مجاراة لشيلة ( لبيك ياسلمان )

[عبدالله السويلم]

مجاراة لشيلة لبيك ياسلمات

من كلماتي
واداء فيصل بن سابر

سلطان جـــارا عايض القرني وبادله الشـجن=وانا بجاريهــم على نفـــس الطريقــه والعـــدد
لبيــــك ياسلمـــان يازبـن الدخيـــل الـيا زبــــن=لبيــــك ياعـــــز الشــريعه والمواطـــــن والبــــلد
يا الفيصلي حنـا معــــك للشـــام والا لليـمــن=قـــدنا تحـــــت رايتــــك رايــــة لالــه الا الاحــــد
ياخــــادم البيتين من لــدين في وقـــــت الفــتن=غيـــر انـــت بعـــد الله يعــزه بالنصر يابوفهــد
جنـــد الخميـني فالقـــرى عاثـو وعاثـو فالمـدن=وجنـــود صالح نكلــو بالناس خــــوان العهــد
ياسيـدي مـا للمجوسي لــو تامــــل لــه امـــن=عـــود عليــه بغــــارةٍ تقضي عليـــه الى الابـــد
تبطي وهي من فعلها تذكــر على طــول الزمـن=من فوق سودٍ صوتها يلجب مثل صوت الرعـد
ســــودٍ يهجــدن الخبيــث الرافضي ويصبـحن=بحفاد ابن طالب علي واحفــاد سلمان وسعــــد
الجــو كلــه ضـــاق منهـا والبحـــر كلـــه سفـن=طــوق على الحوثي عـــدو الله بحبلٍ من مسـد
من حضرموت الى البحر ومن البحر الى عدن=بوارجــــن تضـــــرب مـدافعــــها بنـــــارٍ تتــــقد
بقيادة محمـد ولــد سلمـان الى من قيـــل مـــن=ولي ولي عهــد الملـك والشـبل مـن ذاك الاســــد
حنـا جنـــود الله ومـن بعــــده ملكـنا والوطــــن=وجنـود ابن نايــف ولي العهـــد حـــلال العــقد

[الطائر المهاجر]

حبك و سبك وجزاله
صح لسانك مدد بلا عدد
لاهنت
تقبل اطيب التحيه

[الطامي]

صح السانك ملايين
رائعة جدا وهادفه لافض فوك
شكرا لك

[منيع]

ابيات اكثر من رائعة
كل الشكر لكم
تحياتي

[عبدالله السويلم]

صح بدنك يابوعبدالله

ومشكووور على المرور

تحياتي لك

[عبدالله السويلم]

الطامي

صح بدنك

وشكراً لك على المرور والتعليق يالغالي


تقبل ودي

[عبدالله السويلم]

الرائع مرورك اخوي منيع

تحياتي لك

[داعي الشوق]

صح لسانك ابو جهاد

مجاره جزله و قوية المعنى

ابدعت و عوايدك يا مبدع

صح لسانك ولاهنت

[عبدالله السويلم]

صح بدنك يابوسعد

الابداع منك والليك يالغالي

تحياتي لك

[بنت النور]

صح لسانك وعتلى شانك
لاهنت
تقديري لسموك