أفضل وأمتع وقت لديك

[سناعيس]

هنا على الجميع طبعا اللي يبغى لأننا هنا ديمقراطيين
كل عضو يقول وش أفضل وأمتع وقت لديه وعلى شان تستمتع وش لازم تسوي في حياتك اليوميه الاعتياديه

طبعا أنا أببدأ بنفسي على شان توضح الصوره للجميع

بالنسبه لي أمتع وقت عندي وبالذات في هالشتاء
أني اشتري أبو فروه كلكم تعرفونه ( كستناء ) وطبعا عندي الدفايه
وأشوي عليها واقشر واكل وأنا أشاهد وأشارككم التصفح في منتدانا
وأستانس بعد لالقيت أحد يبدا معي بالمساجل أو الرديه أو المحاوره

[الغريب]

خخخخخخخخخخخخخخخخخخخخخخخخخخخخ

حلوة ابوفروة،،،،،،،،،،،،،،،،، ماقد جربته مسلوق

شف بعد صلاة الفجر احب امشي عشان اسولف مع روحي

واموت اموت اموت في الشتاء عشان طلعات البر والقنص احب السفر عن طريق البر ايام الشتاء

وتعجبني شبت الضو والسواليف والمقالب اللى تصير في البر خصوصاً اذا كانو منسجمين الشباب في السواليف واكون متفق مع واحد من الشباب نسوي مقلب وخذ ضحك

واحب اسولف مع اللى اعرفه واللى ما اعرفه بالكنود


في الصيف ما احب اطلع من البيت يعني عمل بيت ،،،، بيت عمل


يسرقني الوقت مع الافلام الكومديه والبوليسية والاكشن

كنت احب البلوت بس في يوم من الايام تهاوشت انا وزميل لى وبعدها حلفت ماعاد العبها

طبعا احب النت اضيع وقتي واغسل همومي من خلال الردود على المواضيع

واذا المزاج رايق وعال العال تلقاني في المطبخ مسنتر ،،،،، واذا دخلت ايكيا انسى اني بطلع فاضي تعجبني مواعينهم اهم والسيد والشوكة الذهبية ليه مدري

مدري كذا كافي ولا ،لا

[سناعيس]

غريب الآه

انا عارف ان فيه أوقات حلوه كثيره في حياتنا لكن
أنا أبغى واحد منها تمارسه يوميا وتستمتع فيه يعني في حياتك اليوميه فقط
على شان اللي يشاركون مانتعبهم .

[الغريب]

خخخخخخخخخخخخخخخخخخخخخخخخخخخخخخ خخخ

انا جالس اعدل في المشاركه

تئبر البي>>>>>> اقراها بالبناني تخبر الوالده مصرية

[الطائر المهاجر]

والله لا ني عارف ابو فروة ولا الكنود ..
امتع الأوقات عندي لما اصك لي بيعة طيبة ، واشوف الدراهم زادت ..
بر .. ما بر...ضو ... بلوت ... هذي بالنسبة لي مرحلة عدت من زمان ،
كنت احب البحر وانا اتسدح على الشاطئ مع خلق الله ، لكن الظاهر مع كثرة
اسفاري في الماضي ، وما فيه ديرة إلا رحت لها ، حتى السفر هالحين طلع مع خشمي لدرجة لي أكثر من 12 سنة ما سافرت. لدرجة اني شريت شقة في القاهرة ومن ذاك الوقت مادخلتها ، العيال يمكن استفادوا منها بعض الشئ فقط .

[الغريب]

وش عليك اللهم لاحسد ابشرك مع دحدرت السوق امس واليوم خسرت كل شي يعني مولاي كما خلقتني

ابوفروة اللى يكون لونه بني ويشونه الكستناء

الكنود اللى يركبونه في السيارات وفيه موجات ممكن تتفق انت وشخص تكون لكم موجه معينه وهاتك ياحش

يعني تتسلون في الطريق وموصول بمثل جهاز الاسعافات يسمونها الريشه فيها ارقام واذا جيت تحكي لازم ترص على زر

مدري وصلت ولا من جنبها يا ابو عبدالله

[الطائر المهاجر]

قلت لك كم يوم ، يوم تكلمت عن الكهرب ، بع ، لا تنتظر ، ارجع وتلقى توصيتي لك.
بالنسبة لي دائما نصف السيولة على الأقل جاهز للطوارئ ، ولكني ما انتظر اول مكسب
آخذه ولا انتظر ..وامس كانت السيولة بكاملها معي ، وشريت اسهم قليلة ، واليوم شريت شوي
ويمكن بكره وبعده شوي ، ثمٍ انساهن كم يوم ، واصرفهن بمكاسب معقوله.. لو قليلة ..

الكنود وصل ، لكن ابو فروة ما بعد ، يمكن له اسم آخر ..

[سناعيس]

أبو فروه يامشرفنا اسمه المتعارف عليه شعبيا و اسمه العلمي الكستنه أو الكستناء وهو على فكره مفيد جدا ولا يحتوي على دهون كثيره وليس له أي مضار وبامكانك أن تستخدم قوقل وسوف تعرف الكثير عنه وهويؤكل مشويا أو مسلوقا أو مطهيا وفي القدم يسمى غذاء الملوك ويوجد الآن بكثره في محلات بيع الخضار والفواكه انت ماعليك الا تقول أبي أبو فروه وبيعطونك اياه وجربه وادعي لي .

ماتلاحظون انكم قلبتوها دردشه تداول
لكن بالمناسبه يقولون انهم شالو جماز السحيمي وحطو بداله آل الشيخ هل هو صحيح .

يالله أتركو عنكم الأسهم وعطونا طلبنا .

[الغريب]

انا اشهد انك قلت بس وش نسوي العنيد عنيد

اكيد انك جيت العزيزية اللى بتخصصي وفي قسم الخضار ماشفت شي بكيس اخضر مشخل

فيه شي بني تقل سنه بندق بس كبير

مثل البندق بس انه ماهو بقاسي واجد اذا شويته يطرطع ويتفكك فيه ناس يحبونه مسلوق

اهل الغربية يسمونه ابو فروة والرياض كستناء او كتان

مدري وصلت ولا لا

[أم ريما]

مشكور اخوي سناعيس على الموضوع


انا افضل وقت

اذا دخلت المنتدى الظاهر اني ادمنت عليه ما اصدق
متى اخلص ويسمح لي بدخول المنتدى واتنقل بين مواضيعه واقسامه



وشكرا لك