من قبل احسب ان الهوى يستعابا

[بدر بن عيد]

وا قلبي اللي كل ماقلت تابا=بطل يحب امن العماهيج عمهوج
كنه يقول الظن يابدر خابا= حب العذارى بحر واحساسك الموج
البارحه يوم الخلايق تدابا=بالسوق صادفني من البيض مدعوج
ومن ساع شفته والخفوق استصابا=كنه من ايدين الدكاتير مبنوج
الله يامجمل حسين الشبابا=الطف من النسمه اليا هبت الهوج
هافي حشاء والملح بالخد ذابا=و كن الشهد مع مبسم الزين ممزوج
وردفٍ اليا قفى يشيل الثيابا=واليلٍ على هاك النهيدات مدروج
من شوفها جرح المحبين طابا= وغديت عقب العقل ياربع مرجوج
قلت انت ياللي تستحق الخطابا= قلبي عقب شوفك بالاعماق مخجوج
من قبل احسب ان الهوى يستعابا=اللي بداياته تغاميز وهروج
واليوم بفتح لك على القلب بابا= باب ٍعلى كل الشرايين مفجوج
وحقي عليك انك عنه ماتغابا=وان غبت يلحقني من العذل مهروج
واليا حصل ذوق الثمان العذابا =القلب عده عقب هاليوم مبهوج
اكتب عناوينك بليا عوابا=وخيل المشاعر عده اليوم مسروج
مهوب حق تروح بليا جوابا= لو كان وصلك دونه بالباب مزلوج
واقفا ابوكفٍ زهته الخضابا=وغديت مثل اللي تصافق به الموج
منداش فكر وشاف يوم الحسابا=شاف المنايا من قدم عينه اتروج
وعزي لمن يهوى اطوال الرقابا= يصير من كثر الهواجيس مزعوج

[الطائر المهاجر]

تميز في الإبداع
وجزله من راس جزل
صح لسانك
ولاهنت
تحيتي واحترامي

[عبدالله السويلم]

صح لسانك يابدر

جزله من راس جزل


ابدعت وامتعت
لافض فوك


تحياتي لك يالغالي

[داعي الشوق]

صح لسانك بدر الشدادي

ابدعت يالشاعر في وصف ما شفت

الله يعينك يالهواوي

و صح لسانك مدد

ولاهنت

[عبدالمحسن الرحمه]

أبدعت واخلقي واخلقك في هذا الوصف
المميز صح الله السانك ملايين

[رووبين]

لله دِركَ

وَصَحِ لسٌانكَكِ حِتىَ تُرضِىَ عَ هَذاَ الاًبداَعِ

دمَتِ

[نفحات حساسة]

الله الله

صح السانك..ولاهنت

ابيات اكثر من رائعه...يعطيك العافيه

تحيتي لك

[ساهر الليل]

صح لسانك يالشدادي

مبدع كعادتك

رائعه انت راعيها

يدوم حرفك ونبضك يا شاعر

تحياتي وودي

[شاكـر محمـد]

صح لسانك بدر
جزله ورائعه تسلم على هالابداع
لك تقديري

[بدر بن عيد]

الانيق: الطائر المهاجر
حياك الله منور الموضوع يانقي
والتميز والابداع اكتمل بمرورك العطر
صح بدنك وقلبك والف لاهنت لك اعذب التحايا