التميمي لا غضب

[الطائر المهاجر]

التميمي لا غضب بركان ثاير = بالحمم تقذف شماله واليمين
خاسرٍ من يقربه مادام هادر= وجاهلٍ من يعتقد فيه الملين
ولو تأخر ثورته فالكل خابر = خامد البركان تبعثه السنين
لا بدا يغلي فجنّب لا تخاطر= داخله نيران لكن ماتبين
كالجمل لو طال دربه دوم صابر= وكالجمل يثأر ولو من بعد حين
وكالجبل شامخ ولا فكّر بصاغر= راسه المرفوع ما يحني الجبين
ما انحنى ظهره لاجل دنيا المظاهر= ولا سجد إلا لرب العالمين
عزمه الجبار مايثنيه قاهر = ما يعرف الدمع لو جرحه ثخين
العقيده منهجه ما يوم ساير= من يخالفها ولو اقرب عوين
حاملٍ رآياتها فوق المنابر = وفي المعارك لو قطع منه الوتين
والكرم والجود من فعله يفاخر= والشهامه في دمه لو هو جنين
والرجوله والعقل عطر المباخر= وارث الأمجاد تفخر به يقين
لكن إن هو ثار فالزلزال جاير= ترتجف له ارضها غربٍ وصين
الحذر ثم الحذر اسمع وحاذر= التميمي لاغضب جنب يمين