الشوق طيرن والطواري مخاليب

[ماجد الزيد]

دحّام قل لي ويش اسوّي لي بذيب=كلما يزيد البعد زوّد قنيبه
تمددت من عويته بي محاديب=واحسها تشلق جنوبي غليبه
بالجوف نار ٍ والضلوع المحاطيب=تشبّها والقلب جفّت قليبه
والرّيح صرصر والليالي نواديب=تندب عثر حظّن براس الرقيبه
الشّوق طير ٍ والطواري مخاليب=والرّوح من عكف المخالب عطيبه
ابعد وعنّي ابعدت شيخة الطيب =وقلوبنا رغم المسافة قريبه
تطري علي وانط روس المراقيب=عبيرها علّ الهبايب تجيبه
اكن ماجابت لي الريح وآغيب=وافزّ من غيبه واعوّد لغيبه
كنّي قريص ٍ ذاب من سمّه الشيب=يقطر على وجهه وولّع بجيبه
محموم كنّه تحت قصف الشّواهيب=و الموت يرسل له كتيبه كتيبه
ياقف على ساقيه وقفة غواليب=و كلما وقف عوّد صريع بشعيبه
وجدي عليها وجد راعي مطاليب=وسوّ البخت بينه وبين الطليبه
او وجد من قلبه رعته الشواطيب=والهمّ يلفح جبهته ويهوي به
من وين ما ساق القدم جت مناكيب=( ماهوب شايب بيّن الهمّ شيبه)
أو وجد أبو زيد ٍ ليا بيّن مْغيب=طاري يودّي به وطاري يجيبه
ون قيل له يا كثرهنّ الرعابيب=صدّ وحمد ربّه ودسّ الغضيبه
حطّوا لي بجنب الملوّح نواصيب=إن طوّلت عنّي هذيك العريبة
إمّا يسلي خاطري لين ما طيب=وإلا على وجدي يناجي حبيبه
احبها من قلب طاهر بلا عيب=ولولا الجلد شفت المدامع صبيبه
تمرّني واكرم عيون المكاتيب=وانحر لها القيفان جزلة مهيبه
العود الأزرق شبّه الصّدر توجيب=ودلال قلبي فوّحت للنجيبه
حشمه وقدر وطيب ملفى وترحيب=ولا يتخذ قلبي سواها حبيبه
المخلديّة مالحقها عذرايب=يفدونها هبس ٍ ومعهم عتيبه
الطّاهرة ما عرّضت للواهيب=ولا شافوا الجيران منها معيبه
ذيب بصدري يقنب لعالم الغيب=يجمع شتات الذيب بوصال ذيبه

[الـزلـزال]

ماجد الزيد

نص مميز ومتقن وجزل

من شاعر تعودنا منه تقديم كل مايليق

مبدع دائمآ وممتع في كل ماتقدمه شاعرنا الراقي

ابعد الله عنك المناكيب وأدام لنا رقي حرفك

صح لسانك ملايين ملايين

ولك فائق تحياتي وتقديري

[الطائر المهاجر]

صح لسانك وفكرك
ولا هنت
جزل ومتجدد الإبداع
تحياتي

[داعي الشوق]

يا هلا بك يا بو حمد

و الحمدلله على السلامه

أنت وينك يا رجل ؟

وصح لساااااانك مليوووووون

شاعر رائع في كل الاحوال

ولاهنت

*********

[عبير الورد]

ااااااالله ااااااالله

صح لسانك ملايين
سلمت وسلم منطوقك الجزل
واهلا بعودتك اخوي ماجد

[عبدالعزيز العمار]

ماجد الزيد

صح لسانك وجاد بيانك

جزل ماتجيب الا الجزل

تحياتي وتقديري

[صعبة المنال]

تطري علي وانط روس المراقيـب
عبيرهـا عـلّ الهبايـب تجيبـه

صح لسانك
صعووب

[الطامي]

صح السانك يالزيد
رائعة جدا اخي
شكرا لك

[عبدالله راشد الثويني]

حضور مميز دائماً
تملك نهج مـُختلف وراقي أخي ماجد
صح كلك ولا هنت ولا عدمنا هالصوت ياعزوتي
كل الشكر وتقبـّـل تحيتي

[عبدالعزيز الرقابي]

الله الله عليك ياماجد الزيد
دائما ً ماتعقد صفقه مع الشعر وتحسن الظن به ..
مميز جدا ً

مودتي لاتكفي
عبدالعزيز