ســـــعـــــــد الـــخـــويــــطــــــر

ســـــعـــــــد الـــخـــويــــطــــــر

انسان بسيط ... مرح.. خفيف ظل بشكل لا يوصف

كان رحمة الله من ابناء مدينة عنيزة .. عاش فيها ومات وهو لم يصل بعد الى سن الشيخوخة

كان محبوبا من الجميع ... قريبا من الكبير والصغير

بارا بوالدته برا عجيبا


وفي هذا المتصفح ... ساكتب لكم بعضا من قفشاته ونكاته .. واتمنى ان يروق لكم

فقط ... بعد ان تضحكوا من القلب .... ادعوا له بالرحمة ..


****



كان سعد رايح للبر مع ربعه وكانوا جايبين ثلاجتين شاهي.. فقال واحد من ربعه: ليش ثلاجتين؟


فقال سعد: وحدة للي يبي شاهي والثانية للي ما يبي شاهي.


****

كان الشيخ ابن عثيمين رحمه الله يلبس بشته وكان البشت متعلق بمؤخرة راسه..

وكانوا الناس متعجبين كيف ما يطيح بشته!!

فقال سعد: هذا مَلَك السيئات ما عنده شغل وشايل بشته!

****

يقول مره وهو يوصف شكل ولد خالته عبود

مره انقطعت سبحه على وجه عبود ولا طاحت ولا حبه سألوه ليش ؟

قال : لانه خرش


***

يقولون مره يتكلمون شباب مجتمعين ومعهم سعد

فقال شاب :امي تقرص ( يعني تسوي قرصان )

قال له سعد : امك تقرص؟

قال الشاب بحماس : ايه

قال سعد :اقتله

****

يقول الله يرحمه اول ما اشتغلت بالبلدية حطوني بقسم النظافة


جاء لمي واحد قال ابيكم ترشون بعوض عندي بالبيت

يقول قلت له السواق طالع برى لكن رح جب البعوض هنا نرشهن لك

خوش تصريفه

****

يقول الله يرحمه

جدي دخل في بيته الكهرباء وحط لمبتين

وحده عنده بالمجلس ووحده بحوش البقرة

يوم جت الفاتورة قال فيها صرفية كثيرة فقال له شايب مثله أكيد فيه تهريب بالكهرباء

قال الجد تصدق اليوم الفجر لقيت العداد مايل واني خايض بنقعة كهرب الى صدري


***


يقول جدي يألف كثير

و كان جالس يقرا بالقرآن قلت له كم جزء قريت من القرآن ؟

قال ستين جزء

يقول قلت له لكن القرآن ثلاثين جزء

قال جده ايه قريته رايح جاي


***

يقول الله يرحمه كنت ابروح لجده انا وولد خالتي عبود على سيارة ددسن

يقول مشينا الصبح يوم وصلنا للرس بنشر الكفر وقلبت السيارة

وهي تسح على الارض التفت علي عبود وقال ياسعد ترى الاستمارة ما جددت


يقول قلته هذا وقته

المهم موعدنا بجدة لازم نروح

يقول طلعنا ورحنا للمطار وقصينا تذاكر ما لقينا الا اللي تبي تروح العصر


المهم اكدنا حجزنا وتأخرالاقلاع ما طارت الطيارة الا الساعة وحده بالليل ووصلنا جدة الساعة ثلاث واثرنا متكسفين ومتغربلين وجوعانين

ولا معنا قروش نشري عشا لان اللي نبي نروح لمه قد نام من الساعة 12

قلت لعبود وش السوات حنا جوعانين ولا هنا مكان ننام به

يقول طرت على بالي فكرة انننا نروح للمستشفى

على شان ناخذ مغذي ولا نموت


والله رحنا ودخلنا المستشفى قالوا لنا لازم ترقدون على شان تاخذون المغذي

يقول قلت لهم حنا مستعجلين عطونا المغذي سفري

***

يقول سعد الله يرحمه رحت مره للرياض ولا لقيت احد اعرفه

قلت مالك الا حديقة الحيوانات لازم القى واحد من الجماعه

يقول يوم رحت العصر ودخلت وانا امشي بوسط الحديقة والا واحد يصوت يقول سعد سعد

يقول فرحت احد عرفن يوم التفت والا يماني لابس شماغ خضر .... قال ما نيب اعنيك اعني القرد


يقول ظفيت وجهي ومشيت

***

يقولون .. مره ..
ماسكن طريق حايل .. يوم وصل لنقطة تفتيش .. رفع رجله من البنزين يبي يهدّي

ومع رفعت رجله .. طفى الموتر ..

وصل عندهم وهو يدق سلف ..

قال العسكري وشفيها .. عيت تشتغل ؟..

قال .. ايه ودّها تكمل الدراسه


***

مرة وفي احد ايام الشتاء خرج من بيته لابس فروة وهي مقلوبه

سالوه الناس ليش ياسعد لابسها مقلوبه ؟

قال : منتب ابخص من الشاة





رحم الله سعد واسكنه فسيح جناته


مودتي وتقديري

/

اللـهــم .. اغـفـر .. لـ / عـبـدكـ سـعـد الـ خـويـطــر ..

واجـعـلـه .. و / والـديَّ .. والـ مسلميـن ..

في .. عـِـلـِّـيـيــن ..

/

[ابو زياد]

ايه ودّها تكمل الدراسه
الله يرحمة شكلها ماتضيع عليه ابد

[الطائر المهاجر]

الله يغفر له ويرحمه ، وانتم يا اهل عنيزه يكفي انه طلع من بينكم حمده الصقعبي
عندك اخباره وإلا اجمعها من الذاكرة!!!

الله يرحمه ويسكنه جنات النعيم ...............

[ابو أنس]

الله يرحمه ويسطنه فسيح جناته
ووالدي وجميع المسلمين

[أم ريما]

الله يرحمه ويغفر له

قصص جميله وطريفه

الله يعطيك العافيه اخوي ثامر

ايه ودّها تكمل الدراسه

والله لو تكمل الدراسه بيديها ورجليها ان يوقف لها الديوان بمشعابه


---------------------------------

الله يرحمه ويسطنه فسيح جناته
ووالدي وجميع المسلمين

والله يعطيك العافيه اخوي ثامر على هذا الموضوع

الله يرحمه ويغفر له ..

خخخخخخخخخخخخخخخخخخخخخخخ

بس عليه طلعات جوية سعذ ذا

ثامر مشكور يابعدي

تحياتي ..

[سـعـد الحويماني]

طالما ان اسمه سعد



اكيد بيكون فلته


والله يرحم اموات المسلمين اجمعين