المطـــــــــــــــرقة

[سعيد مقبل الأكلبي]

يا هوامير المعارض جتكم التدبيله=ارفعوا سوق المواتر وابشروا بالطفره
مابقا دون الوليمة غير يوم وليله=كل واحد يبْرد اسنونة ويشري شفره
واظهروا ما زاد سعرة واتْخَر موديله=واطرحوا تحت المفطح لاوصلكم سفره
واستعدوا في حراوي لابسات الشيله=وافرشوا الصالات زلٍ للوجيه السَفره
الكدالك والفروت اللينة منهي له=مالها غير الليان اللي تثنّى خصره
الفخامة والطخامة كلها تاوي له=يطلب من النادر الغالي وهو تحت امره
اسدحوا البي أم عند الباب قبل يجي له=وافتحوا بيبانها ياخذ عليها نظره
خلّوا الكيكة تذوب بقطعة الفانيله=في نعومة ملمس الطارة ولين البشره
وهاتوا المرسدس الاسود وارخوا التظليله=خلّوا الزبدة تسيح بمرتبة بو سمره
كنها لا ارخى دركسونه تبي تقبيله=وكنّه يحاول يسابقها ويلقم نمره
وجهها وسط الكبينة ساطعٍ قنديله=والشعر ليلٍ سوادة مايغبّي بدره
وعودها اللين يطول الشرح في تفصيله=الوروك اكبار والا خصرها ياضُمّره
لامشت لاكن في فستانها تحبيله=زادت النعمة وبانت في سنام البكره
والهمر حطّوه عند الباب للجوّيله=اربعٍ فيهن ثلاثٍ كنهن في سهره
ناطلاتٍ بالغطاوي والسحى عزّيله=السحى ماهوب يطرا مع حياة الدشره
العِْبي مخصّراتٍ واليدين انحيلة=والعيون ملوناتٍ والشفايف حُمره
اشترتْه الدبة اللي دلّعوها فيله=دمّها خفيف لكن وزنها ياكبره
ساقته بشويش قالوا ربعها دزّيله=خلّي اللي يتبعونة مايعَرْفون اثره
وانطلق فـي الخط يوم البنت شدّت حيلة=فاهقٍ كل المواتر يُمنةً ويُسّره
وقامت العالم تحوفه والعيون اتخيله=يطردونه من هبال ويطردونه بطره
هايلكس وجمس وهوندا وراس تريله=وجيب شاصٍ مابعد حَوّل تنكْه وتمره
بعضهم يسقط عليه وبعضهم يدني له=وبعضهم ماغير يمشي مادرا عن عمره
وبعضعهم يكتب تلفونه على منديله=وبعضهم لاصف بالموتر نطل بالغتره
والهمر تلعب به الخفرات وتغني له=من يمين القير خفره من يساره خفره
وراعي الشاص انهبل من وحدةٍ تومي له=مادرى عن حملةٍ يشلّها في ظهْره
قام يقرب ويتميلح جنبها ياحليله=مادرا ان الخط قدمه في مساره حُفره
طارت الحملة وطار الثوب والفنيله=وانحرف على الهمر واحدث بجنبه ثغره
والهمر راح ايتطوى والعرب تدعي له=وقامت الطارة تفلّت من يدين الفغره
وانقلب له قلبتين وراح فـي التحويله=وانتثر بدّيه على الازفلت كسره كسره
سلموا الركاب لكن خرْبت التكميله=والوناسة والدلع راحت دموع وحسره
قصة جتني وانا في حزة التقييله=يا جماعة لاحدٍ ينقد علي ويشّره
مانبي بعض العرب يروح في تحليله=الخبر ماهو خبر حتى يجي في النشره
الشواهد بيّنه والسالفة طويله=والحبل مبطي وهو ممسوس فوق المكره
واحدٍ يقسي عليه وواحدٍ يرخي له=وواحدٍ فيه ايتفرج مادرا ويش امره
واللي يسعى فـ الردى بهراوته وازميله=الله لايجزاه خير ولايطوّل عمره
ماحدٍ راح ايتوسط به ولايشكي له=وش علامه يعْترض بين الدروب الخطْره
يهْدم بيوت العرب واموالهم تبني له=ويطرح اقصور العرب والناس ترفع قصره
من يرد العايل اللي ضايعٍ دليله=من يعَلْمه الطهارة والعلوم الظفْره
سد مارب جاه فاره واقدرت تزيله=لاتروح اسدودنا مثل السدود النخره
وراعي الحمّى يبي له حبه وتحميله=وان نفع معه الدوا والا يدق بـلبره
الورق يابَس ويسقط والهبوب اتشيله=والثمر يبقى مكانه في علو الشَجْره
والشعر عندي ماهو غاية ولا وسيله=ان حضر يامرحبا به وان تغيّب بُصره
شاعرٍ ماهوب يكتب عن مشاكل جيله=وش يفيده لاكتب في عصر ماهو عصره

[حي الضمير]

قصيده اجتماعيه جزله
وابدعت وفي الصميم
وملياااااااااااااار صح لساااااااااانك يامميز

[صعبة المنال]

جزلة وقوية

صح لسانك

صعووب

[حوريه]

سعيد الأكلبي

صح لسانك واعتلى شانك

قصيده شامخه وجزله من شاعر جزل

دمت ودااااام حرفك

.

[مجدي صالح المبارك]

الشاعر القدير ( سعيد مقبل الأكلبي ) صح لسانك وجاد بيانك على هذه القصيدة الباسقة , لك مني فائق التقدير ودمت بكل خير .

[عيد بن سعدون]

سعيد مقبل الأكلبي

صح لسانك يالذيب

شاعر جزل ومبدع

قصيدك غزير المعني

تقبل اعجابي وتقديري

اخوك
عيد بن سعدون

[زهرة اللوتس]

سلمت وسلم فكرك
جزلة من شاعر جزل
لاهنت وبيض الله وجهك
تحية طيبة

زهرة

[مبروك بن ماضي]

الاخ الفاضل الشاعر / سعيد مقبل الأكلبي

صح الله لسانك وقلبك أخي العزيز

مبدع وممتع كما عهدتك دائماً

دمت بهذا الألق وهذة الشاعرية الفذه

إحترامي وتقديري

[نجم الإبداع]

الله الله

صح لسانك ياسعيد الاكلبي

شاعر جزل وملهم

شكرا لاتحافنا بروائعك

لاهنت

تقبل مروري

وتقديري

[سناعيس]

الاخ الشاعر سعيد الاكلبي
صح لسانك
جزله من شاعر جزل
هكذا الشعر وكذه الرسالة الشعريه

لاهنت

تحياتي