البارحة ما لايم النوم الأمواق

[ناصر عبيد الهواوي]

السلام عليكم وصراحة انا اكتب وخايف لأني ما ادي قضت المهلة اللي يحق لي اكتب
ام لا ولكن على الله...هذه شبه مجاراة للشاعر الغالي محمد البدراني ولو اني على
يقين انا اقل من ذلك

البارحة ما لايم النوم الأمواق=والنفس فرحانة عسى فالها خير
والليل ساقه ساطع النور وإنساق=وعطا الشفق ضلعانه اجمل تصاوير
وانا على المكتب واقلب بالأوراق=وانقى من الجوهر واسوي دواوير
وهواجسي في غيهب الفكر غراق=هجسن يسندبي وهجسن محادير
ياكيف لا واللي دعا شاعر ٍ راق=محمد الحربي زبون المخاسير
من حرب بدراني عريبين الأعراق=زحول الرجال اللي تبوج الطوابير
يامرحبا فيها من الشهد ترياق=الذ من در امهات المصاغير
ومعها زهر وردٍ من الحقل فتاق=وازكى شذا روضن كسته النواوير
ما اصلح معك للذود لو بس ملحاق=تميح من عدن عليه النواعير
لايمك يامحمد بما قلت ينعاق=لاتلتفت في هذر راع الخماكير
مادام مابك بين الأجفان منحاق=سج فيه مرود كحلة العين ويطير
وإن كان تونس داخل القلب مزراق=وبين الضلوع يولعون الدوافير
واليا غفى طرفك يبا النوم ماطاق=ولو فرشوك الريش كنه مسامير
والقلب طبقه للمحاديب طراق=وبك حاشرن زود عليك التزافير
فانا ترا في طب هالنوع سباق=ومصنفن ضمن الأطباء المشاهير
لي جايزة نوبل بعد كد وإرهاق=لي سلمت من كم سنة من يد بلير
طبيب نفس اليوم ومطوعٍ راق=وعلتك هاذي يارجل طبها غير
يمكن بلاك السلهمة عقب الإطراق=وإن كان معها ..مالقوك المداوير
مير انصحك بالبعد كان انت تطاق=اشد من ضرب السيوف البواتير
عالجت به قلبي من سنين مافاق=وثبت لدي إنه مضرة بلا خير
والظاهر إن الجو بالسجن لك راق=وعرضتني ياصاحبك للمعاسير
وإن كان تبي إلفزعتي معك مصداق=إجني ويبدي لك إلما اوحيت تفسير
وإسلم وبلغ لي سلامي والأشواق=على الرجال الطيبين المناعير
اعداد ما هلهل من السدرة اوراق=واعداد ما راجت بنجد المعاصير
والعفو كان اخطت إلما قلت الأوفاق=والمعذرة عن كل زلة وتقصير

[حي الضمير]

ياسلام ياناصر شاعر متمكن وجزل
وابدعت كعادتك يامميز
ومدد صح لسااااااانك

[نجم الإبداع]

الله الله

صح لسانك ياناصر

مجاراه رائعه

ونعم بك وبالبدراني

لاهنت

تقبل مروري

وتقديري

[الخنساء]

صح لسانك مليون ولايكفون
مجاراة رائعة لاهنت
سلمت ودمت بخير

[محمد عبدالله البدراني]

العزيز الغالي شاعرنا القدير ناصر بن عبيد الهواوي سلمه الله



عزالله مايجي منك تقصير الا زدت والزووود طبعك ولك وتستاهله يابيض الوجه



مليون مليو ن صح السانك


قلت واجزلت يابو عبيد


لاعدمناك


اشهد بالله انك تمتاح من عد رهاوي


وانك على جال هداج


لله درررررررررك


والجايات اكثر يابو عبيد


لاعدمناك


تحيتي وتقديري

[داعي الشوق]

صح لسآآنك يالشاعر الرائع

و صاحب المعنى الجميل

ناصر الهواوي

إبداع جميل و صدى رائع

صح لسانك

و صح لساآآن البدراني

تحيتي لك مع التقدير

[ام العمده]

ناصر الهواوي الله الله الله صح لسانك واعتلا شانك لاهنت على هذه الشامخه كتبت فأبدعت تالقت مبدع كعادتك تحياتي وتقديري

[أم سارة]

الغالي شاعرنا القدير ناصر بن عبيد الهواوي

صح لسانك كلمة جدا رائعه

طرح مميز واسلوب راقي

سلم قلبك وقلمك مميز دائما

تحـــــياتي

[همس الورد]

ناصر عبيد الهواوي

قصيدة رائعة

و كلام هادف

صح لسانك

و بيض الله وجهك

تحيتي و تقديري

[عيد بن سعدون]

صح لسانك ولا هنت

جزله وشاعر وافي وجزل

تقديري ومودتي

اخوك
عيد بن سعدون