قصيدة من العيار الثقيل موجهه لشاعر ثقيل وهو منصور الرويلي

[فواز الغسلان]

يالــرويـلـي ياعـزيـزن بالـغـمـام ابـداعـه=ويـش قولك في نصيـبـن في طبوعـه مالـي
انت بـيـطـار الـقـوافـي لا لويـت ذراعـه=ضاق يامنصور صدري والســبــب عذالـي
لابغيت انسى عـشـيـري بالخلا لـو ساعـه=ماتركني طيف خلي فـي خـلاي الخالـي
من يـفـكـن مـن طيوفـه او يعـرف اقناعـه=لاجل انام ولو دقايق فـي فراشـي سالـي
والبـلاء نـفـسـي قـبـالـه دايـمـن مطواعـه=وهي تعرف انه سبايب كل حوسـة بالـي
قلت له هـذي سبايـب عـلـتـك واوجــاعـه=ماسـمـعـتي نصـح زيـد ومرشـد البذالـي
قالت افـطـن للمـطـوع كيف روحـه ضاعـه=لين مـات لـعـيـن خـلـه ماشكـى للوالـي
والدجـيـمـا صـان حبـه صابـرن ماباعـه=وصب ناره في بـيـوتـن تشبـه الزلزالـي
والـنـفـيـعـي شـف عروقـه بالمحبـه ماعـه=وبالعواشق من يدوهج عن ديـاره جالـي
لاتـحـسـب الروض دايـم زاهـي مرباعـه=بـه مـحـولـن بالمحـبـه تجلـب السلالـي
اعـمـل حـسـابـك تجـرب نارهـا بانواعـه=لين تـبـعد لاجـل تستـر دمعـك الهمالـي
قلت اجل دام المحـبـه لـه جـروحـن ذاعـه=ومات منها ناس قـبـلي ليش نشكـي حالـي
من عـنـودن يالرويـلـي ذايـرن مـرتـاعـه=تزبن عن الخوف رجـمـن في سماها عالـي
يجـفـله غـصنـن تـحـرك لاسـرى ذعذاعـه=او سجع راع العشايـر بالهـوى موالـي
تخـتـفـق خـيـفـة شجاعن من خطيـر سباعـه=او رصاصاتـن تسوقـه بنـدق الزمالـي
عـيـنـها عـيـن الحبيبـه والطبـاع طـباعـه=فرقها المسفع وثوبـه والغطـاء والشالـي
مع نـقـوش الزين كله تسحـرك باصباعـه=او رموشن مـن هـدبـهـا عينهـا بظـلالـي
او ردوفـن بالـمـسـيـر لـثـوبهـا شـلاعـه=يرتفع لو هو طـويلـن زاهـي الـتفـصالـي
ذبحـتي ريحـة جـسـدهـا ريحـة النـعـناعـه=ولو تذوق الريق ريقن فـي مذاقـه حالـي
عـنـدلـن مـنهـا حـيـاتـي دايمـن ملـتـاعـه=وصرت يامنصور منها في جحيمن صالي
لو تجـيـبـه لي وجاهـه والذهـب واطماعـه=كان اسوق لشوف عينه حيلتـي واموالـي
بس درب الزين عاضب ماعرفت اسناعـه=مع دروبن فـي حـيـاتـي صعـبة المـعدالـي
صار مرماعي بعيدن عن هوى مرماعـه=مـثـل فـرق اللي رحـيـل وصاحبـه نزالـي
كيف كل انصاف حظي ماتـنـول ارباعـه=وهي عـقـوبة من يطـارد من ثمنهـا غالـي
اوجس بصدري جحـيـمن تلتهـب باظلاعـه=مـن عـقـودن يـالـرويـلـي مـالـهـا حـلالـي
مثل مـضـروسـن يـلولـج مالـقـى مقلاعـه=وكل ضرسن ذقـت ناره لازمـن يـنـشالـي
ومثل من يـفـقـد وحـيـدن بالـبحـور شراعـه=والبحر هـايـج ومـوجـه للـعـقـول هبالـي
من عشق يصبح سهيرن فوق روس اكواعه=وفي نـهـاره مع ربوعـه يـشـكـي الولوالـي
لـيـت يامـنـصور روحي للـعـرب منصاعـه=تايـبـن عن حمل غيـري مـكـتـفـي باحمالـي

المطوع هو عبدالرحيم المطوع التميمي الذي مات من العشق في نقى المطوع الذي سمي باسمه0 وهو القائل:

الاقفى جزاء الاقفى ولا خير في فتى000 يتبع هوى من لايريد هواه

الدجيما هو عبدالكريم الدجيما العتيبي الذي مات عشقا وهو صاحب قصيدة:واجر قلبي جر لدن الغصوني000

وغصون سدرن جرها السيل جرا000

النفيعي هو عيضه النفيعي العتيبي مات عشقا والقائل:الا واهني اللي اليا من بلي صبر00 صبورن على الفرقا

الياغاب مظنونه00

[الطائر المهاجر]

تعاد الأحد 2 سبتمبر

[يوسف الشقران]

ابو عبدالله

اعتقد ان الفارق الزمني بين المشاركات يجب ان يكون اكثر من 3 ايام

واقترح 7 ايام او 10

كتبت فأبدعت في الوصف والحرف

تألق عانق عنان السماء

[يوسف الصالح]

كلمات رائعة

الله يعطيك الف الف عافية

ولك منى فائق التقدير والاحترام

[مبروك بن ماضي]

صح لسانك مليون ولايكفون
كعادتك شاعرنا القدير/الراوي ابن غسلان
الابدااااااااااااااااااااع :
ولا غير الابداع أجده في هذا النص
وكل نصوصك الشعرية الجميله
وبإنتظار رد أبو نايف
وتفضل بقبول تحياتي
أخوك / بن ماضي

[ابوعزيز]

كلمات جميله و اسلوب راقٍ

سلم فكرك الرائع و بوحك المميز

[فواز الغسلان]

سعدت بمروركم وتشرفت بتعليقكم الغالي والنبيل0


لكم مني كل الود والتقدير والتحيه العطره الصادقه0

تاخر السماح بنزولها جعلني اهمل الردود عليها لاني توقعت مسحها

او حذفها 000 فتقبلوا ودي


الراوي

[الخنساء]

صح لسانك اخي الشاعر بن غسلان
لاهان را سك قصيدة رائعه
سلمت وسلم شعرك
دمت بخير

[داعي الشوق]

صح لســـانك ..

يا بن غسلان
جزلة من شاعر رائع

لاهنت يالغالي

تحياتي وتقديري