جمّعت لي قرشين باشري عماره !!

[سعيد مقبل الأكلبي]

جمّعت لي قرشين باشري عماره=وزوّدتها قرشين حق الدلاله
وجيت العقاري عند مكتب عقاره=شايب شنب غتره وطارح عقاله
متربّعٍ ويمز ذيك الزقاره=ولا مزّها ظرب بها في البياله
كنه خفيرٍ مستلم له خفاره=في فيّة المكتب ويتبع ظلاله
قِمَزْ ورحّب بي بشوق وحراره=تقول شايف واحدٍ من عياله
قلت اشهد ان العود راسه نعاره=يالله عساه يطيب ويزين فاله
ياشيبة الرحمن معي استشاره=وانته ومثلك شوركم ينعناله
انا غشيمٍ في دروب التجاره=والحظ وقّف لي ولا زان فاله
وباعلمك وشهي علوم القشاره=وانت الحكم واحكم وحكمك عداله
------------------=
فكيت لي مطعم وسممت حاره=وتركته وفكيت جنبه بقاله
وحطيت فيها عاملين استعاره=جارت علي رسوم نقل الكفاله
وبديت اديّن واحْسِبْ انها شطاره=وراحت ديوني كلبوها جماله
ودخلت في سوق الخشب والنجاره=وراحت فلوسي في يدين العماله
وفتحت مستوصف وحطيت ادراه=وجبت الدكاتر دارسين الزماله
جاهم مريضٍ علّته في المراره=شقّوا طرف كبده وشالوا طحاله
ونسيوا ببطنه رخصةٍ واستماره=يامن شرا له علّةٍ من حلاله
وخذيت لي ونيت دتسن غماره=وركّبت فوقه شبك واربع قفاله
وقمت اتريبح في البهم والجفاره=السوق وقت العيد يالك وياله
لين اعترضها اللي عيونه شراره=واحد عيونٍ جعل ماله سلاله
جاها على الما جعل تفجاه غاره=وقضا عليها جعل موته لحاله
واليوم ابي لي بيت واخذ اجاره=لعل باقي العمر يمشي سهاله
قال استرح وانس التعب والمراره=وهات الدراهم واكتب الكمبياله
ودْلالتي والحُر يفهم الاشاره=قبل الكلام وقبل مبدا المقاله
------------------=
اربع غرف مبنيةٍ من حجاره=ومقلّط ومجلس ومطبخ وصاله
وحوشٍ يجي للمور فيه استداره=وبوابةٍ تدخل معاها التراله
ماهوب بيتٍ من بيوت الحضاره=بيتٍ قديم من بيوت الاصاله
والموقع مميز وجنب السفاره=وان طعت شوري لاتدوّر بداله
قلت اصبر اصلّي صلاة استخاره=قال اعفني! لو جا زبونٍ وشاله!!
شريته وسقت الذهب والسواره=شيكين من عندي وشيكٍ حواله
ورحت ولقيت البيت كنه مغاره=مبني من ايام الجهل والجهاله
عينت كهفٍ فيه سبعة جحاره=ياما جرالي منه وياما جراله
والحوش يسكن فيه سبعين فاره=والباب مايدخل نفر من خلاله!!
ودوريّه يمينه والاخرى يساره!!=ووحدة جنوبيِه ووحده شماله!!
معهم تعاليم الأمن والوزاره=بان السكن جنب السفير استحاله
خذيت رشّاشي وعبّيت ناره=ناوي على الشايب وناوي قتاله
حياة مثله في الاوادم خساره=والله ماخلّيه ايتهنّا بماله
اللي مايامن به خويّه وجاره=راعي النذاله ينعن!! ام النذاله

[مبروك بن ماضي]

الأخ الفاضل الشاعر / سعيد بن مقبل الأكلبي
بقدر روعتك يكون الشعر ..
لك ولقلمك كل التحية والتقدير
صح لسانك وجاد بيانك
ولا تحرمنا من ابداعاتك المتميزه
دمت بخير حال
أخوك / بن ماضي

[سعيد مقبل الأكلبي]

تسلم يامبروك
والله يجمّل حالك

[محمد عبدالله البدراني]

سعيد الاكلبي

صح صح السانك

وعلا شانك


قصيده لها مالها

لاعدمناك


تحيتي وتقديري

[فارس بن عويف]

الشاعر / سعيد مقبل الأكلبي

نص راقي .. ومحاكاة لبعض هموم العامة ممن حملوا هم المسكن
وشاعرية متدفقة من شاعرٍ جزل .. وصاحب مِراس

صح السانك ولاهنت .

[زهرة اللوتس]

صح لسانك
جزلة من جزل
لاهنت
تحية طيبه

[حي الضمير]

صح لسانك
واعتلا شانك
قصيده رائعه بروعة حضورك
لا خلا ولا عدم

[داعي الشوق]

صح لسانك يالشاعر سعيد الاكلبي

شاعر مبدع و جزل

و القصيدة وافيه

تحكي عن واقع متعايش

لاهنت يا سعيد

تصوير رائع من شاعر رائع

تقديري لك مع التحية

*********

[الخنساء]

صح لسانك مليوووووون

قصيدة جزلة من شاعر جزل

سلمت ودام بوحك

[عبدالله مذكر العقيلي]

جزله من راس جزل

صح لسانك

ولاهان راسك


تحياتي