الله على شوف المزون المزابير:

[عبدالمحسن الرحمه]

من جديدي

‏الله على شوف المزون المزابير:
يبعد عن النفس الحزينه نكدها:
والبرق يشبه للسيوف البواتير:
صوت الرعد يطرب دنينه بعدها:
والسيل مع كل الشغا له شخاتير:
يجلي عن العين الشقيه رمدها:
سالت شعاب الأرض كله بتدبير:
ربي وصدري راوي ن من وردها:
لامن حصل للسيل بالوسم تبكير:
تجني فوايد ماأنت محصي عددها:
تقرا على اوجيه النشاما تعابير:
امن الفرح والهم ماقد ضهدها:
لو تاتصور ماأسعفنك تصاوير:
خل الشحيح بنومته لارقدها:
مع خوة اللي ياخذ الشور ويشير:
حكيم راي وبالمواقف فهدها:
مع صحبة ن مايعرفون المعاذير:
اخوان من دور عليها وجدها:
ربع ن كرام ولا تحسب المخاسير:
تعزم وترشد كل رجل ن نشدها:
ربع ن خيار ن دوم تهليل تكبير:
لاعاهدت ماتختلف عن عهدها:
شفي على خوة وفي الأشابير:
لأذن له المذن صلاته شهدها:
تشوف من جول الحباري طوابير:
بفياض خضرا تعجب اللي قصدها:
الطير فرع للهدد دايم ايغير:
فكوا مسابيقه وفرب هددها:

[الطائر المهاجر]

لو (تاتصور) ماأسعفنك تصاوير
في لجهة سدير والوشم لو تي تصور
اما تاتصور فلاحظت فلاح وهو من زهران يستخدمها
احسنت
وصح لسانك
تحياتي

[منيع]

ياسلام عليك
مبدع ورائع
كل الشكر لكم
تحياتي

[الطامي]

صح السانك ملايين
طيبة جدا
ولاهنت

[التقي]

اكتملت روعتها بروعة ابداعك
لاهنت يالغالي
دمت بخير

[جهاد الشعلان]

ماشاء الله

صح لسانك

تمنيت انها ماانتهت لهذا الحد

انسجمت معها

تقبل مروري

[داعي الشوق]

صح لسانك يالشاعر

قصيدة تهيض البال

صح لسانك مدد ولاهنت

[بنت النور]

صح لسانك مليون مايكفون
كلمات روعه ماشاء الله
يعطيك العافيه
لاهنت
تقديري لك

[البشر]

تسلم على هالإبداع
صح لسانك
ولاهان راسك
مع اطيب التحية

[الاطرم]

قصيده من الطراز الاول
صح لسانك
ولاهنت
ودي واحترامي