![]() |
رقم المشاركة : 1 | ||
|
السلام عليكم ورحمة الله
هذا الموضوع ليسا دعاية او نقد باي شكل من الإشكال للمطعم ، الموضوع هو فقط تجربتي الشخصية فيه ، و رغبة مني في تعريف أهل الرياض و زوارها ببعض مطاعمها... ________________________ مطعم توكيو الياباني Tokyo Restaurant ![]() هذي صوره المطعم من برا. الموقع: على شارع العروبة بالقرب من تقاطع طريق الملك عبدالعزيز و العروبة. التلفون: 4605672 بعد ما كتبت و نزلت الموضوع السابق عن مطعم تاو ، و الردود التشجيعية من الأعضاء الكرام بالإضافة الي ان المعزبة زعلت لاني قلت انها عزمتني على حسابي ، اضطررت لقبول دعوه المعزبه على حسابها للاكل في مطعم طوكيو. طبعاً المعزبة عزمتني في المطعم هذا لانها تعرف ان اموت في الاكل الياباني. توكلنا على الله اللي المطعم يوم الثلاثاء 12/7/2005 حدود الساعة 10 بالليل. احلي شي لما وصلت للمطعم ان لقيت لي موقف قدام بابه على طول ولا كان فيه مشكله في المواقف. لكن يوم دخلت المطعم اضطررت اني انتظر حدود 10 دقايق الين فضت احد الطاولات (غلطتي اني ما حجزت ، بس انا معذور لاني ما كان عندي رقم المطعم و 905 حق الاتصالات ما لقاء لهم رقم). ![]() هذي منطقة الاستقبال في المطعم.. بعد ما فضت احد الطاولات و دخلنا الغرف اللي فيها الطاولة ، على طول استلمت قايمة الطعام و خذ طلبات ، كان الجوع ذابحني لاني ما تغديت ذاك اليوم ( المعزبه الله يهداها ما كان لها نفس تاكل ولا طبخت شي) ![]() هذي الغرفة اللي فيها الطاوله حقتنا. المهم طلبت محبوبتي بيره بدوايزر كان سعر العلبه منها 4 ريال و المعزبه طلبت سفن اب بسعر ريالين. بعد كذا طلبت لي ماكي كلفورنيا (Maki) و هو عبارة عن خيار و افوكادو و قطع لحم سرطعون محشية داخل رز ابيض ملزق على عشب بحري ، سعر 12 حبه من الطلب هذا كان 40 ريال و طلبت لي طلبين منه. و طلبت أيضا شرايح سمك السلمون الني (غير المطبوخ) و اسمه ساشيمي بسعر 40 ريال لطلب فيه 15 قطعة (ممكن تطلبون تونه او أي نوع سمك عندهم بالإضافة الي ربيان او استكوزا بنفس الطريقة). و طلبت بعد تبنياكي ربيان بسعر 60 ريال و رز صيني بسعر 10 ريال. اما المعزبة فطلبت ربيان على الطريقة اليابانية و اسمه تمبورا بسعر 50 ريال . ![]() هذي صوره من احد صفحات قايمة الطعام ، مع العلم انه عندهم قايمة طعام ثانية بصور الاكل. اخذ الجرسون الطلب و رجع بعد كم دقيقة و معه المشروبات و شوربة يابانية (ميسو سوب) مع سلطة يابانية ( الشوربة و السلطة تجي مجانية مع الطلب) ، السلطة اليابانية عبارة عن خضار مع نبتت الحلبة الطازجة و عليها صلصة خاصة ،اما الشوربة فهي مصنوعة من التوفو و عشب البحر. ![]() هذي السلطة اليابانية و جمبها علبة البيره ، العلبة طلعتها في الصوره عشان تعرفون حجم السلطة. ![]() هذي الشوربة اليابانية (الميسو سوب). بعد كم دقيقة ولا الطباخ جاي و جايب معه عدت الطبخ عشان يطبخ بعض طلباتنا على الفرن اللي في وسط الطاوله. الطباخ طبخ ربيان التبنياكي و الرز الصيني و كنت كل شوي اقوله سو كذا و سو كذا الين ضبطت الطبخة. بينما الطباخ كان يضبط في الاكل جاب الجرسون الكلفورنيا ماكي و شرايح سمك السلمون الساشيمي ، و تقل ما صدقت على الله و خذ ظرب في الاكل. ![]() هذا الكلفورنيا ماكي ، والشي الاخضر هو مهروس الفجل و يحط مع صلصة الصويا ، اما الورق الاحمر فهو زنجبيل طازج تعلكونه بعد الاكل عشان يطهر اثمكم. ![]() هذي شرايح سمك السلمون الني (الساشيمي). و هذا شكل الصحن مع عدت الاكل. و عشان افيدكم فنا بقول لكم الطريقة الصحيحة لاكل الماكي و الساشيمي: اول شي خذو لكم صحن صغير و بتلقونه على الطاولة و حطو فيه شوي صلصة صويا ، بعدين خذو لكم شوي فجل مهروس و اخلطوه مع صلصة الصويا ، بعدين خذو قطع الماكي او الساشيمي و غطوها داخل الصلصة و يفضل انكم تكثرون الغط بعدين كلوها ، و انتبهو ترا مهروس الفجل اذا كان كثير ممكن يكون حار شوي ، لكن ترا حرارته ماهي زي الشطه هو حرارته تطلع مع خشم الواحد بعدين تختفي ، و يفضل دايماً انكم تستخدمون عيدان الاكل (تشاب ستيك) بدل الملعقة او الشوكة. ![]() تاخذون الصحن هذا و تحطون فيه صلصة الصويا ، زي ما في الصوره. ![]() بعدين تخلطون مع صلصة الصويا مهروس الفجل ، و يطلع بالشكل هذا ![]() بعدين تاخذون الكلفورنيا ماكي و تغطونها داخل مخلوط الصلصة مع مهروس الفجل ، يفضل تغطونها من الجهتين. ![]() اما بالنسبة للساشيمي سمك السلمون فيفضل انكم تخلونه يتربص شوي داخل الخلطه بعدين تاكلونه. ما امداني اخلص على الماكي و الساشيمي الا و الربيان و الرز جاهز ، طبعاً ما رحمت الربيان او الرز و لفيته زي سابقة... ![]() هذا الطباخ و هو يجهز في عدت الطبخ ![]() ![]() الطباخ قاعد يضبط في ربيان التبنياكي حقي. ![]() هذا شكل الربيان بعد ما انطبخ ، امممممممممم ، يجنن ![]() و هذا الرز الصيني و الطباخ قاعد يجهز فيه. تدرون نسيت المعزبه ، خلوني ارجع لها ، هي طبعاً كلت معي حبتين ماكي و حبه ربيا ، و ثلاث حبات من الربيان حقها و قالت انها شبعت ، المشكله انها ماهي خويه لين جا وقت الاكل ، كل ما قلت الها دقي في النعمه قالت لا اخاف اسمن ، و انا اقعد اقنع فيها ان الاكل الياباني و بالذات الماكي و الساشمي و السوشي ما يسمن بس عييت تقتنع. ![]() هذا الربيان على الطريقة اليابانية (تمبورا) بعد ما خلصنا من الأكل طلبت الفاتورة ولاها 314 ريال و من ضمنها 41 ريال رسم خدمة ، التفت على المعزبه عشان تطلع دراهمها و تدفع ، و بدت تدور في شنطتها و بعدين قالت لي انها نست محفضتها في البيت. و دفعت انا الحساب. هذي الفاتوره نوع الأكل في المطعم: المطعم اغلب اكله ياباني مع بعض الاكل الصيني. ملاحظات على المطعم: 1) ديكوراتهم الخارجية مقبولة. 2) ديكوراتهم الداخلية ماهي ذاك الزين. 3) طاولاتهم و الغرف اللي هي فيه شوي مكتومة رغم انها كبيره 4) الخدمة كانت جيده. 5) الطباخ اللي طبخ لنا كان حبيب. 6) اذا طلبتو رز صيني خلو الطباخ يحط معه شوي شطه و بيطلع طعمه يجنن. 7) الشوربة اليابانية ممكن تكون غريبة بس ترا طعمها زين. 8) لا تغركم سالفة الحلبة في السلطة ، ترا الحلبة الطازجة مالها ريحة. 9) جربو الكلفورنيا ماكي او أي نوع اخر من ملفوفات الرز ( فيه اكثر من نوع) تراها حليلة اذا اتبعتو الطريقة اللي قلت الكم. 10) رغم ان الكلفورنيا ماكي عندهم مقبول الا ان فيه افضل منه في الرياض. 11) لا تنهبلون من سالفة السمك الني ، تراه زين و خفيف على المعده. 12) الربيان على الطريقة اليابانية التمبورا تراه زين و يقوي الظهر. تقييم المطعم: ![]() اتمنا ان يكون الموضوع مفيد بالنسبة لكم. |
||
![]() |
![]() |
رقم المشاركة : 2 | |||
|
|
|||
![]() |
![]() |
رقم المشاركة : 3 | ||
|
آخر تعديل ثار التميميه يوم 09-01-2006 في 02:21 AM.
|
||
![]() |
![]() |
رقم المشاركة : 4 | ||
|
يعطيك العافيه |
||
![]() |
![]() |
رقم المشاركة : 5 | ||
|
يسلم قلبك يالغالي |
||
![]() |
![]() |
رقم المشاركة : 6 | ||
|
رزق اليابانيين على اسبرنزا.. |
||
![]() |
![]() |
رقم المشاركة : 7 | ||
|
الريم |
||
![]() |
![]() |
رقم المشاركة : 8 | ||
|
اسبرنزا |
||
![]() |
![]() |
رقم المشاركة : 9 | ||
|
اسبرنزا |
||
![]() |
![]() |
رقم المشاركة : 10 | ||
|
بارك الله فيك |
||
![]() |
![]() |
مواقع النشر (المفضلة) |
الذين يشاهدون محتوى الموضوع الآن : 2 ( الأعضاء 0 والزوار 2) | |
|
|