ردعلى قصيدة الطائر المهاجر ( كيبوردية )

[هاجس نجد]

أخواني الكرام أقدم لكم قصيدتي وهي عبارة عن رد على قصيدة الحبيب الغالي /الطائر الماهجر التي وجهها لي بعنوان
( يا أبو سعـــد ) .
و طبعاً هي لن تصل إلى مستوى قصيدة الدكتور ولن تجاريها ولكن أجد نفسي مظطرأ للرد عليها عسى أن أوفق وأجتاز الإمتحان بدرجة مقبول.
إليكم قصيدة الطائر المهاجر أولاً
كيبورديه

يابـو سعـد أيامـنـا والليـالـي=ماهي على خبرك وخبري من اعوام
كلش تغير واصبـح الشـي غالـي=إلا الرجـل قيمتـه تنـزل للـقـدام
والبوم حلق فـوق شمـخ الجبالـي=والحر من جوعه غدا كومة عظـام
في وقت فيه البعض شبـه انعزالـي=وبعضٍ وصل بالمكر لو كـان خـدام
احيانٍ اضحك غصب مما جرى لـي=واحيانٍ اكتم عبرتـي مثـل الايتـام
لاشفت كيف الوضع ياخـوك تالـي=تحكموا فيـه الخكـارى والاشـوام
متستريـنٍ خلـف بعـض الثعالـي=اللي لهم في الخبث صولات وإقـدام
وابن الوطن عايش علـى هملالـي=محدٍ يبي قربه ولو كـان ضرغـام
يجوع يعرى لو سكـن بالصوالـي=ولا من سرق خبزه فهو سيد الاجرام
ادري ولي الأمـر ماهـوب سالـي=ولو هو درى بالأمـر للظلـم لطـام
لكنْ بعَـض مـن كلفـوا بالمجالـي=كلٍ لنفسـه والأقـارب بـلا لجـام
ولا جاه من جيبه من القرش خالـي=إن كان وصله فالعذر مايبـي افهـام
مابه وظايـف والنقـص والخمالـي=مهوب مني فانتظـر عـام واعـوام
ولا من لفى من شيعتـه والخوالـي=بامر الولي تظهر وظايف بالاكـوام
لو كنت مسـؤولٍ لاشيـل الثقالـي=واطهر الديره من اوبـاش وخمـام
واقطع يديـن اللـي فسـاده بدالـي=والاجنبي في الباخـره دون إعـلام
لكـن ربـك عالـمٍ عـن حوالـي=اليد قصيره والفكـر فـاق الاحـلام

وإليكم الرد بهذه الأبيات المتواضعة

دكتورنا اللــي بدا لك بدا لي = صارت حقايق ماهي أضغاث وأحلام
مثلك مقامه عند الأجـواد عالي = لــو هـو تغـيّــب عنهــم سنيـن وأيـام
الناس جاها فالأخير اختلالي = تـتغـيــر العــادات عــام بعــد عــام
الشور للحرمة تعدى الرجالي = يبـرى لهــا رجّــالهــا مثــل الأنعام
معها إلى شفتـه تظنّـه مثالي = وهـي تفــرّه فــر خــاتــم بالإبهــام
البـوم بــوم لو تعلا الجبـالي = والحـر يشهــر فـالسماء لأنطلـق حـام
جتنا عماله ما لها أول وتالي = غصبٍ علينـا ملـزميــن بهـا ألزام
عمالــة يالله عساهـا الـزوالي = تـنهب من أرزاق البلـد بأسم الإسلام
طبّت علينا من جنـوب وشمالي = ومـن شرقهـا والغـرب عبـّادة أصنام
سواق وأمثالـه يحوش الريالي = وأبن الـوطـن في نومته ما بعـد قام
عيال الوطن فيهم ردي اتكالي = طمــوحهــم تفحيــط ومتــابــع أفـلام
أحــد ٍ يـدور للـوظيفـة تسالي = ليـن يتــزوج مــن خـــول أو أعمـام
ثمّـن يطلـق بالثـلاث التـولي = كم حـــرّة ٍ تعبت من الضيم واجـرام
صحيح ما كل الوظائف تطالي = يبغـى لها لا جات عزام وجزام
ما هوكسول ٍ كن فيه اعتلالي= لعــاب فـي شغـلـه ومـع اللـعــب نوّام
وشلون نرقى بالبلد للمعـالي = وشبــابنــا لبســه فنايــل بلـى أكـمـام
ســلاسـل بأرقابهـم كالدوالي = ومشطــة يهــود مقلديـن لـلأقــزام
الثوب ضيّق والشعر كالحبالي = والصـدر طالــع بــارز شـوي قــدام
حكّــامنا قامـوا لنـا بالكمالي = ما ودهم أحـــد ٍ مـن الشعـب ينظام
ماقصروا في كل علم ومجالي = أمـــا البـطـانـة مستحــقــه للإعــدام

[صوت الإحساس]

صح السانك ولسان الدكتور

لا يشبه البدع والرد هنا

إلا هطول الهتان في حضرة الشمس

كلام من ذهب وحكم

بكل صدق هنا أتعلم من الكبار أدام الله عليكم نعمته

لكم خالص الود

[ماجد المهدي]

صح لسانك ولسان دكتورنا

ومجاره جزله من شاعر جزل

لا هنت ولاهان دكتورنا

تحياتي لكم

ماجد المهدي

صح لسانك روووووعه القصيده ننتظر الجديد


تقبلو ودي واحترامي

هاجس نجد
صح لسانك ولسان الدكتور
رائعتين الله يعافيكم استمتعت بكلا القصيدتين عساكم على القوه
تحياتي

هاجس نجد

صح لسانك ولسان دكتورنا
على هالدرر الشعريه


لاعدمناكم


دمتما بخير

قصيدة

جميلة تسلم لأبداعك

تقبل مرورى

واعجابى الشديد

تحياتى لك

[منيع]

ابيات رائعه
بارك الله فيك
تحياتي

[هاجس نجد]

المشاركة الأصلية كتبت بواسطة علي بن مساعد الغامدي

صح السانك ولسان الدكتور

لا يشبه البدع والرد هنا

إلا هطول الهتان في حضرة الشمس

كلام من ذهب وحكم

بكل صدق هنا أتعلم من الكبار أدام الله عليكم نعمته

لكم خالص الود

الشاعر العزيز/ علي بن مساعد الغامدي
صح بدنك وسلم رأسك ما عليك زود يالغالي
اخوي / علي أنا مهما قلت فلن أصل إلى مستوى الدكتور عثمان
ولكن هذا أعتبره تواضع ولطف منه حين أسند إليا هذه القصيدة
فالدكتور أطال الله في عمره رجل فاضل ومجرب نستفيد من آراءه وأطروحاته
نسأل الله له التوفيق ولجميع المسلمين
تقبل شكري وأمتناني
سعـد بن عبـد اللـه العبـد
هـاجـس/ــ/نجـــــد

[هاجس نجد]

المشاركة الأصلية كتبت بواسطة ماجد المهدي

صح لسانك ولسان دكتورنا

ومجاره جزله من شاعر جزل

لا هنت ولاهان دكتورنا

تحياتي لكم

ماجد المهدي

الشاعر القدير / ماجد بن مهدي
صح بدنك وعلا شأنك
شهادتك أعتز وأفخربها
والله يالغالي أنا أعتبر الرد على قصيدة الكتور عثمان أمتحان صعب بالنسبة لي
الحمدلله طمنتوني
تقبل ودي وتقديري,,,
أخــــوك
سعـــد بن عبـــد اللـــه العبيـــد
هاجس/نجـــد