إنحسار النيل في زمن الدميرة

[محمد اسماعيل الرفاعي]

يا نيــل تعــال ..
ناغِـم روافـدك جمعهن ..
ألبس سواد وأعلن حداد..
لملم دموعك في أسى ..
يلاك تعال نبكي انحسارك
نلطم خدود ونشق جيوب
ما ننسى حتى الحي وووب
نتباكى في حضرة جلالك
ما الجور خلاص جاربو الزمن
وختاكا تب يا للعجب..
من غير سبب فارق مسارك
أغواهو زول جاهل جهول
بقى فجأه غول
وحلف يمين ما يمر شمالك
في لحظه قام ... شقّا الزحام
زاد في الحُطام .. خالط بنات فِكْروا المُدام
دون إلتزام دون إهتمام
أقلق منام عينيك بلع
في كرشو أرتال من عيالك
لا راعا لي عشرة عُمُر .. لا اعتبار لي ناس سُمُر
كشّر زأر .. صرّاها عينيهو الحُمُر
شوّه صور .. لوحات .. رسوم
كانت زمان بتحدِّث الناس عن خصالك
غيّر ملامحو وكِت هدر ..
قال دار يكون مارد خطر..
ما راعا لي حبّة قيّم كانت زمان
رابطاهو بي حلقة وِصالك
يا نيل دحين ..
أسأل سؤال
وينو الحمام الجانا يوم
طربان مبشّر بالسلام ؟
ولا الكلام كان كلو زيف..
من زول حريف ..
حبك الكلام .. دسّ النزيف
غشغش نِمالك ؟
يا نيل خلاص ..
ضاع الأمل ..
ليك كم زمن تسمع نعيق
مخلوط بصوت زي النقيق
واحلام من الماضي السحيق
والليله جرحك صار عميق
نوسر خلاص ما بندمل
للعالمين كشفوهو حالك !
يا نيل أرح ..
يلاك تعال ..
نبكي انحسارك
قول يا لطيف ..
في كل قيف ..
لامِن تقيف ..
خليك حصيف ..
حجِّي الخلايق والخلوق
بي الكان سبب..
في إنفصالك ..

18 /1 / 2011

[الصياد]

شكرا لإمتاعنا بإبداعك
لاهنت
تحياتي

[داعي الشوق]

الشاعر محمد اسماعيل

وضعت يدك على الجرح النازف ،



و ليس لنا حول ولا قوة ـ

يعطيك العافية

مع التحية لك

***************

[حي الضمير]

ابدعت يامميز

[كظيم]

محمد الرفاعي
ابدعت في ماكتبت
رائعـة هي أحرفك
لله درك
تقبل مروري المتواضع لاهنت
ودي وتقديري

[المحيط الهادي]

كلمات ابدع سلمت وسلم لنا بوحك الجميل

واصل ابداعك

دمت كما تحب

[عرق الماس]

حضرة الشاعر محمد..
حروف تنزف من الألم ..
كم نأسف لما أصابنا من صراعات..
نسأل الله الفرج القريب..
تسلم يدك شاعرنا.

[احمد الحميدي]

معزوفة جميلة مغلفه بالإبداع


صح منطوقك اخي محمد

ولا هنت

جزاك الله خيرا وبارك الله لك وعليك
دمت بحفظ المولى

[محمد اسماعيل الرفاعي]

المشاركة الأصلية كتبت بواسطة لطفي الياسيني

جزاك الله خيرا وبارك الله لك وعليك
دمت بحفظ المولى

بورك سعيك أخي الحاج لطفي الياسيني .. سعيد دوماً ( بطلّتك ) الرشيقة