أشواق الزمن الضائع -في الوحده السودانية

[محمد اسماعيل الرفاعي]

أيــا أسمــر..

إذا الصوت البِفِج جـوفك

يقاسمك في الفرح خوفك

خيّب في الأمان ظنّك

لا سلّم عليك في يوم

ولا قال ليك كيفنّك

وقام بشويش مرق منّك

بدون تشعر .. في رمشة عين

مرق منّك صِبِح صوتين

فهـل ممكن في داك الحين

تقول لي دحين

منو البفهم مُرام قولــك ؟

وإيه حايبقى مدلولك

وإيه حايفـهــم السامعين

ويــا أسمــر..

إذا القلب البضخ دمّك

وبي خيراتو كم عمّك

ويوت تــاكِل عليهو همّك

بدون إذنك غَصِب عنّك

صِــبـِــح قلبين

ولا وراك تقبّل وين!

وكريات دمّك احتــارت

تَلِف بي وين .. تفوت بي وين ؟

ولي وين تـاني راح توصل بعيد عنّك؟

واحدات راحو لفّوا شمال

وواحدات حودوها يمين

وإنتــا بقيـت تـدوش وتدوش

يلف راسك!

وتَحَتِل في الوحل والطين!

يثور بركان يرِجْ جوفك .. تزيد خوفاً علي خوفك

ويظهر ليك طشاش في العين

وتتمطوح شمال ويمين وما تقدر تقول لاكين!

حليلك صِرتا مخطـوفك .. وكت غشاك طشاش شوفك

تميد الأرض قدامك.. وتغطس فيها أقدامك

تراوح بين وحيح وأنين

وعاد لا وين !

ويا أسمر ..

تصوّر لو صحين في يــوم

لقيت وشّك .. نكـر هشّك .. طرد بشّك

عبس لي نفسو صرّا العين

رفض مايتبع الكرعين

ودون إذنك صِبِح وشّين !

وحار بيك الدليل في الحين

ولاك عارف تقبِّل وين ؟

تقول لي مين في داك الحين

منو البعرف أصول فصلك

منو الحايقول دهـ ما أصلك

منو البيهاتي لي وصلك !

وكت يلقاك بقيت إتنين

أيـا أسمر ..

دحين انحت بنات فكرك..

متين كان الشتات حِكرك ؟

وإتذكّر ..

وكت فاضت مياه تــانــا ومن فكتوريا جالك سيـل

وجوك دافرين من الجيهتين

ده أزرق مويتو هدّاره .. وداكا قليبو صِح أبيض

ودايماً في الطباع مسكين

منو اللملم شتات فيضن

منو الجمّع رذاذ غيضن

ووحّد بينهم الإتنين

وصار مجرى المياه واحد

بعد ما كانو منفصلين

وليدك قام وشال واسوقو بي همّه

غرس تيراب حنينو الزين

قرع مويتو وأثمر زرعو في الشطين !

فكيف تشتطّ يا أسمر وتتبع زمرة الطاشين

تغوص جوّه الوحل والطين

يقولوا ودار نقول آميين

تقوم في لحظه تتفرتق

وإنتا الوحّد النيلين

لا .. ما .. ممكن

الجمعة 7 /10 /2010

[داعي الشوق]

ما ممكن أبداً ،،

و ان شالله الوحده تدوم و تدوم ،

غصب عن الأعداء و المغرضين

و يسلم فكرك شاعرنا المبدع

و السودان صامد بحول الله ثم بوقفة الشرفاء ،

تحيتي لك

**********

[محمد اسماعيل الرفاعي]

المشاركة الأصلية كتبت بواسطة داعي الشوق

ما ممكن أبداً ،،

و ان شالله الوحده تدوم و تدوم ،

غصب عن الأعداء و المغرضين

و يسلم فكرك شاعرنا المبدع

و السودان صامد بحول الله ثم بوقفة الشرفاء ،

تحيتي لك

**********

داعي الشوق ..
أثق في أن قلوب كل الشرفاء تهفوا إلينا .. أكف كل المخلصين تلهج بالدعاء .. وأنتم قطعاً شرفاء مخلصين ... فلكم التحية والتجلة والتقدير .

[عبير الورد]

سلم بووووحك اخوي


يعطيك الف عافية

[أم عبدالعزيز]

خاطره ولا اجمل




يعطيك العافيه

[الطامي]

الرفاعي
خواطر طيبه
والسودان صامد بأذن الله بوجه اعداء الأسلام والمسلمين
شكرا لك

[نفحات حساسة]

بوح راق لي

سلمت وسلمت يمينك

تحيتي..

[ماجد الراشد الهيري]

ابو ملاذ
مشاء الله على احساسك الجميل يعطيك العافيه

[محمد اسماعيل الرفاعي]

المشاركة الأصلية كتبت بواسطة ماجد الراشد الهيري

ابو ملاذ
مشاء الله على احساسك الجميل يعطيك العافيه

ويعطيك العافية أيها ( الراشد ) الماجد .. شرفت بمرورك الطيب

[الخنساء]

راائع ولاهنت خاطرة تترجم روعة المعانى

سلمت ودام حرفك