مختارات لمتعب التركي

[الطائر المهاجر]

1
يوم طاب السهر عيت تطيب النفوس..
جت من الله واناكم كنت محتاجها..
كنها من حلاها كل ليله عروس..
خايفه من عيون الناس واحراجها..
حي هالطول يازول عساه محروس..
من عبث لوعةالايام وازعاجها..
تزعل نفوس وإلا تمتلي غيظ روس..
من يقرب لها وضلوعي سياجها..
لامتى وانت ياشوق القلوب محبوس..
طالت السالفه وابطيت بعلاجها..
جعل قلب على نار الغياب محموس..
يحترق بين صاليها ووهاجها..
من خبرله غلا بين الضلوع مغروس..
غرسة كلبو شعري من انتاجها..
لاتقرب لك الفرقا هذيك الهجوس..
من متى والبحور تفارق امواجها..
لازم اصبر على وجه الزمان العبوس..
لين سود الليالي يضحك احجاجها..
من بغى يقطع الفرجه يعاف الجلوس..
لين ياصل نهايتها ومخراجها..
كان شعري قصر ماطال شمس الشموس..
تستريح القصايد داخل ادراجها..

............................
2
يا وسيع البال .. ضيقت الصدور
رحت ما علمتني وين انت ساري؟
في غيابك.. ما لخلق الله حضور
وفي حضورك.. ما لهم بالبال طاري
ليه ما تختال يا بدر البدور؟
و القصايد لك وصيفات و جواري
لك بنات الفكر ربات الخدور
يكشفن الثامهن.. و الجرح عاري
جعل قلب ما ملاه الصدق نور
عند وجه اريح.. ما يلقى مزاري
التغاضي عجز لا طال القصور
ليه أداري؟.. و انت عني منت داري؟؟
الزمان قصير .. والدنيا تدور
كل يوم يضيق في عيني مداري
صاحبي محتاج لك شعر و شعور
و إحتياجي شي.. ما كان إختياري
من متى و الغصن يختار الطيور
من متى و البال يختار الطواري؟
لا تسمي صمتي البارح .. غرور
إنكساري خلف هالصمت امتواري
في غياب الشمس وش ذنب الزهور
و المطر لا شح وش ذنب الصحاري؟
اللقا لحظات و الغيبه شهور
تقصر الخطوات و يطول انتظاري
لو قريت المنكتب بين السطور
ما كتبت لغلطة العمر اعتذاري
صمت هالمينا.. مثل صمت القبور
ما رسى مركب.. ولا لاحت صواري

............................
3
ياسعود لاتنشد ترى ماني مجيب
‏خل الذي خافي له شهور خافي ..!!
إن شفتني مغتاظ لي حق ومصيب
ياسعود مزعلني جديد إكتشافي.
الغالي اللي كان من قلبي قريب
‏بيني وبينه صار مثل التجافي.
إن قلت زله...مثلنا زلته عيب
‏من قال لك شمس الضحى ماتشافي.
إن قلت هقوه...يمكن تصيب وتخيب
كم لي سنة ماشفت فيه إختلافي.
وإن صار في نفسه بعض شكه وريب
‏حتى البحر ماهو على طول صافي.
صرنا من الصده سوات المصاويب
‏كلن نقل جرحه وقال : امتعافي.
أصعب فراق...فراق عكف الأشانيب
‏ماهو مفارق...لابسات الغدافي.
والذيب لامنه عوى جاوبه ذيب
والعلم حامض..بس وين الأشافي
ودامه لقاله غير قلبي معازيب
‏الله يسمح درب هاك السنافي.
يروح...لايرجي رسول ومكاتيب
‏هو خابر إني...ماأتلفت خلافي.
واللي تعلى فوق روس المراقيب
‏أكيد ماتسفي عليه السوافي.
رح بشر اللي "شال شلفا" تريحيب
‏قله...تراها كلبوها عوافي.
اليوم نفسي طابت وباكر يطيب
جرحي لو أنه من يدين المشافي.!!

............................
4
هذي اللي غلاها مايبي قول قايل..
هذي اسباب غيضي والرضا والهيام..
هذي رسومها بين الضلوع النحايل..
هذي اللي على صدر القصيده وسام..
الاصايل يجنك مثل اهلهن اصايل..
والوكاد انها منهن بليا كلام..
يوم فلت على الخصر النحيل الجدايل..
واستدارت خجل مدري تصنع غرام..
عودها مال لو هي ماتبيه يتمايل..
ماهو بكيفها من لين ذاك القوام..
واقف وكن رجلي فوق جرف متهايل..
للجمال بعيون العاشقين احترام..
قلت في خاطري ماني عليها بعايل..
لكن القلب سابقني برد السلام..
ماني اللي حذف عند الزناد الفتايل..
يومها ولعت ناره تغطى ونام..
واجد الزين عند الحاضره والقبايل..
شفت واجد ومرني مرور الكرام..
بس هذي وصفها علوم وهوايل..
كنها قطعة من نور بدر التمام..
ياكثر ملحها والا الحلا له دلايل..
حور عيونها والخشم سلة حسام..
كن ذيك الخدود بروق ماتنتخايل..
لاكساهن شعرها شفت برق وظلام..
تعسف الخيل ونفوس البشر تنتحايل..
مير خيل القصايد مايطيق اللجام..
إنتحيت ولقيت القلب مامن صمايل..
كل ماذعذع الغربي من الشوق هام..
ياكثر ماني من الشوق والحب شايل..
من عشق مثلها وشلون بالله يلام..
هذي اللي حلاها مايبي قول قايل..
ماهي أول غلا لاشك مسك الختام..

............................
5
هب الهوى غرب واجتاح الضلوع وشعرت..
ان الليالي الجميله هب نسناسها..
مدري كبر حلمنا والابعيني كبرت..
والاهي اوهام ودي يصدق احساسها..
تنساني ايام وتجيني متى ماذكرت..
اليامتى وانت روحي حابس انفاسها..
كنت اجمل احلام عمري بس ليه انكسرت..
يازين الاحلام لو ماينكسر باسها..
بيديك مديت لي كاس المحبه وصرت..
انا اول اللي يذوق المر من كاسها..
من يومها وانت قدام عيني ولو ماظهرت..
دايم وعيني تشوفك بين جلاسها..
قدرت ولا على نفسي معك ماقدرت..
لازاد عنها غيابك زاد وسواسها..
لوشفت حال الورق والشعر عقبك عذرت..
اللي حرق صفحة الماضي وكراسها..
ماكنت اصدق يجي يوم ابتسم لانظرت..
اطلال ركب الليالي مر ماداسها..
وإلا انت لوقلت لي نادم وجيت واعتذرت..
كان اجمل ابيات شعري ينحني راسها..
مافيه داعي توصيني تراي اعتبرت..
فرقاك ذكرى وشعري علق اجراسها..
يكفيني البارح اني في عيونك سهرت..
وقفت بين العيون السود وانعاسها..
ان رحت ماانت اول اللي راح وان حضرت..
قلت الليالي الجميله هب نسناسها..

............................
6
نسيتني علمنــــــي شلـــون ابنساك..
فــي هالزمـــن نسيان الاحباب عادي..
وشـــلون لا مـرت على البال ذكراك..
و طيفك سرق منــــي لذيذ الرقادي..
وشلون لاقالوا لي الناس وش جاك..
من كنت في لـــذة منامــك تنـــادي..
وشلون اعيش اللــي بقالي بليــاك..
لا من غديـــــنا كل واحـــد..بــوادي..
لوقلت اداوي جرحـــي اللي تباطاك..
ماكــــل جـــرح يفيد فيه..الضمادي..
اعلنت حبــــك ليـــن كـــل..تمنـــاك..
غلطه وغيـري من خطــايا ستفادي..
لولي..مثل قلــبك تمنيــت.. فرقاك..
واكيد قبـــلك بالجفا.. صرت بـــادي..
حلوه عذاريــــبك وحلـــوه..مزاياك..
حتــــى بيوم فراقـــنا كنت..هـــادي..
كن الليالـــي ودهــا تكسب رضـاك..
وآنا يطـــول مع الليالــــي جهادي..
في ذمتـــي ماهــي غريبه خطاياك..
مبطـــي وقلــبك لــو تنبهت غــادي..
سهله على من كان مثلك وشرواك..
مثـــل الثـــياب يغيـــرون المبادي..
علمــني اكــره ذكــرياتك وطرياك..
وانســـى من الليله صــدوق الودادي..
ولانــي بقايل عقـــبها وين ابالقاك..
راضــي ولــو جــروح قلبي جدادي..
ولا القصــايد جعـلـها مـــن فداياك..
لبســتها مبطــــي ثيــــاب الحدادي..
باكـر على المخطـي يدورن الافلاك..
ونشـوف من يصـعـب عليه البعــادي..
............................
7
مفتوح باب الرجى لو هب مليون ريح..
والريح ماتاخذ الغرسه من عروقها..
القوس مكسور والرامي يقوم ويطيح..
والسهم منعاج والايام خازوقها..
لو لبسوا ساقط الهرجه ثياب المديح..
قلنا سحابة وبلة يابس حلوقها..
ياحادي الركب لا توده عليه وتصيح..
ماعاد هي سالفة ليلى ومعشوقها..
مديت شوفي وشفت الكون رحب وفسيح..
والارض حدر المواطي والسما فوقها..
مادام عين الرضا ماها هماج وشحيح..
ابتبع الغيمه اللي رفة بروقها..
مدري عن المقبله لكن عسى الله يبيح..
اللي تهز القلوب وهزني شوقها..
غنيت للحب ولسان المحبه فصيح..
والبدو سبة غناها ضيقه خلوقها..
باكر يروح الشتا والثلج قصره يسيح..
مايفضح الثلج غير الشمس وشروقها..
............................
8
مرفوض ياللي بعت غيره عشانه..
أزريت عن رد الجزا او تهاونت..
مابي لك اكثر سد باب الميانه..
بانت مع الوقت الخفايا وبينت..
مادام مالي وسط قلبك مكانه..
انا بعد مثلك عن الحب هونت..
انا مثل خيال خانه حصانه..
عذره يقول من الرسن ماتمكنت..
غره مع المركاض وارخى عنانه..
مخطي وانا غلطان يوم اني امنت..
لو كنت وافي ماتخون الامانه..
ياللي تقول تشيب روحك ولاخنت..
ذاك الهوى لو ما شعرت بحنانه..
ماكنت في حلو القصايد تفننت..
شاعر تزلزل من فراقك كيانه..
لك يعترف مايسكن القلب غير انت..
لو كان قلبك صافي الود خانه..
في ذمتي ماهان حبك ولا هنت..
أحد يخون وواحد الوقت خانه..
انا ترى الثاني والاول تراه انت..
............................
9
مدري البارحه وين إفتكرت وسرحت..
هي طواري او ان هموم قلبي ثقال..
هي طرتلي قديم الذكريات ولمحت..
زول وإلا الحكايه كلبوها خيال..
هجن ركايب فكري بالمشاعر وصحت..
منهو اللي تغافلني وفك العقال..
ضقت والبال عمس ومنقلب فوق تحت..
هي من شوي يوم تفوح صفر الدلال..
ودي افرح ومن مبطي انا مافرحت..
ودي القا عن شموس الحبايب ظلال..
كم سنة عقب مركوز النهد مافتحت..
قلبي ولاعيوني للغلا والجمال..
لوبغيت انتهز فرصات واجد ربحت..
كانت اجمل فرص عمري تنادي تعال..
ماهو بعيب لازليت وإلا جنحت..
منهو اللي بلغ فينا حدود الكمال..
وانت ياللي عن حدود المحبه نزحت..
كل ماشدلك حيلي تشد الرحال..
ماشكيتك لواني من جفاك انذبحت..
وانت شف حكمة الخالق ذبحك الدلال..
لاتقول انك بذاك التصرف مزحت..
يوم سويت في هاك النهار احتفال..
ماهجيتك ولاكني ابد مامدحت..
كلبوهن عقب هالعشره اكبر محال..
صاحبي دام انا منك وعليك انجرحت..
لاتجيني على درب الخطأ والخمال..
تدري اني تحملت الكثير وسمحت..
خابر ان التسامح من كريم الخصال..
ليه تفهم غلط وشفيك لبعيد رحت..
ماطلبتك تشيل الهم يابن الحلال..
ماشغل بالي إلا يوم افكر بنحت..
القصايد واحفظها قلوب الرجال..
قالوا اني بترويض القوافي نجحت..
قلت اجل كيف لوبزعل وامس الحبال..
لوتخوفت من الخطر مافلحت..
مايهاب الصعاب إلا ردي العيال..
عكس تيارهم شفني جزمت وسبحت..
ماحرصت اني اترك للتراجع مجال..
لوطموحي قريب من زمان استرحت..
مير خابر محلي فوق روس الجبال..
............................
10
خيل القصيد)

حسي بلوعات الليالي والاحزان
بعدين حسي بالهوى لا بغيتي
وش به يهمك لو يقولون زعلان
لو فيك ذره من الغلا ماجفيتي
يالي تقولين الخطأ زلت لسان
في زحمة الايام ليه اختفيتي
خطاي وان جه مدري الذنب وش كان
ليه انتهى ذاك الغلا وانتهيتي
وقفت في وجه الزمن قدر الامكان
وانتي جنح فيك الخيال وغفيتي
غلطان انا في كل الاحوال غلطان
اسرجتلك خيل القصيد وسريتي
جيتي وقلت الجرح يوم اقبلت هان
وانتي على الجرح القديم ارتكيتي
قلتي لي الحب ان لابد ينصان
واليوم ماكنك دقايق هويتي
شافوك حساد الهوى شوف الاعيان
يومك على رجم القصيد رقيتي
ما بان لك شي ولا بقا شي ما بان
بس انتي اللي غافله ما دريتي
العام لك طاري بقلبي ولك شان
واليوم احس بغلطتي لا طريتي
وان قدر المولى وعشتي بحرمان
ومن حر لوعات التجافي بكيتي
تذكري قلب(ن) له سنين شفقان
شوفي بحقه ياكثر ما خطيتي
كل القصيد اللي اقوله على شان
تهزك الذكرى عقب ما نسيتي


............................
11
متى ذكرتيني على شان تنسين..
خليك مره صادقه وانصفيني..
في وقت واحد تكرهين وتحبين..
انا تعبت استحملك واعذريني..
حب سرق من عمري ايام وسنين..
مثل الهوا مايمسكنه يديني..
............................
12

ماني أعمى بصيره..بس وش عاد أسوي..
مايطيب الجريح إن كان ماينتداوا..
كن حبه على حدب الضلوع امتطوي..
كيف أبقوى وأنا بيبان قلبي تهاوا.،،
شوف قلبي من جروح البعاد امتكوي..
عقب ماقلت جرح العام طاب وتشاوا..
يوم ساقوا ركايبهم وشبيت ضوي..
ماتخوفت وسباع الخلا لي تعاوا..
أشهد إنه تعكر عقب ماراح جوي..
مانسيته وزوله للعيون ايتراوا..
زل وقت الوعد ماعاد فيها تروي..
بس أنا وإنت ياحرف القصيد انتخاوا..
قل لهم ياقصيدي لايروحون توي..
ماني اللي حضوره مع غيابه تساوا..
رد عني علومن ماتونس عدوي..
قل لهم متعب التركي عليل وتداوا..

............................
13
ماقلت لي شي وش خليت ماقلته..
أسكت وخل ألكلام لجرحي ألدامي..
لو غيرك اللي يسولف ما تحملته..
لكن على شان عينك هانت آلامي..
للحب مفهوم عمرك ماتخيلته..
ما أظن يستوعبه تفكيرك ألسامي..
هذا ألفراق ألطويل وهذي اسألته..
هذا حصاد ألسنين وهذي أيامي..
ياما وياما عليك ألبال طولته..
وألعمرعدى وأناعايش على أوهامي..
حتي طريق ألفراق أللي تساهلته..
لقيته أصعب على نفسي من أقدامي..
هذا قصيدي بعينك لو تجاهلته..
ينزف على شان يروي قلبك ألضامي..
ألعام طاري غيابك ما تقبلته..
وأليوم حرماني أصبح مصدر إلهامي..
لاتعتذرلي وابنسى كل ما قلته..
وش ينفع ألعذر لا من ضاعت أيامي..
أصبر لي شوي لو دمي تثاقلته..
بحاول استوعب أللي صار قدامي..
ألحب ضحكه بعينك بس ما طلته..
عمرك بها ألكون شفت ابسط من أحلامي..
ألقلب لو ماخفق لك كان ماشلته..
ولو ما أنت ملهم قصيدي جفت أقلامي..
............................
14
ليه وطيت عن خيل السروج
ليه مديت عقب القراح الهماج
لا تجمل لي الغلطات والعوج عوج
يضحك احجاج او ينعقد لي حجاج
اصبر اشوي وش علمك تهوج وتموج
ميت القلب مثلك مايعرف الهياج
ماتعودت اجامل معتلين البروج
الزم العلم قبل يصير هرجك سماج
المشاعر تحي مثل المعاصير هوج
ونت مالك على هوج الرياح احتجاج
جيت وقلوب حسادي تميل وتروج
لا صفى جوهم ساعه قفاه العجاح
ابتسم لك وهمي فوج يقفاه فوج
من يحبك لزوم ايصر مثلك هجاج
بس قلي ونا غلطان لك ومحجوج
وين يلقون لجروح النواعس علاج
القمر غاب وانت اطفيت نور السروج
قلت يكفيك نور الوجه الاصبح سراج
كن بين الضلوع العوج صفقات موج
يوم فاض الغلا والشوق والقلب هاج
ضيقة الصدر لو بين المحاني تلوج
كل ضيقة لها عند الكريم انفراج
ماهو الغيض سبت كل ابو هالهروج
بس مالي على بعض السوالف مزاج
............................
15
لك بقلبي غلا واعجاب ماهو بزايل..
لو عن الارض زال طويق وإلا سنام..
كن دمع العيون اللي على الخد سايل..
صافي الما وهو يسقي ورود الخزام..
راوي العود لاقاصر ولا هو بطايل..
ينعرف زولها لو هي بوسط الزحام..

............................
16
لاياعلي الوضع هذا مايناسبني..
قله يفارق ترى لي بان تزييفه..
يروح يبعد وثم يرجع يقربني..
يبيني اتبع هواه واخضع لكيفه..
يخطي ويزعل ويرجع لي يؤنبني..
اسكت وانا اسمع تفاهاته وتخريفه..
ماني بتمثال وقت الضيق ينصبني..
عنه اتلقى خطأ غيره وتهديفه..
عذروبي اللي يعرفه مايعيبني..
كتاب مكشوف واضح فيه تحريفه..
الموقف اللي حصل بالحيل متعبني..
ولا يحاول بثوب الكذب تلحيفه..
قله فراقه ترى ماعاد يرعبني..
ماعاد يسوى بعيني ربع تعريفه..
انغام عزفه ترى ماعاد تطربني..
عندي تساوى برود شتاه مع صيفه..
ماني معاتب وقله لايعاتبني..
جوي تعكر ولا اطلب منه تلطيفه..
نهر العطا جف قله لايحاسبني..
القلب مما علق به صعب تنظيفه..

............................
17
لاتنشغل فيني انا بحالي ادرى..
قلب تعلق فيك ينسى مع الوقت..
اكثر من اللي صار لي وش يجرى..
بين الرجا والياس شفني تعلقت..‏
لاراحت الفرصه تحريت الاخرى..
وتروح ماكني عليها تشوقت..
هاك القصايد لاتضايقت واقرا..
شف وش كثر فيها لضحكاتك اشتقت..
لاصار حظي اقشر والايام قشرا..
مافيه احد عاقل يلوم ليا ضقت..
ماكل جرح لاخذ ايام يبرى..
بعض الجروح يزيد شره مع الوقت..
السيل يبقى له مع القاع مجرى..
يبقى له التذكار لو كنت فارقت..
يامدعي فرقا المواليف حذرا..
تبعد وانا في سكة الحب مافقت..
ليتك خذيت بليل الافكار مسرى..
وغربت من كثر الطواري وشرقت..
اشوف لك من وين مارحت ذكرى..
لاشفتها صديت عنها ودنقت..

............................
18
قبل اسافر وتنسى جيت اسلم عليك..
جيت ابي عمري اللي اكتشفته غدى..
ضاعت اجمل سنيني من عمايل يديك..
اكذب ان قلت راحت لاجل عينك فدى..
فرصة العمر قالوا لاغدت ماتجيك..
جتني اكثر فرص عمري وضاعت سدى..
جرب الخوف مره حس به يعتليك..
وارفع الصوت ماتسمع لصوتك صدى..
تدري اللي ذبحني قولتك ماابيك..
مابقالي لثاري لو بغيته مدى..
ماهقيت المشاعر كلها ترتجيك..
قل لها بالمفارق منهو اللي بدى..
هاك دمعة عيون باكيه تشتكيك..
هاك ريح ضميرن مااستراح وهدى..
ماتناظر عيوني زول هذي وهذيك..
مايهز المسامع اسم ريم وهدى..
قلت ماعادلي رغبه وشوفات فيك..
قلت يانفس طيبي يفرحون العدى..
قلت عايف ونفسي بالخفا تشتهيك..
عزة النفس تدري طيب ماهي ردى..
خل عينك تهل دموعها وش عليك..
انت خدك ورود ودمع عينك ندى..
............................
19
قالوا حبيبك يسمع الشعر قلت إيه..
يقراه بعيوني قبل تسمعونه..
لولاه حتى طاري الشعر مابيه..
مير اكتبه من شان خاطر عيونه..
هو روح شعري وامنياته وماضيه..
جذع الشجر وش كان لولا غصونه..
اكتب لغيره والقصايد تجي فيه..
كن القصايد حالفه ماتخونه..
هذاك لامنة زعل قمت اهاديه..
حتى وهو مخطي تعذرت دونه..
يمكن لو انه يلمس الجرح بيديه..
يستغرب ان اللي لمسها طعونه..
ابطى وهو غايب وزلت حواريه..
وانا من العام اتحرى مزونه..
هو مادرى اني في غيابه محاتيه..
ليته نشد عن حالي اللي يجونه..
وقلبي اللي توه افلت عراويه..
كيف انسرق وضلوع صدري حصونه..
عجزت ارده كن ماني براعيه..
يوم انتثر شوقه وهاضت شجونه..
يبسن عروقه لكن اللي يعزيه..
ان اكثر العالم تردد لحونه..
خافوا من الله لاتجيبون طاريه..
لاصرت انا موجود لاتذكرونه..
لو كل غالي جابه الله لغاليه..
ماشفت لك مخلوق تبكي عيونه..
............................
20
ضايق البال مايستانس لحاله..
وانت لاغبت عني كني لحالي..
جتك الاشواق رجلية وخياله..
غير الاول تحمل شوقي التالي..
ليت من قال متعب خابت آماله..
شاف بعيونك الخدرات منزالي..
واحد فيك ماهو منشغل باله..
اشهد انه بها الدنيا هو السالي..
راوي العود يزهالك وتزهاله..
عاد مايقدر يلومه ليا مالي..
صاحبي والقصايد فيك مختاله..
وانت لك حق فيهن يوم تختالي..
دام نفسك لحب الشعر مياله..
ليه ماصير شاعر وانت في بالي..
من تمناك لاتنشد عن احواله..
كيف عقب العسل يستطعم الحالي..
عقبك النفس مذعورة ومهتاله..
سود الايام هزت برجي العالي..
لكن القلب من يمك على حاله..
في تناسيك ليه اكذب على حالي..
قلت لك نعمة النسيان زواله..
ذكرياتك بعضها قام يبرالي..
كل مامرني طيفك على فاله..
قلت يامرحبا في ريحة الغالي..
شلت همك وهمي ماحدن شاله..
كن قلبك غدى ياصاحبي خالي..
ابتعدنا وكلن راح في حاله..
بين هالناس لكن كني لحالي..
............................
21
رغــــم التعب والتناقض منزلك عالي..
لو كنت في خطوتك تكثر تعاريجك..
عنيد لكن عنـــادك حيــــل يحلالـــــي..
ولو كان للعــــند تاج اعلنت تتويجك..
لكن ترفق وشـــوف وجيه عذالـــــي..
تفرح،،تأيد صدودك لـــي وتحجيجك..
يكفي تشوف بعيونك ثوبي البالــي..
اللي تمزق تحت قســـــوة كرابيجك..
حزيــــن رددت للاحـــــزان موالـــــي..
وانت اتغنـــي فرح واسمع اهازيجك..
لازلــــت احبك ولكن وعد يالغالـــــي..
لابـــــد،،،اوقف دعاباتــــك وتهريجك..
وإن كنت مهر ولا روضـــك خيالـــي..
جيت وعلى جثتي عسفك وتسريجك..
............................
22
ذكراك لاهبت يجي عطرها صلف...
واستنشقه بالصدر مثل الخزامى...
إي والله إن غيابها مكلف كلف...
إي والله ان عروق قلبي توامى...
رمش النواعس والحجاجين والزلف...
ياما خذن قبلي قلوب
النشامى...
أمضى من المصقول واسبق من الشلف...
سهم الهوى لوكنت عنه اتعامى...
لايخدعك صبري على الجرح ماخلف...
هالشعر غير جروح قلبي تدامى...
لي خاطر بينه وبين الشقا حلف...
ياما عثت فيه المقادير
ياما...
من عاش هالدنيا بلاصاحب وولف...
عز الله انه عاش عيشت يتامى...
خل السوالف والمشاريه والحلف...
مبطي وانا على الجروح اتسامى...
قلب يضيق بذكريات الهوى جلف...
وقلبي مثل جرد القفار يترامى...

............................
23
دليل المحبه شوف عيني عليك تغار..
ولاودي الحاسد عيونك يطالعها..
مع انك رحلت بعيد لكن بقى التذكار..
لياشافته عيني تسابق مدامعها..
دفنت الغرام بخافقي والقلوب اسرار..
مشاعر هقيت ان الليالي تضيعها..
فرحت برجوعك ماطلبت لخطاك اعذار..
ونفسي تناست ماجرى من تواضعها..
تهادت مشاعر خاطري لك بلا معيار..
تجاهلتها لو كنت خابر دوافعها..
يقولونها قبلي يخون البحر بحار..
والامواج لاهاجت خذت ماتبي معها..
تكاثرت منك الصد وأثر العلوم كبار..
لقيتك على نفسي تقلب مواجعها..
اقوله وانا اللي شفت ذاك الغلا ينهار..
يشوف الندم رجال نفسه يطاوعها..
مثل ماضرب جو خلا غادي محتار..
يدوج ورجله مادرى وين موقعها..
تعرض سموم القيض والدار مامن دار..
هليك وشعر بالموت روحه ينازعها..
جحدت الغلا لين امتلى بالخفوق وثار..
قصايد عساها اليوم تطرق مسامعها..
غرامك مثل نار حطبها الغلا والنار..
تموت وغلاك اللي بقلبي يولعها..
غلاك بضميري واضح ماعليه غبار..
تشيل الغلا نفسي وانا عاجز امنعها..
يقولون ماودعك قلت الفراق وصار..
والانسان روحه تنسلب مايودعها..
هذيك الليالي وين وأثر الزمن دوار..
خذاها ولاظني زماني يرجعها..
طوتها السنين ولابقالي سوى التذكار..
ليا شافته عيني تسابق مدامعها..
............................
24
توديع الأحباب مثل الموت له سكره..
ادمى جروحي وشق الصدر منياا..
والقلب طير ضلوع الآدمي وكره..
لاشاقه الطلع لاسلم ولاحياا..
مصير الأحزان تنساني وتفتكره..
ماكل الأيام بيض وسمحه محياا..
قل غيرها ماأنت لامجبر ولامكره..
لاصار ماهي غلا ما أبي لك حمياا..
لوفي يدي شي ماقلت الوعد بكره..
حزمت حدب الضلوع وقلت لك هياا..
لو كل غالي يجي دايم على ذكره..
ماصرت اشوفك هناك و حبك هنياا..
ياليتني لابغيت اكره قدرت اكره..
ماكان قلبي لياجيت اكرهك عياا..
مادامك معيف رح لكن على فكره..
ماقلت لي ليه دمعك سال منياا..
............................
25
البــارحه مدري وش اللـــي خذانــــي..
يـوم اجنـبوا عني من الضيقه اشملـت..
جيـــت اتكلـــم بـس عيـــا لسانـــي..
ماكنـــي إلا مرتكب ذنـــب واخملـــت..
الله يســـامح من ذكـــرت ونسانـــي..
وانـــا ادري انـــي لاذكرته تجملـــت..
عانيت وادري كـــل طيـــب يعانـــي..
وعلى حساب طعوني الخضر جاملـت..
يامـاخــدوا منـــي ولااحـــد عطانـــي..
من طيبتي في حق نفسي تساهلــت..
عـــزاي لامنـــه تجـــهـــم زمــــانـــي..
يممـــت وجهــي للكريــم وتوسلـــت..
واللي يبـــي قربـــي وبعدي لقانـــي..
امشـــي على وضـــح النقـا ماتخلـــت..
يامــن سكنت اجمــل زوايـا كيانـــي..
يامـــا علـى نفسي عشانــك تحاملــت..
مرات احســ انـك معـي شخـص ثانـــي..
ومـــرات احســ انـك حبيبـــي ومازلــت..
لاتفــرح انــك دجــت بيــن المحانــي..
لـــومـــاتخـون الـــذاكــره ماتسللـت..
عشـــان مــاضيــك الجميـل وعاشـي..
حــاول تشيل من الوفـا ربع ماشلـت..
مانـــي علـــى خبـــرك حبيبي ترانـي..
حتـــي عــن صغـــار الاماني تنازلــت..
............................
26
كل حاجه طعمها مر‎ ‎في هذا ألزمان..
هم هالدنيا وحنا نعيش
لهمها..
ألمكان اللي عرفناه ماعاد ألمكان..
وألقلوب أحداث الايام زادت غمها..
صاحبي حتى انت ماعاد تستاهل حنان..
انت بعثرت ألمشاوير وانت تلمها..
ألبكا في مثل هالحال نوع من الهوان..
وألمهونه كل رجال حر
يذمها..
صاحبي لوكان ألناس وألدنيا امان..
ماتموت ورود الاحلام قبل نشمها..
خل عنك علوم الاحباب واللي كان كان..‏
انتهيت وسيرة الشوق ماني بيمها..
كلما تظمأ لياليك قمت أكتب عشان..
تنزف جروحي والايام تشرب دمها..
الكلام الموحش يخاف نور الشمعدان..
تحترق اسمى معانيه قبل يضمها..
من زمان اكتب على شان نقرا من زمان..
بس ماشفت المكاتيب جابت همها.
............................
27
مشكور يا بايع مشاعرك مشكور .. العام ذنب وهالسنه ذنب ثاني
وش عاد اقول ولا بقى شي مستور .. ما طعتني يوم ابتسم لي زماني
لا تعتذر لو خاطري منك مكسور .. لا تفتكرني دام قلبك نساني
لا لا تقول ان الليالي لها دور .. شف من هو اللي كان فينا أناني
مدري تصنعت الغلا زور في زور .. مدري انا اللي حيل كنت متفاني
مثل العما ما تنفعه طلعة النور .. النور بعيون العما ما يباني
عندي خبر لو جاك من يمي قصور .. لأقول انا مخطي وربي جزاني
لو شفتني قاسي عليك انت معذور .. شفني من أول جرح لا زلت أعاني
انا بشر مثلك لي احساس وشعور .. واغتاظ لا مس الكلام بكياني
حتى وانا في قمة الغيظ مقهور .. بعض الحكي عيا يقوله لساني
ابقولها لو قلت لي صابك غرور .. ما فيه احد ياخذ بقلبك مكاني
العام قلبي فيك هايم ومجبور .. العام لا مني جفيتك عصاني
واليوم حبك في حناياه مقبور .. لو ما دعيته للمفارق دعاني
ذاك الهوى ما عاد لك فيه مقدور .. ابعد من ايام الرشي والسواني
ما دمت راضي عن عذابي ومسرور .. ملعون ابو قلب ٍ عليك يحداني

............................
28
يانفس هيدي لاتزيدين الاوجاع..
كافي من الدنيا نشوف العجايب..
ماني على من صد ضايق ومرتاع..
لاهو من الغالين والا من القرايب..
لاصار مابيني ولا بينه نزاع..
ولاجيته بزله ولاعلم خايب..
حق الرفيق اني نهيته ولا طاع..
والراي مابه فرض والا غصايب..
يومه غدا بينت له كل الاوضاع..
ماقلت اخلي سايب الوضع سايب..
ناديت له لكن تجاهلني وضاع..
صد وعلى عمياه ساق الركايب..
اقفا على رايه ولافيه مرجاع..
مثل السحاب اللي قفت الهبايب..
للعلم بين الناس مدخل ومطلاع..
واللي يجود حامض العلم صايب..
ومن ينطح المويه ولاعنده شراع..
ان عاش يرجع من هك الموج هايب..
والعاقل اللي لا خطا يرجع بساع..
يسترجع ولاياخذ الراي عايب..
واللي يصير لرغبة النفس مطواع..
لابد مايلقى العنا والمصايب..
والناس مختلفه لها اشكال واطباع..
بعض المعارف عرفهم لك نشايب..
بالناس من يلبس على وجه قناع..
حسود لكن في ثياب الحبايب..
هذاك ماني في مخاواه طماع..
من قبل اجيه وخاطري منه طايب..
والرجال اللي لهم بالوفا باع..
وقفاتهم تبري الجروح العطايب..
واللي لفاك بحزة الضيق فزاع..
مادار وجهه عن سموم ولهايب..
ماصد يوم انك من الوقت ملتاع..
ماغاب يوم ان اكثر الناس غايب..
هذاك تشتري خوته كيف تنباع..
هذاك من شانه تهون الصعايب..
قلته وانا مالي ورى هرجي اطماع..
على افراقه لاتصير السبايب..
اسمع مادام الصوت ياصل للاسماع..
ان تبت والا ياعسى منت تايب..
مادامها صارت حزازات واتباع..
مالي ومال مدورين الطلايب..
واعرف تراها لو شكت ثقلك القاع..
مصيرها تركز عليك النصايب..
............................
29
مرت سنه وشهور وشوية أيام ..
على غياب اللي حلاها شمالي ..
كم قلت في نفسي قبل عيني تنام
يارب جبها عند ماأصحى قبالي ..
تعبت أدور بين حزني والآلام ..
عن صبري اللي مابقى منه تالي ..
يابنت خليت السوالف للأقلام ..
يكفيك لاعز الكلام إنفعالي ..
من صارت الدنيا حسابات وأرقام ..
وأنا عجزت أستوعب اللي جرالي ..
ضحيت بالواقع على شان الأحلام ..
وضحيت بالغالي على شان غالي ..
حتى الغرام اللي كسر قلبي العام ..
ماني بحاله كان ماهو بحالي ..
ماينحسب عمر البنادم بالأعوام ..
بعض السنين نعيش فيها ليالي ..
( وجه التشابه بين قلبك والأيام ..
القلب خالي ،، والليالي خوالي )
............................
30
اخر اللي سمعته في نهار الوداع
دقت القلب مدري صوت عجل الخطاوي

نايف الطول وش سوابي الانقطاع
صار بين الضلوع القلب كنه فداوي

بيني وبين ضحكات السعاده نزاع
كني اللي قضى عمره طريدن جلاوي

لا تلوم الذي سوى لك المستطاع
خف من الله وخل جروحنا بالتساوي

عن هذيك النواعس ليه شلت القناع
الحيا وين يلي طول عمرك حياوي

كن خدك الطاهر بروق و شعاع
اثرها رحمة(ن) للناس بعض الغشاوي

وش يفيدك عذابي ياغريب الطباع
ليه دايم على الملتاع سيلك نحاوي

امتلي غيض وازعل يوم وارجع بساع
راعي الجرح يستحمل عذاب المداوي

غالطوني وقالوا ليش هالاندفاع
ادوخوني عليك مكثرين الحكاوي

عذربوك بوجودي بالجفا والخداع
فيك حلو الوصايف صوروها مساوي

التزمت السكوت ورأيهم فيك ضياع
لين قالوا متعب على البعد ناوي

ميت القلب عرضت الغلا للضياع
والله اني على قطع الرجا بك مراوي

ماتغيرت لين انك لويت الذراع
تحسب اني على الهجران ماني بقاوي

لوتقول انت ماعقب الفراق اجتماع
عندي اليوم كل اللي تقول متساوي

او يقولون صار يخاف قلب الشجاع
من هك الليله وبيت القصيد امتهاوي

بين شقر الجدايل والعيون الوساع
اذكر اني فقدت القلب في هالحراوي
............................
31

((جزاي وجزاك))

انتهينا وصار اكبـر خطـاي الوفـا
انتهينا وعنـد الله جـزاي وجـزاك
ادري ان الزعل حجه عشـان الجفـا
ادري وقلـت ابسمعهـا مـن شفـاك
تختفي وانت خابـر جرحنـا ماخفـا
كلهم شايفين الجـرح وانـت بعمـاك
قلبي اللي صفالـك ماللغيـرك صفـا
جاك من طيبه وعاف الهوى من رداك
القدم من طويل الـدرب مـل وحفـا
والنظر طاح من دونك وسرب وراك
***********
32
رجع بي طاري الذكر على ذيك العيون السود
وأنا اللي قلت ماعاد الهوى يطري على بالي

تناسيتك وشفت الشوق في قلبي عليك يـزود
اثرني مانسيتك بـس مـن همـي يورالـي
غديت وطاري الذكرى سواة الملح والبـارود
ليامنه قرب لي ثار شوقـي وانقلـب حالـي
تجي وتروح لكن في ضميري باقي موجـود
على حد السراب اللي زما طيفـك تروالـي
تمر الثانيه في حسبه الساعه على الموعـود
اجل ربي يعينك لاغدى راع الوعـد غالـي
سهيت ولا وعيت الاوقلبي للغلـى مشـدود
تنبهـت وبغيـت الحـق عليـه ولا تهيالـي
وانا اللي خابر كل العلوم ونقصهـا والـزود
أضيع في موازين الحكـي لا شفتـك قبالـي
اسامح وادري اني بالجفا مبطي وانا المقصود
وانا اللي لو من اولها جفيتك يمكن اشوالـي
على هونك توقا ماهي بكيفـك نعيـم العـود
تحاسبني وانا اللي راحت ايامي على الخالي
حرام تضيع من عمري ليالي مالهـا مـردود
تعابيـر الشماتـه شفتهـا بوجيـه عـذالـي
انا ماني بعاجز لو بجازيك الصدود صـدود
يضيق المنزل بغيـري ولا غيـرت منزالـي
كريم النفس حتى بالمشاعر لاعطـاك يجـود
على كثر العطايـا مانشدتـك ويـش يبقالـي
تمهل واعرف اللي راح لا يمكن عليك يعـود
خذاه الوقت لاتستنقض المبطي مـع التالـي
ابقطعها حبالك لو بها حبـل الرجـا معقـود
وابلقا عن مقيلك بالسعه لـي فـي وظلالـي

*************
33

هاك ذكراك من ذكراك ويش أستفيـد
كافـي أن المشاعـر هايمـه كلـهـا
ودي انساك والنسيـان ماهـو اكيـد
كيف ابنسى عيون(ن) رمشهـا ظلهـا
من هك اليوم وانت اللي بعيني وحيـد
ماخبرت العيـون تمـل مـن خلهـا
مير نفسي عزيزه وانت رايـك عنيـد
والنفـوس العزيـزه ماتبـي ذلـهـا
ليه تعطيني الدافـع واقـول القصيـد
ليه صفحـه غرامـي ترجـع تفلهـا
ليه ترجع على الماضي تزيـد وتعيـد
وانت من عـام الاول عاجـز تحلهـا
مابرى الجرح الاول كيف يبرى الجديد
شوف حالي نزيف جروحهـا سلهـا
كل ماشفت لك ذكرى وربـي شهيـد
كـن نـزاع روحـي بالحفـا تلهـا
اندفعـت لغرامـك يالغـزال الفريـد
والغـلا لـه دروب خاطـري دلهـا
فرحتـي بالقـا رغـم انهـا ماتفيـد
فرحـه القـاع لامـن المطـر بلهـا
وش بقى يالسراب اللي قريب(ن) بعيد
المحبـه وراحـت وانتهـى حلـهـا
لو كـل بكيفـه ياخـذ اللـي يريـد
كان ماشفت ناس تمـوت فـي غلهـا
هاك فرقاك خذها خـل قلبـك شديـد
خلهـا ماشيـه بحمولـهـا خلـهـا
كـل مـازاد تعذيبـك ذنوبـك تزيـد
الله اعلـم صلاتـك باطلـه كلـهـا
***********
34

ليل هاك الجدايل طـال مسـراه
بين تفسير حلـم وبيـن امانـي
يوم حد الغلا قلبي على أقصـاه
شرع القلـب بيبـان المحانـي
ما رماني ولكـن قلبـي أدمـاه
عـاد وشلـون لامنـه رمانـي
لانقض ليـل مجدولـه وخـلاه
قلت وش هالظلام اللي غشانـي
لو يمر البحر شاطـي شفايـاه
صار بحر الخليج فرات ثانـي
وين ابلقاه مدري ويـن ابلقـاه
دامـه بكـل ذره فـي كيانـي
ادري انه نسى الموعد ولاجـاه
بـس ليتـه نسـاه ولانسانـي
لو عيونه بحرهن ماركـد مـاه
شط الاهداب صار اجمل مواني
يكفي انه حفظ شعـري وغنـاه
وابتسملي وقـال ادري عشانـي
كل ماترتسم بسمه علـى شفـاه
اشعر انـه يجاملنـي زمانـي
ليه احبه واحب اسمه وطريـاه
يوم اخذ دم قلبي وش عطانـي
غاب وان شفت نفسي قادر انساه
قلت ربي كتب لي عمـر ثانـي
************
35
مليت امشي كلامـك ويـن مقصـودك
باوقفك ابسألـك وتقـول لـي واصـل
واصلت دربك ولكن ضاعـت حـدودك
واللي حصل لي ما اظن لحضرتك حاصل
تعطيني وعـود لكـن تبخـل بجـودك
بنيـت دون الحقيقـه حاجـز وفاصـل
مابي ملامك عتب وارفض عتب سـودك
انته من العيـن مهمـا تفعلـه ناصـل
كمل بروحـك لنفسـك نقصـك وزودك
تاصل طريق تبي او عـل مـا تاصـل
ولا يروح عقلك بعيد وتوفـي وعـودك
اللـي بقـا بيننـا تحصيـل حـاصـل
***************
36

(( مريت الاطراف؟ ))

جابتني الذكرى على الماضي كتاف
سجيـت كنـي تونـي مكتشفهـا
سرى بي الهاجس ومريت الاطراف
دوجت حـول الساعتيـن بطرفهـا
نعم تذكرت الزمـان الـذي طـاف
غديت مثل اللـي عيونـه طرفهـا
لي في غرام(ن) فات كلمه ومقياف
لولا خفوقي هام بـك مـا وقفهـا
اول غيابـك قلـت مابـي خـلاف
واليوم شف حالي غيابـك تلفهـا
تجهل جروحي ياللي جروحك خفاف
معذور لو قلبك جهل مـا عرفهـا
ياليت مجروح الهوى جرحه يشاف
لقول قرب من جروحـك وشفهـا
شفها بعينك كانك مـن الله تخـاف
حاول تصلـح غلطتـن مقترفهـا
العمر لامنـه خـلا منـك ينعـاف
في حال والا حـال غيـر تعرفهـا
قدام عينك لـو تطلعـت وخـلاف
تلقى الخفايا خاطري لـك كشفهـا
خايف ومن مثلي معه حق لو خاف
تبعـد ونفسـي ماتحقـق هدفهـا
ماللهوى عندك مواثيق وانصـاف
ماكـنـه الا لعبـتـن محترفـهـا
اليوم لو ذكراك ترجع بـي خـلاف
محبتـك سيـل التهايـم جرفهـا
*************
37

( مداعبة..نسيم....الليل )

يطول الجفا وتشاغل الخاطر المكسور
ويبقى مـع الايـام طاريـك بلسانـي
اشوفك بعيني مع غياب وطلوع النور
ذكرني خيالك يـوم قلبـك تناسانـي
تذكرت يوم اني معك راضين مسـرور
وسجيت مدري هاجسي ويـن ودانـي
تخيلتك وفزيت طولي بـدون شعـور
اثاريه طيفك صار له وقـت ماجانـي
طرتلي ليالـي لـو تذكرتهـا معـذور
لو الوقت يرجع كان انا جيتها عانـي
يداعب نسيم الليل مجدولـك المنثـور
تغطيه عني والهـوى يكشفـه ثانـي
تفوح الجدايل مسك مدري عطر وزهور
تعنيك في طولهـا والشـوق عنانـي
اثر من تولع لو سمع مايطيع الشـور
هو اللي يشوف وباقي الناس عمياني
نسيت الليالي ذيك وشلـون يامغـرور
انا كنت اغالط من يقولـون تنسانـي
هذيك اليالي وين اثر الزمـان يـدور
رجح في عيونك ذيك الايـام ميزانـي
انا كيف ابنسى خابرن قلبي المجبـور
لو اني نسيتك ماني بناسـي احزانـي
زمان مضى له دور واليوم غيـره دور
انا اليوم مالـد النظـر لـو تعدانـي
كفى ماجرى ما فيه داعي تجي مشكور
غرام الليالي ذيك خلـه علـى شانـي
************
38
((من عام ......الاول........))


لو قلت مرتـاح مانفسـي بمرتاحـه
غير التعب في غيابه مانـي بلاقـي
من عام الاول وقلبي تنزف اجراحـه
ضاقت على الوسيعه والفضا ضاقـي
لا بال مرتـاح لا فرحـه ولا راحـه
كم لي سنه وانتظر غيبـات سراقـي
ارجيه عقب البطا لو طال مرواحـه
كانه على هقوتـي ماخـان ميثاقـي
قلبن يذوق الهوى من يكبح اجماحـه
خلوه يرتاح دامـه بالهـوى شاقـي
اضحك وقلبي مع اللي عجة ارياحـه
لا قلت ياقلب طالت قـال وش باقـي
اللي عيونه وسـاع سـود ذباحـه
ازريت اداري غلاه بخافـي اوراقـي
ساكت وعيني ولو ماقلـت فضاحـه
حتى القصايد تخون وتفضح اشواقي
لو ما بغيت الهوى صابتني ارماحـه
ماجاه دون اللحم ساتـر ولا واقـي
مثل البحر كم غرق به ناس سباحـه
تضيع مع قوَ موجه هقـوة الهاقـي
خبري بقلبه صدوق الشوق يجتاحـه
عندي خبر فيه مايقوى على فراقـي
اتعب وغيري يجي وياخذ على الراحه
من حظ غيري وانا اللي زارع وساقي
***************
39
وش ينفع اليوم لو جيتينـي بلينـي
كسر الخواطر مصيبه من يجبرها
روحي واخلي جروحي منك تدميني
والسالفه لو يطول الوقت ابسترهـا
واليا اسألـوك وش بينـك وبينـي
قولي حياتي قصيده كان شاعرهـا
ا****************
40

وضح النياق)

وين هالغيبه عسى ماهي إفـراق
ليه تبخل بالمجـي خلّـك كريـم
خابر ان الجرح لا صابه حـراق
مـا يفيـده طـبّ والله العظيـم
ينشدوني وين من رمشه دقـاق؟
قلت مدري ذاك خبري بـه قديـم
الغلا راعيـه لـه قلبـن رقـاق
لو جفيته صارت ضلوعه هشيـم
لو زعل لو شال غيضه واستضاق
ما يخرّبهـا وجرحـه بالصميـم
ادمـح الـزلاّت زلاّت الرفـاق
خصّ لا من صار راعيها حشيـم
واكره الخـوّان كرهـي للعـراق
واعشق الوافين عشقـي للقصيـم
عند اهلها غاليه وضـح النيـاق
وانت عندي يمكن اغلا يا وسيـم
ان بغيت افراقنـا هـاك الفـراق
وش نبي بالحب دام الحب ضيـم
ــــــــــــــــــــــــ
سر ياقلم واطفح على كايد الموق ..... ربانك اليمنى ومركبك الاوراق
وإن سربة عينك ترى خمسي سبوق ..... ماجاك مني حق والرد مالاق
من دم غرقان نسف خلفه حقوق ..... نجدد لك الميثاق من جم الاعماق
وسر ياقلم لعيون دره بصندوق ..... ومانيب غطاس ولانيب بواق
سحابة مرة على الراس من فوق ..... واقفت وانا المقفي ورى ضوح براق
صبر صبرته لايقولون مطفوق ..... وطويق لوينطق محا صبره فراق
وانا دخيل اللي فتني بمخلوق ..... عن جاه خلق الله في جاه خلاق
ياحيلة الله بان ماكان مفهوق ..... وقت امانه صار خاين وسراق
إن قلت هانت وافق الطاق مطبوق ..... واصبحت انا ملحوق من عقب لحاق
سر ياقلم واكتب من الغبن طاروق ..... انا اشهد ان البعد والصد حراق
ياويل حالي يوم راودني الشوق ..... وانا بعيد الدار والقلب عشاق
مشتاق للي عشقها عاقني عوق ..... يامن خبر قلب على العوق مشتاق
لليلي طويل ودامع الوجد مدفوق ..... ياشيب عيني من تناهيد الاشواق
ممسي على حلم من الياس منسوق ..... والصبح شرب الهم والريق ماراق
إن كان لي شمس ترى ماله شروق ..... وترى الزمن باقيه ماعاد ينطاق
يابنت انا مخلوق لي دم وعروق ..... ولي قلب من عشقك لهالحين مافاق
خليتني للحزن والحبر والموق ..... والليل والغربال مع بيض الاوراق
_____________________________
عطني من خيوط الامل روح كذبه ..... يعيشها قلبي ولو كنت كذاب
يفرح بها قلبي ولو قال لعبه ..... لك مني ابنيها واحطم لك عتاب

الحال منك اليوم بان الظرربه ..... يامبعد عني وبعدك بلا اسباب

كم واحد عفناه من غير سبه ..... وانتي عشانك نرخص اليوم لرقاب

قلبي مولع واعلن اليوم حبه ..... ماعاد به سر نبوحه للاجناب

إن عذربوبه قلت لاحد يسبه ..... ياويل حالي من بلا ابوك ياعقاب

تسعين وضحى شافة العين عقبه ..... واشكي فراق الزين والجرح ماطاب

البعد عنها يكفي الله حسبه ..... وشلون اباصبر فيني الشوق غلاب

سبحان من سواه سبحان ربه ..... خصه بزين للمحبين نهاب

الله عليه الله يازين عشبه ..... ياريحة الريحان ياكل الاطياب

يشكي نحل عوده ويدفي مشبه ..... والريق حالي والشهد منه سكاب

والعرق اشوفه بين خلف تربه ..... حورية لعيونه الموت جذاب

ياعين شيهانه وجول ينبه ..... يامهرة تصعب على كل ركاب

غديرها صافي ولا ذيق عذبه ..... وسكر سبيل الزين معذور لو ذاب

من شافها ولا وضيع دربه ..... واصبح ضحيتها من الحب منصاب

لو شافها ريس على شان كسبه ..... ضحى بشعبه والجريمه من عجاب

ومعذور لو رفرف على الزين قلبه ..... الزين تكسرله شيوخ وشياب

بصري يتوب وحبها عند كعبه ..... وراع الهوى المجنون مجنون لوتاب

دامي صويب الحب وعاجز لحربه ..... اهلين في ذنبه وعشرين ترحاب

اباكتم جروحي وابنعى لطبه ..... وانس اللذي حدرتها فوق الاهداب

شخص سكنته قلبه اليوم سربه ..... الجرح يازن روح من كان طلاب

انت العذاب اللي تمنيت قربه ..... ليت اللذي دونك مهو ستر وحجاب

عنك الدقيقه كنها درب غربه ..... من كثرها راجع وانا مولف كتاب

جيتك ضمى والمر مليت شربه ..... ومانيب طامع قال وصلك بلا غياب

عطني من خيوط الامل روح كذبه ..... ونذر يجيك العمر مني بلا حساب
_____________________
البارحه جاني خبر كنه الليل ..... منه غدى همي على القلب عاله

قالو حبيبك صاير ضعيف الحيل ..... ومن المرض ماعاد ينفع دواله

قلت السبب ياللي تجيب المراسيل ..... قال اللعيون اللي قهرهن جماله

ثم قلت له ياصاحبي دون تحليل ..... هذا الصحيح وللاسف ماجراله

كنت متوقع واستمع لتفاصيل ..... دامه جميل وزاهي في خصاله

مادام طوله ضافي وخصره نحيل ..... سلسال خصره شاقي من دلاله

وزوله حسين ولاوجد زول مثيل ..... مشيه يعبر عن ركاد وثقاله

والنهد بول زمته كالفناجيل ..... وعنقه ترى عنق النعامه غدى له

وإن فل شعره واصل للمفاصيل ..... اسود سواد الليل لونه شدى له

والعين غطتها رموش مضاليل ..... راع المحبه شاف فيها زواله

وزمام خشمه قبضت للمساليل ..... والخشم بتار وحلته خاله

والحاجبين قصار من دون تطويل ..... وفمه كما جمر يزود اشتعاله

وخده كما ورد برز باخر النيل ..... وجهه يشابه للقمر في كماله

عزالله انه فتنة الكون والجيل ..... ولافيه من كل الخلايق مثاله

الزين ملكه واترك القال والقيل ..... زينه هلاك المجتمع واحتلاله

فاق البني بالزين من دون تجميل ..... ونجمه تعلى في سمايه لحاله

ولارجعنا للعقل حارب الميل ..... فكره رزين وخالي من جهاله

اللي نضرها شفت منه البهاذيل ..... واصبحت في قلب عدوه رثاله

ياعل عين ماتعرف التهاليل ..... ماتذكر الله معميتها النذاله

برمح العمى تطعن لجل شره يزيل ..... ويذكر لنا ردت على الخل حاله
_________________________
ياهلابك يالحبيب اللي غيابك ..... ما أطيقه يانظر عيني دقيقه

مرحبابك من غلاك الحلم جابك ..... المشاعر يوم جيت انفك ريقه

ياشهد حالي ترى حالي حلابك ..... داخل بك ياشذى الورد ورحيقه

الورود بطلتك عطره زهابك ..... ياكمال الورد يا اجمل حديقه

لو حكابك وصفي ماضنه وفابك ..... يكفي انك للذهب لمعة بريقه

ياشبيه الريم ارحم من سهابك ..... في عيوني راسمك ريم رشيقه

ماتهنيت بمنامي من عذابك ..... صورتك جتني مع احلام عميقه

وانتخابك شوق قلبي واعتزابك ..... ياقمر نورك سرى الساري بشعيقه

يوم فتح عقله اثره مع سرابك ..... اثره حلم يالغظي ماهي حقيقه

ليت حلمي طال لجل انه هنابك ..... حيث عيني من توجدها غريقه

وياهلابك يالحبيب اللي غيابك ..... لودقيقه ياعيوني ما اطيقه

مرحبابك عادلي حلم جابك ..... وليت حلمي ينقلب علم وحقيه
______________________
الديره منيره اثره منك يامنيره ..... وانا احسب انه من اللي كبسه مدور

صحيح والله قمرنا به قمر غيره ..... والكون كله ترى من طلتك نور

مفاتن الحور وانتي توك صغيره ..... الله يستر علينا منك نتهور

شدي لثامك ترى في شدته خيره ..... لاتوضحين المبيسم لجل مافور

انا معاك احترق بخلاصة الغيره ..... حتا بعيونك هلاكي شفته مصور

لا واخسارة زمان فات تبذيره ..... انتي هوى قلبي وغيرك فلا ادور

ياعل تفداك روح بعدك بحيره ..... وحبي لغيرك ترى يامنيره مزور

ويامنيره القلب دوم يخون تعبيره ..... لكن غلاك بظميري كون ومسور

والديره منيره اثره منك يامنيره ..... وانا احسب انه من اللي كبسه مدور

صحيح والله قمرنا به غيره ..... والكون كله ترى من طلتك نور
____________________

ياللي تركتيني ليتك دريتي
اني من اسبابك جريح ومنصاب
رحتي وليتك يوم رحتي حكيتي
الموت فرقى دون توديع واسباب
غبتي وعني وغاب معك المبيتي
واصبحت للونات بيت بلا باب
لو شفتي احوالي وربي بكيتي
ماسرة العدوان وش عاد الاقراب
هذا جزاي انك بدمي سريني
واني معك صادق ولاني بكذاب
يالغاليه ليتك لخلك وفيتي
ماكانت الدمعه جرت بين الاهداب
طاح العمود وطاح اليوم بيبتي
ولا عاد تنفعي كثيرات الاطناب
ابسكت انا لو قلت عني مشيتي
وابكتم الاهات لو عارضي شاب
يكفي انك يوم رحتي رضيتي
وان الشقى موجود لعيون الاحباب
يطهر من الامزان كانك سليتي
هذا منى قلبي ولا يهمك عتاب
_________________________
زرعت لك بستان في داخل الروح

عشان لاشفتك بعيني وعيني

أزف لك عمري ولو كنت مجروح

من دم قلبي هاك وردة يميني

أنأ الهواوي والهوى مابه مزوح

وشلون انا بنساك وانتي حنيني

أنأ اللذي من حبك اليوم مفضوح

وشلون قلبك طاوعك تتركيني

ليتك تشوفيني وانا ابني لك صروح

يابهجة الدنيا وسبة ونيني

ب صبر على شانك ولو كنت مطروح

واكذب على روحي بأنك تجيني

واهديت لك بستان من داخل الروح

يهديه قلب عذبته السنيني
_______________________
لاتجرحين القلب يابنت الاجواد ..... لاتجرحين القلب بالبعد والصد

يابنت جرحي داخل الروح يزداد ..... كون له جروح كثيره ولاتعد

القلب يشكي لك ترى الموت صياد ..... جرح خفي ماله طبيب يضمد

العشق يمك ساقني دون ميعاد ..... والعشق مايوحي ولاتمسكه يد

وانتي واقفتي ضد والحظ ماجاد ..... ويالعنبوه الحظ خلاك لي ضد

مع الدهر صرتي علي عون وشداد ..... واخلفتي الهقوه وعلم موكد

ماهوب حق منك تحرمني الزاد ..... وانا على نفسي مبديك بالود

لجلك شربة المر عودت وراد ..... واقول ياحلوه جلا دبلة الكبد

ولجلك هجرة الضحك وحاربة الاعياد ..... ورضيت لو كني سجين موبد

صبر صبرته والتناهيد مقعاد ..... وكامي على العذال وناس مقرد

واليوم فرحتي من الناس حساد ..... انتي سبب ماصار وبيحة لسد

معذور دامني مهاوي وقصاد ..... وعشقك برى حال عناها تزايد

ليت الزمان اللي قبل عشقك يعاد ..... عندي طلب ومناة لوقيل حدد

ياليتني طفل سكن وسط الامهاد ..... مدري هو ابيض يومي ولاهو اسود

لاعشق بهذلني ولاتهت برقاد ..... مرتاح من دنياك ماعرف معقد

الى متى لهمومك عيوني بلاد ..... وبمتوني طعونك ترى ماله حد

انت السبب واللي جرالي لك مراد ..... ماتدري انك مخطي وانت اتعمد

انا اشهد انك ضيم وامجادك امجاد ..... تسقيني العلقم وترهيلي المد

سلمك مهو مسلم ولاسلم الاجداد ..... ولانافع بك سلم مسلم ولاجد

الظاهر اني عاشق حرب وجهاد ..... الخير وينه واللغم قدني قد

راحت حياتي بين مخلص ونقاد ..... شي اشوفه عن الموت ماسد

انا ذبحني صبري اليوم مافاد ..... بسباب عين تجمع الصد واللد

منها غدى همي على القلب وقاد ..... من الناعسات السود قمت اتوجد

استنجده للقرب ويزداد ببعاد ..... يزيدني بالبعد وبالصد يجدد

إن قلت له ارحمني جازاني بعناد ..... يرسل سهام الموت وفيها يهدد

أنا دخيلك من سهم عينك الحاد ..... إن قلت جرحي طاب عودلي ورد

تطعن ومابك خوف من رب الاعباد .....ارجوك ترحمني عن الطعن واللحد

الحال تشكي منك يابنت ماعاد ..... لي حال تطمع بك عساها تشهد
___________________________

يامبارك الريم شفته واقف ابابك ..... مكحول الاعيان لابس ثوب دراعه

سميته الريم يوم انه تذرابك ..... والخاتم الماس ويلمع لمعة اصباعه

يابو لثام جميل الشوق غنابك ..... يالشامخ الروح صارة بيدك وداعه

اهلين في طلتك مرحب وحيابك ..... لو أن روحي عليك اليوم ملتاعه

ياويل حالي بصدي ملتوي دابك ..... معك شلع قلبي وردنه اصباعه

جيت اتقضى تكمل ناقص ثيابك ..... وحنا لك ارواحنا وقلوبنا بضاعه

تكفين يالفاتنه قولي لمن جابك ..... إن البشر تشتكي من حسنك ضياعه

حوادث الناس صارة كله اسبابك ..... من فندق الخالدي لشارة الساعه

وتكفين يالفاتنه لايطول غيابك ..... حبك زرعته انا في قلبي زراعه

والله لو إن قلبي حسب حسابك ..... قلبي من اجلك تسوقه راحة ذراعه

ويمبارك الزين لاشفته على بابك ..... قل متعب يسلم ويشكي لك اوضاعه

وإن جتك يمبارك وقصده تقضابك ..... ببلاش عطها عليك السمع والطاعه
___________________

ياميرة المينا وياعقد الالماس ..... يافتنة الشاطي ويالمعة الطوق

يالجوهره يامعجزة كل عطاس ..... دونك هلاك الموج حاميك من فوق

وحوت البحر والقرش لعينيك حراس ..... واللي تجرى يسرقك صار مسروق

وحكم عليه الحوت يعدم وينداس ..... وعذر الملك لشعب هذا جزا البوق

يالجوهره لروح حبك ك الانفاس ..... والقلب ينبض به ومشاه بعروق

ولو تاقف الانفاس مع شلعة الراس ..... حبك بقا فيني وساكن بمعلوق

ياميرة الاحساس يا أصدق احساس ..... يانجمة الاشعار وياروعة الشوق

يامنبع الالهام مع نشوة الياس ..... ياسلسبيل الحب وياقمة الذوق

يالجوهره ماشفت مثلك مع الناس ..... انتي غرامك غير عن كل مخلوق
___________________

النور من نورك منور للانوار ..... واكبر دليل اسمك مع الناس نوره

ياعزوة الحكام ويانسل الاخيار ..... يامنبع الامجاد وياساس سوره

الله يفكك من تصاريف الاقدار ..... يابنت من مشى الاوادم بشوره

ياسيدة ذالجيل وياجيل بدار ..... انتي حظور صار واجب حظوره

يامنتهى الاحلام ومفتاح الاسرار ..... ياجمل شعور ضمني في شعوره

متشكله في رقتك مثل الازهار ..... ومن طيب قلبك خصني في عطوره

والله انا مانساك لو صار ماصار ..... رسمت لك بالقلب يابنت صوره

فيك افتخر واقولها سر وجهار ..... انا اشهد انك نجمة في عصوره

الشعر في شرواك والله يحتار ..... محد يلومه فيك تنضب بحوره

وإن كان به تاج على روس الاشعار ..... انتي ترى تاجه وقمة سروره

____________________

اسألك بالله قولي يالهنوف ..... اللعيون اشلون تقدر تشبعك

وش بقول انتي كمال بالوصوف ..... الحلا والزين كله منبعك

قلتها مجبور حدتنا الظروف ..... القصايد يابنيه تجزعك

إن كتبت البيت ضيعة الحروف ..... ابتدي ثم انتهي ثم ارجعك

القلم وشلون يكتب والكفوف ..... تردد التصفيق لجل تسمعك

طارة الطيران مع راع الدفوف ..... إن وقفتي ثم مشيتي بصبعك

وإن تمايلتي تصاقط لك الوف ..... صرتي الفايز وكل شجعك

لعنبو حيك طغيتي بالردوف ..... كنك تقولين جيت اولعك

والشعر منثور من فوق الكتوف ..... الله الله ياحلاهم مروعك

من يقول الموت في ضرب السيوف ..... والله إن الموت ساكن مدمعك

______________________

الريم كثرة عجايبها ..... والوصف بيح لمكنونه

الشعر والله يحير ابيها ..... غطة على كل مزيونه

طول على الكيف صار ابها ..... لاقصر لاطول موزونه

لامن تخطة اراقبها ..... ودي تمشى على هونه

إن شالة الردف يتعبها ..... وضافي على ردفه قرونه

الخصر وشلون قاضبها ..... معذور لو مالة غصونه

بالهون بالهون ياعنبها ..... شلعة قلبي من حصونه

الرقه اللي تلاعبها ..... تطغى على العود ولحونه

ومن الغنج طاح غاربها ..... لولاه ثابت على متونه

وشفته لولو مرتبها ..... العقد كنه على سنونه

الزين يضمى ويشربها ..... والزين نصه على عيونه

العين فارس وحاجبها ..... سيف عطيبات اطعونه

صاطي وجراح مخلبها ..... وللقرب ماتعرف العونه

إن شفتها قلت بنهبها ..... واعوذ بالله من الخونه

ليت المحبه تداعبها ..... وتظفي على الحب قانونه

اتحس في حب كاتبها ..... وتمشي على الحب وفنونه

متى لي الله يقربها ..... هي علة القلب وحزونه

الحال دقة سبايبها ..... والزين مقفي بمرهونه

الروح لا لا تعذبها ..... ياصاحبي فيك مجنونه

النوم عيني محاربها ..... مدري عن النوم وش لونه
______________________

زى لون الطيف وألوان الفراش () الهنوف اللى شغلنى صدها

إن بكت جا دمعها مثل الرشاش () وإن تبسم ثغرها من قدها

وإن حكت كن بشفايفها رعاش () الخجل عن سالفتها لدها

والطيور اللى جفت حضن العشاش () ليتها خلت بقايا ودها

عقبها كل الغصون أمست نشاش () خاليه عقب الوناسه خدها

كل قلب فى ذراه الحب عاش () فيه طيبه زايده عن حدها

والقلوب إن فارقت صارت هشاش () موحشه والذكريات تشدها

رفرف البرق وزمت بيض الدشاش () وامتلا من صافى الما عدها

مابنيت بيوت شعرى من قشاش () ليه أخاف إن الرياح تهدها

والهجوس اللى من الفرقا عطاش () ترقب نجوم السما وتعدها

يوم شق النور من ليل القماش () شفت حبة خالها فى خدها

القصيد لمثلها ولأ بلاش () لو تبى عمرى حشى ماردها
ــــــــــــــــــــــــــــــ ــــــــــــــــــــــ
خافو من الله لا تجيبون طاريه
.......................لا صرت أنا موجود لا تذكرونه

لو كل غالي جابه الله لغاليه
.......................ما شفت لك مخلوق تبكي عيونه
ــــــــــــــــــــــــــــــ ـــ
ترجل الفارس......... )
هذا الخبر صدمه وحزن وعلامه
________ على محبة كل الامه لخطاب
هذا الخبر والهم هذى خيامه
_________ شرع للأحزان النوافذ والابواب
ألحقت من جاب الخبر لى ملامه
_________ صعبه على الانسان توديع الاحباب
البارحه غابت عن العين قامه
_________ قامة رجل زلزل قناعات واحزاب
ترجل الفارس وذب العمامه
_________ واستقبل الموت بحفاوه وترحاب
ترجل بصمت ووقار وصرامه
_________ حتى وفاته شى يدعو للأعجاب
من يعتبر فقدان كفه وسامه
________ أكيد ماهو لحظة الموت مرتاب
وجه واهو مسجى بدر فى تمامه
________ ميت ولكنه واهو ميت مهاب
أومت له كفوف تمنت سلامه
________ بكته الامه قبل تبكيه الاقراب
خطاب ماهو بس رمز الشهامه
_______ خطاب نجم فى سما الامه وغاب
حر شهر والطلع دار الكرامه
_______ والحر مايعنيه تحليق الاسراب
فعله فرض على الجميع إحترامه
_______ واسمه ملا الدنيا بطوله واهو شاب
ماكانت الدنيا مثار اهتمامه
_______ بالعكس كان لنصرة الدين وثاب
لو كان يبحث عن نفوذ وزعامه
_______ كان امتلا صدره نياشين والقاب
الاخره كانت على طول امامه
_______ فى هالزمن خطاب واشباهه اغراب
اختار بديار الجهاد الاقامه
_______ ومن كان هذى رغبته لازم يثاب
واختار بالاسلام ذروة سنامه
_______ الصبح ساحة حرب والليل محراب
يكفيه فخر ان الشهاده ختامه
_______ ماحسب لدنياه ولعمره احساب
يارب تغفر له وترفع مقامه
_______ وتعظم أجر إمة محمد بخطاب
__________________
هذاك عبدالله ليا طوح السيف
وقام يتلامع بين اصابع سموه

برق من عالية نجد للسيف
كل يخيله ويتباشر بنوه

ولى عهد المملكه سمح ومخيف
سمح على شعبه مخيف لعدوه

يشوف من عاداه له شى ماشيف
ونشوف به حنا حنان الابوه

مثل الجبل ماشال هم العواصيف
مثل البحر حتى هدوءه يتوه

نسل الزعيم اللى نصل سيفه رهيف
اللى قبس من مشعل الشرع ضوه

عبدالعزيز اللى على امته ريف
مامات لين احيا شعور الاخوه

لولاه ماصرنا ربوع ومواليف
ولولاه حاضر هالجزيره مشوه

من غير عبدالله يغيث الملاهيف ؟
يلقون فيه ضعوف الاسلام قوه

أدناه فى عرف النشامى مشاريف
ويطاول نجوم الثريا بجوه

نايف على روس الشواهيق ومشيف
عنده لشعبه والعروبه حموه

ياسيدى تسلم لنا ظل ومريف
بينك وبين الشعب عهد وخوه

اى والله أعشق سيدى مابها زيف
ومن لايحبه مابقلبه مروه

والله لو إن الله خلق روح للسيف
مايركد الا بين اصابع سموة
_____________________________
يا سعود لا تنشد ترى ماني مجيب
خل الذي خافي له شهور.. خافي
إن شفتني مغتاظ.. لي حق و مصيب
يا سعود مزعلني جديد اكتشافي
الغالي اللي كان من قلبي قريب
بيني و بينه.. صار مثل التجافي
إن قلت زله.. مثلنا زلته عيب
من قال لك شمس الضحى ما تشافي
إن قلت هقوه.. يمكن تصيب و تخيب
كم لي سنه .. ما شفت فيه اختلافي!
و إن صار في نفسه بعض شكة و ريب
حتى البحر ما هو على طول صافي
صرنا من الصده .. سوات المصاويب
كلن نقل جرحه و قال: امتعافي!
((أصعب فراق.. فراق عكف الأشانيب
ما هو مفارق لابسات الغدافي ))
و الذيب لا منه عوى.. جاوبه ذيب
و العلم حامض.. بس وين الأشافي؟
دامه لقى له غير قلبي معازيب
الله يسمح درب هاك السنافي
يروح.. لا يرجي رسول و مكاتيب
هو خابر إني.. ما اتلفت خلافي
واللي تعلى فوق روس المراقيب
أكيد ما تسقى عليه السوافي
رح بشر اللي _شال شلفا_ تريحيب
قله: تراها كلبوها عوافي
اليوم نفسي طابت.. و باكر يطيب
جرحي.. لو انه من يدين المشافي
خلصت.. و الدنيا دروس و تجاريب
سجل يا بو عبدالعزيز اعترافي
______________________
ماهو خطا عشان ادور معاذير
ولاهوغلط عشان ادور صوابه
اليوم توه عود لوكره الطير
واصبح يشوف العالم اكثر رحابه
مستغربين انه ملى قلبي الخير
ليه الغرابة! وين وجه الغرابة؟
تعبت ادور للخطاوي مشاوير
لين التعب زاد الليالي رتابة
يبكي فرح من شاف بعض التباشير
معذور لو دمعه يبلل ثيابة
من كنت بأول خامسة طفل صغير
كنت امتلي حزن وغموض وكأبه
كنت أشعر اني غير والمدرسه غير
هيمان في جو النبي والصحابة
كنت المح بوجه الليالي تعابير
وأقراء همومي قبل أعرف الكتابة
والشعر غاااب وله محبة وتقدير
اول غيابه شلت هم لغيابه
بالنفس كان لبعض هالأمر تأثير
والليلة اهون من جناح الذبابه
__________________________

مفتوح باب الرجى لو هب مليون ريح
والريح ماتاخذ الغرسه من عروقها
القوس مكسور والرامي يقوم ويطيح
والسهم منعاج والايام خازوقها
لو لبسو ساقط الهرجه ثياب المديح
قلنا سحابة وبلة يابس حلوقها
ياحادي الركب لا توده عليه وتصيح
ماعاد هي سالفة ليلى ومعشوقها
مديت شوفي وشفت الكون رحب وفسيح
والارض حدر المواطي والسماء فوقها
مادام عين الرضا ماها هماج وشحيح
ابتبع الغيمة اللي رفة بروقها
مدري عن المقبلة لكن عسى الله يبيح
اللي تهز القلوب وهزني شوقها
غنيت للحب ولسان المحبة فصيح
والبدو سبة غناها ضيقة خلوقها
باكر يروح الشتاء والثلج قصره يسيح
مايفضح الثلج غير الشمس وشروقها
_____________________________

الموت هين البلا وش ورا الموت
عند الحساب يهون سهم المنايا
باكر نموت وتصبح قبورنا بيوت
وعقب القصور بضيقات الزوايا
في جوف الارض وكل من حولك سكوت
وتعاقبن بالقبر عوج الحنايا
يارب يامنجي نبيك من الموت
سترك وعفوك يوم كشف الخفايا
باكر اليا جينا على داعي الصوت
شيبان واطفال وشباب وصبايا
ندعي وحنا بين باكي ومبهوت
ورحنا لها ننقاد مثل السبايا
يارب تهديني قبل لحظة الفوت
وتغفر ذنوبي ياكريم العطايا
اشكيك هم داخل الصدر مكبوت
وأيامي الي بالخطايا ملايا
أن لاذ بك من كان طايع ومبخوت
في من يلوذ المرتكب للخطايا
يارب ياقادر على كل طاغوت
لا ياقف اللي وحدوبك خزايا
رحماك لامنا صحينا من الموت
واليا وقفنا عند بابك عرايا

[روح الشعر]

لا هنت على الطرح يبوعبدالله

اشكرك

[الطامي]

الطائر
نقل طيب وأختيار رائع
صح السان الشاعر
ولاهنت دكتور

[حوريه]

اختيارات رائعه
يعجبني شعر متعب
صح لسانه وتسلم يمينك طااائرنا عالنقل الجميل
كل التقدير

0
0

[حنان الكون]

الطائر
نقل طيب وأختيار رائع
صح السان الشاعر
ولاهنت دكتور

قمة الروعه ، صح لسان قايلها

ويعطيك العافيه يالطائر على النقل


" تحياتي"

[عبدالرحمن الصباح]

الله يعطيك العافيه نقل رائع ومميز