ حمدان: تبين الصدق يابنت عمي.... قسم بالله مادري... بس مادري كيف ماقدر اقاوم اني اغايظها واطفربها... ويوم اتذكرها انقع من الظحك... وانا ادري انها ماطيقني... عشان جي شريت الهدية...نحاول نلطف الجو شويه... حصه: ياويلي انا عالرومانسيه..... نورة: ياخي حمدان ليش انولدت عقبي انته..؟؟؟ حمدان: لييييييش شو عندج..؟؟ نورة: لو اكبر مني جان مافوتّك...!! حمدان: هههههههههههههههاي... لو الدنيا كلها مافيها غير بنت وحده وهي انتي..مابخذج..شحقه ابلي عمري بمينونه..؟!. نورة: ههههههههه يالهرم... الا ياحظك....قم قم خلنا نروح.. حمدان: يالله... ..في طريق الرده اصرن البنات انهن يمرن على عنود ويسلمن عليها ويتشكرن لها بالسلامه... وام سلطان ماكانت موجوده.. وحريم سلطان وحميد كل وحده فبيتها... نزلهن حمدان وراح الميلس يشوف منو فيه... وهن دخلن على عنود وحصلنها طايحه عالشبريه وسلمن عليها ويلسن وياها شوي عقب ردن طلعن وشلهن حمدان البيت عشان مايتاخرن.. حمدان وصى حصه ونوره على الدبدوب.. وكتب بطاقة على السريع وعطاهن اياها ..هو مستانس من اللي سواه... لانه فاطمه يا انها بتحن عليه شويه... يا انها بتعصب زياده وهذا هو اللي يظحكه في السالفه اكثر.... نورة على الرغم من العذاب اللي تحس فيه الا انها كانت متحلفه لسعيد عشان تراضيه...مستحيل تظيع اللي بينهم... لازم تتفاهم معاه...وكانت مخططه لكل شي بتسويه في سبيل انها تراضيه... حتى لو كان هالشي خطير او عيب..بس مايهمها...تراضي سعيد يعني تراضيه... اول ماوصلوا الشارجه دخلوا سياره سعيد ماكانت موجوده جدام الباب... بس وين بيروح من نوره..؟؟ مصييره يرجع البيت ويشوفها.. ام خالد كانت يايبه بناتها ويا البشكاره والدريول بس.. ومحد وياهم يعني رياييل...لانه محد فاظي... دخلوا وسلموا وباركوا لفطوووم اللي ميته من الفرحه... والمسا يوم قوم خوله وهالشي خلا نوره تلوع جبدها وحاولت قد ماتقدر انها تجنبها....وسعيد رد البيت وعلى طوووول الميلس .. لانه ريل خالته هناك + فيصل وابوه..والصراحه انه ماكان يبا يشوف نوره.. كان بعده متغيظ منها ومنقهر... ولوشافها مايعرف شو بيسويبها...على هالحال مادخل البيت الا الساعه 1 يوم تاكد ان الكل راقد... دخل حجرته على طول ورقد هو بعد... نوره وفطوم كانن يسولفن في الحجره وتراويها فطوم الهدايا اللي وصلتها.. وتقدرون تقولون ان فطوم تم تجهيزها للجامعه بكافة الاشكال... امها يابت لها عقد الماس صغييييير وبسيط وايد بس رووعه لانه وايد ناعم ابوها ياب لها موبايل مع رقم طبعا..وهو يعرف انها يوم بتروح الجامعه بتطلب واحد..عشان جي يابلها من الحين وفك عمره من الصدعه... فيصل عطاها الفين تسوي فيهن اللي تبغيه عنه وعن حرمته طبعا... شيخه ربعت السوق وماخلت بدله ولا قميص ولاتنوره الا وخذته حق فطوم.. وطبعا كلهن كاشخات ومرتبات.. سعيد كان ناوي اييب لها لاب توب... بس يوم عرف ان الكلية اللي ناويه تلتحق فيها بيعطونهم لاب توب كنسل السالفه... وخذ حقها بدال اللاب توب.. كاميرا ديجيتال اللي تشبك على الكمبيوتر على طول.. فطوم لين الحين تتحسب ان الدبدووب هذا اللي تخبلت عليه من عند نووره..لكن يوم عطتها نوره الكارد وهي تظحك ..وقرت فطوم اللي فيه وكان.. " الى <الشيخه> فاطمه... الف مبرووووووووك على النجاح..وعقبال الباكلريوس.... بسج باكلريوس ماتبين دكتوراه..! واذا كنتي زعلانه علينا...السموحه منج ..ترا كلها كانت سوالف ومزح... ولا تحطين بخاطرج..... المهم الف مبروووووووك.... 91.3 % نسبه ممتازه... والله يوفقج الشيخ ..حمدان" انصدمت فطوم من هالهدية والبطاقه... وماعرفت بالضبط بشو تفكر او شو المفروض تكون رده فعلها... هذا ناوي مايفكني من حركاته... بس الدبدوب وايد روعه..ومابفرط فيه.. عشان جي ابتسمت وخشت البطاقه في السده... مايهم من عند منووو ...المهم ان الدبدوب عايبنها ومتخبله عليه.... قبل ماترقد نوره ظبطت الساعه على خمس.. وهي تعرف عدل ان المنبه بيوعيها هي قبل فطوم لانه فطوم نومها ثجييل وايد....وفعلا اول مارنت الساعه نشت نوره..لانها اصلا ما ارتاحت برقادها من كثر التوتر..نشت توظت وصلت الفجر..بعدها مسكت تيلفون فطوم اللي تعرف ان رقم سعيد مخزن فيه..واتصلت به... مره ..مرتين...ثلاث...لين مانش ورد عليها وصوته كسلااااااااان..... واول ماسمعته سكرت بويهه..على الاقل احين تروم تدق عليه وينش بسرعه لانه واعي.. نشت ولبست شيلتها البيضا وطلعت من الغرفه... ترددت عند بابه وقلبها مثل الطبل وتحس انه دقاته تنسمع... والرجفه ترجف بجسمها كامل... بس يوم تذكرت زعل سعيد عليها وانه الفرصه هذي مابتتكرر...تشجعت ودقت الباب..... داخل الغرفه سعيد استغرب...ماكان يعرف رقم فطوم بعده عشان جي ماعرف منو هذا اللي متصل عليه وماذنه عشان اخر شي يسكر فويهه... ومافكر انه يرد يتصل لانه ميت من الرقاد يبا يرقد..كان لابس وزار وفانيله ومنسدح على شبريته...ويوم سمع الدق استغرب اكثر...شو السالفه اليوم..؟؟ حالفين مايخلوني ارقد.. خيبه يمكن مستوي شي...!!!..نش بسرعه وبطل الباب وويهه معتفس...ويوم دقق النظر...انصدم من اللي شافه... نـــــــوووووره..؟؟؟؟؟!!!!!!!! نوره بعد انصدمت....اوكي انا وعيته من رقاده لكن ماكنت اتصور انه بيفتح لي وهو بوزار وفانيله...!!!... آآآآآآآآخ يالفظيحه..شو بسوي الحين... نزلت عيونها بسرعه..واي كلمه كانت مجهزتنها عشان تقولها له طااااااااارت....تبخرت.... وماتم شي غير الاحراج...! سعيد ماعرف بشوو يفكر....ياترى يحلم والا شو السالفه..؟؟؟ نوره شو يابها عندي..؟؟ وليش ادق عليه في هالوقت..؟؟؟؟..وفي لحظه خوف نسى الزعل وسالها باهتمام... سعيد: خيـــــر نوره..؟؟؟ شو بلاج.؟ تشجعت نوره وقررت انها تتكلم غصب... ما تقدر تفوت هالفرصه...لانها ما بتتكرر مره ثانيه... وان شاء الله انه محد بيدري في البيت لانه كلهم ينشون 9 او عشر تقريبا... نوره: آآآ ..الخير بويهك... ..آآ..آآسفه اني وعيتك ..الحين....بس...هممممم.... اباك تقوم..وتصلي.. وتتلبس....وووو... تيب سويجك وتنزل للحوش....بترياك هناك... وشردت قبل مايسالها اي سؤال....ماصدقت تخلص من هالاحراج..ولا تدري هي شو قالت بالضبط بس المهم وصلت الفكره...بتروح احين وبتهدي اعصابها وبتترياه في الحوش... سعيد ماصدق اللي قاعد يستوي....بلاها هذي تخبلت..؟؟؟...حد قايلها توعيني والا شو سالفتها... طلع في الممر يشوف..البيت هادي واكيد كلهم رقوود ...الا هالساحره واعيه والظاهر انها دهمانه...!!.. بس خلني اسوي اللي قالت عليه واشوف شو سالفتها...دخل وتسبح والرقاد طار من عينه كله... وصلى الفجر وتلبس وخذ سويجه وتيلفونه ونزل عندها.. ومثل ماقالت...كانت يالسه عالحشيش مثل ماتعودت ... قال في خاطره " بسم الله" ..وسار صوبها... والزعل رد في خاطره ..بس الفضول غلب عليه...يبا يعرف شو سالفتها وشو تبا... نوره اول ماشافته رد لها التوتر..وفزت من مكانها ووقفت.. يوم وصل لها سعيد...حاولت تبتسم.... قالت له نوره: صباح الخير.. سعيد: صباح النور...خير...شو مستوي.. نورة: مب مستوي شي... يبت سويجك..؟؟ وسوا حركه بيديه يراويها السويج... سارت نورة صوب الباب الرئيسي... نوره: تعال وياي... سعيد تعطل الفكير في مخه..وقرر انه يجاريها ويعرف شو في خاطرها.... لانه فعلا مب قادر يفهمها... تبعها لين برا البيت ويوم طلعوا سكرت نوره الباب وراهم .. نورة: افتح السياره...!! سعيد: نوره شو عندج..؟؟ نوره: افتح السياره سعييييد....! هز راسه وسار صوب باب السايق وفتح السياره... وعلى طول نوره فتحت الباب للكرسي اللي عدال السايق وركبت...وهي تاشر له تباه يركب بعد... فتح بابه وركب عدالها.. سعيد: قاعدين نلعب لعبه نحن..؟؟ نورة: لا... سعيد: انزين...!!..ركبنا...وبعدين..؟؟ ؟ نورة: ودني البحر لو سمحت..... بطل سعيد عيونه .... سعيد: نعم...؟؟؟؟ البحر..؟؟؟ نوره ينيتي انتي..؟؟ نورة: لا ماينيت..بتخلي البحر في خاطري بعد...؟؟ سعيد: موعتني من رقادي عشان اوديج البحر..؟؟؟....انزين جان يبتي فطوم وياج.. نورة: لاني ماريد اسير ويا فطوم.... ممكن تتحرك قبل مايظيع علينا الوقت...! سعيد: اصبحنا واصبح الملك لله.... وحرك السياره ونوره تتبسم.. الخطوه الثانيه ونجحت...باقي الثالثه..والله يستر من ردة الفعل....وصلوا البحر ونزلت نوره ..ويوم شافته مانزل ولا تحرك احتشرت.. نورة: انزل...بتخليني اروحي..؟؟ سعيد: نوووره.... اختصري هالحركات كلها وقوليلي شو فخاطرج... نوره: في خاطري ارمسك بسالفه بس مب في السياره... سكرت الباب وراحت للبحر ..وقعدت على التراب.... وبعد شوي تبعها وهو مقرر يهدي اعصابه... لين مايشوف اخرتها وياها... وصل لين عندها ويلس مجابلنها.. سعيد: وهذي يلسه.... رمسي...شو فخاطرج.. سعيد كان متنرفز وكان مبين على صوته وطريقة كلامه ... يعني باختصار مايشجع حد يتكلم معاه....سكتت نوره.. وماعرفت كيف تتكلم ومن وين تبدا.... ليش يتصرف جي...؟؟؟..ابدا مب متعاون.... يتعمد يوترها... زين جي احين ظاع الكلام كله اللي مجهزتنه...!!!!! نورة: سعيد.. لا اتم جي عاد ...ماعرف ارمس جي.. سعيد: شو تبيني اقولج يعني والا كيف اتصرف... وانتي تسحبيني مثل التيس من مكان لين مكان وماتقوليلي شو السالفه...!! وموعتني من الساعه خمس.... اظايقت نوره... الفكره كلها كانت مب زينه...وخلها ترد البيت احسن لها واحفظ لكرامتها...نشت ونفظت التراب عن ثيابها.. نورة: آسفه خلاص... ردني البيت... تلوم سعيد ... ويوم وصلت عداله مسكها من ايدها وهو بعده يالس... سعيد: سووري......خلاص يلسي...وخبريني باللي في خاطرج... ايد سعيد ومسكته لها يابت لها هشاشه في عظامها..واضطرت تقعد وتسكت... سعيد: شو بلاج نوره.... ؟؟؟ خذي راحتج رمسي عادي... قولي الي في خاطرج.. نورة حست انه سعيد تفهم موقفها المحرج شوي... ونوره من النوع مايتحمل كلمه من حد غالي عنده..وتصيح على طول... بس كانت كاتمه وماسكه عمرها.... نورة: سعييد... انته ليش زعلان عليه..؟؟؟؟ رفع سعيد حواجبه... وردت له الفكره اللي نوره ماخذتنها عنه واظايق... سعيد: خبريني انتي اول...ليش كنتي زعلانه..؟؟ نورة: انته تعرف ليش كنت زعلانه....فطوم خبرتك.. سعيد: ابا اسمع السالفه منج.... نورة: كنت منصدمه من رمسة سمعتها من خوله... قالت لي كلام بما معناه انك تحبها وتباها...وبتخطبها قريب... وانك تغار عليها...انا انصدمت من اللي قالته... وقلت في خاطري هذي ليش تتكلم بكل هالثقه..؟؟؟ اكيد عندها شي تستند عليه..وان حد مرمسنها انك بتخطبها... ومادري كيف فكرت ساعتها...بانك دام رمست عن خطبة خوله...معناته انا مالي مكان فحياتك.... وان خوله هي اللي بتاخذها ...وانا مجرد تسلية بين فترات... سعيد: وزعلج هالشي..؟؟؟ نورة: اكيـــد زعلني..... وذبحني بعد... سعيد: ليش نوره..؟؟؟ رفعت نوره عينها فعينه.... وشافت عيونه تلمع بشكل غريب وحلوووو وايد.... نورة: انته تعرف ليش.... سعيد: ماعرف.. نورة: تعرف.... سعيد: مااااااااعرف...اذا كنتي تبينا نتفاهم خلج صريحه بكل شي.. سعيد كان ناوي يذلها ذل...ومايبا يسهل اي شي عليها....احتارت نوره...اقوله احبك..؟؟؟ ماقدر.. ماتطلع مني مااجرأ... وفجاه يت في بالها فكره انها تكتبها بدال ماتقولها...اسهل صح...؟! مدت ايدها على التراب اللي فاصل بينهم...وكتبت" لاني احبك " ... تابع سعيد حركتها وقلبه خلاص ذايب..مايعرف بالضبط متى راح الزعل..بس تظاهر بالعكس.... نوره تقوله احبك..؟؟ من متى وهو يتريا هالكلمه.... بس مابيخلي السالفه سهله عليها..لازم يطفربها شوي... سعيد: سوري ثقافتي انجلييزي...ماقرى عربي... نورة عرفت انه سعيد يبا يغايظ ويطفربها..لكن ده بعدك على قولت اخوانا المصريين... ومدت ايدها مره ثانيه تبا تكتب " I love u" بس مسك ايدها قبل ماتكتب... سعيد: ماريد اقرا شي....ابا اسمع... نورة: سعيييد ..!!. سعيد: قوووولي... نورة: اووووفففف.... احبــــــــــك...خلاص اترتحت.. نورة دمعت عينها وهي تقول هالكلمه...ابتسم سعيد ..وعقب رد ظحك... وهو يحس باحراج... و بعده ماسك ايدها.. مايقدر يتم زعلان عليها...صح حاط بخاطره بس بيتفاهم وياها على كل شي... يدري شكثر تطلب منها جرأة وشجاعه انها تسوي اللي سوته اليوم....ومايقدر انه يغض النظر عن كل هالاشياء...وفوق هذا نوره قالت له انها تحبه...شو يبا اكثر من جي...؟؟ سعيد: تدرين اني انا بعد احبج واااااااااااايد نوره... وتعرفين شكثر ابغيج واني اتريا بس حصه تعرس عشان اخطبج...صح والا لا؟؟ هزت نوره راسها وهي منحرجه وعيونها على الكلمه اللي كتبتها من شوي عالتراب... فج سعيد ايدها وهو يقولها بعتااااب واضح.. سعيد: دامج تعرفين... كيف قدرتي تفكرين فيني هالتفكير...؟؟؟؟ نورة: بشو تباني افكر وانا اسمع هالرمسه منها...؟؟ سعيد: المفروض تتاكدين...بالله عليج نوره انا اسوي هالسوالف..؟؟...ترمسين جنج ماتعرفيني.....خليني اقولج شي...اي واحد يوم بيلعب.. بيلعب شهر...شهرين.....سنه ان كثر..... بس مايلعب عشر سنين...!!! نورة: آسفه والله... لا اتم زعلان عليه... آسفه مابشك فيك ثاني مره.... ابتسم سعيد... سعيد: قولي احبك مره ثانيه وبيطيح الزعل كله.... نورة: ههههههههههه مشكله الطمع... قوم خلنا نرد البيت... سعيد: تو الناس... توها ست الا ربع... ماتبينا نلعب شوي عالبحر..؟ ووافقت نوره... وقعدوا يتمشون وكل واحد منهم الدنيا مب سايعتنه من فرحته..ويسولفون عن اشياء وايده ويعاتبون بعض... وكل حد يخبر الثاني عن ردات فعله تجاه بعض المواقف اللي صارت بينهم... ويوم ردوا البيت ووقف سعيد سيارته... قالها. سعيد: تصدقين نوره...احس ان هاليوم احلى يوم مر عليه فحياتي لين الحين... نورة: والله حتى انا... يسد انه راضيناك وافتكينا من زعلتك الشينه.. سعيد: لا والله...؟؟ منو الي زعلته شينه احين انا والا انتي..؟؟؟ نورة: والله ثنيناتنا.... يالله انزل.. ويوم بغت تنزل قالها سعيد.. سعيد: صبري نوره... ابا اسالج... متى تبيني ايي واخطبج..؟؟؟ لانه حصه انخطبت خلاص... انحرجت نوره...كيف ترد على هالسؤال... بيذبحها ان درى باللي مسوتنه... نورة: سعيييد...انا يوم كنت زعلانه عليك سرت وحلفت على امي ما يجدمولي اي معرس لين سنه... لين ماتخرج... انصدم سعيد... عقب كل هالتخطيط يتريا بعده سنه...!!!!!!! مايقدر... سعيد: بذبحج..... نورة: سوري والله.... ماتروم تصبر...؟؟ سعيد: نص سنه وبس.... ست شهور بالتحديد... وبعدها بيي اخطبج ومالي خص... على الاقل عرس ماشي لين ماتتخرجين.... بس الخطوبه قبل...تسمعين..؟ نورة: هههههههه اوووكي ولا يهمك... نزلوا من السياره ويوم دخلوا البيت حصلوه على حاله مثل ماخلووه... وبالتالي محد درى عنهم..يوم دشوا البيت حصلوا الريوق محطوط... سار سعيد يبا يتريق وشاف نوره انها بتسير فوق... سعيد: تعااااااااااااالي..... وين سايره...؟! نورة: اوووص لا تصارخ.... شوفيك..؟؟ سعيد: بتخليني اتريق رووحي....تعالي تريقي عقب سيري فوق... ظحكت نوره ...طبعا مابتمانع... تريقت وياه وهم كله يسولفون ويظحكون ..ويعوضون عن فترات الزعل...ويوم خلصوا وركبوا فوق ..وقف سعيد جدام غرفته... سعيد: نورووووه...!!.. وعيني والا وصّي اي حد يوعيني الساعه 11 اوكي..؟؟ نورة: من عيوووني الثنتين... ابتسم سعيد... سعيد: فديت عيونج الثنتين انا.... وانتي بعد سيري رقدي... دخل كل واحد منهم غرفته وهو يحس بونااسه ماحس مثلها من قبل ابد....اول مادخلت نوره الغرفه... اول شي سوته مسكت تيلفون فطوم ومسحت المكالمه الصادره .. ودقت على تيلفوون امها عشان تخوز اي اثر في التيلفوون يدل على انها اتصلت بسعيد الصبح...ويوم اطمنت من كل شي...رقدت وهي تسترجع كل شي صار بينهم .. وهي ميته من الوناسه...  وش رايكم حلو مو 
|
||
|
|
|
26-07-2006, 04:29 AM
|
رقم المشاركة : 3 | ||
|
|
الجزء الثاني والعشرين نشت نورة على حدود الساعه 12 الا ربع..واول ماشافت الساعه فزت من نومها... ياويلي..!!..سعيد محد وعااااه,.... نشت وتلبست ثيابها وتغسلت وتعدلت ولبست شيلتها البيظا وطلعت من الحجره... وفطوم بعدها راقده.... نزلت تحت للصالة وحصلت الكل متيمع.. امها وحصه وعلياوفيصل وخالها وحرمته وشيخه ومنى ومنال .. يعني سعيد بعده راقد..!! ياوييييلي.... يت وسلمت عليهم كلهم ..بس ماقدرت تيلس..لازم توعييه حرااااام... ردت نشت ... حصه: وين بتسيرين.؟؟؟ نورة: هاا..؟؟..آآآ ... بوعي فطووووووم...خاست من الرقااد... وطلعت من الصالة ويوم كانت بتركب الدري ..انصدمت بسعيد نازل ومتكشخ لصلاة الجمعة.... اول ماشافها ابتسم... الحمد لله يعني مب معصب...بس وقف وطالع ساعته ورد يطالع فويهها وعلى ويهه تعبير يظحك كانه يحاسبها عالتاخير هذا... سعيد: عيونج ميفنه... توج ناشه.؟؟ نورة: هي والله....سووري راحت علي نوومه ونسيت اقول لحد يوعيك..! سعيد: هههههههه ليش انا رمت ارقد اصلا..؟؟؟ ناش من عشر... ظحكت نوره وتمت ساكته... كمل سعيد طريقه ونزل لين وصل عدالها..... وفرر راسها بريحه عطره.. عنبوو متسبحبه ياسعيد..!!!... سعيد: وين بتسيرين.؟؟ نورة: بسير اوعي فطووم... سعيد: وبتسيرون بعد الغدا؟؟ نورة: كالعاده... سعيد حاس بوزه كانه مب عايبنه الوضع هذا...بس ماباليد حيله... وعليه بالصبر.. سعيد: همممم..خلاص براايج. كملت نورة طريجها لحجرة فطوم وسعيد روح عندهم في الصالة... بعد شوي ساروا الرياييل يصلون ويوم ردوا حطولهم الغدا وتغدوا.. ونفس الشي للحريم... وبعد الغدا فطوم ونورة كانن في الغرفه لانه نوره تلم اغراضها في الشنطه عشان تنزلها.. نورة: فطوووووم.. بخبرج بشي .. لاني اعرف انج مستهمة من الموضوع... فطوم: خيييييييير..؟؟ نورة: تراضينا انا وسعيد اليوم..الصبح..بس بليز لا تساليني كيف...المهم تراضينا وخلاص.. فرحت فطووم وااايد. فطوم: والللللــــــــه..؟؟ الحمد لله مااااااااااابغييييييتوووووا... !! نورة: ههههههههه شو نسوي...زعلته شييييييينه اخوووج... فطوم: والله زعلتج انتي اشين الصراحه...ما تتفاهمين... نورة: يعني اخوج اللي يتفاهم... خيبه كان ياي يظربني بروحج شفتيه...!! فطوم: هههههههههههههه خسج الله.... كان معصب..ولا كان بيظربج بعد...اونه كان ساير ينازعج... بس اصلا حتى لو صار ووصل لج..مابيقول شي...لانج ماتهونين عليه... نورة: فديييييته والله.... تعااااااااالي.... فطوم: هااااا...؟؟ نورة: هذا النجاح ونجحتي.. احين لازم تاخذين ملفج من المدرسه وتسوين فحوصات الجامعه وتين العين تسجلين... فطوم: هي ادري.. نورة: متى بترمسين ابوج عشان السكن عندنا..؟؟؟ فطوم: خلال الاسبوع الياي.... بس بقنع سعيد اول عشان يساعدني .. نورة: هههههههههههاي سعيد ارووحه بيعطيج طراق ان طريتي السالفه...... فطوم: ههههههه بكم تراهنين.؟؟؟... ماعليج انتي منه..يوم بيشوف اني بسكن عند عرب مزايييين وبيشوووفني سبب مقنع يخلييه يروح العين.... بيوافق وبيقنع شيبتنا بعد وياه... نورة: والله عليج تفكيير...؟؟.....المهم خبريني باللي يصير وياج...اتصلي مب تقطعينا... فطوم: افا عليج..احين عندي موبااايل بحشركم كل يوووووم ههههههههههه... بعد فتره كانوا كلهن متيمعين في الحووش قبل مايروحون هل العين..ماعدا سعيد... ونوره كانت ادوره بعيوونها...وييينه..؟؟ يدري انه نحن بنروووح احين ليش منخش؟؟... بس قاطعت افكارها امها... ام خالد: امايه سيري هاتيلنا دبه ماي بارده حق الدرب... نورة: ان شاء الله امايه... سارت نورة صوب المطبخ..ويوم دخلت كان سعيد توه طالع من البيت وشافها وهي تدخل المطبخ... يوم صد صوب باقي الاهل شافهم لاهين في الحوش ومحد منتبه له... لحقها ودخل المطبخ وراها.... نورة كانت اطلع دبة ماي من الثلاجة ويوم سكرت باب الثلاجه والتفتت حصلت سعيد جدامها.... نورة: انته وين من الصبح..؟؟؟؟؟ سعيد: تولهتي عليه..؟؟؟ نورة: بغيت اسلم عليك قبل مانسير.... سعيد: همممممممم يالله سلمي عليه... نورة: اووفف منك يالغلس ... قوم عن الباب..مابسلم خلاص كنسلت.. سعيد: هههههههههه افااا ... نورووه لا تروحين.... والله مب مستوعب انج بتسيرين.. نورة: ههههههههه عندي دوااااااام... سعيد: خليييييييه يولي... نورة: شو هالخريييط..؟؟ تعرف انه محد بيخليني اقعد شحقه تطلب.... سعيد: انزين متى بتون مره ثانيه..؟؟ نورة: والله ماعرف ياسعيييد... سعيد: بتخبريني يوم بتون..؟؟ نورة: بخبر فطوم وهي بتخبرك.... سعيد: ماباااا...خبريني انا.. نورة: هممممممممممممم اتصلك يعني....!..هذا قصدك...؟ سعيد: هممممممممممممم هي... نورة: لا والله..؟؟؟ صاحي انته تطلب مني اكلمك في التيلفون..؟؟؟ جي شو قالولك عني.؟؟ ظايعه..؟؟ سعيد: هههههههههههههه انزين انزين بسم الله كلتيني...كانت محاولة يائسه لاغير.... انزين بالايميلات..؟؟؟ نورة: عندك ايميل..؟؟؟ سعيد: حلفي انتي بس..؟؟؟؟ يعني واحد يشتغل بالاتصالات....بالله اذا انا ماعندي ايميل منو عنده يعني..؟؟؟؟ نورة: همممممممممم بفكر.... مسك سعيد قلمه اللي في مخباه وخذ كلينكسه من العلبه المحطوطه عالطاوله وكتب فيها ايميله ... وعطاها نوره.. سعيد: لا تفكرين... بس راسليني عالاقل بين فتره وفتره ..... نورة: ههههههههه انزين ...شي في خاطرك؟؟ سعيد: اهتمي بعمرج... وعن السوالف الزايده ويا حمداااان.... ظحكت نورة ...لو تدري ان حمدان حاط عينه على اختك شو بتقوووووول..؟؟؟ نورة: ان شاء الله..وانته بعد اهتم بعمرك.... مع السلامه سعيد: فمان الله.. طلعت نوره وهي شالة دبة الماي وسلمت عليهم كلهم .. وبعد شوي لحقها سعيد وسلم على عمته وحصه.. وركبوا اهل العين سيارتهم وراحوا.... في هاللحظه كانت عنود تكلم عبدالله.. عبدالله: شحالج غناتي..؟؟ عنود: متولهه عليييك موووووت... شخبارك انته..؟؟ عبدالله: والله حتى انا متوله عليج وعليكم كلكم والله...شحاله عمي وعمتي وخوانج كلهم..؟؟ عنود: كلهم بخير وسهاااله....شحال خليفه عندك..؟؟؟ عبدالله: همممم والله...على حاله...بخير بخير.. عنود: عبااادي..بعده خليفه زعلان على سالفه حصه..؟؟.. عبدالله: هذا اللي احسه انا....دوومه مويّم وسرحان ومايسوولف مثل قبل... لكن يوم اساله يتظاهر بالعكس.. عنود: فدييته والله... مسكين مايستاهل... عبدالله: شو نسوي بعد هذا النصيب...لايكون خبرتي حد انتي..؟؟ عنود:لالا ماقلت لحد... شخبار دراستك.؟ عبدالله: والله ماشي الحال مع انها اصعب عن قبل....عنووده قوم امي في البيت.؟؟؟ دقيتلهم محد يرد.. عنود: لا عمري...اظني انهم الا في الشارجه...ترا بنت خالك نجحت في الثانوية العامه وساروا يباركولها.. عبدالله: وانا اقوووول وينهم....ثرها العيوز عند اهلها... ماسووا شي في قسمنا..؟؟ عبدالله صح كانت عنده غرفته اللي هو فيها حاليا...لكن مسوين له قسم خاص داخل البيت عبارة عن غرفتين وحمام وصاله..وهو بعده مش ماثث...يبون يجهزونه لعرس عبدالله.. عنود: لا ماظني سووا شي.... عندهم وقت براايه لين عقب.. عبدالله: تمام عيل....بخليج عنووده ماقدر اطول وايد...اهتمي بعمرج لا تخليني احاتيج... شي في خاطرج؟ عنود: سلامتك الغلا...انته اللي اهتم بعمرك وسلم على خليفه وايد وايد.. عبدالله: يووووصل ان شاء الله.... فمان الله وسلمي عنود: ان شاء الله...الله يحفظك ياربي... بعد اسبوعين .. رجع سيف بيت عمه حمد وقالهم انه يبا يملج... وان الملجه مابتستمر سنه وبيعرسون ان شاء الله قبل عرس عبدالله...واذا كان على حظور عبدالله وخليفه العرس... يقدرون يرجعون البلاد فتره اسبوع ويردون مره ثانيه امريكا.. لانه حتى سيف كان مصر انه مايعرس الا يوم يحظرون عبدالله وخليفه.... بس هذا مب معناته انه يصبر سنه وشي لين مايعرس عبدالله بعدين هم يعرسووون.... !!... ووصل هالكلام حصه... اللي قالت لهم بتفكر في السالفه هاذي... وبينها وبين نفسها كانت متوجسه... وخايفه... ياترا توافق عاللي قاله سيف..؟؟ اللي هو منطقي... والا تعاند وتتريا لين مايعرس عبدالله... بس فتره سنه وشي فتره طوييله وسيف معاه حق... يعني هي وافقت عليه.... وتدري ان العرس مب لعبه ..خلاص وافقت عالخطبه يعني انها بتعرس قريب..وهي ماعندها شي يمنعها عن العرس...واذا على عبدالله وخليفه..مثل ماقال سيف..يقدرون ايوون فتره اسبوع ويحظرون العرس ويرجعون بعدين امريكا يكملون دراسه.... حصه: خلاص موافقه...سووا اللي تبونه.. ام خالد: مب نسوي نحن اللي نباه...مابنغصبج على شي ماتبينه... حصه: انزين خلاص..حددوا وقت للملجه بس ابا وقت اجهز... ام خالد: ثلاث اسابيع يسدنج تجهزين.؟؟؟ حصه: اعتقد.. ام خالد: على خير ان شاء الله.. ساعتها نوره كانت في غرفتها ويالسه عالكمبيوتر وميته من الظحك على رساله سعيد... اللي سبها سب بسبب تاخرها بارسال رساله حقه... وخبرها بعد انه فطوم خبرته بسالفه السكن في العين...وهو بعد تردد وافق عالسالفه... وكاتب بعد " لغرض في نفس يعقوب" وحاطلها غمزه... عاد انتي فهمي اني انا موافق لانها بتسكن وياج واني بقدر اسير العين متى مابغي بحجه اني ساير لاختي.... دخلت عليها حصه الغرفه وملامحها غريبه...لانه هي اصلا مب عارفه بشو تفكر..تفرح والا تظايق..؟؟؟ حصه: شو تسوييين..؟؟ نورة: ماااشي يالسه عالنت.... بلاج؟ ومسكت نوره كوب والماي وشربت منه يوم قالت لها حصه.. حصه: نوروه ..ملجتي بعد ثلاث اسابيع....... انصدمت نوره وبغت تختنق..وطلعت اللي فحلجها كله عالشاشه... حصه: ههههههههههههههههه ياااااااااااع.... نورة: شووو تقوووولين انتييييي..؟؟؟؟ حصه: مشي مشي الشاشه عن تنقع فويهج.... وفرت عليها الفوووطه اللي كانت عالشبريه..شلتها نوره ونظفت الشاشه.... وملامحهامصدوومه.. نورة: ويا ويهج ليش جدمتي الملجه..؟؟ حصه: انا اللي جدمتها احين..؟؟..سيفووووه محتشر يبا يملج....ولا ازيدج من الشعر بيييت.... حتى عرسي بيكون قبل عرس عبدالله.... نورة: عشوووو مستعيل ويا راسه.. حصه: شو درااااني... حشرووني ووافقت.. على شرط ان عبدالله وخليفه يحظروون عرسي... واذا ماحظروا تراني والله بكنسل كل شي ولا عليه من حد... نورة: وكيف بتجهزين عمرج فثلاث اسابيع..؟؟ لازم تروحين تشترين قطعه للفستان بسرعه وتختارين الموديل..يالله يالله يخلص في ثلاث اسابيع... حصه: بتدبر ان شاء الله.... بعد ثلاث ايام في امريكا... كان عبدالله يكلم ناصر اخووه وخليفه يالس وياه في الغرفه يدرس.. ويوم سكر عبدالله كان ويهه معتفس...وتم ساكت....رفع خليفه نظره وقعد يطالعه... خليفه: شوفيك..؟؟ عبدالله: ماااشي.. خليفه: لا والله..؟... بلاك.؟؟ الاهل فيهم شي..؟؟ عبدالله: لالا مافيهم شي..مستانسين ... خليفه: عيل بلاك من سكرت معتفس ويهك.؟؟ تم عبدالله ساكت....يخبره..؟؟؟..والا مب ظروري..؟؟...مسكين عليه امتحان بعد يومين مافيه يزيد عليه... بس والله بيعصب اذا ماخبرته... خليفه: بتقول والا اصفعك....!! عبدالله: همممممم... خلوووف... ملجه حصه بعد ثلاث اسابيع.... انصدم خليفه....بهالسرعه ياحصه..؟؟ ... كان عندي احساس انها بتكون لي وبترجع لي ..لكن احين صدق بفقد الامل هذا.... يارب ساعدني.... مابيدي شي غير اني اتمنالها التوفيق وتستانس بحياتها... كان عبدالله يراقب تعابير ويه وهو قلبه يعوره... مانسى..!!...خليفه بعده مانسى حصه... لو كانت بنت ماتقرب له يمكن ينساها بشكل اسرع...بس بنت عمه...!!..ويسمع اخبارها دايم...وريلها ربيعه...!!..كيف بينسى بالله...؟؟؟ عبدالله: مابتقول شي..؟؟ خليفه: الله يوفقها ويسعدها.... عبدالله: خلوووووف....الله بيرزقك باللي احسن عنها بمية مره... سكر خليفه كتابه وجمّع باقي الكتب والدفاتر وشلهن... ولاحظ عبدالله ان ايد خليفه ترتجف... عبدالله: وين ساير..!!! خليفه: بسير الحديقه اللي عدالنا بدرس فيها... عبدالله: ايي وياك..؟؟ خليفه: لا..عبود...ابا اتم بروحي شوي... طلع خليفه وسكر الباب وراه....وعبدالله متندم انه خبره بهالخبر... هذا قاله عن الملجه بس.عيل لو قاله ان العرس بيصير وهم بعدهم في امريكا شو بيقووول...؟!.. الله يعينك ياولد عمي... حصه ونوره شلتهن امهن بوظبي عشان يختارن قطع ويفصلنها هناك بالمره ..خلال هالاسبوعين قبل الملجه..... حصه كانت مشغوله بالتجهيزات مع امها ..وعنود تعاونهن متى ماحصلت فرصه.. وحمدان متى ماطلبوا منه شي مايقولهم لا.... كانوا في نص شهر ثمانيه في هالاوقات.... نوره بعد الملجه باسبووع بتخلص الصيفي...وفطوم شافت الوقت يظيع منها وقررت انها تكلم ابوها في السالفه..لانه اصلا المفروض تروح للعين عشان اجراءات التسجيل والارشاد وتحويل وضعها في الجامعه من طالبات السكن لطالبات العين... كان الوقت في الشارجه العصر... وسعيد كان في البيت..سارت فطوم وخبرته عشان يرمس ابوها وياها..ونزل..ويلس عدال ابووه وامه وعليا وفطوم..وفتحت له فطوم السالفه.. بو فيصل: شوووووووووووو؟؟.. لالالالالا...امين يايبه هالفكره انتي..؟؟ فطوم: ابووويه دخيييييييييلك.....ليش انزييين؟؟ بو فيصل: وين تبين تيلسين فبيت عمتج تغثينهم... عليا: افاااااااا ياخالي... شو تغثهم بعد بالعكس البنات وامايه وايد يحبووون فطوم... فطوم: بعدين ابوويه انا الصراحه ماريد اقعد مع بنات غرب في السكن...واختلط ببنات الله اعلم بهن... انا ماقول ان كلهن مب زينات بس واااااايد اشياء تستوي في السكنات يخبرونا عنها.... بو فيصل: خلي عنج... اكييه اختج شيخه سارت وسكنت في السكن ودرست وخلصت وتخرجت ولا صار عليها شي ولا تغيرت علينا.... سعيد: ابووويه ويييييييين زمااان شويخ ووين الحين....احين البنات استون اقوى عن قبل... والصراحه نحن نسمع سوالف وايد عنهن.... يعني اللي تروح صاحيه من بيت اهلها تخترب هناك.... الا البنت اللي هي ماسكه عمرها ومتربيه عدل فبيت اهلها.... بعدين الصراحه فطوم احسن لها ويا بنات عمووه وتحت نظر عموووه ومراقبتها... ونحن بنكون مطمنين عليها اكثر... ومتى مانبا بنسير لها... شحقه تسكن في السكن دام عندها اهل في العين وبناتهم في الجامعه...بتسير وبترد وياهن ... فطوم: فديييييييييتك ابوووويه...... على الاقل اول سنه... بو فيصل: يابنتي مابترتااحين وياهم..... عندهم ريااايييل وميلسهم دوم مايخلى من ربعهم... سعيد: ابويه اذا على خالد وناصر كلهم معرسين وعندهم عيال وكل حد فبييته واصلا هم مثل اخوانها... وعبدالله تراه مسافر واصلا اول مايرد بيعرس .... بو فيصل: اشووفك انته موااافق..؟؟؟ سعيد: انا الصراحه مواااافق...بنطمن اكثر عليها فبيت عمووه...بتكون تحت نظرها ومراقبتها... ونحن بنعرف ويا منو تسير ومنو ترابع ومتى سارت ومتى يت.... مب مساله عدم ثقه لكن عشان نطمن اكثر.... خلها تسكن عندهم واذا ماعيبك الوضع ومارتحت على تصرفات فطوم ردها السكن...مب مشكله... بو فيصل قعد يفكر بالساااالفه... وفطوم تدعى ربها انه يوافق... وسعيد يتبسم... يعرف ابووه..اذا شاف حد من اخوانها موافق بيقتنع... لانه يعرف انهم حريصين مثله... بوفيصل: ....... يصير خير...!! فطوم: ابويه ..فديييييييييييييييييت روحك انا...يعني موافق..؟؟ بو فيصل: يعني بنشاااور عمتج وريلها... مابنفرضج عليهم فرض نحن.... سعيد: ههههههه خلاص ظمني الموافقه.... فطوم: الله يسمع منك.... بس آآآآآآآآخ اتخيل عمووه تقول لا ماباها هههههههههههه... سعيد: هههههههههه صدق والله بتتحطمين.... لا فديتها عمووه مابتقول غير مرحبابج الساع.... بس قبل مايتصل بو فيصل على اخته شاور اخوها العود فالسالفه هاي... وهذا ماعاارض الفكره بالعكس ايدها وقال انها احفظ للبنت ... وهم واثقين فيها... ويوم اطمن بو فيصل ان امها واخوانها موافقين... وهي تشوف عمرها بترتاح وياهم...رمس اخته في السالفه... ام خالد: عنبووووووووو يالغااالي...تشاورني..؟؟؟ حياها الله بنت هلال هذا بيتها تراه.. بو فيصل: تسلمييين يام خاالد.. بس اذا كانت فيها مغثه والا شي لا اجاملينا... ام خالد: ويدي ياهلال..شو هالرمسه بعد.... !!!... والله مرحبابها فاطمه والبيت وسيييع وبترتاح عندنا ونحن بعد بنستانس فيها... انته هاتها وماعليك من اي شي ثاني... بعد يومين في مكتب سعيد وجدام كمبيوتره...فتح الايميل اللي صار يشيكه اكثر من خمس مرات في اليوم...وحصل رساله من نوره...استانس من الخاطر وهو يقراها وكانت تقول.. " السلااام عليكم.... مرحبا سعيييداااااااان... شحالك ويا هالراس....؟؟.. شو اخباركم... الحين الساعه 12 ونص في الليل... من شوي كنت اشوف فلم الرزفه.. مع حصه... هي تشوف خطيبها سيف وانا اشوفك انته لوووووول... بقولك شي بس لا تتخقق.... حلوه رزفتك... ماباقي شي عن ملجه حصيييص.... باقي 10 عشر بالضبط .. انتوا متى بتوونا؟؟؟ هي صح بغيت اتخبر عن فطوووم... شفت بنات التاسيسي ايين الجامعه..حظرتها متى بتي ؟ والا ناويه ماتمتحن امتحانات تحديد المستوى.؟؟؟؟ المهم انتظر رسالتك...سعووود دير بالك على نفسك... وووووووو وخبرني باخبارك... احم ابا اقول شي بس مستحيه... والا اقولك . مابقول هههههههههه باي Yours, NoOoOoOoRa" ظحك سعيد على نوره... هو يعرف شو بغت تقول ومستحيه ..بس بييها يوم وبتقوله هالكلمه بدون حاسيه... سار وكتب لها رد.. " السلااااااااااااااااااااااااام عليج يالبخيله.. شحالج حبيبتي..؟؟ متوله علييييييييج مووووووووووووووووت... وتراج مقصره ويايه ولا اطرشين لي دووووم... بس ماعليه احسن من لاشي بعد ..مانروم نقولج شي.. نحن هني كلنا بخييير... والله اني دوم افكرفيج... وانا احين تراني في الدواااااام....والساعه عشر وثلث... فطوووم ابشرج عنها.... اقنعنا ابووويه انه يخليها تسكن عندكم.... يوم اقولج فطوم مب هينه...!!... المهم الخلاصه ان نحن بنيكم انا وهي يوم الجمعه..يعني بعد ثلاث ايااام... وبتم عندكم لين ماتخلص شغلها في الجامعه .. يعني يمكن اتم اسبووع فاظيه فيه قبل مايبدا الدوام رسمي... وبنيبها الشارجه وعقب بردها عليكم ان شاء الله....وابشرج بعد تراني انا توصيت فسيراتها ورداتها..يعني بتشوفيني كل اسبوع ... يالله عاد جهزولها حجره زينه... وتوصّووا في اختي... وخلووا بالكم منها.... وعلى فكره تذكرين هدية البشااره اللي مارمت اعطيج اياها بسبب زعلتج يالزعاااااااااله..!!!؟ شرييتها..وبييبها وياي بالجمعه ان شاء الله... ماشي في خاطرج من الشارجه..؟؟؟ اذا شي في خاطرج لا تستحين ..طرشيلي رساله وخبريني... بتريا منج رسااله.. وابا اقوولج شي.. بس انا مااستحي.. اموووت فيج... سعيد.." yours NoOoOoOoNa |
||
|
|
|
26-07-2006, 10:22 AM
|
رقم المشاركة : 4 | ||||
|
اقتباس:
 حلووه  صرااحه !! يا ملحهم سعيد ونوره مره تحمسست لهم بس حصه وخليفه مره مضيقيين خلقييييي  القصه كل مالها وتحلوو من جد انتي مره ذووق بختيارك لها تدرين نونا والله صارت جزء من يومياتي لووووووووووول لازم اقراها واعرف وش صار يومياااً <==من النوع الي تتحمس مره مع كل شي تسلمييين حبيبتي وبنتظار الجزء ال 23 لا تطوليين علينا
|
||||
|
|
|
27-07-2006, 01:33 AM
|
رقم المشاركة : 5 | |||||||
|
|
اقتباس:
اقتباس:
اقتباس:
اقتباس:
مثلي يعني أنا يوم وصلت هالجزء واصلت يوم كامل وأنا عيوني على الشاشهاقتباس:
|
|||||||
|
|
|
27-07-2006, 01:33 AM
|
رقم المشاركة : 6 | ||
|
|
الجزء الثالث والعشرين
في بيت حمد الكتبي.. نورة وحصه وعنود كانت يالسات في الصالة ..نوره كانت تكلم فطوم وهن يسمعنها.. نورة: احين انتي خلصيني وين تبين تسكنين.؟؟ عندي والا في غرفة الضيوف العوده والا الصغيره..؟؟ فطوم: همممممم لالا الصغيره... خلوا العوده للضيوف... نورة: بس جي بتكونين تحت عنناااا... نحن فووق.. فطوم: شووو عليه انا عاد تحت والا فوق كله واحد.... بعدين غرفة الضيوف الصغيره عدال غرفة عموووه.. جي احسن.. الغرفه العوده معزوله شوي.. نورة: خلاص على راحتج....متى بطلعوووون..؟؟ فطوم: سعيد يقوول بنتغدى وبنييكم... نورة: ياسلااااااااااااااام والله وناااااسه يوم بتسكنين عندنااا... هني عنود وحصه يسلمن عليج... وبنترياج.. فطوم: والله انا اروحي ميته من الفرحه... وردي السلام عليهن... شو بتسوووولي عشا..؟؟ نورة: ههههههههه اللي تبينه...اول يوم بس بندلعج بعدين حالج حالنا ترا... فطوم: ههههههههه والله ما اسال عشاني انا...سعيد بيتعشى فبيتكم .. عشان ماتقوليلي ماخبرتيني...سوي عشا عدل تفنني... نورة: ياللـــــــــــــــه من عيووووووووووني ماطلبتي... بتشوفين العشا السنع.. فطوم: هههههههه فديتج والله..برايج احين بسير اصلي الجمعه..ونتلاقى العصر على خير نورة: ان شاء الله.... قولي لسعيد لا يسرع... فمان الله.. فطوم: ان شاء الله...مع السلامه... نشن البنات وسارن غرفة الضيوف الصغيره اللي صارت غرفة فطيم الحين... وطلعن لها فراش يديد وفرشن الشبرية وبطلن درايش الغرفه عشان تتهوى... وحصه سارت تيب المدخن وادخن الغرفه...ونورة وعنود طلعن الاغراض اللي كانت بالكبت كلها ووودنها كبت الغرفه الثانيه... وزقرن الخدامه تغسل الحمام ..وبعد ماخلصت حطن لها الشامبو والمعجوون والفراشي اليديده والليف وكل شي ممكن انها تحتاجه... يعني خلن الحجره جاهزه للسكن تماما وان شاء الله فطيم مابينقصها شي... وبعد ماخلصن سكرن الغرفه وطلعن يخططن شو بيسون للعشا... بعد الغدا فطوم كل شوي تلوي على حد من اهلها كانها بتفارقهم سنه...مب اسبووع... بس لانها المسكينه ماتعودت تفارق اهلها هالفتره كلها... وسعيد كل شوي يستعيلها... يبا يوصل باسرع مايمكن العين عشان يقعد فتره اطول وياهم... فطوم شلت وياها شنطتين ملابس طبعا معاهم اغراضها الشخصية واللي قدرت تيبه معاها... عشان ماتكون غرفتها فاظيه... وطبعا حطت بحسابها ملجه حصه وشلت فستانها وياها وكل شي تحتاجه... وشلت بعد الدبدوب اللي يايبنه حمدان وياها... من وصلتها هالهدية وهي ماتقدر تفارقها.. مب لانه حمدان يايبنها...لا.... بس لانها تعودت عليها ...وتعودت تقعد عليه وتتساند وتقرا قصص... ولازم تاخذه وياها هناك... اذا خلته في غرفتها مابيسلم من منى ومنال...بيتعبثن فيه... وصتها امها بالادب والحشمه وانها تستوي حرمه مثل بنات عمتها... وابوها نفس الشي...وعطاها مصرووف يكفيها..عشان ماتحتاج لشي... في العين.. البنات كانن في المطبخ ومعاهن الخدامه.. يطبخن ويخترعن اكلات ويسوولفن ويظحكن واصواتهن واصله اخر البيت... دخل عليهن ناصر..واصلا هن كلهن كانن متحجبات لانهن يخافن الدريول يدخل عليهن المطبخ... ناصر: السسسسسسلام عليكم... حصه: هلا والله ناصر عليك السلام.... ناصر: شو تسون انتن كلكن في المطبخ..؟؟.. (وصد صوب العنود).. شحالج عنووود؟؟ شحالج اهلج عنود: بخير الله يسلمك ..شحالك انته ناصر؟ ناصر: الحمد لله.. نورة: قاعدين نجهز للعشا.. ناصر: من الحيييييييين؟؟؟؟ عنبوو بعده ماذن العصر..!!! نورة:نحن مابنطبخ من احين...بنطبخ عقب..بعدين فيه اشياء معجنات يبالها وقت تتخمر العجينه... ناصر: حق شوو عاد هالعباله..؟؟ وسار ياب دبه ماي فاظيه وقعد يترسها من الفوز... لانه ياي يبا دبة ماي للسياره... حصه: ترا هل الشارجه بيون اليوم..مب كلهم.. فطوم بتينا وبييبها سعيد.. ناصر: لا والله.؟؟؟ عيل مابظهر من البيت بنتريا سعيد... نورة: انته ماتدري..؟؟ فطوم بتسكن عندنااااااا.. ناصر: حياها الله...بس ليش؟ نورة: عشان تدرس في الجامعه... ناصر: اهاااااااااا ..تمام....قصرن حسوسكن.. شل دبة الماي وطلع يعبي سيارته ....وبعد ماخلص منها سار بيته عشان يتسبح ويبدل ثيابه.. والبنات يوم جهزن كل شي طلعن من المطبخ وراحن للبيت... وبدلن ثيابهن وتعدلن..عنود عادي تلبس من ملابس حصه... ونزلن تحت وين ماكانت امهن يالسه تتريا ويلسن وياها.... واول ماسمعن صوت سياره طلعت نوره وحصه وياها اما عنود فقالت للبنات بصوت واطي.. عنود: انا خاطري اشوف هالسعيد هذا مال نوره... بوقف عند الدريشه... نزل سعيد من السياره وهو يشوف نوره ظاهرتله.. وشي اكيد انه مانتبه لحصه فحظور حياااته جدامه..ابتسم لها وردت له الابتسامه باحلى منها....اما فطوم طارت صووبهن تسلم عليهن.. حصه: هلااااااااااااا والله بفطيم نور البيت .... فطوم: منور باهله حبيبتي... شخباااااااركن؟؟..نوروووه ..نحن هنااااااااااا... التفتت نوره اللي كانت مشغوله بسعيد وعيونه.... وحست باحراااج... نورة: هلا والله فطييييم....اخييرا ييتي...؟؟ فطوم: انا احين اللي اخيرا ييييت... ماعليه انزين بخطفها لج... حصه: شحالك سعيد...؟ سعيد: بخير الله يسلمج حصه..شحالج انتي..؟ حصه: بخير الله يعااافيك.. نورة: شحالك سعييد..؟؟؟ كان سعيد منزل عيونه يوم كانت حصه تسلم عليه.... بس يوم سمع حس نوره رفع عينه... سعيد: انتي شحالج؟؟؟ نورة: انا بخير.... كانت حصه شلت فطوم وسارن داخل وهن فاقدات الامل بهالثنينه... سعيد: عيل انا بخير...النت مقطوع عندكم اشووو..؟؟ قفطت نوره.. نورة: هههههههههه لا شغااال.. هز سعيد راسه .. سعيد: دواج عقب... نورة: ههههههههه ياويلي عيل... اقرب في الميلس سعيد بزقرلك ناصر... سعيد: بسلم على عمووه...داخل؟؟ نورة: هي داخل في الصالة ..بس بنت عمي هناك..اصبر بزقرها لك... دخلت نوره تزقر امها ويلست ويا فطيم ترحببها... وبعد ماصلوا العصر.. سارت نورة وعنود للمطبخ عشان يجهزون الفواله حق سعيد وفطوم.. في المطبخ... نورة: هااااا..؟ شفتيييه...؟ عنود: شفته يابووج ....شفته... نورة: ههههههه شو رايج..؟؟ عنود: تبين الصدق....يذوووووووووب... شفته كيف يطالعج ماخوز عينه... ظحكت نوره وسكتت... زقرت الخدامه عشان تودي الفواله للرياييل..وشلت هي وعنود الباقي لفطوم... في الميلس اتصل سعيد بحمدان... حمدان: مرحباااااااااا الساع ملااااااايييين بهل الشااارجه.. سعيد: هلا والله حمدااااان..شحاااالج؟ حمدان: بخيييييييير وعافيه والله علووووووومك..؟ سعيد: بخير يطولي بعمرك..وين انته..؟؟؟ حمدان: ماااعندي شغل قلت بسير عزبه عمي .. توني طالع من البيت ... سعيد: لا تسير العزبه...تعال بيت عمك... حمدان: لا تقولي انك عندهم.. سعيد: اوكي انا مب عندهم... حمدان: لا صدق صدق... سعيد: هههههه شو اسويبك تقولي لا تقول....هي انا عندهم وجانك فاظي مر عليه... حمدان: احين ياينك... فمان الله سعيد: الله وياك في البيت..كانت الخدامه نزلت اغراض فطوم كلهن بما فيهن الدبدوب وحطتهن كلهن في الغرفه ...ويوم دخلتها فطوم ..عيبتها .. فطوم: واااااااااو شو هالترتيب..ماحيدها جي اخر مره ييتها... حصه: غيرنا بعض الاشياء عشان ترتاحين فيها... فطوم: مشكووورات حبيباتي والله عبلت علييييييكن... عنود: لا بالعكس والله مستانسين فيج وان شاء الله انتي بعد تستانسين باليلسة هني... فطوم: اكيييد اني بستانس ان شاء الله... نورة: اندوكم ههههههههههههههههه حتى هذا يبتيييه..؟؟؟؟ كانت نورة تاشر عالدبدوب.... فطوم: ههههههههههه وحياتج قبلي راكب السياره... نورة: ليييش يعني؟؟؟ فطوم: تعلقت به والله ماصبر عنه الحين... ولا تفهمين غلط عن اكفخج... نورة: انزين انزين ههههههههههههه.... دخل حمدان البيت بسيارته ونزل منها وعلى طول سار الميلس وسلم على ناصر وسعيد... واصر حمدان على سعيد انه يسير وياه يتحوطون.. سعيد ماكان خاطره يطلع من البيت بس بعد مايبا يقعد ارووحه... بس صدقه حمدان لين العشا شو بيتم يسوي..؟؟؟ فوافق ..وناصر بعد طلع لانه عنده كم شغله.. البنات بعد ماتفاولن وماحصلن شي يسونه قررن يساعدن فطوم على ترتيب اغراضها.. اما نوره خلتهن عشان تسير تشرف عالعشا عن تخربه الخدامه... وتمت في المطبخ لين اذن..حتى يوم اذن المغرب سارت تصلي وردت للمطبخ ...وماخلصت الا على حدود الساعه 8 ..ويوم طالعه من المطبخ شافت حمدان يايب سعيد وياه رادين من برا ويظحكون .. قالت في خاطرها زين ان حمدان وياه..وشردت داخل البيت قبل مايشووفها.. لازم تبدل ثيابها وتتسبح ريحتها كله شياط ومطبخ... المهم ركبت فوق وتسبحت عالسريع ولبست ثياب يديده ونزلت عند البنات..كان ابوها توه راد من عزبته... فقالت له ان قوم سعيد وحمدان في الميلس...وسار صوبهم... راحت صوب الصالة وحصلت الكل متيمع .. امها وحصه وعنود وفطيم وحريم اخوانها ميرة وحمده وعيالهن... وحطوا العشا للرياييل والحريم وتعشوا... وقعدوا يسولفون...بعد العشا بساعتين دخلوا الشواب بيرقدون... وحريم العيال كل وحده سارت بيتها...تمن البنات يالسات في الصالة... اما نوره فكانت عند الدريشه وهي ميته غصه..وتشوف سعيد واقف عند السياره يرمس حمدان وماتقدر تطلع تسلم عليه... بعدها شافت حمدان ساير صوب الميلس وسعيد تم واقف ..عقب تحرك ويا صوب البيت .. ودق الباب... سعيد: هوووووووود....!! تحركت نوره من عند الدريشه وهي تتبسم ..وطلعت لسعيد فويهه وروعته... نورة: بوووووووووو...!! سعيد: اهـــــــــــــــــب... بسم الله يالساحره روعتيني... ظحكت نوره...وكمل سعيد بلهجة ماكره فصوته..والبسمه شاقه الحلج.. سعيد: كنتي واقفه عند الدريشه.... نورة: هممممممممم هي.... ظحك سعيد.. سعيد: منو كنتي اطالعين؟؟؟؟ نورة: ......... حمـــــدان... اختفت الظحكه عن ويه سعيد..ونوره ماتت من الظحك....سعيد كان وده يكفخها.. سعيد: سيري سيري....سيــــــري زقريلي فطيم...! نورة:...زعلت؟؟ سعيد: مالج خص..! نورة: سعوووووووووووووووووود....!! سعيد: سعوود فعييينج انزين... ظحكت نوره وهي تشوفه منقهر... نورة: صدق ان سعود فعيووني الثنتين مب وحده بس... ظحك سعيد وهو مستااانس من الخاطر... نورة: سعيد شو رايك تبات فحجرة عبدالله..؟؟؟ قال وهو يذكرها بشي قالته يوم طلب منها تقعد.. سعيد: باجر عندي دواااااااام.... سكتت نوره وهي مبرطمه.. سعيد: بالخميس ان شاء الله بني عشان ملجه اختج.... نورة: على خير.... بزقرلك فطيم...ومابرد اطلع اخاف حد يشوفني... شي في خاطرك؟؟ سعيد: اهتمي بعمرج...كلي مثل الناس غادية يبسووون... نورة: ههههههههههه انا عايبني جسمي... انته بعد اهتم بنفسك.. سعيد: ان شااااااء الله... ونورة: وسلم على اهلك وخااالي وعلياااا.... سعيد: وبعد؟؟ نورة: والشبييييه بعد... سعيد: ناسيه حد..؟؟؟ نورة: ههههههههههههه لالا الباقي بوصل لهم سلامات خاصه بنفسي.... سعيد: ههههههههههه اووكي بنترياااا السلامات هاي... نورة: لا تسرع سعيد اماانه.. سعيد: من عيوني الثنتين.. نورة: يعلهن سالمات يارب.... فمان الله سعيد:الله يحفظج.. سارت نوره ودخلت الصاله... نورة: فطوووووووم...اخوج بيسييير ويبا يرمسج.. طلعت فطووم لاخووها ونوره يلست مع البنات كانها مب عندهن... سعيد: هااااااا فطوووم...بسير انا ماتوصين عشي؟ فطوم: سلااااااامتك والله وسلم على اهلي تولهت عليهم والله... سعيد: من احين تولهتي؟؟ توج يايه... فطوم: والله مب متعوده ابات ارووحي فمكان غير بيتنا بس ماعليه بتعود.. سعيد: ماوصيج عااااد...عن الخــفّـــة.. وخلج حرمه ولا تفشليني لاني متوسطلج عند ابويه... فطوم: ان شااااااااااااااء الله ولا يهمك.... سعيد: مب محتايه شي؟؟؟ اذا محتايه اتصليبي وبييبلج اللي تبينه الاسبوع الياي.. فطوم: ماتقصر حبيبي انته... سعيد: حبتج القراااده.. فطوم: ههههههههههههههه ليش عاد انا اختك حليلي... سعيد: المهم لا تنسين اللي موصنج عليه.. وهدية نوره توصلها بينج وبينها مب تغدين مفضوحه تقوليلها جدام البنات... فطوم: ولا يهمك... سعيد: يالله فمان الله.. فطوم: الله يحفظك اخوويه.. طلع سعيد من البيت وتلاقى ويا حمدان اللي رد طلع من الميلس وسلم عليه وروح.... ويوم روح يا حمدان صوب البيت ودخل كعاادته بدون مايستاذن..بس شاف باب الصالة مسكر ودق الباب قبل ويوم فتحه انصدم بعيوون فاطمه العسلية الفاتحه اطالع فيه....اول شي سوته فطيم تغشت..وهي تسب وتلعن من الخاطر..وتقول في خاطرها " بدينا عاد" ... والمسكين حمدان منصدم اصلا ماكان يدري بانها في البيت..وكان داخل عشان يشل اخته... مد ايده ياشر عليها مستغرب وجودها وهو يقول... حمدان: ايـــــــه...!!... اخوج روح عنج...!!!! وتناقعن البنات كلهن من الظحك حتى فاطمه.... وحليلك ياحمدان...مايدري بالسالفه... نورة: اقول حمدان ممكن تهوينا.؟؟ تشوف ان عندنا بنت... حمدان: سوري مابطلع...بيت عمي... بعدين ليش تظحكن ؟؟ صدق سعيد روح عنها اتصلبه... حصه: فطوم بتسكن عندنا عشان الجامعه ... بطل حمدان عيووونه مب مصدق.....بتسكن في بيت عمه..؟؟؟؟؟؟ كيف هذي.؟؟ نشت عنوود وهي ادز اخووها برا الصاله... عنود: متى بتودر حركاتك ماحيدك غلس جي ....شو بلاك...؟؟ كانوا برا الصاله الحين... حمدان: فهميني السالفه..؟؟ عنود: وانته شووو خصك؟؟؟ حمدان: عنودوووه خلصيني... عنود: البنت بتدرس في الجامعه وبدال ماتسكن في السكن بتسكن فبيت عمتها...شوفيها يعني..؟؟ تم حمدان منصدم ويفكر بالسالفه .... يعني الطويله بتسكن هني.... اهلا اهلا...!!.. احين مابروم ادش بيت عمي مثل مابغي ومثل ماتعودت.... لالا..مابغير عادتي..وليش اغيرها..؟؟ بيت عمي..وكيفي اسير وارد... حمدان: المهم انتي لبسي عباتج ويالله نروح..تاخر الوقت... بترياج في السياره لا تبطين... روح عنهاحمدان لسيارته وباله مشغوووول بالسالفه هذي... اما عنود دخلت ويابت عباتها وتلبست وسلمت عالبنات وطلعت لاخووها وروحوا بيتهم... مر الاسبوع اللي بعده مثل لمح البصر... نورة كانت اداوم دوامها الصيفي كالمعتاد وفطوم كانت تروح وياها وتعابل اشغالها في الجامعه...وكلمت المسؤولين وحولت وضعها من طالبات السكن لطالبات العين وبدلوا بطاقتها الجامعية...وامتحنت امتحانات تحديد المستوى... وكل الامور المتعلقه بالمستجدات.. حصه كانت مشغووله بنفسها وتجهيزاتها للملجه.. الا مره تحاتي الفستان..ومره تحاتي التسريحه ومره تحاتي الحنا.. وابدا ماكانت تقدر ترقد في الليل وهالشي اثر على شكلها ...وكانت وايد متوتره بانهاعلى وشك ترتبط بانسان طول حياتها ماتعرف عنه الا الشي البسيط...ومازال بالنسبه لها غريب...وفلحظه ضعف وارهاق فكرت..بانه لو كان خليفه...ماكانت بتتوتر هالكثر...وبتكون مرتاحه.... خليفه كل مايمر يوم عليه تدهور صحته وتركيزه في دراسته اكثر واكثر... الوقت يمر..واليوم الثلاثاء.. بعد يومين بتكون حصه زوجه سيف الشامسي... كيف بقدر اتحمل ياناااس..؟؟ كيييييييييف..؟؟؟ .. سعيد ونوره كانوا على اتصال دايم بالنت..وبينهم رسايل ... ووضعهم مستقر... الخميس الظهر وصلت للبيت باقة ورد بيظا وكبيييييييييره باسم حصه..وفيها بطاقه صغيره مكتوب عليها "صباح الورد..لاحلى ورده... مبرووك" وماعرفن من عند منووو ...وطنشن السالفه...الخمس الظهر كانن عنود ونوره وفطوم في الصالون.. يتعدلن وهن محتشرات... نورة: ريلج هذا غير شكل شل الكيمره عنااا....احين كيف بنصور..؟؟؟ عنود: لا تقولين شي عن ريلي لو سمحتي... فطوم: لازم هالتصوير..؟؟؟ نورة: لاااااااااااااازم ماتمر مناسبه بدون ماصور... حرام.... عنود: فكيينا..بييبلج كيمرتنا من البيت... نورة: غصبن عنج اصلا بتيبينها... اونها تعزم عاد...!!! عنود: ههههههههه خسج الله كيف طايحتبي... بخبر عبااادي عليج ..بقوله يعذبوني في غيابك... فطوم: انا اغااار جذي.... وحده بتملج والثانيه مالجه وادلع ريلها بعد..عبادي اون...مالي خص ابا اعرس... نورة: مابطولين صدقيني... فطوم: هههههههه اطمني مابعرس الا يوم تعرسين انتي... وتغمز لها.. وظحكت نوره... خلصن تعديل واتصلت نوره بامها.. نورة: امااااااااااايه ...نحن خلصنااا..طرشووا الدريول... ام خالد: وين نطرشه الدريول مشغووول لين قمه راسه مايروم يتحير... نورة: على الحظ يعني..؟؟ انزين خالد....والا ناصر... ام خالد: والله مادري بخوانج بعد كل حد لاهي.... نورة: امااااااااايه شو هالحال..؟؟ دبريييناااا طرشيلنا اي حد... ام خالد: انزين بشوفلكن حد.... سكرت نوره عن امها وقعدن يترين... بعد ثلث ساعه رن تيلفون عنوود.. عنوود: مرحبااااا حمدان: هلا عنوود...يالله نزلن.. عنود: وين ننزل؟ حمدان: نزلن بسرعه ورايه اشغال..ماتبن تروحن البيت..؟؟؟ عنود: اهااااااا..اوكي احين بننزل... سكرت عنه والتفت لقوم نوره... عنود: يالله روحنا...حمدان ياينا.. بطلت فطوم عيونها..عنود سارت تلبس عباتها وتلم اغراضها ... مسكت فطوم ايد نوره.. فطوم: انتي هااااي... ماروم انا اركب ويا ولد عمج هذا... نورة: شو تبينا نسوي محد غيييره...!!! فطوم: نسيتي انتي ان اهلي بيوون العصر..والحين الساعه اربع واحتمال وصلوا...والله لو يشوفوني نازله من سايرة حمدان بيعدموووني... نورة: هممممممممم اتصليبهم شوفيهم وين... مسكت فطوم تيلفونها واتصلت بسعيد..اللي قالها انهم بعد نص ساعه ان شاء الله بيكونون في العين.... اطمنت نوره من هالناحيه...بيوصلون البيت قبل مايوصلون هل الشارجه لكن فطوم تمت معارضه ومب قادره تستوعب.. فطوم: نورووه بليز لا تسوون فيني هالحركات.... نورة: يابنت الناس مابياكلج... قلنا غلس وشيطان بس مب مصاص دماء صدقيني... برطمت فطيم... بنت عمتها هذي تبا توديها فداهية... يت عنود تستعيلهن.. تلبسن عبيهن وشلن اغراضهن وتغشن... عنود ركبت جدااام.. ونورة ريحت فطوم من الاحراج وركبت هي ورا حمدان... وفطوم من الصوب الثاني وعيونها على ريولها تحت... الودودها تنخش تحت السيت بعد.... بس بعد فتره ...ماقاومت وهي تسمع سوالف نوره وحمدان ومغايظهم لبعض من انها ترفع عينها وتراقبه من تحت غشوتها... الصراحه حلوو ..وشكله شخصية...ولين الحين مالتفت لي ولا رمسني ولا قل ادبه عليه باي طريقه... ياحيه يوم يحشم شوي... تذكرت الدبدوب اللي يابلها اياااه... واكتشفت ان حمدان له جانب رقيق في طبيعته... بس حركاته الماصخه تخرب عليه..وصدت عنه يانب وقعدت اطالع من الدريشه... اول مادخلن البيت انصدمن ببقاية ورد ثانيه نفس الحجم بس لونها هالمره مشكل..اصفر على بطيخي على عيناوي ... والبطاقه مكتوب عليها.. " الله يجعله يوم مبروك...الف مبروووك" استغربن البنات..!!..شو السالفه..؟؟ حصه وايد وصلتها باقتين اليوم من عند ربعها... بس مب مكتوبه عليهن اسماء... وطنشن السالفه مره ثانيه وكملن استعداداتهن... وتلبسن الفساتين اللي يابها ناصر الصبح من بوظبي.... وحصه كانت في غرفتها مع راعية الصالون اللي يابوها لها... دخلن عليها البنات.. عنود: اوووش اوووش يالعرووووس من قدج... حصه: سكتن عني احس عمري بموووت.... فطوم: بسم الله عليج شحقه تموتين بعد..؟؟؟..الله يوفقج يارب... نورة: حصوووه شفتي الباقات اللي وصلتج..؟؟؟ حصه: احيدها وحده بيظا قتلهم يحطونها عند المدخل... نورة: لا..وصلت وحده ثانيه بعد... وحطوها عند المدخل الثاني ... حصه: والله..؟؟؟... نوروه ماعليج امر سيري هاتيلي من كل وحده ورده والبطايق بعد لا تنسينهن... سارت نوره وسوت اللي قالته لها حصه ويابت لها ورده من كل باقه...ويوم شافت حصه البطاقات..رفعت عينها وقالت... حصه: لاحظتوا ان كلهن نفس الخط...؟؟ ين البنات وكلهن قعدن يشوفن في البطايق..واطالعن بعض.... وقالن مره وحده.. " ســــــيــــــــــف..!!!" وتناقعن من الظحك وحصه احمر ويهها.. وردت راعية الصالون تسشور شعرها... نورة: ياحليله ريل اختي رومانسييييي...متعبل كل شوي باقه... بنتريا شو بيطرش في الليل...!! حصه: مابيطرش في الليل بيكون مشغووول... نوره: على كم تراهنين انه بيطرش..؟؟ حصه: حراام الرهااان... عنود: اوووووووه..نسينا كاميره الفيديووووو... فطوم: اتصلي بحد فبيتكم خليهم اييبونها قبل الملجه... واتصلت عنود بحرمه اخوها ووصتها تيبها... وعقبها صدت على حصه... عنود: حصوووووووه... لا يكون بتفجينه..؟؟؟؟ كانت تطري شعرها... حصه: هي بفجه... نورة: ياويلج من امااايه... حصه: مالي خص..مطولتنه ومتبهدله بسبته اخر شي ما اطلعه..؟؟؟ بعدين صراحه ذاك اليوم تلعوزت بالتسريحه مارمت له... عنود: كيفج لا تقولين ماقلنالج...عموه بتهزبج... حصه: برااايها... وصلوا هل الشارجه واختبص البيت كله ونوره ماشافت سعيد الا من بعيد وهو ساير الميلس... وكانوا كلهم يايين متعدلين عشان مايتلعوزون هني... على المغرب خلصت حصه تعديلها ... وكانت بسيطه وناعمه .. ومكياجها يناسب فستانها الذهبي الفاتح..وشعرها المفتوح عطى لمسه واااااااااااااايد روعه عليها.... لكن مع الوقت كان ارتباك حصه يزيد... وقلب خليفه يتقطع اكثر واكثر.... اللي اتصل بسيف وبارك له عالملجه... وصدمه هذا بخبر انه العرس بيكون بعد اربع شهور او خمس...يعني في الوقت اللي بيكونون فيه غايبين... وانه اصر عليهم انهم ياخذون اجازه عشان يحظرون العرس.... لانه بدون حظورهم مابيكون شي عرس وهذا قرار حصه... كانت الملجه ربشه ... وانترس بيتهم كله حريم وعرب... وقبل ماتنزل حصه يابولها الدفتر وسالوها اذا موافقه او لا طبعا بتوكيل ابوها... وقالت انها موافقه ووقعت على وثيقة الزواج وبعدها نزلووها للحريم ولبسووها الشبكه..وحصه من تسارع الاحداث تحس ان راسها يدور وبطيح في اي لحظه...على الساعه عشر كانن الحريم يتعشن..وقفت نوره التصوير وعطتها فطوم عشان تسير تعدل شي في مكياجها... ويوم مرت من الباب شافت الخدامه يايبه باقه يديده اكبر عن قبل..وكلها ورد احمر...ظحكت نوره وسارت صوب الخدامه ..ولاحظت بعد ان الباقه مش برووحها...معاها علبة متوسطه الحجم كهدية معدله ومزينه بورد مجفف... قالت للخدامه توديه كله غرفة حصه...هالباقه الحمرا ما يتفرط فيها الصراحه... خلصن الملجه وكانت الساعه 11 ونص يوم ركبت حصه فوق لغرفتها وشافت الباقه الحمراا... قفلت الباب وراها لانها تبا تكون برووحها.. وقبل ماتعق ثيابها راحت صوب الباقه... وشلت العلبه ويلست عالشبريه...يوم فتحتها حصلتها تحت مفروشه بحرير احمر... ومنثور عليه ورد مجفف وحلاوة باتشي موزعه في الصندوق داخل..وفي الوسط تيلفون صغير مع الجراجه ماله وكل شي...وبطاقه كبيرة شوي مكتوب فيها.. " الف مبرووووك.... صدقيني اني اسعد انسان في هالدنيا يوم الله عطاني اللي اباه.... من اول ماشفتج وانتي فبالي.. واوعدج انج ماتندمين على ارتباطج فيني.... والله يجعل حياتنا كلها سعاده وتوفيق من الله عز وجل.. بخصوص التيلفون..لا تخافين شاورت عمي وهو موافق... ادري انج تعبانه الليله عشان جي مابتصلج.. بس اذا حبيتي تتصلين بكون وايد فرحان باتصالج.... الف الف مبرووووك مره ثانيه.. ريلج سيــــف " ---------------------------------- |
||
|
|
|
27-07-2006, 01:34 AM
|
رقم المشاركة : 7 | ||
|
|
الجزء الرابع والعشرون
سكرت حصه العلبه.. وماصكت اي شي فيها..خلتها مثل ماهي وابتسامه صغيرة على شفايفها... سيف هذا خفيف الروح.... مب ثقيل عالنفس.... عيل ليش بالله مب قادره تتخيل انه ريلها..؟؟؟؟ بكل بساطه لان الامور اطورت باسرع مما كانت هي نفسها تتصور... الحين هي انسانه متزوجه.. ومفروض عليها الاخلاص طبعا حتى بافكارها... صح ان تفكيرها راح كم مره اليوم لخليفه...وقارنت بينهم بشكل كبيير... لكن كل شي لازم ينتهي هني...سيف هو زوجها وبيتم جذي... ولازم تبدى تتقبله على هالاساس.....بعد رسالته الصغيره اللي كاتبنها لها...تبين لها ان سيف هو اللي بغاها من الاول...من يوم ماشافها... يعني مب امه اللي شافتها في الملجه وعيبتها وراحت تخطبها..... الصدف هني مالعبت دور... كل شي صار بناءا على طلب سيف... وكل شي سواه لين الحين يدل على رغبته الكبيره فيها ..وشكثر هو شارنها من الخاطر... ماوفر وقت عشان يخطبها ويسال عنها... والله عطاه على قد نيته.... ريال مثل هذا يستحق الصراحه انه ينحب... والكل من البداية مدح فيه... عيل ليش التوتر.؟؟ ليش الخووف؟؟.. يمكن لانها حياة يديده لازم اتعود عليها واحبها... سيف..امس كان ريال غريب فحياتها..واليوم...زوجها... حقيقه تخوف صح لكن لازم تتعود عليها...لازم...! حصه الوحيده اللي كانت هادية في هالبيت... اما خارج غرفة حصه المقفوله... كانت الربشه صدق ...نورة وفطوم وعنود اللي قررت تبات عندهم... منى ومنال ..عليا وامنه وشيخه.. كلهم كانوا متيمعين في الصالة يشوفون الفلم الخبل اللي مصورتنه نوره.... وكلهم تفاجؤوا يوم شافوا الباقات اللي مصورتنها وهي تعلق وتقول هذي باقات وهدايا المعرس اليوم... وعرفوا انها من عند سيف..وبعدماخلصوا قعدوا يسولفون عن كل شي صار الليله..ويوم خلصت السوالف انصدموا بترتيب الغرف ووين بيبااتووون..؟؟؟؟ عليا وريلها رقدوا كالعاده في غرفة عليا الجديمه... هلال وحرمته وبناتهم الصغار منى ومنال في غرفة الضيوف الكبيرة.. اما غرفته فطيم الحاليه فرقدوا فيها شيخه وآمنه وعيالها مع فطيم طبعا... عنود رقدت مع نوره.. وسعيد رتبوله حجرة عبدالله وخلوه يرقد فيها.. وهذا سعيد ارووحه مادخل البيت غير الساعه 1 ونص في الليل...يوم الكل رقووود... مر يومين عالملجه... وحصه لين الحين مب مجرأة حتى انها تفتح التيلفووون... لين الحين مغلق وفي العلبه... اكيد سيف يتصل ويتصل ومظيج عليها... بس مب متخيله كيف بتكلم ريال غريب كيييييييف؟؟؟....وبموافقه اهلها بعد..؟؟؟ كيف يعودونها ويربونها على شي طوول حياتها... ويحذرونها وكل شي... واخر شي وفيوم واحد يقولولها كلمي ريلج..؟؟؟ .....اوكي بالنسبه لكم هذا ريلي.... لكن انا ما اعرفه....ماعرفه....!!!.. نزلت حصه تحت وعلى طول اتصلت باخوها عبدالله.... الوحيد اللي ماسمعت رايه في هالموضوع..كل اخوانها قالولها كلمييه وابوها بعد. .. بس عبدالله...لازم تسمعها من عبدالله.... عبدالله: آآلووو...! حصه: مرحبااا عبدالله... شحااااالك..؟؟ عبدالله: هلاااااااااا والله وغلااااااااا بحصيص... بخير شحالج انتي؟؟؟ حصه: الحمد لله.... عبدالله: بشريني...؟ شحال الاهل كلهم ؟ حصه: بخير الحمد لله....ليتك كنت موجود ياعبدالله.... والله الملجه كانت ناقصتنك... بس ترا مابعذرك في العرس ولا بعرس الا بوجودك... عبدالله: من عيووني الثنتين والله... عنبوو عرس اختي ولا احظر؟؟؟ حصه: بنشوووف.... عبدالله..!!.. سيف عطاني تيلفون عشان اكلمه...وانا لين الحين غالقه التيلفون ومافتحته... عبدالله: ليش حصيص...؟؟؟ حصه: انته موافق..؟؟ عبدالله: مالي شور في هالموضوع هذا...لانه هذا حق من حقوقج وخلاص سيف صار ريلج ...وشورج عنده.. حصه: والله ياعبدالله اني لين احين مب متقبله دخول انسان غريب فحياتي ...وكلكم تشجعوني اني اكلمه واشوفه.... هذا ريلج وهذا ريلج.....انا مب حاسه انه ريلي....!!.. عبدالله: حصه... انتي ماحاولتي حتى.... كيف بتتقبلينه اذا انتي رافضه اي اتصال لج وياه..؟؟؟ فتحي التيلفون... وردي على اتصاله... صح بتنحرجين في البدايه ويمكن اتمين ساكته لكن شوي شوي بتتعودين... وبتتقبلينه واضمن لج انج بتحبينه بعد قبل ماتعرسوون شو رايج..؟؟؟ حصه: كانك تتكلم في الاحلام ياخوي... عبدالله: انتي جربي.... ومابتندمين... انتي خايفه لانج ماتعودتي تكلمين ريال غريب... لكن هذا مب غريب..هذا ريلج ... رضيتي والا لا... وصدقيني سيف انسان وايد حبوب وبيخليج تتعودين عليه اسرع مما تتوقعين ... حصه: على خير... بحاول عبدالله: اليوم....فتحي التيلفون احين....اكيد بتهل عليج المسجات..حرام عليج مسويه بالريال جي.. حصه: هههههههه... اووكي.. خلاص مابطول عليك عبدالله... عبدالله: اووكي سلمي عليهم كلهم ماوصيج... وهالله هالله بسيف.. حصه: ان شاء الله..فمان الله.. عبدالله: مع السلامه... حصه:.........عبدالله....!!!! بس عبدالله سكر..... ياخسااااااره....!!... كنت بقوله يسلم على خليفه...! سكرت التيلفون ومرت على حجره فاطمه... نوره وفطيم هناك يسولفن ويظحكن..ولا على بالهن... فكرت تدخل تفرفش وياهن شوي... لكن قررت تواجه اللي تخافه... اصلا مالها مزاج عالسوالف احين.... كان الوقت العصر... ركبت فوق وقفلت الباب... ويابت الصندوق..وفتحته..مثل ماكان..مالمست اي شي فيه... مدت ايدها للتيلفون وفتحته.... واستغربت يوم حصلت مسج وحده بس...وكانت تقول.. "اتصلت وايد وكله يعطيني مغلق... عسى المانع خير.... متى ماتكون نفسيتج مرتاحه ياريت تبلغيني ولو بمسج.." تلومت حصه... انا شو سويت..؟؟ بديت حياتي الزوجيه باني زعلت ريلي..؟؟؟ امحق زوجه.... بس ياناس مب متعوده...والله مب متعوده...!!.. حاولت انها تتصل..ماقدرت...بطرش له مسج احسن...وكتب له.. " آسفه سيف... كل السالفه اني ماكنت مستعده.." رد عليها على طوووول... " ومب انا اللي بفرض وجودي على حرمتي... الحمد لله انج بخير... ومتى ما حبيتي تكلميني اتصليبي او طريشيلي مسج وانا بتصلبج...بس ديري بالج على نفسج..." تلومت حصه اكثر عن قبل... احين هذا كيف خذ هالفكره عني... من اولها زعل ..؟؟؟ .لا والله بشرتني بحياة حلوه وياك عيل دام من اولها زعلت....اووففف... شو هالحاله...؟؟ .. خله يولي لاااه... فرت التيلفون عالشبرية وطلعت من الغرفه.. وسارت بيت اخوها ناصر وقعدت مع حرمه اخوها حمده وعيالها لين بعد المغرب... المسا بعد مارقدوا... كانت فطوم ونوره وحصه السرحانه يالسات في الصاله..وكانت تقريبا الساعه عشر ونص... يجلبن في هالقنوات مب عارفات شو يطالعن...سمعن دق عالباب ..على طول فطوم تحجبت تتحسبه واحد من عيال عمتها.. وحصه ونوره نفس الشي لانهن يعرفن انها دقة حمدان هذي...وفعلا بعد شوي دخل حمدان وسلم وما التفت ناحية فطوم ابد...الي من شافته بطلت حجابها وتغشت وطلعت من الصالة وسارت حجرتها... حمدان: شووووو...!!!.. اذا حضرت الشياطين هربت الملائكة؟... حصه: حليلها مب متعوده عليك شو تباها تسوي يعني... تعال..اشوف في ايدك شي..شويايبلنا.. حمدان: والله يايبلكن فلم رعب توه نازل.. بس اذا الوقت مب مناسب بروح.. حصه: افااا عليك شو هالرمسه .؟؟ من متى انته لك وقت مب مناسب؟؟ يا حمدان وقعد مكانه المعتاد مجابل التلفزيووون .. حمدان: ماعليينا...المهم حصيص..شو عندكم؟..ميت من اليوع... حصه: تعشينا حمدان....بس بسويلك همبرغر عالسريع اذا بغيت...!!! حمدان: ياريت والله ..ولو سمحتي عصير برتقال بعد... حصه: ههههههههههه يحقلك تتشرط يايب فلم... حمدان: هي عيل اشوو اييبلكن ابلااش؟؟؟.... المشكله اني ماذكر بطني الا يوم ايي عندكم والله... حصه: لانك ترتاح عندنا اكثر عن اي مكان... لا تشغلوون الفلم عني ... نشت حصه وسارت المطبخ تسوي لحمدان اللي طلبه...نشت نوره بعد وقالت.. نورة: انا بعد دقايق بسير وبيي... حمدان: ماعندج ذوووق تخليني يالس ارووحي في الصاله... نورة: البيت بيتك ياخي...مابطول..دقايق... سارت نوره لحجرة فطوم..وحصلتها يالسه عالشبرية.. نورة: شووو بلاااج..؟؟؟ فطوم: مابلاني شي...ليش؟ نورة: ليش نشييتي جيي..؟؟؟ فطوم: نعم نعم..؟؟؟؟ .. تبيني ايلس واتقيعس ويا ولد عمج في الصاله...؟؟؟ نورة: مابياكلج.. فطوم: ادري.. بس عيب... نورة: يابنتي يافطوووم.. حمدان مثل اخواني واعززززز بعد... يعني اعتبريه انتي مثل عيال عمتج.جنه اخوونا... وصدقيني هو متعود ايينا يوميا ويسهر ويانا ويسولف ويخربط علينا...ماتشوفينا متعودين عليه اكثر عن الثانين..؟؟... فطوم: انزين اكوووه عندج سيري ييلسي وياه...والله عادي انا عندي... نورة: مب هذا القصد.. انتي مابتسكنين عندنا اسبوع واسبوعين...بتسكنين عندنا فتره طويييله وطوييله وايد بعد....ولازم تتصرفين مثلنا والا صدقيني بظيجين ...!!... احين تشوفينه عادي...بس عقب بتظايقين... فطوم: احين شو تبين تقوليلي يعني..؟؟ نورة: اباج تلبسين شيلتج وتطلعين تقعدين عندنا.. فطوم: شوووووووووووووو..؟؟؟ ينيتي انتي...؟؟ نورة: يابنت الناس مافيها شي.... وصدقيني حمدان بيحشم ولا بيطالع صوبج حتى ... فطوم: لالالالالالا شلي هالفكره من بالج نهائيا... نورة: فطوم...حرام عليج ...والله مافيها شي عااااااادي اعتبريه اخووج...والله انه طيب وحبووب وايد... اذا تميتي تنخشين عنه كل مايانا بيحس بالاحراج وبيحس انه ثقيييل علينا عقب مابيينا موووول.... فطوم: والله انا ماطلبت هالشي نوره.... قولوله انه والله عااادي عندي ...يمكن اقعد ارقد او اقرااا...مب شرط تقعدن موازراتني اربع وعشرين ساعه....عادي تصرفن برااحه صدقيني مابشل فخاطري على حد... نورة: عشاني انزين....جربي اليوم بس... اذا احرجج بكلمه منيي والا مني طلعي ولا تسمعين كلامي مره ثانيه... فطوم: يانوووره عييييييييب ...كيف تنصحيني بشي مثل هذا... نورة: لاني اعرف انج بترتاحين اكثر فبيتنا اذا تقبلتي وجود حمدان طاب علينا يوميا في البيت.... فطوم: نوروووه ترا ولد عمج كل مايشوفني يطيحبي... نورة: انا اعرف حمدان.... جربي اليوم بس... فطوم: بنشوووف يا السوسه انتي.... بس والله اذا رمسني والا طاحبي ياويلج انتي وهووو... نورة: ههههههههه اوكي... يوم نشت فطوم ولبست شيلتها...وحاولت تتغشى مسكتها نورة... نورة: شو بتسوين..؟؟ فطوم: بتغشى...! نورة: لا لا تتغشين...تحجبي بس.. ردت فطوم ويلست عالشبرية... فطوم:لااااااااااااااااه... انتي اممممممممره ينيتي.... نورة: فطوووم ...بتحرجينه زياده جي اذا تميتي متغشيه عنه...بعدين نحن بنطالع فلم شو بتشووفين انتي بالله عليج..؟؟ فطوم: عمري ماسويتها حبيبتي اطلع بويهي جدام رياييل غرب... نورة: حمدان مب غريب وشايفنج كذا مره بلا غشوه ...بعدين اقولج بنطالع فلم...مابيقعد يطالع ويهج يعني... هزت فطوم راسلها مستسلمه... فطوم: انتي بتخربيني انتي... تحجبت فطوم عدل وهي متوتره من اللي بتسويه ..تدري انه غلط.. بس نوره مزعجه...وبعد ماخلصت طلعت وياها وسارت الصاله وهي عيونها تحت وتمشي ورا فطوم.. ما انتبهت لردة فعل حمدان بس سمعت صوته وهو يقول.. حمدان: نورة ماعليج امر سكري الليت... سكرت نورة الليت وقعدت هي وفطوم على كرسي بعيد شوي..وحصه ورا حمدان...وحمدان مجابل التلفزيوون وياكل سندويشته....وكان فعلا لاهي عنها وعنهن كلهن اصلا طول الفلم....مندمج ويوم يعلق مايلتفت حتى....وهالشي خلى فطوم ترتاح شوي... وتتمتع بالفلم ..ولو ان عينها كانت دايما تنحرف عن الشاشه وتروح لحمدان..طريقه القعده...والسفره المفرووره..وريله اللي كل شوي يمدها ويسندها فمكان... والمخدات اللي مخربنهن ورااه عشان يرتاح حضرته بالقعده...كلها اشياء ادل شكثر حمدان يعتبر هالبيت بيته فعلا.....والا هو جي طبيعته انه يرتاح وين مايسير؟؟؟ في نص الفلم بند عليهن الفيديوو وهو ينقز من قعدته.. حمدان: استراااااااحه...بسير الحمام... وتناقعن البنات كلهن من الظحك... الحمام كان عدال غرفة فطيم...يوم طلع حمدان من الحمام التفت صوب الحجره.. لانه بابها كان مبطل...ماكان بيلتفت صوبها لولاان لفت نظرة الدبدوب اللي هو شارنه...!!... يعني هني ساكنه فاطمه..؟؟!!!... وماصبرت عن الدبدوب ويابته وياها.... ظحك حمدان وهو مستانس من هالاكتشاف... ورد الصاله وتظاهر انه ماشي صار وكالعاده ماصد صوبها عشان مايعصببها..وكملوا الفلم للآخر... كانت الساعه 1 يوم ركبت حصه غرفتها وطاح نظرها على طول على الموبايل...خذته وشافته... لا مسج ..ولا مسد كوول... مطنشني هالريل... سكتت.وفكرت مره ثانيه... احين هو اللي مطنش والا انا..؟؟؟...الصراحه انا اللي مطنشتنه... وهالشي غلط...وصاني عبدالله اني اكلمه اليوم...ليش ماكلمه الحين ....اعتقد انه راقد..بس يوم بيشوف المسد كول باجر بيعرف انها اتصلت عالاقل....بدلت ثيابها ولبست مال النوم... واتصلت برقم سيف الوحيد اللي مخزن في التيلفون....ورن التيلفوون...كانت بتسكر لولا ان سيف رد بسرعه...وهالشي خلاها تشهق بس هو ماسمعها... سيف: آآآلووو...! حصه: .............................. . شو بتقول يعني؟؟ مارامت ترمس... سيف: .... آآآلووو.... حصه رمسي... حصه:..................... هلا... ويالله يالله تنسمع... سيف: هلا والله...... شحااااالج..؟؟ حصه:.....بخير... سيف: شو حالهم اهلج كلهم...؟؟ حصه: ..الحمد لله كلهم بخير.... سيف:.... اخيرا حنيتي عليه واتصلتي....!!! حصه...................... (مبتسمه)...! سيف: مخلتني هذربان ارووحي ارمس..!!.... شو مسهرنج لين احين..؟؟ حصه:.... آآآ ..همم...كنت اشوف فلم... سيف: اهااااااااااا تشوفين فلم.... حصه: خلاص برايك بخليك... سيف: وين وين..؟؟؟؟ ماواحيتي حصه...! حصه:....برقد.. سيف: متاكده..؟؟ حصه:....................... سيف: اللي يريحج...تصبحين على الف خير.. حصه: وانته من اهله....فماان الله.. سيف: الله وياج.. سكرت حصه عن سيف ويديها ترتجف.... صوته هادي... من النوع اللي يوم يسمعه اي شخص يحس انه صاحبه دايم مبتسم وهو يتكلم....الله يعيني...مادري متى بتعود عليه...!!.. بالباجر يوم نشت من الرقاد الصبح حصلت مسج من عنده مصبح عليها وكاتب كلام رومانسي...طنشت حصه تسبحت ونزلت تحت.... نورة وفطوم مب موجودات..كانن في الجامعه... يوم قعدت تتريق.صدمتها امها بخبر.. حصه: شووووووووووووووو..؟؟؟ ام خالد: شو بعد شووو..؟؟ انتي من ثلاث ايام مالجه والريال يبا يشووفج... حصه: اماااايه...شو يشوفني واشووفه مابااااا... ام خالد: والله مب عكيفج عاد بنتي...فيه وحده ماتبا تشوف ريلها..؟؟؟.. بيي بيسلم عليج بيشوفج وبتشوفينه بتسولفون شوي رباعه وبيروح عنج مابياكلج هو... عافت حصه الريوق وركضت فوق مسكت التيلفون واتصلت به... سيف: مرحباااا الساع... حصه:.... صباح الخير.. سيف: صباح النوووور والسرووور والورد والياسمين بعد....اكيد انه صبح حلوو يوم انتي مصبحه علي... كان ودها حصه ادخل ايدها للتيلفون وتعطيه بكس على خشمه.... يغازل بعد..؟؟ مسود الويه متفيج... حصه: تسلم...شحالك سيف؟؟ سيف: بخييييييييييير الله يعافيج ياربي...شحالج انتي؟؟ حصه: الحمد لله.... صدق بتي اليوم؟؟؟ سيف:........... هي ان شاء الله المسا بيي...بعد المغرب.. حصه: ليش ماقلت لي ؟؟؟ سيف: وين اقولج انتي خليتي حد يقولج والا يرمسج امس؟؟ حصه: .............................. .......... (مبرطمه)... سيف: ماتبيني ايي؟؟؟ حصه: مب جي السالفه...بس...تفاجأت.. سيف: حصه....ادري ان كل شي يديد عليج....وتراج مب انتي الوحيده اللي اول مره تعرسين...حتى انا كل شي يديد عليه وماعرف كيف ممكن اني اتعامل وياج....المفروض ان هالفتره نتفاهم ونتعارف على بعض فيها.... انا تقبلتج واباج من خاطري فحياتي... بس مادري ليش انتي لين الحين مب متقبلتني.... حد غصبج عليه..؟؟؟ حصه: لا ... سيف: عيل بلاج..؟؟؟... مشكلتج تفكرين وايد.... وتخوفين نفسج بنفسج... خذي نصيحتي..لا تفكرين..بس عيشي حياتج في هالفتره...يقولون انها احلى فتره... حصه: ان شاء الله.... معاك حق..آسفه...وايد صعبت الامور عليك.. سيف: لا تعتذرين..... انا كل اللي اباه انج تكونين مرتاحه ويايه... حصه: ان شاء الله.... انته في الدوام احين.؟؟؟ سيف: هي والله بس يالس في الكافتيريا اتريق وعقب برد للدوام.... تريقتي..؟؟ حصه: امبوني كنت اتريق ويوم خبروني انك بتي نشيت عنه...عشان ايي اتصلبك واتاكد.. سيف: هممممم... تردين تتريقين تسمعين..؟؟ حصه: ان شاء الله...برايك عيل بخليك تتريق وتكمل دوامك...وو نترياك في الليل.. سيف: اووكي...بس لا اتعبلين موليه.... انا ياي اشوفج واسولف وياج شوي ما ياي اكل.. حصه: هههههه مالك خص بهالسوالف انته.... يالله كمل ريوقك بالعافيه عليك سيف: الله يعافيج يارب...فمان الله الغاليه.. حصه: مع السلامه بعد هالمكالمه حست حصه بشويه راحه لاول مره تجاة سيف... الحمد لله طلع متفهم... وهو الوحيد اللي قدر يدخل لعقلها فكره الارتباط هذا...كانوا اهلها كله يقولون لها ريلج وكلميه وغيره.. كانوا يحسسوونها انه له سلطه عليها... وانها مجبووره تسوي كل هالشي عشانه ... وهو ياخذ وهو مستانس...لكن من بعد كلامه قبل شوي حست انها ظالمتنه... مسكين هو رووحه كان مرتبك... وحسسها ان ارتباطهم مثل الشراكه..لا هو له سلطة عليها ولا هي لها سلطة عليه ...وعلى هالاساس تقدر تتقبله وتتعاون معاه انهم يبنون حياتهم رباعه ويتفاهمون عليها.... |
||
|
|
|
27-07-2006, 01:38 AM
|
رقم المشاركة : 8 | ||
|
|
الجزء الخامس والعشرون
كانت نوره فحجرتها تدرس لامتحانها اخر الاسبوع... لانه خلاص هالاسبوع اخر اسبوع في الصيفي...دخلت عليها حصه المغرب.. وويهها محمر.. حصه: وصل...وصل...ياوييلي.. نورة: ريلج وصل..؟؟ حصه: هي... نوروه ماروم انزل...انزلي وياي.. نورة: مامنه يعني انتي..؟؟ ماتخافين اذا شافني يكنسل عنج..!!! حصه: اووف والله انج متفيجه... نورة: جهزتيله كل شي انتي..؟ حصه: هي.. نورة: وانا اشوفج حلوه وكاشخه ومرتبه...ناقصنج ابتسامه حلوه وتخوزين هالعبووس هذا.. حصه: ماروم ويا هالويه...ياويلي احين امي بتزقر عليه ... نورة: ارتاحي ياحصه...هذا ريلج مب سايره عند جلاد انتي.. وبعدين هو شايفنج من قبل وانتي بعد شايفتنه شحقه تخافين... تمت حصه ساكته... نورة: سيري اقري ايه الكرسي والمعوذات ودخلي... مابياكلج.. ترددت حصه اول شي..بس بعدين نشت وهي تسحب ريولها سحب... ونزلت تحت وهي شوي وبطيح من الدري... شافت امها طالعه من الميلس الصغير وين كان سيف وسكرت الباب... ام خالد: تعالي سلمي على ريلج... نزلت حصه وهي قلبها يدق مثل الطبل... وتنفسها صاير سريع كانها كانت تركظ ...وقفت جدام باب الميلس الصغير..وكانت بتفتح..ولاحظت ان امها كانت تبا ادش وياها...فصدت صوبها وقالت.. حصه: امايه لا ادشين وياي..!! ام خالد: ليش بنتي..؟؟ بدخلج على ريلج بتستحين ادخلين ارووحج... حصه: بستحي زياده يوم انتي عندي.... بس يوم بدخل اروحي بدبر عمري... ام خالد: على راحتج.. سارت عنها امها تسوي كم شغله... سمت حصة بسم الله وفتحت الباب.... وشافته يالس.. حست انه مرتبك..بس يوم سمعها داخلها على طول نش وقف.. وهي نزلت عيونها...وسكرت الباب وراها.. حصه:......السـ.....ـــلام ..عليكم... سيف: وعليكم السلام هلا حصه... تمت واقفه ..وهو بعد تم واقف...هي عيونها عالارض..بس هو عيونه عليها..منبهر...معجب..احلى عن الشوفه اللي شافها من قبل جدام السياره... ياحظي..ماصدق ان هاي حرمتي... سيف: آآآآ..احمم...تعالي حصه...استريحي... تقربت حصه ويلست عالكرسي اللي عداله.. بس مب عداله عداله طبعا...ويلس هو وماعلق على شي.. سيف: شحالج..؟؟ حصه: ..الحمد لله...بخير... شحالك انته سيف.؟؟ سيف: بخير الله يعافيج... ادري انج قافطه وواصله حدج احين ههههههههه عشان جي مابقولج انج حلوه وتخبلين... ظحكت حصه...اونك عاد ماقلت ويا هالويه..!!...سيف ماشل عيونه عنها..يبا يقعد يراقبها...يراقب اقل حركه تصدر منها... ويعرفها..ويالفها...خلاص حرمته....!.. سيف: امايه واختي شما يسلمن عليج وايد.... حصه: الله يسلمك وياهن من الشر....رد السلام عليهن... سيف: ان شاء الله.... وقعد سيف حوالي ساعه ونص يستدرجها بالكلام لين ماحس شوي انها بدت تتصرف بعفويه...بس من تتذكر منو هو وشو يسوي هني ترد تقفط مره ثانيه....ماعليه ...الايام بينهم وبتتعود عليه..على حدود الساعه تسع نش بيروح عنها ويوم وقف عند الباب..لف صوبها..واحتار كيف يسلم عليها... سيف: بترقدين من وقت اليوم..؟؟؟ حصه: والله مادري.. 12 او 1 جي..على هالحدود...! سيف: بتصلج قبل مارقد... حصه: اوكي... سيف: شي في خاطرج..؟؟ حصه: سلامتك سيف... سيف: الله يسلمج... تقرب منها..وباسها بين عيونها.... احترق ويه حصه...حتى سيف مسكين قفط... سيف: تصبحين على خير...فمان الله.. وطلع وهي بعدها واقفه مكانها وتحس بدوره فرااسها.....اللي صار صدق والا انا احلم...؟؟؟ في هالوقت كانت فطوم يالسه مع نوره في غرفة نورة فوق... فطوم: نورووه... انا شغلي خلص في الجامعه..واحين اسبوعين باقي عن يبدا الدوام... انا بسير عند اهلي.. نورة: والله..؟؟؟ على راحتج... فطوم: بتصل بسعيد.... مسكت تيلفونها واتصلتبه... وتفاهمت وياه وقالها انه بييها بالثلاثاء العصر لانه مب فاظي قبل الثلاثاء.. في امريكا.. كان عبدالله يالس يدرس يوم دخل عليه خليفه وهو مظايق من الخاطر... عبدالله: خيبه خيبه....شو بلاك جي؟؟ خليفه: ...شووووف...!! ومد له ورقه في ايده...وكانت ورقة الامتحان .... وكانت النتيجه زفته من الخاطر... عبدالله: ول...!!!...شووو خلوووف اول مره تيب درجه جي...!! يا خليفه ويلس عالشبريه... خليفه: ترا هذا اللي قاهرني... هالعلامه بتنزل من درجاتي وايد... عبدالله: ماكنت تدري بالامتحان..؟؟؟ خليفه: بلى..كنت ادريبه ودرست له اوني... سكت عبدالله...وعرف ان هالامتحان اللي صادف ملجه حصه... خليفه ماقدر يركز بالدراسه وياب نتيجه مب زينه... عبدالله: ماتروم ترمس الدكتور عشان يعيده لك..؟؟ خليفه: رمسته ولا طاااع... عبدالله: انزين حاول تقنعه انك تسوي بحث اظافي...عالاقل يغطي شوي على هالدرجه... خليفه: والله الا جان جي.... والا انا مب ياي هني ومتغرب ومتلعوز عشان نتايج مثل هاي... عبدالله: هد اعصابك...تعشيت؟؟ خليفه: لا... عبدالله: انا يوعان...قوم نطلع نتمشى وعقب بنتعشى فواحد من هالمطاعم....بنسير مكان يديد ماسرناله قبل... طلع خليفه ويا عبدالله وهو مظايق ويفكر بدراسته...لازم يركز اكثر... وصلوا المطعم اللي كانوا يبون يسيرون له لانه توه فاتح ويديد..ويلسوا على طاوله خارجية ... وطلبوا عصير لين مايشوفون شو بيطلبون عشا...كان عبدالله يسولف على خليفه عشان يطلعه من هالمزاج..بس خليفه كل شوي يعقد حياته اكثر..وتلتفت عيونه مكان ثاني غير عن ويه عبدالله...لين مااظايق عبدالله... عبدالله: شو بلاك..؟؟؟ خليفه: اووفف...تبادل المكان..؟؟؟ استغرب عبدالله..ابادل المكان..!!!.. وصد وراه عشان يشوف من شو مظايق خليفه ..وشاف شله بنات خليجيات كلهم متحجبات ما عدى 2 مظهرات قصيصهن.. ووحده من هالمتحجبات كانت اطالع خليفه وتتبسم... رد عبدالله صد صوب خليفه وهو رافع حياته... عبدالله: ماابااادل... تبا اختك تيب آخرتي..!!. سكت خليفه ونزل عيونه يلعب بتيلفونه.... عبدالله: منو هذي..؟؟؟ خليفه: اظن انها وياي في محاضرتين.... عبدالله: شو سالفتها ليش اطالعك..؟؟ خليفه: شدراني...نبدل المطعم..؟؟؟ عبدالله: لا ما بنبدل المطعم بسبب بنات... يالله اطلب العشا خلنا نتعشى ونروح.... تنهد خليفه...مايرتاح من هالحركات....مايحب يختلط ببنات يعرفهن..فما بالك ببنات مايعرفهن..؟!!!!.. طلب العشا وتعشوا وهو يحاول قد مايقدر انه مايصد صوب هالشله... وقبل مايقومون خليفه وعبدالله..نشن البنات..ومرن عدال طاولة قوم خليفه...او بالاحرى متعمدان يمرن من هالصور... البنت المقصووده مدت ايدها وحطت ورقه صغيره عدال ايد خليفه وراحت... عبدالله وخليفه بطلوا عيونهم وحلوجهم بعد...شو هالحركه..!!!... صدق ان الدنيا انعفست فوق تحت ... ماعرف خليفه شو يسوي... بس يوم شاف ايد عبدالله تمتد للورقه...قال.. خليفه: عبدالله...!!... لا تصكها.. عبدالله: عيل افتحها وقولنا شوفيها...يالس تطالعها...!! خليفه: بتدفع انته والا انا..؟؟؟ عبدالله: انته ادفع.. بطل خليفه بوكه وطلع الفلوس منه.. بس قبل مايسكره شاف طرف ظرف في بوكه...يوم طلعه شوي تذكر انها الرساله اللي كان كاتبنها لحصه... آآآخ ياحصه... ليت هالرسالة وصلتج قبل ماتنخطبين.....ياترا كنتي بتترييني..؟؟؟.... اعتقد اني مابعرف جواب هالسؤال ابدا..... سكر بوكه واطالع فويه عبدالله.. ودفع للجرسون الحساب.. خليفه: يالله روحنا... عبدالله: اوكي...شل الورقه لاتنسى...فيني فظوول... خليفه: طوف جدامي انته.... لا ورقه ولا خرابيط... نشوا ثنيناتهم وراحوا وخلوا الورقه بعدها على الطاوله مثل ماحطتها البنت... في العين نوره كانت تكتب رساله لسعيد..وكانت تتحظى وتتحرطم وماخلت شي ماقالته وماخلت استاذ ماسبته...بسبب الامتحانين اللي بتمتحنهن اخر الاسبوع......والقهر ان سعيد بيي يوم الثلاثاء...وهي اصلا عندها امتحان يوم الثلاثاء وتخاف تفوتها شوفته... دخلت عليها فطيم وويهها محمر... ويلست هالشبريه وهي شكلها متنرفز.... فطوووم: يوووووم اقوووووووووولج.... لا ادااااااااااااافعين عنه....!! نورة: بسم الله....منووووو؟؟؟ فطوم: ولد عمج...حمدااااااااانووووووووووو ه....!! نورة: ههههههههههههههههه... شو سوابج..؟؟ فطوم: فشلني...وظربني.... نورة: شووووووووو؟؟؟... فشلج اوكي لكن كيف ظربج بعد.. فطوم: كنت يالسه اطالع سبيس تون في الصاله....طب عليه وقالي وهو شاق الحلج...."السلام عليج يالطويله"...ويوم انصدمت بشوفته قالي:" لا تزعلين.. طويله حلوه..".. انصدمت اكثر ونشيت عنه وكنت بدخل..مسك المخده وفرني بها....اون ثاني مره ردي السلام.....!!!!.... آآآآآآآآآآآخ بجتله...عطيني مسجبه بس... ماااتت نورة من الظحك..... ومارامت تسكت الا عقب ماحصلت تكفيخ من فاطمه...اللي كل ماتكفخها زاد ظحكها...لين ماخلاااص حست عمرها بتموت.... نورة: ههههههههههه والله ياحمداااااااااان.... تراه حمدان خلاص تعود عليج .... وحصل له فريسه ثانيه غيري في هالبيت...تحملي.. هههههههههههههه... فطوم: مالت عليج انتي وولد عمج..... ودووني بيتنا...ماريد اسكن عندكم... والله مسولي فلم رعب هالحمدان.... نورة: انزين ردي عليييه انتي...كشري عن انيااابج...بروحج انتي هب هينه.. فطوم: لا حبيبتي ماتعودت الااااسن رياييل.... نورة: ماعليج منه ...خذي راحتج.. ولاتاخذينها بحساسيه..الا يسووولف وياج... فطوم: والله انا مستغربه منه...شو هالشي هذا ...!!...كيف يفكر ابا افهم... سكتت نوره عن فطوم وهي تظحك.... الله يعينج يافطوم...خلاص انتي فبااله احين منو بيفكج منه؟؟؟... نورة: هو ارووحه احين تحت..؟؟ فطوم: مادريبه... بس يوم ركبت سمعت صوت ابوج.... اكيد وياه احين... مرت الايام وامتحنت نوره امتحاناتها الثنينه... وكانت مستانسه ان سعيد اجّل اليــيّــة للعين عشان امتحانات نووره...وبالمره عليا اختها تشبصت فيه وقالت انها بترد وياه العين.. وفيصل بيردها الشارجه عقب... ويوم الاربعاء الظهر قبل الغدا وصلوا..وكانت نوره راقده ساعتها.... سلم سعيد على عمته وريلها واخته فطوم وسار الميلس.. وعليا وبنتها سلامه وهلال دخلوا البيت مع فطوم وام خالد... بعدها وعوا نوره وحصه اللي بعد كانت راقده بسبب انها كانت سهرانه وهي تكلم سيف... علاقتهم وايد اطورت عن قبل...وتقبلته بشكل اكبر وبدت تحس بالسعاده والتفاهم معاه.... سلمن البنات على اختهن وحطوا الغدا وتغدوا... سارت عليا بترقد شوي هي وعيالها لانها من الصبح ناشه... ونفس الشي الشواب... سعيد بعد دخل البيت وزقر على اخته فطيم.. سعيد: حد في البيت..؟؟ فطوم: انا ونوره وحصه بس يالسين في الصاله... سعيد: ابا اسير فوق اطيح شويه.. من الصبح ناش... فطوم: اووكي تعال بوديك غرفة عبدالله... وصلته غرفة عبدالله وردت عنه ويلست عند البنات بعد ماوصته انه يوم يبا يظهر يتصلها تيلفون.... العصر ووقت الاذان نش سعيد وتوضى واتصل بفطيم.. وفطيم كانت في الحمام ونوره منسدحه على شبريتها تقرا وحده من المجلات..ويوم ازعجها التيلفون وهو يصيح مسكته..وشافت اسم "سعيد" .هو اللي متصل يعني... بتهور ردت على التيلفون وقالت بدلع.. نورة: آآلوووووووو.... سعيد فز قلبه... صوت نووره وهو متاكد....مستحيل حد يقلدها جي... سعيد: هــــــــــــــــــلاااااا واللـــــــــــــه بهالصووووت.... ظحكت نوره... سعيد: شحاااالج ويا هالويه....؟؟ يالرقاااااااااااااده..بستقبلك وبستقبلك ولا شفنا طشششششششه منج... نورة: هههههههه سوووري والله كنت راقده....ماصدقت اخلص امتحانات ... سعيد: وشو سويتي..؟؟ نورة: ممتااااااااز الحمد لله... علومك انته... سعيد: علووووم الخييييييير ... تعالي زفـّــــيـــنــي...!! نورة: هههههههههههههه ازفك؟؟؟ سعيد: شو اسويبكن بعد...وحده ادخلني والثانيه اطلعني.... تعااااااااالي ابا اسير المسيد اتلاحق الصلاة... نورة: ثواااااااني بس.... باي سعيد: بااي سكرت نوره التيلفون وهي تبتسم مستانسه.... وتحجبت وركضت على الدري وهي سايره صوب غرفة سعيد... سعيد كان في الممر... يوم شافها ظحك لها.... نورة: هاااااا...تاخرت... سعيد: هي تاخرتي وايد يالدبه... نورة: هههههههه ادريبك تطنز.... المهم يالله جدامي ..يالله...! سعيد: .......وياااااااااااا هالويه.... نورة: هههه الحلووو لو سمحت... بتبات عندنا..؟؟؟ سعيد: لاااااا وين اباات... بنسير عقب المغرب... نورة: لاااااااااااااه....!! سعيد: هيييييييييييييييييه...!! نورة: ومتى بتردووون..؟؟؟ سعيد: الله اعلم بفطيم...يمكن الخميس الياي ..لانه دوامها بيبدا الاسبوع اللي بعده اظن... نورة: هي صدق....تمام عيل.... وصلوا الباب الرئيسي...التفت لها سعيد.. سعيد: مشكوووره عالتوصيله.... خليني اشوفج قبل ماسير... نورة: ان شاااااااااء الله... سعيد: فمان الله... نورة: الله يحفظك... |
||
|
|
|
28-07-2006, 07:13 PM
|
رقم المشاركة : 9 | |||
|
الله يوفق حصه وسيف |
|||
|
|
|
30-07-2006, 05:08 AM
|
رقم المشاركة : 10 | ||
|
|
هلا والله ريمو كيفك تو مانورت الصفحه الجزء السادس والعشرين
بعد ايام من الاحداث اللي طافت.. دخل عبدالله هو وعلي الكافتيريا وين كان خليفه يترياهم... عبدالله وعلي: السلااااااااااااااااام عليكم.. خليفه: وعليكم السلام والرحمه.... عبدالله: من الصبح يالس...؟؟ خليفه: هي لاني مطنش المحاظرة اللي طافت... عبدالله: ليش مطنش..؟؟؟ ناقص انته..؟؟؟ خليفه: بس... علي: بسير شوي ارمس ربيعي اشوفه هناك يالس..باخذ منه دفتر....لا اتغدون عني... نش علي وسار صوب ربيعه وتم خليفه يشخط عالدفتر وهو سرحان...من ابتعد علي صد عبدالله صوب خليفه مره ثانيه.. عبدالله: خلووف بلاك... رفع خليفه نظرة وتظاهر بانه مستغرب من السؤال... خليفه: مافيني شي ليش السؤال..؟؟ عبدالله: ليش السؤال؟؟؟...هذي اول مره اطنش كلاس...!!! خليفه: ماشي بس مابغيت احضره مالي خاطر عليه... عبدالله: خلصني وقول لا اسوي وياك تحقيق في الليل وماخليك ترقد...!! حاز بوزه خليفه.... عبدالله يعرفه زين مازين...خليفه كله ولا دراسته...واكيد فيه سبب خلاه يطنش كلاس هو محتاج انه يحظرة اول باول.... خليفه: هممم... تذكر البنت اللي... قاطعه عبدالله... عبدالله: هي هي ..راعية المطعم....بلاها... خليفه: قلت لك انها وياي في محاضرتين ورا بعض...!!.. المحاظرة اللي طافت طفرتني .. عبدالله: جي شو سويت..؟؟ خليفه: انا متعود تقريبا على نظراتها...فقمت اطنش.... بس من يومين تغيرت قامت اطالعني كله باحتقار...شوي وبتفل عليه...تقولون ذابحلها حد من اهلها.... عبدالله: يمكن لانك ماشليت الرساله.. خليفه: غصب هووو...؟؟؟؟ عبدالله: سالها انزين بلاها..!! خليفه: طب السالفه لاه شو اسالها..!!...خلها تولي... رد علي في هاللحظه وطلبوا الغدا وتغدوا ..بعدها رد خليفه لغرفته وساروا علي وعبدالله كل حد محاظراته... عنود كانت قاعده مع عمتها ام خالد يشوفون كاتلوجات الاصباغ والالوان وورق الجدران وغيره... عنود كانت تقول لام خالد انها تثق بذووقها..لكن هذي اصرت ان كل شي لازم يكون على ذوق عنود...لان هذا قسمها وهي اللي بتسكنه مب ام خالد..!!... واتفقن على اشياء معينه يسونها بالغرف ..وحصه كانت يالسه وياهن تقترح عليهن..اما نوره فكانت في المطبخ وهي مستمتعه باجازتها القصيره ومتولهه عالطبخ... دخل عليها حمدان وظحك على شكلها.. حمدان: هههههههههههه شلــــــــــــج انتي في الطبخ..؟؟؟ نورة: مسود الويه ماجنك دوم تزط من طبخي... حمدان: شو تسوين..؟؟؟ نورة: صينية بطاطس وفتوش... حمدان: تمااااااااااااام .....منو داخل البيت؟ نورة: امي وحصه واختك...! سكت حمدان ..واقف عدالها..كل شوي يمد ايده وياخذ طماطه..والا بطاطس...لين ماهزبته... حمدان: هههههههههه يوعان والله.....عيل وينها الطويله عنج..؟؟ مندسه من كم يوم..!! صدت نورة صوب حمدان مستغربه...وقررت انها تغلس عليه شوي.. على الاقل تنتقم لفطيم... نورة: ماتدري انته...؟؟...حليلها سارت بيت اهلها... تفاجا حمدان وبطل عيونه.... وبان على ويهه الزعل... حمدان: لييييييييش..؟؟؟ والدراسه... نورة: خلاص بتسكن في السكن....ماتبا تسكن عندنا... حمدان: افاااااااااااا...شحقه عاد...؟ نورة: همممممممم...تبا الصدق كانت مظايقه وايد من تصرفاتك.... امبونها بتسكن بس بسبتك كنسلت... انصدم حمدان اكثر من قبل... وبان على ويهه مسكين ..ابتعد عنها شوي وهو يفكر بالسالفه.... حمدان: ...انا..؟؟...بسبب.....!!..هممم م...آآآ .. انا كنت اسولف وياها بس.. ماعرفت انها بتاخذها بهالحساسيه ..! نورة: بس انته كنت تزودها شوي حمدان ...يعني فطوم غير عني انا وحصه... ماتعرفك الا من فترة بسيطه وطايحبها مسكينه...نحن نعرفك من انولدت عشان جي مانحط بخاطرنا عليك... تم حمدان ساكت..... ماتوقع ان كل هالشي يصير... عنبوو كان مبين عليه انه يمزح...كيف تاخذ الامور بجدية؟؟؟... مسكين كان زعلان من الخاطر بسبب اللي صار..مر عليه دقايق وهو ساكت ويفكر....مب مصدق انه تصرفاته زعلتها لهالدرجه ....لازم يودر هالمزح البايخ ويا حد مايعرفه.... تحرك يبا يمشي..ويطلع من المطبخ والبيت بكبره... ونوره كاتمه الظحك... نورة:... اقووووووووووول..... حمدان: هااا...؟!.. نورة: ..............امزح وياك...!! ما استوعب حمدان...وعقد حياااته.... نورة: فطوم سارت عند اهلها صدق بس لين مايبدا الدوام وبترد...يعني اخر هالاسبوع...!! شهق حمدان ...ورد سكر حلجه.... وهو مظيج فووول عليها... يا صوبها ومسك دبة الماي اللي عالطاوله وصبها كلها على راس نورة.. اللي مارامت تشرد وهي ميته من الظحك.... وحمدان بعده مافجج ظيجته فيها..شاف جريده جديييمه مفروره عالرف ...شلها وطواها وقعد يكفخ نوره بها...دخلت حصه على هالحشره... حصه: هاااااااااااااي....بلاك على اختي... فر حمدان الجريده وقال .. حمدان: اختج سبــــــــــــــاله..... ونورة ميته من الظحك... خلاهن وطلع من المطبخ ساير صوب البيت... صدت حصه صوب نورة المتلعوزه والخرسانه..والمكفخه.... حصه: شووو السالفه؟ اول مره يطيحبج جي... نورة: هههههههههههههه ,آآآآآ بموت من الظحك.... قصيت عليه وقلت له فطوم بتسكن في السكن بسبب تصرفاته وغلاسته....لو شفتي شكله وهو متلوووووم.....كسر خاطري ... حصه: هههههههههه حسبي الله عبليسج....خبله... نورة: بغيت انتقم لفطوم شوي..بتطمش عليه يوم بخبرها السالفه....تعالي كملي عني بسير ابدل ثيابي... الخايس جب غرشة ماي كامله عليه....!! حصه: ههههههههههه محد قالج اتنقرشيييبه.... كملت عنها حصه الطبخ وسارت نوره ودخلت البيت وركبت فوق على طول وبدلت ثيابها وردت تنزل عند قوم امها... على اخر الاسبوع كان سعيد ياي يوصل فطوم... ام خالد كانت طالعه مع عنود يختارون غرفة نوم... اما بو خالد فكان فعزبته ..ومن حل العصر يا حمدان ويوم شاف البنات بروحهن شلهن ولحق عمه للعزبه...فيوم وصل سعيد للبيت ماحصل حد....حتى في الميلس محد... دخل هو ويلس في الصاله لين ماادورهم فطوم..بعد شوي يته وهو تقول.. فطوم: محد في البيت سعيييد...!!! سعيد: عوذ بالله وين ساروووا...؟؟؟ فطوم: مااادري.. استحي ادخل بيوت خالد وناصر... وماعرف رقم حصووووه.... سعيد: صبري بتصل بحمدان.... اتصل بحمدان ...اللي كان متفيزر ويا عمه جدام العريش ويشرب قهوه وياكل رطب.. حمدان: مرحبـــــــــــا الساااع... سعيد: هلاااااااااا والله.... شحالك حمدان..؟؟ حمدان: بخييييييييييير الله يعافيك علووومك انته ربك الا بخييييييييييير.. !! سعيد: بخييييييييييير وعافيه... وين انته؟؟ حمدان: انا هني في العزبه ويا عمي.... سعيد: هيي ياحيك...تخبر عمي وين اهل البيت..؟؟؟ وصلنا وماحصلنا حد هني...عسى ماشر..؟؟ فز حمدان من مكانه يوم سمع كلمه "وصلنا"...سعيد مب بروحه...يايب وياه فاطمه اكيد..... حمدان: الله يسلمك البنات هني... حرمه عمي سارت السوق لشغل.. سعيد: اهااااااااااا...والا كلكم في العزبه هاااا... حمدان: شحقه ماتي...؟؟ بتلاقى وياك عند الدكاكين وبييبك هني...بتفريووون شوي... سعيد: تمام.... صوب مزيد هااا.... حمدان: هي بالضبط.. سعيد: تمام بتصلك يوم بوصل.... فمان الله حمدان: مع السلامه.. ... سكر سعيد عن حمدان والتفت صوب فطوم... سعيد: ماروم اخليج هني واسير.... بنسير صوب عزبه ريل عمووه.... وانا من هناك برد الشارجه وانتي بتردين وياهم... فكرت فطوم شوي بالسالفه....وعرفت ان حمدان موجوود...واستغربت من نفسها يوم حست انها متولهه عغلاسته.... فطوم: اوووكي... ... نشوا وركبوا سياره سعيد بعد مانزلوا شنط فطيم عدال باب الصاله...بدخلهن بعدين للغرفه.... وروحوا صوب العزبه ... مشى سعيد بسيارته لين ماوصل اخر عند محلات مصطفه.. وقف وخذ بيبسي واتصل بحمدان...وهذا قاله انه دقيقه وبيكون عندهم...كانت فطيم متغشيه طبعا يوم وصل حمدان..نزل سعيد يسلم عليه وسولفوا شوي كان حمدان يبتسم ولابس نظارات شمسية... فطوم استغلت الفرصه بما انها متغشيه تبصبص على راحتها... الصراحه حلو... هذي المره الالف اللي اقول عنه هالشي... ياترى ليش تولهت على هالغلس..؟؟؟ حد يتوله على واحد مثله...!! مجرم... رد سعيد ركب السياره وتبع حمدان في الدرب...وقف حمدان سيارته اول ماوصلوا العزبه... تغشن نورة وحصه عن يحصلن هزبه من الشايب بعد عسب سعيد...نزل سعيد وفطيم وهي بعدها متغشيه سارت صوب البنات وسلمت عليهن بينما سار سعيد يسلم على ريل عمته... وسلم عالبنات بشكل رسمي جدا وشي طبيعي عرف نوره أي وحده منهن.... لو بين 100 بنت مابيغلط بها.... يلس سعيد مع الشايب وحمدان وين ماكانوا يالسين من قبل...وسارن البنات يتمشن صوب الهوش والدياي ... بعد صلاة المغرب تعذرر سعيد عنهم وقال انه وراه خط للشارجه مره ثانيه...وسلم عالبنات من بعيد بانه رفع ايده وسلم...وروح صوب سيارته ساير للشارجه..وهو متحسف على هالشوفه القصييره واللي ماتشبع حد موليه.... بس يالله..احسن من ماشي... بعد صلاة المغرب وبعد ماروح سعيد... بو خالد قال انه بيمر على ريال وطلب من حمدان يرد البنات وياه..لانه اصلا ماعنده مكان ياي في البيك اب.... على هالحال ركبن البنات ويا حمدان وروحوا صوب البيت... يوم وصلوا نزلن البنات ونزل حمدان وياهن....وقال انه بيتريا عنود عشان يشلها وياه البيت يوم ترد هي وام خالد من السوق.. يوم دخل البيت حصل فاطمه مبتلشه تسحب شنطتها وراها اللي خلتها قبل ماتطلع...يا صوبها وقال.. حمدان: هااا عن تنكسرين نصييين.... وتقرب ومسك الشنطه عنها وشلها... ابتعدت فطوم عن الشنطه وهي اطالعه بنظرة غريبه... فطوم: خدووم ماشاء الله..... حمدان: سكتي عن افرها على راسج ...وتستوين من رقم واحد لرقم خمسه.. فطوم: تسوييها والله.... ظحك حمدان واجدمها لحجرتها اللي يعرف سلف انها ساكنه فيها ... ويوم مد ايده بيفتح الباب قالت.. فطوم: لا لالا لالالالالالالا.... لا تفتح الباب...خلاص خل الشنطه هني مشكووور وماقصرت... اطالعها حمدان وهو متوله على غياظها... حمدان: شحقه يعني...؟؟شوداخل ماتبيني اشوفه..؟؟ فطوم: ماشي..بس غرفتي..ماباك ادشها... ظحك حمدان ومد ايده يفج الباب ...الحجرة عادية مرتبه ..حط الشنطه واعتدل فوقفته...ويوم طاحت عينه على الدبدوب اللي يايبنه لها ..ابتسم... والتفت صوبها.. حمدان: شو مسويه بالدبدوووب..؟؟ كانت فطوم ملبسة الدبدوب كاب ونظارات..ويايبه شال رفيع ولافتنه على رقبته..وطالع شكله فنان... احلى من قبل... فطوم: كيفي دبدووودبي...اسوي فيه اللي اباه... حمدان: هههههههههه والله انه صار احلى يوم انه عندج... انحرجت فطوم من كلمته هاي... فيه تطور...ماقاعد يغايظ... فطوم: شي اكييد..صح مشكوور عالدبدوب... حمدان: العفووو.... وخلاها وطلع عنها ويلس في الصاله وهو كل شوي يتبسم لفكره تمر براسه... في نفس الليله اتصلت حصه بسيف... سيف: هلااااااا والله بالغلاااا.. حصه: اهلييييييين سيف..شحااااااالك..؟؟ سيف: بخييييييييير يسرج الحال شحالج انتي ؟ حصه: الحمد لله... هااا...مرتاح اليوم بتسهر ماشي دوام باجر.. سيف: بسهر وياج عندج مانع....؟ حصه: عالتيلفووون..؟؟؟ بخسسسرك لانه الفاتوره كلها تدفعها انته...ههههههه سيف: وانتي شووو عليج.. حصه: لا بس ماريد اخسرك... سيف: قولي ماريد اكلمك... حصه: لاااااااا سيفووووو حرام عليك...انا ماقلت جي... سيف: خلاص عيل جب.... المهم شو سويتي اليوم..؟؟ حصه: والله سرنا العزبه.... وتصورت ويا الهوش والبقر...ورغت الدياي بعد... سيف: هههههههههههه اخافج من نعرس تقولين بسويلي عزبه... حصه: هي عيل شو تحسب....انا امووت عالعزب.. سيف: لا ماشي... لين تعيزين ماشي عزبه....كل يوم بتقوليلي حلالي وحلالي... حصه: ههههههههه انزين..وانته شو سويت اليوم..؟؟ سيف: الله يسلمج سرت دبي وقبل شوي راد.. حصه: شو عندك فدبي..؟؟؟ سيف: آآآآآآخ يازين اللي يحاسب... حصه: هههههههه خلصني شو عندك هناك..؟؟؟ سيف: سرت اشوف غرف النوم هناك.... حصه: والله..؟؟؟ سبحان الله حتى اامي سايره اليوم تختار غرفة نوم لقسم عبدالله اليديد... سيف: لا يحاولووون....ونهم بيسابقووونا.... ماشي نحن بنعرس قبل.... حصه: هههههههه يالله مستعيل... سيف: هي عيل شوووو... حصه: ليش انزين..؟؟ سيف: شو ليش؟ حصه: ليش مستعيل.. سيف: هذا سؤال..؟؟ ابا حرمتي هني عندي... حصه: شو تبابها...؟؟؟ ...لا تشوفني طيبه تراني العوز.... سيف: هههههههه برايج لعوزي عكيفج المهم تكونين جدام عيوني... حصه: هههههههههه ويا هالويه....استحي جذي انا... سيف: يالله يالله...بين عليج عاد هوو المستحى..!!.. فديتج والله... حصه: اخافك تعافني عقب العرس سييف....!! سيف: شووو..؟؟ انا اعافج..؟؟ حرام عليج شو هالكلام... حصه: شو دراك انك مابتعافني..؟؟ سيف: مابعافج وخلاااص... حصه: شو دراك انزين... سيف: لاني احبج ..... ! سكتت حصه وانحرجت مووووووووووت....اول مره تسمع هالكلمه من اي ريال.... مب بس سمعتها..حست انه صادق فيها بعد... وفي هاللحظه حست بشعور قوي تجاه سيف... ماتعرف شو هو...لكنها فرحت به واااايد... حصه:..... حبك ربك ياااااااااارب.... سيف: بس..؟؟ حصه: هههههه اذا حبك ربك كل الناس بتحبك.... سيف: انا ماريد كل الناس.....اباج انتي... حصه:..... انزين...وانا بعد... سيف: حلـــفـــــي...!! حصه:......ههههههه والله... سيف: ياوييلي....عيل قوووليها.. شحقه بخلانه علي..؟؟ حصه: مب الحين.... سيف: ليش؟ حصه: خلها تطلع من نفسها احسن واحلى..... سيف: ههههههه بنترياها ولو اني اشك انها تطلع....!! حصه: هههههههههه لا تخاف بتطلع... وخذتهم السوالف وكملوا ساعتين وهم يرمسون ويا بعض..... بعد ثلاث ايام فامريكا.... خليفه كان يسكر كتبه ويجمعهن...وكانت المحاظرة توها مخلصه ...وحس بشخص يوقف عداله..يوم التفت انصدم بالبنت راعية المطعم واقفه اطالعه وهي حاظنه كتبها والدموع فعيونها.... هند: ممكن اكلمك برا شوي.. خليفه: عن شوو..؟؟ هند: موضوع مهم... ماحب خليفه يماطل ولو انه تفاجأ من هالجرأه اللي تتمتع فيها هالبنت...ولسبب ثاني وهو انها كانت تصيح.... شل كتبه وتبعها لبرا الكلاس....وتمت تمشي هي شوي مبتعده عن زحمه الطلاب.... وهو يمشي وراها وهو ساكت...وبيشوف شو آخرتها وياها..... ويوم وصلوا فسحه صغيره فاظيه تقريبا وقفت البنت وجابلت خليفه المستغرب.. هند: ابا اسالك سؤال...انته شفت مني شي غلط علشان تسوي فيني جي..؟؟؟ خليفه رفع حواجبه وبطل عيونه..... وهو مب فاهم اي شي يدور حواليه.... خليفه: شو سويتبج..؟؟ هند: انته تعرف زين شو مسوي... انا ماكد غلطت عليك...ولا قلت لك كلمه شينه....عيل ليش تحاول تشوه سمعتي قد ماتقدر...؟؟؟ زادت دهشة خليفه....شو تقول هذي..؟؟؟ الله لا بليتنا يارب...هذي منو سلطها علي.. خليفه: انتي شو تخرفين..؟؟؟ انا من وين اعرفج عشان اتبلى عليج..؟؟؟ هند: شوف..انااعترف اني يمكن غلطت بحركتي الجريئة هذاك اليوم...لكن السبب اني كنت اراقبك من فتره..واحس انك ريال حشيم ومحترم..واي شخص يتمنى يتعرف عليك.... وانا كنت ابا اتعرف عليك لا غير لاني اشوفك ماتختلط مع الطلاب وايد... لكن هذا مب معناته انك تعاقبني بهالطريقه...!! وكانت البنت تصيح ودموعها ينزلن بدون توقف...ومن توترها كل شوي تلعب بدفاترها بصبوعها.. خليفه: شوفي...يا انج ترمسين بالسالفه عدل يا تراني بروح من هني وبطنش....شو تقولين انتي..؟؟ اي عقاب واي خرابيط... انا ماعرفج ولا كد احتكيت بج...ولاعرف عن شو ترمسين... صرخت البنت.. هند: كيف توزع رقمي على شباب خايسين بهالطريقه..؟؟؟؟ خليفه: شوووووووووووو..؟؟؟ هند: يتصلوبي يوميا من ارقام مختلفه ويقولون كلام خايس ويقولون انهم يعرفون اسمي وبيفضحوني وغيره... ..لين ماطفرت وكسرت التيلفون..... شوف خليفه انا صح عايشه في امريكا طول عمري لكن من عايله محترمه ...وهذي اول مره اسويها واعطي رقمي واحد من الشباب...لكن الله عاقبني باسوا طريقه... فكر خليفه شوي بالموضوع اللي بين يديده.... انا الله شو بلاني بها هذي... وعرف ان الموضوع فيه سوء تفاهم... خليفه: همم شوفي اختي.... انا ياي هني ادرس واتخرج وارد بلادي عند اهلي... ماياي اتعرف على بنات.... وعمري ماسويتها اصلا حتى في البلاد.... وانتي يوم عطيتيني الرساله ذيج انا اصلا ماشليتها من الطاوله..وروحنا بعد ما روحتن انتن بدقيقه... انصدمت البنت...وبطلت عيونها وحلجها بعد والدموع بعدهن ينزلن... هند: ماشليتها..؟؟؟ هز خليفه راسه كانه يقولها " لا".... بعدين رد تكلم... خليفه: اكيد طاحت في ايد شباب خايسين وهم اللي ملعوزينج...والا مب انا اللي بسوي هالحركات ويا خواتي من الامارات...حتى لو كنتي من وين ماتكونين مب مهم.... انا اصلا مالي خص بهالسوالف... من صدمتها البنت يلست على الدري اللي كان عدالهم...وهي مازالت حاظنه كتبها ... شكلها صغيره وتكسر الخاطر... خليفه: لا تصيحين...غيري تيلفونج وتنتهي المشكله ان شاء الله... هند: اسفه خليفه...وايد ظلمتك ودعيت عليك في الايام الاخيره... خليفه: ما تنلامين.... هند: اسفه والله صدق... خليفه: ماصار الا الخير.... المهم انا ربعي يتريوني عالغدا وبروح.. هند: الله وياك..ومشكوور.. خليفه: ماسوينا شي...فمان الله... خلاها خليفه وروح عنها وين ماكانوا قوم عبدالله يتريووونه .. الجزء السابع والعشرون.. بدت الجامعه وفطوم اربع وعشرين ساعه لاصقه بنوره... تحس بالغربه... حتى انها حظرت كلاس مع نوره ولا فهمت منه شي...وكانت وايد قافطه من فكره الاساتذه الرياييل... تعرفون يوم طالبه متعوده طول عمرها على الحريم فجاه تحصل نفسها يدرسونها رياييل...!!!... وايد ارتبكت من هالسالفه.... هذا عدى عن انها كل شوي تنسى اسماء المباني... الوحيد اللي حفظته هو الكافتيريا الصالة الرياضيه...المهم انها مرت بيوم حافل جدا في اول يوم..وردن البيت تعبانات الساعه 4... نورة كان يخلص دوامها يوميا 1 ونص... اما فطوم يخلص دوامها 4... فاضطرت نورة تترياها كل هالوقت وحظرت معاها عشان يردن مع بعض...بس هالحال مابيمشي كل يوم.... اول مادخلن البيت عقن بعمارهن على الكراسي في الصاله... وين ماكانت حصه وامها يالسات.. ام خالد: ويدي..!!..بناااتي بلاكن..؟؟ نورة: هلكنا اليوم من المشي حشى.. فطوم: هي والله...خلاص ماريد ادرس... حصه: هههههههههه لا حبيباتي خلاص ادبستن..كملن...ياما تحملنا قبلكن.. فطوم: حشىى جاني بتريا اربع مادري خمس سنين لين اتخرج...بختفي لين ذيج الساعه بروحي عاد انا مايحتاي...!! نورة: انا وحده بروح اصلي وانخمد.... حصه: نوروووه..شو تنخمدين انا قلت بتساعديني...! نورة: فيشوووو اساعدج؟؟ حصه: سيف بيي اليوم وابا اسويله عشى محترم... نورة: متفيجه انتي وريلج... خليني اساعد نفسي عالمشي ذيج الساعه اساعدج... نشت نوره شلت شنطتها وراحت فوق.... فطوم: ولا يهمج حصيص بتسبح وبنسدح شوي وبيي اساعدج في المطبخ... حصه: فديتج والله مشكوووره ...بس اذا تعبانه برايج... فطوم: يم بتسبح بيخوز التعب...ماعليج نشت فاطمه بعد ودخلت حجرتها... ويوم فضت الصالة مره ثانيه على ام خالد وحصه...لفت ام خالد على بنتها وقالت بصوت واطي.. ام خالد: هزرج اخبرها عن الاتصال اللي ياني اليوم..؟؟!! حصه: لالا احين هي تعبانه ...رمسيها يوم ترتاح شويه... ام خالد: على خير.. حمدان اللي بدا دوامه هو بعد...فقرر انه يقلل سيراته لبيت عمه بشكل كبير.... هذي السنه ماخذ مواد صعبه ولازم انه يركز على دراسته بشكل اكبر...ولو ان هالشي صعب هالفتره بسبب وجود فطيم.. من يمشي بسيارته ويمر على بيت عمه طرت على باله...ويشوف نفسه مغصووب انه يوقف وينزل ويشوفهم...حتى لو ماكان ناوي على هالشي... هو يدري انه مايحبها..... لكن هالبنت غير... مهتم فيها بشكل غير عادي...ويخاف ان فيوم من الايام يكتشف انه يحبها وتظيع من ايده... وصولها صعب...وين بيطير لين الشارجه يخطب..؟؟!!!!...بعدين هو لين الحين صغير عالعرس ومايبا يعرس اصلا.....عشان جي اجبر نفسه يحط على فطيم علامه اكس ...ولو حاليا.. مايبا يورط نفسه في شي مايعرف في النهاية شو نتايجه.... خليفه في امريكا ومن يوم ما فهم هند السالفه... رجعت هالبنت اطالعه بنظرات اعجاب من اول ويديد...وتمنى في لحظه انه ما فهمها شو السالفه عشان تحل عن سماااااه.... هو مب نااااقص مشتتاااات للتركيز...يكفي حصه.... كان قد مايقدر يجاهلها...بس احيانا حركاتها تحرجه من بين ربعه اللي حتى هم انتبهولها.... لكن اليوم طفح الكيل عنده... تريا لين ماخلص الكلاس وزقرها.. خليفه: اقول هند.... التفتت هند صوبه وهي تبتسم ووييهها محمر... هند: هلا خليفه.. خليفه: شوفي... همممم..والله مب عارف كيف اقولها لج.... لكن انا مب من النوع اللي انتي تتحسبينه... هند: اي نوع... خليفه: انا مالي علاقة بالبنات.... ابتسمت هند.. هند: ادري انزين.... خليفه: بطلي حركاتج البايخه اللي تسوينها هذي...انتي تحرجيني من بيت ربعي وتبينيلهم انه بينا انا وانتي شي وداسينه... وهو اصلا مابيني وبينج اي شي ولا عرفج حتى.... انصدمت هند...وسكتت.. خليفه: شوفي..انا ماريد اغلط عليج...اعرف ان نيتج طيبه... لكن انا بتخرج هالسنه وبلتعن الامارات ولا بطب امريكا مره ثانيه...فياريت تعفيني من حركاتج...لاني مستحيل اتعرف عليج عن قرب او اني اكلمج في التيلفون مثل ماانتي تبغين... فـــ لو ماتصدين صوبي ابدا وتنسين واحد اسمه خليفه يكون وايد احسن.... والسموحه منج... خلاها خليفه وروح عنها وهو جزئيا متلوم من قسوته عليها...بس كانت ظروريه...قبل مايطلع من الكلاس صد صوبها وحصلها واقفه مثل ماكانت واقفه جدامه.... ماتحركت اي حركه....ومبين عليها الصدمه... قوى قلبه والتفت عنها وروح..... يوم وصل عند عبدالله اللي كان يالس ارووحه ...سلم ويلس ..عبدالله كان يتكلم في التيلفون....والظاهر انها عنود....الريال باين على ويهه انه ذايب...ابتسم خليفه..يابختك...!!..اللهم لا حسد... بعد شوي سكر عبدالله واطالع خليفه... عبدالله: هااااااااا....شو بلاك تتبسم..؟؟ خليفه: هههه ماااشي...وين الباقي...؟؟ عبدالله: ساروا السينما.... خليفه: اهاااا...هذي عنود؟؟ عبدالله: هي نعم ..هذي حرمي المصوون.... خليفه: شخبارها..؟؟ وشحال الاهل كلهم.. عبدالله: بخييييييييير وعافيه والله وتسلم عليك وايد.. خليفه: الله يسلمك وياها من الشر... قول شو سويييت اليوم..!.! عبدالله: شوووو...؟؟ خليفه: رمست البنت..وقتلها لا تصدين صوبي موليه ....! عبدالله: خييييييييييييبه ههههههههه....بالله عليك..؟؟ خليفه: هي والله... طفرتني عبوود مااركز في المحاظرات والسبه هي وحركاتها... عبدالله: والله افتكيت...مالك امل تستمر وياها اصلا... رفع خليفه نظرة صوب عبدالله مستغرب... خليفه: منو قالك ان بينا علاقه...؟؟؟؟ عبدالله: هااا..؟؟.... لا ماشي بس اقول يعني اذا كلمتها مابتستمر وياها لانك بترد البلاد.... خليفه: وانته تحيدني راعي هالسوالف...؟؟ عبدالله: لا والله ولد عمي محشووم... خليفه: عيل جب... ادب لك الغدا على حسابك... بعد صلاة المغرب كانت حصه يالسه مع سيف في الميلس.... يسولفون رباعه ويظحكون.. وهو كل شوي يغايظها...مستانس انه اكتشف ان حصيص ماتتحمل الغياظ وايد.... واذا زاد عن حده بتصيح... وهو كل مايشوفها خلاص سكتت وهي معصبه رد يراظيها ويظحكها.... سيف: اذا بتعيشين وياي لازم تتعودين عالمغايظ.... حصه: انته ماتحبني اصلا... سيف: ههههههههه لا والله..؟! حصه: اذا تحبني مابتغايظني جي.... سيف: وشو رايج اني مااغايظ الا اللي امووت فيهم.... حصه: ههههههههه قردن..ادريبك تقردن... سيف: ههههههههه صدق صدق حصه... قبل ماتاخذيني او قبل ماخطبج حتى...شوكان خيالج عن الريال اللي بيكون ريلج...؟؟؟!! توترت حصه... حصه: ماكان عندي خيال.. سيف: جذااابه... حصه: انا جذااابه..؟؟؟ قوم اطلع من بيتنا.... سيف: ههههههههه والله انج جذااابه..اصلا كل بنت لها خيال معين لزوج المستقبل.... حصه: حتى الرياييل انزين....مب بس البنات.. سيف: اكيييد وانا ما انكرت هالشي... سكتت حصه.. سيف: يالله قولي... وحصه متوتره...شو بقووله..؟؟ اني كنت اتمنى واحد مثل خليفه..؟؟ بياخذها بحساسيه... بس يوم فكرت فيها عدل..خليفه مثل سيف...وسيف مثل خليفه...صدت صوبه وهي تبتسم.. حصه: مثلك... سيف: لالااااااااااااا..خلي عنج... حصه: ههههههه والله مثلك... مثل شخصيتك جي... سيف: حلفي..؟؟ حصه: حلفت تراني..والله... سيف: فديييييييييييييييتج ياربي... حصه: وانته..؟؟؟... سيف: انا كنت اباها قصييره وسمراااا وشعرها ميعد وماعندها شهادة..اميّة... حصه: هههههههههههه خسك الله وياها خياارااات....لالا صدق... سيف: ههههههه شو بعد..؟؟... كنت اباها مدينه وخلوقه وجميله وتحب امي مثل امها... حصه: بس.؟؟ سيف: شو تبيني اطلب اكثر من جي...دامني حصلتها واايد زين كفايه علي... حصه: الحمد لله.... سيف: بس تعرفين..بقولج شي... قبل ماخطبج ..كنت وايد وايد واااااااااااااااااايد متخوف من ردة فعل خليفه... انصدمت حصه...وطالعت فويه ريلها باهتمام.... حصه: خليفه..!!!!!....ليش يعني...؟؟ سيف: يعني...ولد عمج...وسنه مناسب... كنت خايف انه حاط عينه عليج والا شي... سكتت حصه وماقالت شي... سيف: بس يوم سالته وقالي انه مايفكر بالعرس الا بعد مايتخرج تشجعت...وبعد الخطبه بعد سالته اذا كان خاطره فيج والا شي.. تعرفين شوقالي.؟؟ حصه: شوو..؟؟ سيف: هههههههه..قالي لو كانت فخاطري ماخليتها لك عشان تخطبها ....هههههههه ظحكت حصه بدون خاطر مع ريلها... حصه: ماحس خليفه من النوع اللي يبا يعرس... سيف: ماعليج...بيستقر فيوم من الايام....هو بس همه الحين انه يتخرج ويفتك...صدقيني اول مايرد ويشتغل ويستقر بيقول ابااعرس دورولي حرمه... حصه: هههههههه ان شاء الله... سكت سيف وتم يفكر...وشكله كان سرحان...قعدت حصه تراقبه وتعرف ان افكاره سرحت مع خليفه.... حصه: هاااااااي...بلاك سرحان.. سيف: هاا..؟؟... لا ماشي.. حصه: لا فيه شي....قول...افاا انا حرمتك ماتقولي...!! سيف: لو قلت لج بتزعلين وبتحرجين عليه... حصه: جربني... صد سيف صوبها واطالع فعيونها بتركيز...وعلى ويهه ملامح غريبه.. سيف: كنت افكر بانه اذا صارلي شي.... ما أ أمن اي ريال ثاني عليج ماعدا خليفه...! انصدمت حصه من هالكلام...وشحب ويهها وعلى طول دموعها تجمعت فعيونها ...كمل سيف.. سيف: هو الوحيد اللي يستاهلج من عقبي.... مدت ايدها حصه وظربت سيف على جتفه بقووو قد ماقدرت... حصه: ليش هالرمسه يالسبال.....؟ سيف: هههههههه الموت حق ويا هالويه.... حصه: ادري بس لا تفكر فيه.... سيف: انزين مافكرت فيه انا.....شبلاج تراني صاحي جدامج..... قتلج بتعصبين... حصه: محد طلب رايك في الريال اللي بخذه انزييييييين...... بخذ هندي... بعرس بدريولنا... سيف: هههههههههههه جب لا اعطيج عويهج احين.... ويوم شافها تمش دموعها كسرت خاطره...وتمنى انه ماقالها هالرمسه .. تقرب منها وباسها على راسها سيف: فديتج والله آسف.... لا تصيحين ماقصدت....شحقه تصيحين انتي... حصه: لا ترمس بهالرمسه مره ثانيه سيف.....دخيلك ماتحمل هالفكره... سيف: خلاص وعد... فديت رووووحج انا....ثرج اممممره عالدقه..ماتتحملين... حصه: القوية نوره مب انا.....نوره تتحمل وايد ... سيف: هذي اختج انا ماكد شفتها.... حصه: بتشوفها عقب العرس... مش قبله...ماسمح لك تبصبص على بنات غيري.. سيف: هههههههه عنبو تغارين من اختج..؟؟؟ حصه: اغار من الذبابه اذا طارت فوق راسك.... سيف: ياويييييييييييييييييلي..ماتحمل ...قومي قومي حطي عشاج اللي مسوتنه عن اسوي شي تحتشرين عليه بسبته... ظحكت حصه ونشت تحط لسيف العشا.... في الوقت اللي كانت ام خالد راكبه فوق لحجرة نورة... دخلت عليها وحصلتها توها ناشه وتسحي شعرها.. نورة: هلا امااايه... ام خالد: تعالي بنتي برمسج.. ويلست عالشبريه ويتها نوره ويلست وياها... ام خالد: بنتي اليوم عرب متصليلي يبونج لولدهم... على طول نوره هزت راسها.. نورة: لالالالالالالالالالالالالالالا لالالالا امايه انا قايلتج مـــ ..... وقاطعتها امها... ام خالد: قوم خالج هلال..... انصدمت نوره .... وكل شي فويهها مفتوح..... قوم خالي هلال...؟؟؟ يبوني لولدهم..؟؟؟ ومنو الولد هاذا....سعييييييييييييييد..... ؟؟؟ لالالالا بموت.... ام خالد: شو بلاج فاجتلي ثمج... نورة: قوم خــ ...خـــالي..؟؟؟ ام خالد: هي خالج هلال.... يبونج لسعيد...وانتي تعرفين سعيد..ريال ماعليه قصور يشتغل ومستقر ولو بندور مابنحصل اخير منه..... وانا رمست ابوج وقال بعد هذي يبالها مشاوره..؟؟؟ سعيد ولدنا ولا تشاوروني فيه بس شاوروا البنت... سكتت نوره....وهي مب عارفه بشو تحس بالضبط...بالفرح..والا بالخوف... كانت فرحانه بانه السالفه شكلها متسهله....اما الخوف بسبب تحقق حلمها اخيرا...تخاف انها تمد ايدها له ويختفي.... يارب ماكون احلم يااارب.... بس كييييييييييييف..؟؟؟ سعيد مستحيل ايي يخطب بدون مايخبرني...وهو بنفسه قالي بيتريا ست شهور قبل مايخطب.... شو السالفه..؟؟ ليش غير رايه....واخر رساله منه واصلتني اليوم وماخبرني اي شي فيها.....لاحووووول...!! نورة: امااايه....قوم خاالي هلال اللي في الشارجه...؟؟؟ سعيد ولد خالي هلال..؟؟؟ سؤال غبي.... بس ماتنلام....تخاف نفسها سامعه غلط والا شي... ام خالد: وااااااااااااابويه عليج انا....جي كم خال عندج انتي..؟؟ نورة: شاورتي اخواني..؟؟؟ عبدالله يدري..؟؟ ام خالد: محد بيرفض سعيد...بس بنخبرهم نحن بالسالفه باجر... وانا خبرتج اباج تفكرين بالموضوع..ويوم تقررين خبريني... نشت عنها العيوز ونزلت تحت... ونوره يالسه مكانها.... مستحيل اللي يصير....مب قادره اصدق...مب قاااااااادره...لازم اتاكد... نشت نورة وطلعت من الحجره وركظت تحت لحجرة فطوم.... نورة: فطوووووم ....فطووووووووووم... فطوم: هااااااااااا بلاج.... نورة: مابتصدقين اللي صار... هاتي تيلفونج ولحقيني فوق...بسسسسسرعه... وردت نورة تطلع من الحجره وركبت فوق..بعد دقايق لحقتها فطوم وعلامات الاستفهام على ويهها... قفلت نورة الباب وخذت التيلفون وعلى طول اتصلت بسعيد.... وفطوم ساكته ومستغربه.... فطوم: شو مستوي..؟؟ نورة: اششششش...بتعرفين احين... من الطرف الثاني سعيد كان فسيارته... سعيد: هلااا فطيم... نورة: هلاا سعييد...انا مب فطيم... سعيد: نوره..؟؟؟؟؟ هلا والله عمري....شحالج..؟؟ انحرجت نورة... نورة: بخير الحمد لله شحالك انته.؟؟ سعيد: بخيييييييييير وعافيه يوم سمعت هالصوت الحلو.. نورة: سعيد ابا اقولك شي..؟؟ سعيد: قوولي نواري..... نورة: فيه عرب يو يخطبوني اليوم واهلي كلهم موافقين عليه وقالولي فكري.... .... .... .... .... سكووت تام... فطوم شهقت من الصدمه.... ابتسمت نورة وعرفت السالفه كامله بدون ما اي واحد منهم يجاوب على شي... سعيد: حلفي..؟؟؟...نورة بذبحج ان وافقتي ...انتي واعدتني.. نورة: ماتبا تعرف منو ياي يخطبني..؟؟؟ سعيد: مايهمني بس المهم رفضي..... ياويلج ان وافقتي.... نورة: هههههههه سعيد... اللي ياييني عرب حشام من الشارجه وانته تعرفهم بعد.. سعيد: منوووو هذيييلا بعد..؟؟؟؟ سعيد كان معصب ويصارخ.. نورة: قوم هلال السويدي... وحليلك ياسعيد....سكت مره ثانيه منصدم.... سعيد: نوره لا تمزحين وياي....مب بهالطريقه الناس تمزح... نورة: ارفضهم..؟؟؟ سعيد: نــــــــــــــورة...!!!! نورة: ارفض؟..... سعيد: شو تخرفين انتي... نورة: ههههههههه اسال امك بالسالفه.... محد خبرك الظاهر... سعيد: نورة بصفعج... نورة: والله اني ارمس جد.... سعيد: ماصدقج.... نورة: اوكي..تاكد بس اذا طلع كلامي صدق شو اسويبك.... سعيد: ان شاء الله يطلع صدق وسوي اللي تبينه....انا بسير احين البيت وبتاكد من امايه... نورة: خيبه شو بتقولها.؟؟ من وين عرفت بالسالفه..؟؟ سعيد: من فطييييييم.... نورة: اووكي... وطرشلي رسالها بعدها وتخبرني شو صار وياك.. سعيد: من عيوني بس والله ان كنتي تمزحين يا تشوفين مني شي ماشفتيه.. نورة: ههههههههههه انزين انزين.... سعيد: يالله فمان الله نورة: مع السلامه... سكرت التيلفون وصدت صوب فطوم اللي فاجه حلجها.... فطوم: تمزحين صح..؟؟ نورة: والله ما امزح امي توها ظاهره عني وقالت ان اهلج متصليبنا اليوم ويبون يخطبوني لسعيد... فطوم: والله.؟؟؟؟؟؟؟؟؟.... كيف عيل سعيد مايدري.. نورة: ماعرف...يمكن امج تصرفت من نفسها... فطوم: تسويها امي...فديييتج والله يانورووه مبرووووووك.. ويت لوت عليها وحبتها... نورة: الله يبارك فيج بس ماشي تاكد لين الحين... **** دخل سعيد البيت مستعيل.... ويوم دخل الصاله شاف حرمه اخوه وشيخه وامه... سعيد: السلام عليكم...امااايه تعالي اباج فسالفه... ودخل حجره امه ويوم وصلته ويلست حذاله قالها.. سعيد: فيه شي عندج تبين تخبريني اياه....؟؟؟ ام فيصل: شو بلاك فديتك...؟؟؟؟ سعيد: امااايه....من شوي اتصلت بي فطوم.... ابتسمت الام.. ام فيصل: هيييييييييييي... سعيد: علييج نوووووور...صدق اللي سمعته...؟ ام فيصل: هي ابوويه صدق.... سعيد: امااايه..دخييلكم لا تمزحووون...شو متفقين عليه انتوا...؟؟ ام فيصل: جي ابوويه مب هذا اللي انته تباه..؟؟ ماتبا نوره..؟؟ تراك اروحك قايلنا انك تباها...ومابتاخذ غيرها.. سعيد: هي اباااااهااااااا.... ام فيصل: خلاص وانا خطبتها لك.... مع ذلك تم سعيد مب مصدق اللي قاعد يصير وياه.... سعيد: حلفي امااايه... ام فيصل: وابوي عليك انا....والله.... اخيرا صدق سعيد.....وما تتخيلون فرحته..عفد على امه يلوي عليها ويبووسها سعيد: فديييييييييييييييييتج ياماياا...الله لا يحرمني منج يارب....والله اني اموت فيج... وتم وياها نص ساعه يستجوبها..متى اتصلتي وشو قالولج ومنو رد عليج والخ... وعقبها راح يطرش لنوره رساله...وكانت تقول.. " احبج احبج احبج بس خلاص افرجت عنج ماااابااااااج روحي عرسي ووافقي عالعرب اللي يايينج... " |
||
|
|
 |
| مواقع النشر (المفضلة) |
| الذين يشاهدون محتوى الموضوع الآن : 3 ( الأعضاء 0 والزوار 3) | |
|
|
تكمله أموت وأحيا بك
