من روائع الغيداني

مساء الخير جميعاً اتمنا من يقراء هالقصيده يقراها من أول بيت لأخر بيت .. لأنها تستاهل . على الأقل بالنسبه لناقلها.. وان شاء الله تعجبكم

مايبرد واهـج الشـوق وشعـور الهيـام = غير سرداً تطوي البعد بالسرعـه طـوي
بديها من خلف ماهوب مثلـه مـن امـام =مستوي في حال .. وبحال ماهو مستـوي
خشمها عبرود طلقه .. وموخرهـا بهـام = رافعـه راعيـه بـأشـارة ٍ ماتنـغـوي
لابدو دعاء السفر .. واعلنو ربط الحـزام =ورشادات الامن لـو ترتطـم والا تهـوي
واستلمها واحد ٍ خبرتـه عشريـن عـام = كبتـن ٍ بالله وبكتابـه إيمـانـه قــوي
مسلم ٍ عنـده خبـر بالحـلال وبالحـرام = جابله ربي على الديـن وسلوكـه سـوي
وصعدت مثل اشقر ٍ فوق جول الصيد حـام = لمراوحهـا مـع الجـو لجـه وحـدوي
مثل مايدوي صدى صوت رعـاد الغمـام = صوتها صداه عبـر الفضـا يـدوي دوي
صنعة اللي ماعرفـوا لاصـلاة ولاصيـام = شعب ٍ أكثرهم ماهو عارف ٍ منهـو ذوي
بالنهـار لياتعلـت كبـر فـرخ الحمـام = دونهـا الاف المسافـات تزويـهـا زوي
وان تغطلس بينك وبيـن رؤيتهـا الظـلام = كن في روس اجنحتها مشاهيـب بـدوي
دوبهم دكو عـن دلالـه الربـع الحشـام = تحتها من وقدة السمـر جمـر ٍ مجثـوي
دايم وربعه علـى جلسـة ٍ عنـده حيـام = ابلـج ٍ ليـن جنابـه لربعـه وحـمـوي
مالي الا هي .. لياجـا للاشـواق أحتـدام = وقامت الذكرى على القلب تكوينـي كـوي
لي شهر وشوي عيني محاربهـا المنـام = ودي احضـر جـوازي وادورلـي خـوي
بينـي وبينـه مسافـات وحـدود ونظـام = واحد ٍ فرقـاه شاويتـن فـوادي شـوي
بس ابـا ازوره مثـل مايـزارون الكـرام = لين عيني مـن قبالـه وشوفـه ترتـوي
لو بغيت اصبر .. واكابر .. واقول اني تمام = ذيب حبه بيـن جـرد المحاديـب يعـوي
كان مالي في دروب الهوا شـف ومـرام = لين شفته .. واشهد انه هـواة المهتـوي
ياسـلام الله علـى السلهمـه والابتسـام = وياسلام الله على اللي مابيلـه مطـروي
كن مالله حط في منطقـة خصـره عظـام = وكن غيره ماحتوى مثل ماهـو محتـوي
لاقعـد مـاوده يقـوم .. ولياقـام قــام = تلوي اعناق البشـر قومتـه يمـه لـوي
تقل بين اعلا الجسم واسفل الجسم انقسام = شي من جسمه مرتب وشـي ٍ فوضـوي
استلمنـي فـي جبروتـه اشـر استـلام = ليـن طيّـح معنويـات راس المعـنـوي
الغرام ليابطـش فيـك ملعـون الرسـام = مايعرف هـذا قبيلـي .. وهـذاك خلـوي
يكبر الرجـال امـام المهمـات الجسـام = ويصغر الرجـال امـام الجمـال الانثـوي
مايتحمل نظرة العين .. وارخـاي اللثـام = لو باسه باس رحمة حيـاة بـن جلـوي

لعل السحاب اللي مـن البعـد دوبـه واق=على حد الارض من السما تسبـر اعناقـه
على ديـرة دونـه جنـوبٍ عنـه ينسـاق=تقـفـاه وتلمـلـم شتـاتـه وتسـتـاقـه
ذعاذيـع ريـحٍ ماتشيـل وتـحـط رواق=يصحبها شويـة عنـف وانسامهـا رقاقـه
لو تمـر بيـت البـدو مترامـي الاشنـاق=تهـزه شـوي شـوي ماترمـي رواقــه
تسوق السحـاب بدبـرة المانـع الـرزاق=إلـهٍ عبيـده تطلـب ارضـاه واعتـاقـه
ولامنـه تسـاوى فـوق دارٍ غلاهـا فـاق=حـدود الغـلا تستـأذن الريـح لفـراقـه
يقر ويسر البـال .. والعيـن .. والخفـاق=ويلجّّ رعده .. ويرفـرف البـرق بأشناقـه
من بعيد برقـه يسهـر المسنـي المشتـاق=هاكاالليل يقضي كـل ليلـه علـى ساقـه
كاانـه يقـول ليانتفـض برقـه الشـعـاق=على الهـون تكفـا ماعلـى قلبـي لحاقـه
وصلها وباشرهـا علـى غيبـة الاشفـاق=جـلال مطـره مايعطـي الوقـت لدقاقـه
تضيق بسخاه الاوديـه والفضـا ماضـاق=بغيمه .. وهتانـه .. ورعـده .. وبراقـه
يمد الجذع بالوصل .. والغصن .. والاوراق=بعد مااشتكى من هجـره الغصـن لوراقـه
شهر .. ويتجاور فيه راعي غنم .. ونيـاق=بربله .. وحوذانـه ضحـى تشبـع الناقـه
تكحل بنبـت فياضـه العطـره الاحـداق=من يشوف نبته يشكـر الله علـى ارزاقـه
شذا نبـت ريضانـه ماينبـاع بالاسـواق=مايجمع شذاها مـع بعـض غيـر خلاقـه
تجـلا بتنويـع الزهـر قـدرة الـخـلاق=تلاويـن نبتـه تأسـر قـلـوب عشـاقـه
ربيعه .. وغدرانه .. متى مانهمـر دفـاق=لـدارٍ لهـا كــل الاحاسـيـس تـواقـه
سلامي عليها من اولـي لاخـر الارمـاق=ولها صادق الاشـواق باقـه .. ورا باقـه
غلاها وسره دافنـه فـي ثـرى الاعمـاق=وأكيد الغلا ماجـا مـن البـاب .. للطاقـه

بواسطة ناصر الحربي

السلام عليكم ورحمة الله وبركاته

هذه بعض القصائد التي اخترتها لكم..

للشاعر الرائع :/ لافي بن حمود الغيداني الحربي

وهو من سكان محافظة دخنه ...

راكب اللي كن زوله زول ذيب"="أن نطحته وأن قفيته من ورى
وأن عرضلك قلت مابلوصف ريب"="جنب ذيبٍ لاحقه جوع وعرى
شاصيه تصميم لاندكروز جيب"="مايبيعه من شراه أليا شرى
مايهمه لا نفود ولا قليب "=" ولا الطلوع اللي مثل طلعت كرى
لا أهمزوا قير أدبله جاله نحيب"="مثل من ميته على باله طرى
ناحل الأطراف تصميمه عجيب"="من سماح الدرب مشيه بخترى
كن جرات الربابه في السبيب"="صوت ماطوره أليا منه سرى
نحّروه الليل مع وقت المغيب"="الثنين اللي على العزا أقصرى
ماعليه الا صحيبٍ مع صحيب"="بالملح والزاد والطيب أخشرى
ماعيهم من بسيط ومن صعيب"="في الدروب وفي المحلات أخبرى
ودهّم مايمرحون الا قريب"="من مكانن كن لاجوّه أومرى
من شعيب يحدرونه من شعيب"="والفظا مشموس والديره ثرى
ديرةٍ ربي للأهلها مستجيب"="كل وادي من فضل ربي جرى
جوّها من صادق الوسمي عشيب"="للحباري والقطا فيها حرى
نبتها يفوح كنه فوح طيب"="ماتصدق باللي عيونك ترى
والله أن عماس راسي مايطيب"="ولا يطيب الزاد ويلذ الكرى
غير لرقبة النبا مثل الرقيب"="ونمت فيها أيام لو شح الذرى
وفي الخصوص أليا صدف جوٍ رهيب"="وقمت أدوج من الفياض الى القرى
فوق جيبٍ كن زوله زول ذيب"="أن نطحته وأن قفيته من ورى

0
0
0

العين عن حلو الكرى موقها تاب"="ماتذوق حلو النوم مع ذايقينه
أسباب لأنه ماش شيئاً بلا أسباب"="هاك الغزال اللي ذبحني بزينه
مر يتخطاء ويتلفلف بالأسلاب"="وطير عن القلب المشقى يقينه
من نظرته وقّع على القلب مضراب"="أشد وقّع من الرماح السنينه
يسرق نظر عينه حذر مدري أعجاب"="وأنا منه قلبي تقطّع وتينه
عرّض ومن تعريضته خافقي ذاب"="وقمت أتبعه ما غير عيني بعينه
وأقفى عجل من نظرتي فيه مرتاب"="ويحط ظول الناس بيني وبينه
وصديت عنه وخاطري منه ماطاب"="كني مني يمه وأنا أقول وينه ؟؟
من خوف يفطن لي وننشب بالأنشاب"="السوق زحمه والأوادم ذهينه
وأخذت عنه أشوي مقفي والأعصاب"="متوتره ما فكرت بتهوينه
ولّديت به لأنه يسعر بالاطياب"="عند الهنود اللي لغتهم رطينه
وأرسلت يمه نظرة أحباب لحباب"="النظره اللي ما أتركتلي غبينه
وأقبل يبي يحطني عنه مجناب"="وشكيت في ممشاه علاه وينه؟
وناظرت فيه وضحك الناب لناب"="ومن ضحكته حلت علي السكينه
موّه على أهل السوق وأشر بالاهداب"="أشارةٍ تبغى قلوبٍ فطينه
منها فهمت أنه يبي يعود لو غاب"="وأن الأمر ماعاد هو في يدينه
وعقب غلاق أسبوع مر ومعه جاب"="أصغيراً متجودٍ في يمينه
أصغيراً في الزين للعقل نهاب"="يقول أخوي ومقصده فاهمينه
قصده يقول أن كان عندك أستيعاب"="علي من هذا ملامح وعينه
وأخذت أنا وياه مزح وتعجاب"="عقله رزين وكل كلمه رزينه
في موقعٍ عنه المخاليق غياب"="الأ ملايكة العمل حاضرينه
بيني وبينه ماوقف غير الأداب"="أداب سلمٍ كلنا وأرثينه
منه أحترام شعور عربين الأنساب"="ومنه أحترام الرجل نفسه ودينه
وبغى الوكاد وقلت هايم ومنصاب"="حبك ذبحني لعنبو والدينه
قال أستميحك عذر وأقول لاعاب"="وش هالغرام اللي غدابك بحينه
وحلفت له وأقسمت في رب الأرباب"="منقذ من الطوفان راع السفينه
أني معه صادق ولاني بكذاب"="والكاذب الله لايطول سنينه
قال أنت صادق بس سابقك خطاب"="وأهلي في تال الشهر موعدينه
كم له وهو ماغير ذهاب وأياب"="لاهم براضينه ولارافضينه
وأن كانها تمت على يدين كتاب"="وتم القرأن وروحوا كاتبينه
أنا تراي أبعتبرك من الأقراب"="وعلى النقا تبقى صلةٍ متينه
ودّع وصارت كلمته تقل مشهاب"="وأركت على كبدي عراقي مزينه
وبقيت في وضعٍ تحير أبه الأطباب"="أيست منه وحالت اليأس شينه
وأخذت وقت أحسب أيامه أحساب"="وقلبي على شوفه تزايد حنينه
أحيان أقول أنشد عنه بعض الاصحاب"="ويجيك بالعلم المؤكد جهينه
وأحيان أقول أصبر على جور الأتعاب"="ورزق الفتى وأجله كتّب في جبينه
وسكّت ماودي عليه أفتح ابواب"="للهرج من ناسٍ مهم راحمينه
وصبرت مير الصبر طول ولاثاب"="ومن طال صبره يالله انك تعينه
ويومٍ راسي من طويل الصبر شاب"="قررت عنه أنشد حدى مجاورينه
ونشدت عنه وقال راحوبه أجناب"="ومن قريته شّد وسكن في المدينه
قلت أيه مادام أهله عندنا يجاب"="أما بعيد الفطر والا بحتينه
قال أهله معه أرحلوا قلت ياشاب"="يعني لازايركم ولازايرينه
قال ايه مير أنسه والايام هراب"="تطول وتنسي ظنينن ظنينه
قبلي وقبلك خلت أصحابٍ أحزاب"="وكم فرقت بين الختين وختينه
ماعاد في شوفه طلايب وطلاب"="ترى ماعاد الا يدرج جنينه
وش تطلبه وحباله في يدين قضاب"="أحذر لاينصبلك زمانك كمينه
قلت الرجال أمفتلت روس الأشناب"="لقسى الظروف حسابهم حاسبينه
وأقفيت من عنده على الغلب غلاب"="أكّن غيض القلب وجحد ونينه
وأعلنت يأسي وأنطوت صفحة كتاب"="من البدايه للنهايه حزينه
وأقول يالله لاتبارك بالأسباب"="اللي رمتني بين حبه وبينه

0
0
0

( قصيده مهداه للطهيمي)

ياراكب اللي لياناظرت تمثاله = تقول صقر ٍ موقع له على قمه
متنطح ٍ للبراد براس منزاله= تشتت الريح شمل الريش وتلمه
فاكسار .. في قيمته زود ٍ على امثاله= لله دره لاشال العزم بمهمه
مايصير له وسق عرق الرمل محباله= عدو عرق النفود وهمه وغمه
صدره ليامن سواقه تساواله= يشرب قراطيع صلف الريح وتزمه
راعيه حرك وهو متريح ٍ باله= متروح ٍ من بني عمه لابن عمه
يسوقه الشوق من رجله الى عقاله= لشوف جمعا رجال ٍ مابهم خمه
من ديرة اهل النقا .. والطيب .. والطاله= والمذهب الزين .. والتوحيد .. والعمه
شيبانها رمز وقت ٍ فات وابطاله = وشبابها للعلا في روسهم همه
على طرفها خزاز يميل اضلاله= قبل يحط الظلام الشمس في كمه
لو مابها غير هاكالضلع وجباله= نحبها كلنا حب الولد لامه
( دخنه ) لعل السحاب يصب هماله= على ارضها لين يطلع كل ماتضمه
منها مشى الجيب لعل السعد فاله= متيمم ٍ يمة ٍ ماغيرها يمه
منصاه رجل ٍ تهرج الناس بافعاله= تبذل يمينه .. وكثر البذل ماهمه
من روس قوم ٍ تهوم الطيب وتناله = ماينكر امجادها رجل معه ذمه
حرب الحرايب كعام اللي يوراله = بنفسه انه مصمصم راس ومطمه
اهل المحازم .. بيوم ٍ تعرف رجاله= ومنصا الوازم .. وسقم العايل وسمه
قلته .. وللمجد بس لربعي لحاله= كل ٍ حباله موردته على الجمه
مابه قبيله ماهي بالطيب مختاله= غصب ٍ على كل متبجح .. ودرعمه
وقصدي .. ومنصاي ابو فواز وعياله= وبيت ٍ بوسطه قبايل حرب ملتمه
يضك بالناس من جاله الى جاله= يطري علي لياشفته وادي الرمه
تنطحك ريحة شذى هيله .. وفنجاله= والعود الازرق منه ينطحك وتشمه
نارد صناياه .. ونصدر على دلاله= ولاهوب جوع وعطش يوم انعنا يمه
كل ٍ غني .. مير يوم انا انتعناله= دافع حمياً تفوح بكل جمجمه
يستاهل المال رجل ٍ هذي اعماله= نفسه بمايزود نفسه طيب مهتمه
يفداه مغلول يمناً لو كثر ماله= عن شنحة الطيب وجهه بارد ٍ دمه
اللي على قول زيد صحيبه رياله= وان طاب طيبه من الزوجه الى العمه
يالله عسى اللي شال اطيب منه يشتاله= يدلي مخاليبه زويان .. ويخمه
رجل ٍ يدنق عن العليا ولا ياله= للطيب .. والدرب قدمه فاتح ٍ فمه
ودك من بعيد وقريب تحماله= بمخمس ٍ من شحمة الاذن للرمه
وعن هالكلام .. وقصير الهرج واطواله= ياكثر بكم الزمان .. وياكثر صمه
يقوله اللي تهمه صحة اقواله = ويسعى يوصل هدف معناه ويتمه
وصلو على المصطفى نبينا وآله = محمد اللي بعث برسالة الامه

0
0
0

وهذه القصيده مرثيه بالراحل محمد العسيلي رحمه الله
اترككم مع شاعرنا لافي يتكلم عن ذلك :


رحم الله أديبنا وشاعـرنا الكبير
صاحب الوجاهه ولاعمال الخيره
محمد عبد الله العـسيلي انه سميع ومجيب الدعـوات .
كنت انتظر تشريفه لمحلي رحـمه الله ظهر يوم الخميس ومن ثم
نتجه سوياً مساءً لحضور المناسبة الكبيره التي يقيمها
الشيخ /فيحان بن سلطان الشغار لمجموعة كبيره من وجهاء القبائل الاخرى .
ولكنها قدرة الله عز وجل التي لا اعتراض عليها حيث وافاه الاجل المحتوم
وعلى اثر حادث مروري بمنطقة القصيم أوداء بحياته رحمه الله .عـسى ان
يتغمده الله بواسع رحمته ويدخله فسيح جناته. فهو صاحـب طاعه ومواقف
انسانيه نبيله لايظهر منها للناس الا اليسير واليسير فقط . نعـم انه
البطل الخفي كما لقبه احد الاخوان بعـد وفاته رحمه الله حيث انه
يعـمل وبصمت لصالح القبيله قاصداً وجه الله تعالى .. ومن فضل
الله علي وجزاء الله من أبلغني خيرالجزاء قـد حضرت الصلاة عـليه
وشاركت بدفن جنازته ومواساة ابناءه . وعند الانتها من دفنه وخروجنا
من المقبره اردت ان امسح رقم جواله من صفحة المكلمات الصادره ومن
قايمة التخزين كي لا اراه بعـد وفاته وبعـد الضغـط على الزر الخاص بمسح
الارقام ظهرت على الشاشه عـبارة ( كل التفاصيل ) أي مسح الاسم والرقم .
وتبادر الى ذهـني لحظتها هذا البيت والـذي اكـملت عليه القصيدة فيمابعـد : /

ايه امسح النمره .. وكل التفاصيل = اسم .. ورقم .. شيخ المزايا العـظيمه
لياصار ماصوته يجاوب على التيل = ماعاد للجوال .. والرقم قيمه
راح .. وعليه قلوب ربعه معاليل = وصدور رحبات المجالس محيمه
على أحر من الجمر .. مثل ماقيل = كنت انتظر لحظة لقاه الكريمه
مير القدر مابه لياحل .. تأجيل = ويرضايه المؤمن بصبر وعزيمه
دنياً لها على الاوادم مصاويل = وصكاتها في روسنا مستديمه
أمراض .. وموت .. وشح زاد ومحاصيل = وكوارث.. ووارث .. ودنياً ذميمه
مافي مجي الموت شكه وتأويل = مثل الغريم اللي يدور غريمه
مرحوم يامن لـه معزه .. وتبجيل = عندي .. وعند اهل العقول الفهيمه
اقفن عليه مذوقات الغرابيل = وبانت علينا من الخرايم خريمه
فيه إهزمنا .. وتركنا مغاليل = راس ٍ علينا من فراقه هزيمه
راس ٍ كفو لدموع روس الرياجيل = اللي يقفون الهضيمه .. هضيمه
من القصيم .. الى الرياض المراسيل = وصلت .. وحزن رياض نجد .. وقصيمه
إكد رحيل مدلل الضيف تدليل = وكل ٍ وصل من ضيقة البال تيمه
هكا المساء وش يمسحن المناديل = كن السحاب الروس .. والدمع ديمه
عليه مخزون المحاجر هماليل = من شدة الصدمه .. وطول الحريمه
احد ٍ لو انه مات موته تساهيل = حـسرة خبر موته على ام اليتيمه
واحد ٍ خبر موته خساره .. وتنكيل = وفي غـيبته على القبيله ثليمه
كان الغـنيمه فقد بعض الازاويل = هذا السلامه منه ماهي غنيمه
مفني عمار .. البن .. والهيل .. والحيل = وعدو هراج القفاء .. والنميمه
رمز الكرم .. حلو النبا والتعاليل = لياطاب مجلاس النديم .. ونديمه
ماظن في مثله تعوض المقابيل = وجهة نظر .. حسب اعتقادي سليمه
عشقة بعيدين النظر والمواصيل = ان مانجبت مثل العسيلي .. عـقيمه
ولا قول خَـلـْيَت من وجود الحلاحيل = لكن قليل اللي صفاته عـديمه
على بعضهم في بعضهم تنافيل = شي ٍ مايجهل فيه غير البهيمه
مرحوم يامنصا الرجال المشاكيل = ونطاح قالات الرجال الجسيمه
جاه .. ووجاه .. وحبك جزل التماثيل = مستوطنات ٍ راس محرج خصيمه
ولاهو على وجهه ولا جاهه بخيل = للي به المعروف ماهو ظليمه
يقوم بالقالات .. ويحط .. ويشيل = ومرجع لمن يبغون الارياء الحكيمه
على المشاكل مايجر المواويل = يحسب لعاقبة الامور الوخيمه
مايستجره صوت دبكه .. وتطبيل = وعنده لمن خالف وصالف قسيمه
لاحتاجت القالات شرب الفناجيل = طق البهام لكل راعي هميمه
بأسلوبه يعد هل العوج تعديل = وعلاقته مع كل طيب حميمه
ماطيشنه مثل بعض المهابيل = ندر قوافيه الجدد .. والقديمه
تواضع وضحكة حجاج وهلا .. هيل = وبشاشة ٍ بالوجه تسوى وليمه
أمدح .. ومدحي فيه ماهوب تضليل = اشهود ربي بارض ربي مقيمه
والمدح باأهل المدح مابه مداخيل = والا بغير اهله قوله جريمه
يالله عسى قبر ابيض الوجه لسيل = ويخضر جنابه كل ماتهل غيمه
ويبد الله ظلمته بالقناديل = آمين يامححي العظام الرميمه
يامفضل محمد على الرسل تفضيل = كرم سميه بالجنان النعيمه

0
0
0


وأختتم رحلتي مع هذا الشاعر العلـَـم بهذه الابيات المشهوره
وهي من بداياته ولها
مايقارب الـ 15 سنه

تنفعني المرّه على بيت أهل نوف = لو كان مالي عند أهل نوف حاجه
الجادل اللي لافني حبهالوف = لوف الهشيم اللي تلوفه عجاجه
ماارتاح لين اشوفها بالنظر شوف = واخذ على بيت الحبيب إدراجه
اروح قلبي من صخر ماأعرف الخوف = ويبدي عليّ الخوف حين إنتواجه
لا شفتها جاني عن الهرج صادوف = مغير أهز الراس مثل "الخواجه"

0
0
0

دمتم بخير

[عبدالرحمن الصباح]

صح السانك ولسان الشاعر ومشكور اخوي الفاضل على ا لنقل المميز والرائع لشاعر مبدع تقبل ودي وتقديري اخوي الفاضل

[ابراهيم عبدالحميد]

عظيم الشكر للإختيار الراقى المتميز
دمت و سلمت و سلم القائل

[محمد عبدالله البدراني]

العزيز الغالي ناصر الحربي
العزيز الغالي محمد البلاجي

حفظكما الله

والف شكر لهاالنقل المميز لشاعرٍ مميز

ماقول الا الله يعطيكم العافيه وبيض الله وجيهكم

وهذه تحياتي
مع اسمى ايات الشكر والامتنان فائق التقدير واطيب المنى رعاكم الاله

[معتدل]

وفقك ربك
تحياتي

[المرشودي]

مشكور
على ما افدتنا به
تحياتي

[المؤذن]

لك الشكر
على ما فاض به قلمك
تحياتي

[طويق]

مشكور
على المعلومه الجيده
تحياتي

[الحويطي]

وفقك الله
وسلمت اناملك
تحياتي وتقديري