هل العليا \ حضرت ونجد ترقبني

[ماجد الزيد]

لن اطيل عليكم المقدمه فالقصيدة تقدم لنفسها وللإدارة إن شاءت إدراج موضوع النص حول قضية فوزي الخالدي ... لمن شاء أن يتقدم أو يتأخر
قال تعالى (وما أدراك ما العقبه فكُ رقبه)



للحفظ من هنا

حضرت ونجد ترقبني ويتقصّى قصر صاهود =حضرت أسرع من الريح الكنوس إن جت يمانيه
حضرت وناشفن ريقي وبآ رد لي على مورود=فراتن عذبن ائْجاجن نقيّ وصافين ميّه
زلالن مثلما قد قال عمرو التغلبي بل زود=بني وايل وغرتهم رويل اهل العلائيّه
هل العليا رقوها سنود وكل العالمين شهود=فساس رويل عدناني وراسه بالسّماويّه
رويلي طيب(ن) وجيرة وخوّة مثل ريح العود=يفز فزعه شماليه شمال المرجلة حيّه
رويلي إن جيت له يعني بلغت لغاية المقصود=تهون النازلة تفرج وتسرج للرجا عبيّه
عبيّة وامّها الجوبة وابوها مارد النمرود=مغيره لادعى الداعي تفز اسرع من النيّه
تفك العاني إن صوّت وذوّب صوته البالود=دخيل براعي العليا وبشيوخ الرويليه
على النّوري على نواف بدرن والليالي سود=على قبر المهاب الشيب اورنس(ن)بشاميّه
على اورنس يعني بو لبد يعني كبير أسود=هو الجرفاس بل جيفر وهو ليث الهزبريّة
وعلى ناوي على الدّغمان كل قرم(ن)مقام وعود=نخاوي والنخاوي في صميم الخالدي كيّه
يحول الحول باثر الحول حال وحول والملهود=يحزّه سيف توباته ونوبات النداميّه
يموت الفين موته كل يوم ٍ والعباد رقود=وقلبه ينطبخ مثل الذي لادغته الحيّه
تضاحكْه المنايا كل مايسمع خطى لجنود=وكل صبْح ٍ يظن الشمس جاءت بالقصَاَصِيّه
منيّه عن يمينه واقفه بالأبهر الحاصود=ونطْع ٍ ظامي ٍ تحته تعطّش للدمائيّه
تذكّر زلته واطرق . تنهّت وانطلق بارود=واتبعها بغفرانك . فنفس العبد مبليّه
أبى الشّيطان واقسم يوم ذله عاصي المعبود=ليأتي لابن ادم كل لحظه للفنائيّه
حضر بين الكرام ابليس وشبّ الشّر وصب (ا)وقود=واقفى عنهم خنّاس شايل له هجينيّه
من ادم لين نوح ٍ وهود الى سيّدهم المحمود=الى ذا السّاعة السّاعة وابليس ٍ على ذيّه
يرود يكود شرّه زود حتّى يومه الموعود=فيشعم صدر كل مؤمن بزفراتن سموميّه
ولكن للزلل غفّار دام ان النّفوس تعود=حليم(ن) غافر(ن)توّاب دام الشّمس شرقيّه
وراعي الحق من حقّه يشيل الرّاس .... لامنقود=ولكن العفو شيمة.... منابتها عروبيّه
ومن اقسم بمشهود(ن)بوالد واقسم بمولود=ربيعة مع مضر اعمام... في حق النزاريّه
بني عمّ (لبني خالد بني وايل) نزول صعود=تحامينا على الدّنيا من الف ونصّ حوليّه
(بذي قار ٍ) شواهدها عن اوكار الحرار نذود=عرب يوم الكرب يحمي حدينا عن بني خيّه
(بني وايل بني خالد) مهي طوشة حصا لاعقود=من ايام العدو سابور ساسان المجوسيّه
(خرجنا عن نجد والسّاحل الشّرقي) بعد معدود=ابا الله غير يجمعنا (فحمداً له بجوفيّه)
تخاوينا على وضح النقا ذا مود وذا مودود=نفوسن الين من القز (وصدورن شماليّه)
ونا من لابتن هامة عظيمة شامخة كالطود=بني خالد حسام الله وعزوتها قريشيّه
كبار بيوت واهل سموت والجبري لها عامود =وقد حمّلت حملاً يُثْقل جبال التهاميّه
من (عريعر اميري) (وكلّنا في ظل ال سعود)=هل العوجا ونا ألاعْوج إذا العوجا سعوديّه
ورب البيت ما ابالغ ولا هي جلجلات رعود=ولاهي فبركة فطحل فحل لاخط قافيّة
حضرت وناشف ٍ ريقي اسد وازبن على الاسود=هل العليا يهد الكون ماردوا دخاليّه

[عادل العتيبي]

الله يجزاك خير


وعتق الرقبه اجرة كبير بأذن الله


الله يفك اسرة واسر كل مسلم



صح لسانك


وتقبل تحياتي

صح لسانك ياماجد

وبيّض الله وجهك

والله يعافيك على هالقصيده الرائعه

تحياتي

[ابوعبدالرحمن القريشي]

اخي حمد الزيد

لله درك على هذه القصيدة
عند الشدائد يظهر الرجال وكل بما يستطيع

اسأل الله ان يحقق ما ترمي اليه

دمت طيبا

[الخنساء]

صح لسانك اخي الشاعر ماجد
لاهان راسك قصيدة رائعة
سلمت وسلم شعرك
دمت بخير

مبدع ومتميز

، تشرفت بضيافتك ونهلت من صفاء

حرفك بلسماً بنكهة أسمك

[هاجس نجد]

الشاعر ماجد حمد الزيد
بيض الله وجهك وجزاك الله كل خير على ماتكرمت به
قصيدة مؤثرة نسأل الله لنا ولكم ولجميع المسلمين الأجر والثواب
وأن يكون العفو والصفح عن من يستحقه ممن يملك حق العفو والصفح
والله لا يضيع أجر من أحسن عملاً
من عفى وأصلح فأجره على الله
نسأل الله للجميع السلامه
وما أقول إلا بيض الله وجهك وصح لسانك
وأشهد أنك شهم ورجل مواقف يا ماجد
تقبل تحياتي وتقديري
أخـــوك
سعــد العبيــد

سلمت و دام لنا حرفك الراقى

تحياتى ولا هان مغليك

[حي الضمير]

شاعرنا النجم ماجد الزيد صح لسانك يامميز
قصايدك اطرب لها لروعتها
دسمه حيل
سجل اعجابي وتقديري لك

[سناعيس]

ماجد الزيد
صح لسانك والله لايهينك على هذه القصيدة الجزله
والتي طوعتها لأن تحمل الصدى المتوقع من أناس كرام وقادرين ان شاءالله
فالعفو عند المقدره ومن شيم العرب العفو والصفح
ومادام ابليس موجود فالكل معرض لأن يغلط الا من رحم ربي
فأسأل الله تعالى أن يتغمد من قتل برحمته ويسكنه الفسيح من الجنان
وأن يرحم ويعفو ذويه عن انسان قد ابتلي وقدر الله وما شاء فعل
وعليهم الآن أن يفكروا بأن رقبة هذا المسكين بأيديهم وان شاءالله تأتيه البشائر بالصفح والعفو
ويكتب لذوي المتوفى الأجر والمثوبة
تحياتي