اكتبي يا حروفي عن زمن صار عايم

[الطائر المهاجر]

اكتبي يا حروفي عن زمن صار عايم= في بحور الحضاره ضاع باسبابها
وارسلي ما تبينه مع رياح السمايم = كود تفتح عقولٍ صكت ابوابها
تحت ظل النفاق وفوق جسر النمايم= وش بقى للمبادي يحفظ اسلابها
في رؤوس الذيابه العبي ياحمايم = لا تخافين منها طاحت انيابها
في تساوي الخليقه بين خادم ونايم= في مسار المصالح تخضع ارقابها
وفي حراج المذله بين بايع وسايم= للمذله زباين تشرب انخابها
من خمامٍ تسلق لين وصل الغمايم = وصار شيخٍ وهو للقدر ربابها
وقرّب اللي تذلل من طبول وصتايم = شان يضمن ينفذ امر باعتابها
اخطبوطٍ تمدد لين مسك الشكايم = ضامن الربح دامه قاري كتابها
لابسٍ جلد ذيب وعاثيٍ ف الغنايم = ولا لقى من يعرفه صار سنجابها
من جهل به يظنه صقر ف الجو حايم = مادرى بوم يسقط باسفل ترابها
ومن مشى بالكرامه يحتسب للظلايم = خاسرٍ وسط غابه تنبح كلابها
ان رقى السفح حوّل لو قوي العزايم= او يزحلق ونفسه تجهل اسبابها
جهّزي يالليالي ماتبي من ولايم = لحم ذيبٍ وصقرٍ واشوي اجنابها
يشبع اللي يدربي الراس في جو غايم= ويقرص الجوع صاحي يعرف اذنابها
يالله اني دخيلك من زمان الفدايم = يوم صار الحصاني تفرس ذيابها
في حضاره غريبه مالها من دعايم= من يلوم العواصف تقشع اطنابها
كل من عاش فيها صار كالديك صايم = منعمٍ بالمذله لابس اثوابها
لو يؤذن يقولوا موقظٍ للرمايم = خالطٍ للدجاج ويجهل انسابها
وان عجز لايساير يشعر الضيم دايم= يحترق مثل شمعه والزمن عابها
بعد كان العرب والمجد ولدوا توايم = انحسر دور امه والمجد سابها
العداله سراب بشعب ف الجهل هايم= والمساواة وهمٍ لبس جلبابها
بين كثر النفاق وبين كبر العمايم = راحت الضاد تشكي حر ما صابها

[زهرة اللوتس]

لازال في العمر متسع من أمل
وبقايا من طهر
كتبت فابدعت ..لله درك
تحية طيبه

[نجم الإبداع]

الله الله

صح لسانك ايها الطائر الملهم

مصافحه عانقت السحاب

لله درك ولنا درك

تقديري

[احمد القاسم]

صح لسانك ملايييين يامبدع

قصيده جزله من شاعر جزل

لاهنت على هذا الابداع

تحيتي لك

[عمر ال شيبي]

ومـن مشـى بالكرامـه يحتـسـب للظـلايـم

خــاســرٍ وســــط غــابــه تـنـبــح كـلابــهــا

ان رقـى السفـح حـوّل لـو قــوي العـزايـم

او يـزحـلــق ونـفـســه تـجـهــل اسـبـابـهـا

حكيم الشعر
والظرب له موقعه
صح لسانك لا هنت دام قلبك وعمرك

[منيع]

ابيات - تحاكي - الواقع - المرير -
وماعشت - اراك - الدهر - عجبا
شكرا - لك - تحياتي *

[داعي الشوق]

العداله سراب بشعب ف الجهل هايم =والمسـاواة وهـمٍ لبـس جلبابهـا
بين كثر النفاق وبين كبـر العمايـم =راحت الضاد تشكي حر مـا صابهـا

................

صح لساااااااااااااانك مليووووووون يا بو عبدالله

قصيدة وافيه بالحيل و جزلة

صورّت واقع مؤلم في قالب فاخر

صح لسانك مدد

ولاهنت

**************

[عبدالعزيز ابراهيم المنصور]

الله الله
صح لسانك يالطائر
نص فيه من الإبداع الكثير
سلمت ولاهنت
دمت بخير

[عبدالعزيز العمار]

راحت الضاد تشكي حر ماصابها

ايه والله صدقت يالطير

صح لسانك مدد بلا عدد

رائعه وهادفه

تحياتي وتقديري

[حوريه]

صح لسانك طائرنا
دائما حرفك يحاكي الواقع بحرفً جزل
تحيتي لك ومودتي
0
0