الولد لاطاب طيبه من خواله

[شمس القحطاني]

الولد لاطاب طيبه من خواله


الصبي وان طاب طيبه من خواله... وان تردى فـعلم انهم خايبينـي
أشرب الفنجـال واكـب البيالـة... طيـبٍ واحـب سلـم الطيبينـي


[[[السلام عليكم ورحمة الله وبركاته ]]]

من لا يعرف .. هذين البيتين .. بيتين اشهر من نار على علم ..

قد يجهل البعض قائلهما .... ولكن اكيد سمع بالبيتين من قبل ....

حتى اصبح مضرب مثل يتداوله كثير من الناس ..


قائل هذين البيتين ..

الشاعر / راشد بن حسن بن مانع بن رحيان الضاعني الملقب بــ ( ابن الذيب)..


وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله ..




راشد بن حسن .. كان يشتغل في شركة ارامكوا السعوديه .. وكان يملك سيارة الشركه ( جمس ارامكوا ) ..

وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة الشركه ..

حتى اشتهر عند البدوان .... لا جا احد يبي يروح مكان ولا عنده مطيه والا موتر .. يمشي في طريقه ويقول عسا يلقاني ( ابن الذيب ) على الطريق والا انا القاه ....

ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..

جاء يوم من الايام الا عجوز وعندها غنم شوي تعد على الاصابع .. و ( راشد بن حسن ) .... كان مشغول ومتأخر على الدوام شوي ..

وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز ..

يوم جاها قالها يا مره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..

قالت له العجوز .. خلاص رح الله يستر عليك يا ولدي ..

انا جالسه هنا انتظر ( ابن الذيب ) ..

هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه ( ابن الذيب ) .. هو نفسه اللي هي تكلمه ..

يوم انصدم ( راشد بن حسن ) بقولها .. وتعجب !!

قال اركبي يا خاله انا ( ابن الذيب ) وابشري بعزك ..

ابوصلك انتي وغنمك ..

وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم ؟؟؟؟؟

حتى وصل علم .. لشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤساءه يأسوا من المحاوله معه .. واعجبتهم شهامته ..

وصل العجوز إلى منصاها والمكان اللي تبيه ..





وقال هذى القصيده .






قالها ابن الذيب من هاجـوس بالـه كلمـةٍ يلعـب بهـا والبـال زينـي
قالهـا يومـه طـرالـه ماطـرالـه من هواجيسٍ تشيـب المرضعينـي
حالفٍ ماخذ علـى الطرقـي ريالـه وبالثـلاث محـرم أنـه مايجيـنـي
لالقيت اللي على ( السكـه ) لحالـه يلتفـت ويقـول ويـن المستحينـي
أوقف الموتر حيـا وأبـي الجمالـه يوم ولـد الـلاش وجهـه مايلينـي
الطمع فـي كـروة الرجلـي رذالـة ...خص وان جابه مجال الغانميني
والردي فـي حالـةٍ ماهـي بحالـه واعوينـه مـن كـلام الطيبيـنـي
الـردي لـو بـان مايذكـر عمالـه مايعـد الـلاش مقصـور اليمينـي
أركبـه لعيـون مـن زيـنٍ دلالـه ماتحاكـوا فـي قفـاه الرامسينـي
مابغى غيري وانـا مابغـى بدالـه .....قاعدٍ لي بالرجا مـدة سنينـي
الصبي وان طاب طيبه مـن خوالـه بالخـوال يسـال قبـل الوالديـنـي
أشـرب الفنجـال واكـب البيـالـة تابـعٍ سلمـي سـلـوم الأوليـنـي
ولاقعدنـا بالعمـل بنـا الـرزالـة ....ناخذ العليا طريـق الفايزينـي
غرني بعض الرجـال بكثـر مالـه مادرى ان الموت في حبل الوتينـي
كيف ينفعني وابا(..........) خالـه مايقوم البيـت دام السـاس طينـي
ماش وين اللـي عوايـده الجمالـة ......مثل ابن ظافر حمد ليته يجيني
الثنـا والجـود دايـم فـي خيالـه علمـه ظافـر سلـوم الطيبيـنـي
جـوّد العليـا ولزمّـهـا عيـالـه وادركوا من علمتـه دنيـا ودينـي
واهني من باع حظه واشتـرى لـه وسار في درب النبي وأخزى اللعيني
موقفـه مـاكـل رجــال ينـالـه من بغـى ممشـاه يقعـد مرتينـي
كم ذبح من حايـلٍ مـن حـر مالـه وعادتـه لطمـة خشـوم العايلينـي





و البيتين اللي بأول الموضوع يقال انهم محرفين.. والبيتين الصحيحين كما ذكروا فالقصيده ..


مــــــــــــلاحظه:::الشاعر راشد بن الذيب هو والد الشاعر المعروف حاليأ

محمد ابن الذيب

[الطائر المهاجر]

اختيار رائع لشاعر رائع
وهذي سلوم العرب من شهامة وفزعه
لكن القول بأن جود الصبي من جود أخواله فهذا غير صحيح
فالطفل من تربية ابيه له على الرجولة ، ولكن يبدو ان ابن الذيب
يلمح هنا إلى من تربيهم امهاتهم ، فالأم تتأثر بإخوانها ،
وبالتالي تؤثر فيه .
شكرا لك
تحياتي

[الخنساء]

اختيار رائع اديبتنا شمس

لاهنتي حبيبتي والله قصة وقصيدة

هادفة وين الان منا من يخدمك

دون مقابل لاهنتي

دمتي بخير

[إستبرق]

شـــ م ـــش آلقـــ ح ـــطــآنـــي ..

.. مشــآركـــة متميــزه منــكـِ غــآليتــي ..

قصـــه كشــفت لــي معــآنــي الــأبيــآت ..

ولـيــسـت غــريبـــة هــذه الآخـلآق الآصـيـلـه عــلى آلـ ع ـرب ..

ســلــمـكـِ مــولآكـِ .. ولآ عدمنــآ آلـلـه منـكـِ ..


كــل آلــود ..

إستبــرق !

[العمده]

اختيار رائع وموفق وهذا هو اصل العرب

[شمس القحطاني]

المشاركة الأصلية كتبت بواسطة الطائر المهاجر

اختيار رائع لشاعر رائع
وهذي سلوم العرب من شهامة وفزعه
لكن القول بأن جود الصبي من جود أخواله فهذا غير صحيح
فالطفل من تربية ابيه له على الرجولة ، ولكن يبدو ان ابن الذيب
يلمح هنا إلى من تربيهم امهاتهم ، فالأم تتأثر بإخوانها ،
وبالتالي تؤثر فيه .
شكرا لك
تحياتي

الطائر المهاجر

مشاركاتك تعطي تميز للموضوع ...

كل الشكر

[شمس القحطاني]

المشاركة الأصلية كتبت بواسطة الخنساء

اختيار رائع اديبتنا شمس

لاهنتي حبيبتي والله قصة وقصيدة

هادفة وين الان منا من يخدمك

دون مقابل لاهنتي

دمتي بخير

الروعة في تواجدك حبيبتي الخنساء

ولنكن متفائلين ...ستجدين من هم على شاكلة ذلك الشاعر الرائع

سلمت وبيض الله وجهك

[شمس القحطاني]

المشاركة الأصلية كتبت بواسطة إستبرق

شـــ م ـــش آلقـــ ح ـــطــآنـــي ..

.. مشــآركـــة متميــزه منــكـِ غــآليتــي ..

قصـــه كشــفت لــي معــآنــي الــأبيــآت ..

ولـيــسـت غــريبـــة هــذه الآخـلآق الآصـيـلـه عــلى آلـ ع ـرب ..

ســلــمـكـِ مــولآكـِ .. ولآ عدمنــآ آلـلـه منـكـِ ..


كــل آلــود ..

إستبــرق !

استبرق ..غاليتي لا خلا ولا عدم

استمتع بوجودكم

مع خالص التحية والتقدير

[شمس القحطاني]

المشاركة الأصلية كتبت بواسطة العمده

اختيار رائع وموفق وهذا هو اصل العرب

الروعة في اضافة بصمتكم هنا


تحيتي لك معطرة

[الطائر المهاجر]

الصبي وان طاب طيبه من خواله... وان تردى فـعلم انهم خايبينـي
البيت هذا ، لو قلنا انه الصح : فلازم يكون
وان تردى فاعلم بهم خايبيني
ولكنني اميل إلى التالي ، بعد تعديل الشطر الثاني
الصبي وان طاب طيبه مـن خوالـه بالخـوال يسـال قبـل الوالديـنـي
بالخوال اسأل قبلما الوالديني

على العموم رايح اعارضها بما يتفق وعصرنا الحاضر

شكرا لك
تحياتي