مرّت على أطلال قبري غادة-صوتية

[ماجد الزيد]

السلام عليكم ورحمة الله وبركاته لكم وحشة يالفطاحلة ولكن للظروف ومشاغل الحياة احكام
لذا فلتعذروني على الانقطاع وكل عام وانتم بخير ومبروك عليكم الشهر

مرّت على اطلال قبري غاده=وحطّت تحت خدّ العظيم وساده
حطّت خفوق آعادني للدّنيا =ميّت وموت الصالحين عباده
بنت الشّرف بنت الترف آميره =امْبجّله من صلب قوم ٍ ساده
عين المها ياعلني فدوتها =لا سبّلت بالرّمش تهزم قاده
يابنت ياللي لك محل بقلبي =دونه جيوش وعسكرن وايباده
قلب ٍ حشمته مانزل للدنيا = وانتي رقيتي عاليات اوتاده
اتسيّدي بارضه وعيشي جوّه =سيحي سماه وخفف ِ مْن عناده
كوني به الطف من نسيم ٍ غربي=لا جاء بثلث الليل جاب وداده
قلب ٍ تخلوى من مشت به رجله =لا ذاق حلّ ولا اهتنى برقادة
قلب جبلْه الله طرق الدّنيا=وجوس الفيافي للصّميدع عاده
ياما إلاهي من الخطر سلّمني=باسباب راس ٍ والشّجاعة زادة
ولا جاب راسي غير عين ٍ ترمي = في لحظها الجمّال وطاح شداده
عين بها من باس حوّا نظره=تدخل على قلبي ويفزّ رفاده
يابنت خوذي من خفوقي همّه=طالت به الغربة وطال جْهاده
ليله عصي الدّمع مخفي عبرة=قد باحها بن برغش ٍ لاجْداده
ماني مع العالم ولاني منهم =لي عالمي راسي لقلبي شاده
فيه العرب والخيل و سيف وشلفى=وكرّة جهامه والبطل بجياده
فيه الطّوارق والبحر والهيعه=والحاجب المنصور طقّ جناده
فيه النّصارى يدفعون الجزية =وفيه المجاهد سيّد ٍ ببلاده
فيه الخليفة تحت رمحه رزقه=وفيه الخزينة للفقير زْواده
فيه الجيوش تهزّ قلب الدّنيا=لا صاحت الحرّه جتْك شدّاده
فيه الرّعيه مثْل حال الرّاعي=ون جاع شعبه جاع هو بزيادة
فيه الرّجال رجال ما تتلوّن=انْفوسهم للمرجلة روّاده
ولا زمنّا يا بعد من عافه =عند المقابر شفت لون حداده
يبكي على جدّي ويبكي جدّك=ويفزّ جدّي والقصيد مداده
يا بنت عيشي داخلي تلقينه =فردوس ضايع أندلس يا غادة
هو موطنك يا اطهر من الماء الصّافي=يا يوم استقلال وعيد اعياده
يا ثورة المُعدم يا صوت المنبر=يا جلدي الصّابر على جلاّده
يا شعري اللي لك كتبته وحدك=يا ملهمة شاعر قبل ميلاده
مرّي على قبري بذكرى موتي=وحطّي خفوقك للعظيم وساده

[عدنان كريزم]

صح لسانك ولا هنت يالغالي


تحيتي لك

[نفحات حساسة]

يـا بنـت عيشـي داخلـي تلقينـه

فردوس ضايـع أندلـس يـا غـادة

هو موطنك يا اطهر من الماء الصّافي

يـا يـوم استقـلال وعيـد اعيـاده

الله الله الله الله الله الله الله الله

هنا يزهو الشعر بروعه حضورك..

ورقه اسلوبك..وأبداع فكرك

صح السانك وزان حالك

وسلمت وسلم فكرك يابن زيد

تحيتي لك..

[ابو أنس]

الفاضل ابو حمد ماجد الزيد..............
دائما لك حضورك المميز
ولنصوصك قوة وصلابه وجمال سبك وحبك
القاؤك زادها بهاءا وروعه
دمت بود

[عبدالله مذكر العقيلي]

وين الغيبه

صح لسانك

ولله درك

دمت مبدع

[عبدالعزيز البليهد]

صح لسانك ولاهنت

حضور مميز ينسينا الغياب

[زهرة اللوتس]

صح لسانك
رائعه بروعة حضورك
لاهنت
تحية طيبة

[أم ريما]

صح لساااانك

قصيده رائعه وابيات جميله

يعطيك العافيه ولاهنت

[الـزلـزال]

عيـن المهـا ياعلـنـي فدوتـهـا=لا سبّلـت بالرّمـش تهـزم قــاده
يابنـت ياللـي لـك محـل بقلبـي=دونه جيـوش وعسكـرن وايبـاده

ماجد الزيد
نص مميز ومتقن وجزل
من شاعر تعودنا منه تقديم كل رائع وجميل
نطرب ونستمتع بنصوصك الراقيه
دمت بخير ودام لنا أبداع وتميز حروفك
صح لسانك ملايين ملايين
ولك فائق تحياتي وتقديري

[الخنساء]

صح لسانك مليوون ولايكفووون

قصيدة جزلة من شاعر متمكن

سلمت ودام حرفك