قالوا ربيعٍ للعرب فيه ثورات

[الطائر المهاجر]

قالوا ربيعٍ للعرب فيه ثورات = والغرب فرحٍ فيه واصبح نصيره
قلت اصبروا ننظر بكل اتجاهات= مايهرول الثعلب عبث في مسيره
طبخة صهاين ماتبي أي اثبات= ومن لا عرفها قال للشعب خيره
باسم التحرر مع جميل الشعارات= اشتعلت النيران لحظه قصيره
يديرها عن بعد بعض العمالات = ممن سكن ف الغرب واصبح اجيره
فيها علاجٍ لإقتصادٍ غدا اشتات= وسرق ارصدة شعبٍ جهل وش مصيره
وتحطيم قوة انبنت من سنوات = في كل دوله صامده او خطيره
واشعال حرب ف المساكين تقتات= حتى الرجل ما عاد يامن قصيره
تدمير بلدانٍ بنت للحضارات = ويرجع بعدها الرجل يلحق بعيره
وفزاعةٍ للي رفض من بشاوات = يطبّع مع اسرائيل حتى تديره
واللي حكيم الراي فهم الإشارات= خلوا نجادي ينهشه في صفيره
يبي يتدخل شان يحمي طويرات= في يوم ارسلها على كل ديره
ومن سمع هرجه من كلام العداوات= ضد الصهاين قال ف الرجل غيره
ما يدري بالخافي عهد واتفاقات = من يوم مافارس غدت في الحديره
ودام العرب في ضعف رغم الثراوات= كلٍ طمع فيهم واعلن نفيره
فالجهل لامن ساد بين البهاوات = كلٍ يشوفه عنترٍ دون غيره
وكلٍ يصدق ما سمع من روايات = من التآمر من اخوه ونصيره
ولو فيه وحده تجمع لكل الاشتات = صار العرب ف الكون قوه كبيره
امه عظيمه مثلها كالولايات = من بعد ما عاشت عصورٍ مريره
وحنا سبقناها على ماضيٍ فات= من الصين لاوروبا نقود المسيره
في امةٍ وحده بعدل ومساوات= بالدين والمذهب بعينٍ بصيره
ما نعطي العادي فرص للتشتات= ونعطي الاداره للعقول الخبيره
من دون انانيه نصل للمجرات = لكن جهلنا نصطلي من سعيره
من وصل للقمه لهى بالملذات = ولا جاه ناصح انطرد من خفيره
يقعمز على الكرسي لعدة سنوات= ما كن في الديره عقولٍ جديره
وحتى ولو يقتل الوف الألوفات = ويخرب الديره بلحظه قصيره
كلش ولا الكرسي فهو ملك باثبات= حتى الممات ووارثه له صغيره
وندور بوش ولو وصلنا مطبات = نرجع ورا ثم نحدر ف الحديره

[نجم الإبداع]

الله الله

صح فكرك يادكتور

وحشا ذا مهو ربيع الازمهرير

وصف وافي للحاله

لاهنت

تقبل مروري

وتقديري

[زهرة اللوتس]

صح لسانك وفكرك
لاهنت
تحية طيبه

[منيع]

ابيات رائعة ومعبرة وتحاكي واقع هذه الامة وماحصل فيها من تخاذل وضياع
تحياتي لكم

[عبدالعزيز العمار]

صح لسانك يالطائر وصدقت

مانقول الا الله يرحم الحال وتتعدل احوال العرب والمسلمين

لاهنت ولاهان فكرك الجياش

تحياتي وتقديري

[داعي الشوق]

صح لسااااااااااانك مليوووووووووون


يعني لا ثورات قابلينها ولا اللي يقمعز على الكرسي

الله يصلح احوال المسلمين

وصح لسانك مدد

شاعر حكيم و مبدع

ولاهنت

[حرف وشعر]

اشهد انك صدقت


وهذا كان رأي من البدايه

والي الان

تحليل صحيح يابوعبدالله

[أحمد السكران]

اخي الغالي عثمان
كتبت وابدعت بكل شفافيه حتى اعجبت واطربت
صح لسانك الى الابد ياجزل

[عبدالعزيز ابراهيم المنصور]

الطائر المهاجر
نص رائع
صح لسانك
سلمت ولاهنت
دمت بخير

[بدر العيد]

قالـوا ربيـعٍ للعـرب فيـه ثـورات
والغرب فرحٍ فيـه واصبـح نصيـره
قلت اصبروا ننظـر بكـل اتجاهـات
مايهرول الثعلب عبـث فـي مسيـره


صــــــح لسانك ابو عبدالله

الله يصلح حال المسلمين ويجمع كلمتهم


لاهنت وبيض الله وجهك

تحياتي
badr